INKHANI IYAKUMANYILA 44
ULWIMBO 33 Katundu Wako Umuthwikiske Yehova
Mo Mungajimbila ku Vinthu Ivisita Ubugholosu
“Mutakitikizye ukuti ububibi bubapote, mubuyo bwache mubupote ububibi pakubomba inyiza.”—LOMA 12.21.
IFUNDO INKULU
Inthi tumanyile vyo tungabomba nanthi bamo batubombela ivinthu ivibibi sona ukuti vitakafike pabubibi nkhani.
1-2. Ka ivinthu ivisita ubugholosu vikutukwafya bulibuli?
U YESU akanena ichifwanikizyo icha mukolo umufwilwe yo akabukilila ukumulaba umulongi ukuti amubombele ivinthu muzila iya bugholosu. Inkhani iyi yibaghiye ukuti yikabakwafya sana abamanyili ba Yesu ichifukwa chakuti pa kabalilo kala, abanthu bakababombelagha abanji ivinthu ivisita ubugholosu. (Luka 18.1-5) Amasiku ghano, nuswe bulo inkhani iyi yikutukwafya ichifukwa chakuti akabalilo kamo bamo bangatubombela ivinthu ivisita ubugholosu.
2 Abantu abinji muchisu ichi bakusalila muchimanyani, bakwighana sona ba te ni chisa. Cho chifukwa tutakuswigha nanthi abantu bakutubombela ivinthu ivibibi. (Ndumbi. 5.8) Akabalilo kamo abakamu na bayemba bangatubombela ivinthu ivisita ubugholosu. Loli abakamu na bayemba te bantu bo bakususya ubwanaloli. Bope bulo basita ukufikapo. Tungamanyilako ivyinji ukufuma kwa Yesu pa mo akabombela na banthu bo bakababombela ivinthu ivisita ubugholosu. Nanthi abanthu batubombela ivinthu ivibibi tukulangizya ubufisalyoyo, polelo tukulondiwa ukubulangizya nkhani ku Bakilisitu abamwitu! Ka u Yehova akwiyivwa bulibuli nanthi abanthu pamo abakamu na bayemba bitu batubombela ivinthu ivisita ubugholosu?
3. Ka u Yehova vikumukwafya nanthi tukutamiwa ni vinthu ivisita ubugholosu sona chifukwa buli?
3 Vikumukwafya sana u Yehova, nanthi abanthu batubombela ivinthu ivisita ubugholosu. ‘U Yehova abughanite ubugholosu.’ (Sali. 37.28) U Yesu akatusimikizya ukuti nanthi akabalilo kakwana, u Yehova akwiza ‘pakubalongela akiza sona akwiza pakubomba umwalubilolubilo.’ (Luka 18.7, 8) U Yehova akwiza ukwefyapo inthamyo zyosi zyo tukomana nazyo ni vinthu vyosi ivisita ubugholosu.—Sali. 72.1, 2.
4. Nkhimba amasiku ghano u Yehova akutwavwa bulibuli?
4 U Yehova akutwavwa ukuti tujimbaghe ku vinthu ivisita ubugholosu, po tukulindilila akabalilo ko ivinthu vikwiza ukwendagha akiza pachisu chosi. (2 Pita. 3.13) Akutumanyisya mo tungabombela ivinthu umwamahala pa kabalilo ko abanthu batubombela ivinthu ivisita ubugholosu. U Yehova akutupa ichifwanikizyo ichiza ukwendela mu Mwana wache icha mo tungabombela nanthi abanthu batubombela ivinthu ivisita ubugholosu. Sona akutupa ubulongozi ubwa mo tungabombela.
MUCHEBE NA MO MUKUBOMBELA NANTHI BABABOMBELA IVINTHU IVISITA UBUGHOLOSU
5. Choni cho tukulondiwa ukucheba na mo tukubombela nanthi batubombela ivinthu ivisita ubugholosu?
5 Nanthi abanji batubombela ivinthu ivisita ubughulosu, vingatubaba sona tunganda ukutamiwa inyinong’ono. (Ndumbi. 7.7) Ababombi abasubaliwa ba Chala ngati u Yobu nu Habakuku, bope bakiyivwanga umwakuyana bulo. (Jobu 6.2, 3; Haba. 1.1-3) Napo tutakuhoboka nanthi abanthu bakutubombela ivinthu ivibibi, loli tukulondiwa ukucheba ukuti tutakabombe ivinthu umwabupunganu.
6. Ka tukumanyilako ichoni kwa Abisalomu? (Ennya sona ichithuzi.)
6 Nanthi yumo atubombela ivinthu ivisita ubugholosu, tungalonda ukuti tutanizye. Ukubomba bunubu, kungapangisya ukuti inthamyo yikule nkhani. Za twennye ichifwanikizyo icha Abisalomu, umwana uwa Mwene u Devedi. U Abisalomu akakalala hee bo u Amunoni amukolelela umuyemba wache u Tamala. Ukuyana ni Ndaghilo izya Mozesi, u Amunoni akalondiwanga ukughoghiwa. (Levi. 20.17) Napo chikaba chakwivwika ukuti u Abisalomu akalale bunubu, loli atakaba nu budindo ubwakuti amughoghe u Amunoni.—2 Samu. 13.20-23, 28, 29.
U Abisalomu akakalala sana ni vinthu ivisita ubugholosu vyo vikabombiwa kwa muyemba wache u Tamala (Ennya indime 6)
7. Ka uwamasalimo akiyivwanga bulibuli po akennyanga ivinthu ivisita ubugholosu?
7 Akabalilo kamo, tunganda ukwennya ukuti ukubomba cho chiza kute ni pindu nanthi tukwennya ukuti bo bakupanga ivinthu ivisita ubugholosu batakufundiwa. Inong’onela ichifwanikizyo icha wamasalimo yo akennyanga ukuti abanthu ababibi ivinthu vikabendelagha akiza po abagholosu bakatamiwanga. Akati: ‘Aba bobo babibi, bo akabalilo kosi bakwikala akiza.’ (Sali. 73.12) Sona akakalalagha na vyo vikabombiwanga umwakuti pakasyala panandi ukuti aleke ukumusubila u Yehova. Akanena ukuti: ‘Pa kabalilo ko nkhayezya ukuti inchivwisye, chikanthamya.’ (Sali. 73.14, 16) Pisinda pache, akati: ‘Loli une, ivinama vyane vikasyala panandi ukuti visobele; ivinama vyane vikasyala panandi ukutyelemuka.’ (Sali. 73.2) Ivinthu ivyakuyana bulo vikabombiwa kwa mukamu yumo yo inthi tumwitizye ukuti Alberto.
8. Nkhimba ivinthu ivisita ubugholosu vikamukwafya bulibuli umukamu yumo?
8 U Alberto bakamutamanthila ukuti akiba indalama izya chipanga. Ivi vikapangisya ukuti atakabe nu budindo sona abakamu na bayemba muchipanga bakaleka ukumuchindika. Akukumbukila ukuti: “Nkhakalala sona vikamphunuzya sana.” Umukamu uyu, akitikizya ukuti ukukalala kukwafye mo akabombelagha ivinthu ivyabuzimu vyo vikapangisya ukuti aleke ukwiza ku nkhomano ukwa myaka 5. Ichifwanikizyo ichi, chikulangizya ivinthu vyo vingabombiwa nanthi bangatubombela ivinthu ivisita ubugholosu.
MUMWEGHELELE U YESU PA MO AKABOMBELA PAKUMALANA NI VINTHU IVISITA UBUGHOLOSU
9. Nkhimba vinthu buli ivisita ubugholosu vyo u Yesu akajimba? (Ennya sona ichithuzi.)
9 U Yesu akalangizya ichifwanikizyo ichiza sana icha mo tungabombela ukuti tumalane ni vinthu ivisita ubugholosu. Inong’onela ivinthu ivisita ubugholosu vyo akakomana navyo ukufuma ku ba mumbumba yache na ku banthu abanji. Abakamu bache bo batakamusubilagha bakamunenagha ukuti apenite, abalongozi abavipanga bope bakamunenagha ukuti ali ni mizimu imibibi, abasilikali Abachiloma bakamutuka, bakamukoma sona bakamughogha. (Mali. 3.21, 22; 14.55; 15.16-20, 35-37) Loli u Yesu akajimba sona atakatanizya. Ka tungamanyilako ichoni kwa Yesu?
U Yesu akalangizya ichifwanikizyo icha mo tungajimbila ku vinthu ivisita ubugholosu (Ennya indime 9-10)
10. Ka u Yesu akajimba bulibuli ku vinthu ivisita ubugholosu? (1 Pitala 2.21-23)
10 Belenga 1 Pitala 2.21-23. a U Yesu akatulekela ichifwanikizyo ichiza icha mo tungabombela ukuti tumalane ni vinthu ivisita ubugholosu. Akamanyagha akabalilo ko angikala myee na ko anganena. (Mata. 26.62-64) Atakabamulagha akabibi abanthu bo bakamunenagha. (Mata. 11.19) Nanthi akulonda ukuti anenepo, atakabanenagha akabibi bo bakamuyivyanga pamo ukuboghofya. U Yesu akabanga wakwilema ichifukwa chakuti “akavibika vyosi munyobe izya Chala yuyo we mulongi umugholosu.” U Yesu akamanyagha ukuti u Yehova akennyanga vyo akakomanagha navyo. Akasubilagha ukuti u Yehova akwiza pakumalana ni vinthu ivisita ubugholosu pa kabalilo akiza.
11. Nkhimba tungabomba bulibuli ukuti twikolaghe nanthi tukunena? (Ennya sona ivithuzi.)
11 Tungamweghelela u Yesu, umwakwilema pa vyo tukunena nanthi bamo batubombela ivinthu ivisita ubugholosu. Akabalilo kamo tukulondiwa ukusulako bulo vyo abanji batubombela. Pamo tungalondiwa ukwikala bulo myee, vyo vingavwa ukuti inkhani yitakakule. (Ndumbi. 3.7; Yako. 1.19, 20) Akabalilo kamo tungalondiwa ukuti tunenepo nanthi twennya ukuti ivinthu ivibibi vikubombiwa pamo nanthi pakulondiwa ukuti tufighilile ubwanaloli. (Imbo. 6.1, 2) Nanthi tukunena, tukulondiwa ukuyezyayezya ukuti tunene umwakwiyisya nu mwamuchizi.—1 Pita. 3.15. b
Nanthi twakomana ni vinthu ivisita ubugholosu, tungamweghelela u Yesu pakwennya akabalilo ko tunganenapo na mo tunganenela (Ennya indime 11-12)
12. Ka tungalangizya bulibuli ukuti tukumusubila “yuyo we mulongi umugholosu”?
12 Tungamweghelela sona u Yesu, nanthi tutakwisubila loli tukumusubila “yuyo we mulongi umugholosu.” Nanthi abanji bangatwennya akabibi pamo ukutubombela ivinthu ivibibi, tukusubila ukuti u Yehova weyo akumanya ubwanaloli bosi. Ulusubilo ulu, lukutwavwa ukujimba ku vinthu ivisita ubugholosu ichifukwa chakuti tukumanya ukuti u Yehova akwiza pakubombapo zimo ukuti amalane ni vinthu ivi. Ukubika vyosi munyobe zya Yehova kukutwavwa ukuti tutakakalalaghe sona ukuti tutakabombe ivinthu ivyakulangizya ukuti tubabengite bo bakutukalalizya. Nanthi tungabomba bunubu, vingapangisya ukuti tukalale nkhani, tungaleka ukuba bakuhoboka sona tungabomba ivinthu vyo vingakomannya ubumanyani bwitu nu Yehova.—Sali. 37.8.
13. Choni cho chingatwavwa ukuti tubukilile ukujimba?
13 Ubwanaloli bwakuti, te tukabombepo lumo ivinthu ndendende ngati mo u Yesu akabombelagha. Akabalilo kamo, tunganena pamo ukubomba ivinthu vimo vyo pisinda pache tungiyipa inongwa. (Yako. 3.2) Sona akabalilo kamo ivinthu ivisita ubugholosu vyo tungakomana navyo, vingapangisya ukuti twivwe ukubaba pamo ukutamiwa inyinong’ono ubumi bwitu bosi. Nanthi momo vibeleye, musubile ukuti u Yehova akumanya chilichosi cho chikubombiwa pa bumi bwinyu. Sona u Yesu yo akatamiwapo ni vinthu ngati vinivi, akwivwisya akiza sana mo mukwiyivwila. (Hebe. 4.15, 16) Ukongelezya pa chifwanikizyo ichiza icha Yesu, u Yehova akutupa ubulongozi bo bukutwavwa ukuti tujimbaghe nanthi batubombela ivinthu ivisita ubugholosu. Za twennye amavesi mabili agha mwibuku ilya Aba Loma gho ghangatwavwa.
“MUMULEKELE U CHALA UKUTI ATANIZYE”
14. Nkhimba amazyu aghakuti “mumulekele u Chala ukuti atanizye” ghakung’anamula choni? (Aba Loma 12.19)
14 Belenga Aba Loma 12.19. Umutumiwa u Pabuli akabalimbikisya Abakilisitu ukuti “mumulekele u Chala ukuti atanizye.” Nanthi tukwitikizya ukuti u Yehova weyo amalane ni vinthu ivisita ubugholosu, tukulangizya ukuti tukumulekela ukuti weyo atanizye. Umukamu yumo izina lyache u John akati akomana ni vinthu ivisita ubugholosu, akati: “Nkhalondiwanga ukwilema ukuti nthakabombe ichinthu ichibibi napo chitakaba chipepe. Isimbo ilya Aba Loma 12.19 likanavwa ukuti imbe mufisalyoyo nu kumulindilila u Yehova.”
15. Choni cho chiza sana ukumulindila u Yehova ukuti weyo ize amalane ni vinthu ivisita ubugholosu?
15 Tukupindula sana nanthi tukumulindilila u Yehova ukuti weyo abombepo zimo. Nanthi twabomba bunubu, tukuba ukuti twamutulila u Yehova ukatundu sona tutakulimbana nu kumalana ni ntamyo yo twakomana nayo patweka. Akabalilo kosi u Yehova wakwisengannya ukuti atwavwe. Akuba ngati akunena ukuti, ‘Ndekela ivinthu ivisita ubugholosu; inthi mbombepo zimo.’ Nanthi tukwitikizya vyo u Yehova atulayizizye ivyakuti ‘Inkhwiza pakutanizya,’ tungasulako bulo vyo tukukomana navyo nu kusubila ukuti amalane ni nthamyo yitu muzila inyiza sana. Ivi vyovyo vikamwavwa u John yo twamutambula kwisinda. Akati, “Nanthi namulindilila u Yehova akwiza ukubomba muzila inyiza sana ukuchila mo une ningabombela.”
‘MUBUKILILE UKUBUPOTA UBUBIBI PAKUBOMBA CHO CHIZA’
16-17. Ka ulwiputo lungabavwa bulibuli ukuti ‘mubukilile ukubupota ububibi pakubomba cho chiza’? (Aba Loma 12.21)
16 Belenga Aba Loma 12.21. U Pabuli akabalimbikisya sona Abakilisitu ukuti ‘mubukilile ukubupota ububibi pakubomba cho chiza.’ Pa Bulumbilili Bwache Ubwa Pighamba, u Yesu akati: “Mubaghane abalwani binyu nukubiputila babo bakubavwima.” (Mata. 5.44) Ivi vyovyo u Yesu akabomba. Tutangalongosola akiza mo u Yesu akabombela ukuti ajimbe pa kabalilo ko abasilikali Abachiloma bakamuyivwanga pikwi ilyakutamiliwapo. Cho tungabomba chakuti tunginong’onela bulo ububavu bo u Yesu akivwa ni vinthu ivyamusamu sona ivisita ubugholosu vyo akajimba.
17 U Yesu atakitikizya ukuti ivinthu ivisita ubugholosu vyo akakomana navyo vimupote. Mumalo mwakuti abaghune abasilikali bala, u Yesu akiputa ukuti: “We Tata uwahobokele pakuti batakumanya vivyo bakubomba.” (Luka 23.34) Nanthi tukubiputila abanthu bo batubombela ivinthu ivibibi, vikutwavwa ukuti tutabasungile ivyakusingo, ukubakalila sona ukusintha mo tukubenezya.
18. Ka ulwiputo lukabavwa bulibuli u Alberto nu John ukuti bajimbe?
18 Ulwiputo lukabavwa sana abakamu babili bo twabatambula kubwandilo ubwa nkhani iyi ukuti bajimbe. U Alberto akati: “Nkhabiputila abakamu bo bakambombela ivinthu ivisita ubugholosu. Nkhamulaba u Yehova umwakupyanizyapyanizya ukuti anavwe ukusulako bulo ivinthu vyo bakambombela.” Ichakuhobosya chakuti pa kabalilo aka, u Alberto akumubombela sona u Yehova umwabusubaliwa. U John akati: “Akabalilo akinji nkhamwiputilagha umukamu yo akankhalalizya. Inyiputo izi zikanavwanga ukuti imwennyange akiza ukusita ukumulonga akabibi. Sona zikanavwanga ukuti imbe nu mutende uwa mumoyo.”
19. Ka tukulondiwa ukubukilila ukubomba choni mupaka pabumalilo ubwa chisu ichi? (1 Pitala 3.8, 9)
19 Inthi tukomane ni vinthu ivisita ubugholosu po ubumalilo ubwa chisu ichibibi ichi butizite. Chilichosi cho tungakomana nacho, tutakaleke ukumulaba u Yehova ukuti atwavwe. Nge twabikapo umoyo pakumweghelela u Yesu pa mo akabombelagha nanthi bamubombela ivinthu ivibibi sona tubukilile ukubombezya ifundo izya mu Bayibolo. Nanthi tungabombagha bunubu, u Yehova angatusaya sana.—Belenga 1 Pitala 3.8, 9.
ULWIMBO 38 Wamuzgoraninge Ŵankhongono
a Muchaputala 2 nu 3 mukalata uwabwandilo yo mutumiwa u Pitala akasimba, akababuzya vyo vingabavwa Abakilisitu nanthi ababwana pamo abalume babo bo te Bakilisitu bababombela ivinthu ivisita ubugholosu.—1 Pita. 2.18-20; 3.1-6, 8, 9.
