NKHIMBA vikubatamya ukuti mumanyilaghe Ibayibolo pa mwebene usabata aliwesi? Swebinji vikututamya. Inong’onela ivinthu vyo tukubomba isiku lililyosi ngati ukogha. Nangabuli ukuchapa kukusenda akabalilo sona kukulonda amaka, loli pisinda apakuti mwachapa mukwiyivwa akiza! Ukumanyila Ibayibolo akabalilo kosi kungatwavwa ukuti twiyivwe akiza. (Efe. 5.26) Ennya amasakizyo ghamo gho ghangabavwa:

• Mupange indondomeko. Tukumanya ukuti ukumanyila Ibayibolo pa twebene, ‘chinthu chakulondiwa sana’ kwa Mukilisitu cho atakulondiwa ukuchisula bulo. (Filipi 1.10) Mungasimba pipepala isiku na kabalilo ko mukulonda ukuti mumanyilaghe nu kumatika pa malo gho ghakubonekela vyo vingabavwa ukuti mutakaluvyange. Pamo mungateghela u alamu pa foni yinyu ukuti abakumbusyange nanthi kwasyala panandi ukuti akabalilo akakumanyilila kakwane.

• Musale akabalilo ko kangaba kiza. Ka mukwennya ukuti akabalilo akinji chikuba chipepe ukumanyila kwa kabalilo akatali pamo akapimpha bulo? Umwe mwemwe mungamanya akiza mo ivinthu vibeleye pa bumi bwinyu. Nanthi mwamanya ivinthu ivi, popo musimbe indondomeko. Nanthi akabalilo akakuti mumanyilile kakwana loli mukwennya ukuti ubukata bwabakola, muyezye ukumanyila bulo kwa 10 minisi. Ukumanyila kwa 10 minisi bulo kuli akiza sana ukuchila ukuti mutakamanyile. Sona nanthi mwanda ukumanyila, mungagha ukuti mwaba ni chinyonywa ichakuti mubukilile ukumanyila.—Filipi 2.13.

• Musalilaghe zila inkhani. Nanthi akabalilo akakuti mumanyile kakwana popo mukwanda ukwinong’ona vyo mungamanyila, mungalangizya ukuti ‘mutakukabombezya akiza akabalilo kinyu.’ (Efe. 5.16) Mungabomba akiza nanthi mungasimbila zila inkhani zyo mukulonda ukuti mwize mumanyile. Nanthi muli ni lalusyo limo pa nkhani yo mutakwivwisya, mulisimbe. Sona nanthi mwamala ukumanyila, mungasimba pipepala ifundo zimo zyo mungighana ukuti mwize mumanyile akabalilo akanji.

• Musinthaghe po pakulondiwa ukusintha. Musinthaghe indondomeko yinyu po mwennya ukuti pakulondiwa ukusintha ngati ubutali ubwa kabalilo pamo inkhani zyo mungasala ukuti mumanyile. Cho chikulondiwa nkani te kabalilo, ubutali ubwa kabalilo pamo vyo inti mumanyile, loli chakuti mumanyilaghe akabalilo kosi.

Ukunena ubwanaloli, tukupindula sana nanthi tukumanyila usabata aliwesi. Nanthi tukumanyila akabalilo kosi, ubumanyani bwitu nu Yehova bukughoma, tukusala akiza ivinthu sona vyo tukumanyila vikutughomya sana.—Yoswa 1.8.