▪ Munkani yila tukamanyila ukuti pali ichintu choka cho chakulondiwa nkani, cho chikubakwafya abantu na bantumi. Ichintu ichi ko kuzelufya izina ilyapamwanya ilya Yehova. Napo tukwitikizya pamo tukukana, loli izila zyo u Yehova akubombezya pakulaghila, nyiza sana pakuzelufya izina lyache. Umwakuyana bulo, napo tungalonda pamo awe, loli umuntu yo akubukilila ukuba musubaliwa kwa Chala, akulangizya ukuti ichintu ichakulondiwa nkani kukwache ko kuzelufya izina ilya Yehova.

Choni cho pakabalilo aka tukulongosola ukuti inkani iya izina ilya Yehova nu kulizelufya yakulondiwa sana? Za twennye ivifukwa vitatu ivi.

Ichabwandilo, mumughunda uwa Edeni u Satana akafisya izina ilya Yehova pamo imbili yache. Ilalusyo lyo u Satana akamulalusya u Eva, akalangizya ukuti u Yehova, te mupi sona indaghilo zyo akabapa u Adamu nu Eva te nyiza. U Satana akamubuzya u Eva amazyu aghakupambana na gho u Yehova akababuzya, akanena ukuti u Chala mumyasi. Apa akanena ivintu ivibibi ivyakukwafannya ni zina ilya Yehova. U Satana akati abomba bunubu, akaba “mubibi” izina lyo likung’anamula yo “akunenela abamwabo ivintu ivibibi.” (Yoha. 8.44) Ichifukwa chakuti u Eva akasubila amabumyasi agha Satana, akaleka ukumwivwila u Chala, ivi vikalangizya ukuti u Eva atakalonda ukuti u Chala weyo abe mulaghili wache. (Ubwa. 3.1-6) Mupaka amasiku ghano, u Satana akubukilila ukunena amabumyasi aghakukwafannya na mo u Yehova abeleye. Abantu bo bakusubila amabumyasi ghache, batakumwivwila u Yehova. Loli abantu aba Chala, bakwennya ukuti te bwanaloli ukuti banenaghe ivibibi ivyakukwafannya ni zina ilizelu ilya Yehova. Abene bakumanya ichifukwa cho muchisu muli intamyo izyinji nu bubibi.

Ichabubili, ukuti ichipeliwa chosi chipindule, u Yehova akwiza pakuzelufya izina lyache nu kwefyapo ivintu vyo vikulifisya. Ichi chocho chakulondiwa nkani kwa Yehova. Cho chifukwa akunena ukuti: ‘Inkwiza pakulizelufya izina lyane ilikulu.’ (Eze. 36.23) Sona u Yesu akalangizya ichintu ichakulondiwa nkani ku babombi aba Yehova po bakwiputa, pakabalilo ko akanena ukuti: “Itabwa [izina] lyako lichindikiwanje.” (Mata. 6.9) Ibayibolo likunena umwakupyanizya-pyanizya ivyakulondiwa ukwakuchindika izina ilya Yehova. Ennya ivifwanikizyo ivinandi bulo ivi: ‘Mupeleke ubuchindamu kwa Yehova bo bubaghiye izina lyache.’ (1 Syambu. 16.29; Sali. 96.8) ‘Mwimbile inyimbo izina lyache ilya buchindamu.’ (Sali. 66.2) ‘Inkwiza pakupeleka ubuchindamu kwizina lyinyu kwa bwila na bwila.’ (Sali. 86.12) Akabalilo koka ko u Yehova akanena weka ukufuma kumwanya, ko kabalilo ko u Yesu akaba pa tempeli ku Yelusalemu, ko u Yesu akati anena ukuti: “Tata, chindika itabwa [izina] lyako!” U Yehova akamula ukuti: “Nalichindika kale, po inkwiza pakulichindika sona.”—Yoha. 12.28. a

Ichabutatu, akabalilo kosi ubwighane ubwa Yehova bukukolelana ni zina lyache pamo ulumbili lwache. Inong’onela ifundo iyi: Nanti twiza twagheliwa kubumalilo uwa Bulaghili Ubwa Kilisitu uwa Myaka 1,000, ka choni cho chikwiza pakukonkapo? Nkimba pakabalilo  aka abantumi na bantu bakwiza pakulyennya buli-buli izina ilya Yehova? Pakabalilo aka, vitakwiza pakulondiwa sona ukuti abantu balangizye ukuti basubaliwa. Abantu bakwiza pakuba bakufikapo sona abakuti bagheliwe kale. Pakabalilo aka bakwiza pakupokela ubumi ubwa bwila na bwila. Sona tutakwiza ukulondiwa ukuti twitikizye nanti izila zyo u Yehova akubombezya imbombo nyiza sana pamo awe. Loli pakabalilo aka, aliwesi kumwanya na pachisu ichapasi bakwiza ukuba bakukolelana nu kwitikizya ubulaghili ubwa Yehova. Nkimba izina ilya Yehova pakabalilo aka likwiza ukubukilila ukuba ichintu chakulondiwa nkani ku bantu bache?

Pakabalilo aka, izina ilya Yehova likwiza pakuswepa sona aliwesi akwiza pakumanya ubwanaloli ubwakukwafannya nu Yehova. Loli izina ilya Yehova likwiza ukubukilila ukuba chintu ichakulondiwa sana ku babombi bache kumwanya na pachisu ichapasi. Chifukwa buli? Ichifukwa chakuti bakwiza pakwennya ukuti u Yehova akubukilila ukubomba ivintu ivyakuswighisya. Ennya ifundo iyi: Ichifukwa chakuti umwakwiyisya u Yesu akwiza ukupeleka ubulaghili bosi kwa Yehova, ukuti u Chala “abanje nu bulaghili pa vintu vyosi.” (1 Koli. 15.28) Pisinda pache abantu pachisu bakwiza pakuhoboka “nu buchindamu ubwa bana aba Chala.” (Loma 8.21) Sona u Yehova akwiza pakukwanilisya ubwighane bwache ubwakuti abe ni mbumba yoka iyakukolelana iya bana bache abakumwanya na bapachisu ichapasi.—Efe. 1.10.

Nanti ivintu vyosi ivi vyiza vyabombiwa, ka imbumba iya Yehova iya kumwanya na pachisu ichapasi yikwiza pakwiyivwa buli-buli? Tukusimikizya ukuti tukwiza pakuba ni chinyonywa ichikulu ichakulipala izina ilya Yehova. Uwamasalimo u Devedi akasimba ukuti: ‘U Yehova u Chala apaliwanje . . . Izina lyache ilyabuchindamu lipaliwanje kwa bwila na bwila.’ (Sali. 72.18, 19) Kwa bumi bwitu bosi, inti tubukilile ukwagha ivifukwa ivyakulipala izina ilya Yehova kwa bwila na bwila.

Izina ilya Yehova likwimila chilichosi ichakukwafannya na yuyo. Pakabalilo ko tukwinong’onela ivyakukwafannya ni zina ilya Yehova, tukwinong’onelapo sona ivya lughano lwache. (1 Yoha. 4.8) Akabalilo kosi inti tukumbukilaghe ukuti u Yehova atupelite ichifukwa cha lughano lwache, akatupa isembe iya Yesu ichifukwa chakuti atughanite sona akutulaghila umwalughano na mubugholosu. Loli inti twize tubukilile ukwennya mo u Yehova akulangizizya ukuti achighanite ichipeliwa chache kwa bwila na bwila. Kwa bumi bwitu bosi, inti tubukilile ukupalamila kukwache ngati we Baba witu nu kwimbila inyimbo izina lyache ilyabuchindamu.—Sali. 73.28.