INKHANI IYAKUMANYILA 32
ULWIMBO 44 Lurombo lwa Munthu Wakusuzgika
U Yehova Akulonda Ukuti Tupinduke
‘U Mwene. . . atakulonda ukuti umunthu yumo apyutiwe, loli ukuti umunthu wesi apinduke nu kuzileka imbibi zyache.’—2 PITA. 3.9.
IFUNDO INKHULU
Inkhani iyi inthi yitwavwe ukwivwisya cho ukupinduka kukung’anamula, ichifukwa cho tukulondiwa ukupinduka, sona mo u Yehova akubatulila abanthu ukuti bapinduke.
1. Ka umunthu yo apinduka akubomba bulibuli?
NANTHI twabomba ivinthu vimo ivibibi, chakulondiwa sana ukuti tupinduke. Ibayibolo likunena ukuti umunthu yo apinduka, akulondiwa ukusintha inyinong’ono zyache pa vinthu vyo abomba nu kusimikizya ukuti te apyanizye sona.—Mata. 3.8; Imbo. 3.19; 2 Pita. 3.9.
2. Choni cho tukulondiwa ukumanyila ivyakukwafannya kupinduka? (Nehemiya 8.9-11)
2 Umunthu aliwesi akulondiwa ukumanyila ivyakukwafannya nu kupinduka. Chifukwa buli? Ichifukwa chakuti aliwesi akunanga isiku lililyosi. Pakuba bizukulu ba Adamu nu Eva, tukapyana imbibi ni mfwa. (Loma 3.23; 5.12) Aliwesi akombeye. Na banthu bo bakaba nu lwitiko, bope bakalimbanagha ni mbibi. (Loma 7.21-24) Ka ivi vikung’anamula ukuti akabalilo kosi tupasyanje ichifukwa cha mbibi zyitu? Awee, u Yehova wachisa sona akulonda ukuti tuhobokaghe. Ennya vyo vikabombiwa ku Bayuda aba mu kabalilo aka Nehemiya. (Belenga Nehemiya 8.9-11.) U Yehova atakalondagha ukuti babukilile ukuba ni chitima ichifukwa cha mbibi zyo bakabomba kwisinda, loli akalondagha ukuti bamwiputaghe umwakuhoboka. U Yehova akumanya ukuti nanthi umunthu apinduka akuba wakuhoboka. Cho chifukwa akutumanyisya ivyakukwafannya nu kupinduka. Nanthi twapinduka ku mbibi zyitu, tungaba nu lusubilo ukuti u Tata witu uwachisa inthi atuhobokele.
3. Nkhimba munkhani iyi, inthi tumanyile choni?
3 Za tumanyile ivyinji ivyakukwafannya nu kupinduka. Munkhani iyi, inthi tumanyile ifundo zitatu. Iyabwandilo, inthi tumanyile mo u Yehova akabamanyisizya Abaizilayeli ivyakukwafannya nu kupinduka. Pisinda pache, inthi twennye mo u Yehova akabatulila bo bakananga ukuti bapinduke. Pabumalilo, inthi tunenezannye mo u Yesu akabamanyisizya abamanyili bache ivyakukwafannya nu kupinduka.
MO U YEHOVA AKABAMANYISIZYA ABAIZILAYELI IVYAKUPINDUKA
4. Ka u Yehova akabamanyisya choni Abaizilayeli pa nkhani iyakupinduka?
4 Pa kabalilo ko u Yehova akabasalagha Abaizilayeli ukuba mutundu wache, akapanga nabo ipangano ilyakuti bamwivwilaghe. Nanthi bivwila indaghilo zyache, akabafighililagha nu kubasaya. Pakunena ivya ndaghilo zyo akabapa, akabasimikizya ukuti: ‘Ululaghilo lo nkhubapa ilelo ulu, te lukafu kukwinyu sona lu te kubutali nkhani numwe.’ (Kumbu. 30.11, 16) Loli nanthi basala ukwiputa abachala abanji, akalekagha ukubasaya sona bakatamiwanga. Napo vikabanga bunubu loli bakaba ukuti bachili bali nu lusako ulwakuti bangaba pabumanyani nu Chala. Bakalondiwanga ‘ukunyokela kwa Yehova u Chala [wabo] nu kwivwila amazyu ghache.’ (Kumbu. 30.1-3, 17-20) Mu mazyu aghanji tunganena ukuti bakalondiwanga ukupinduka. Nanthi babomba bunubu, u Yehova akapalamilagha kukwabo nu kubasaya sona.
5. Ka u Yehova akalangizya bulibuli ukuti atakabaleka abanthu bache? (2 Banyafyale 17.13, 14)
5 Abanthu bo u Yehova akabasala bakamusambukilagha umwakupyanizyapanizya. Ukongelazyapo pakwiputa ivifwani, bakabombagha sona ivinthu ivyamwabo ivibibi. Loli u Yehova akabukilila ukubavwa ukuti babukilile ukumubombela. Akatumagha abalaghuzi umwakupyanizyapyanizya ukuti babavwe abanthu bache ukuti bapinduke nu kunyokela kukwache.—Belenga 2 Banyafyale 17.13, 14.
6. Ka u Yehova akabombezya abawenu ukuti abamanyisye abanthu bache ukulondiwa ukwa kupinduka? (Ennya sona ichithuzi.)
6 U Yehova akabombezyanga abalaghuzi ukuti babavwange nu kubasoka abanthu bache. Umwakufwanikizya, u Chala ukwendela mwa Yelemiya akanena ukuti: ‘Nyokela, we Izilayeli wakusambuka . . . te imbennye ni cheni ichabukali, pakuti ne musubaliwa . . . Te mbukilile ukukalala kwa bwila na bwila. Witikizye bulo ubutulanongwa bwako, pakuti wamusambukila u Yehova u Chala wako.’ (Yere. 3.12, 13) Ukwendela mwa Yoweli, u Yehova akati: ‘Nyokela kukwane nu moyo winyu ghosi.’ (Yoe. 2.12, 13) U Yehova akamubuzya u Yesaya ukuti anene ukuti: ‘Mube bazelu; mwefyepo imbombo imbibi pamaso pane; muleke ukubomba ivinthu ivibibi.’ (Yesa. 1.16-19) Ukwendela mwa Ezekiyeli, u Yehova akalalusya ukuti: ‘Ka une nkuhoboka nimfwa iya munthu umubibi? . . . Ka nthakulonda ukuti anyokeko nu kuzileka izila zyache ukuti abe nu bumi? Nthakuhoboka nimfwa iya munthu aliwesi, . . . nyokela ukuti mube nu bumi.’ (Eze. 18.23, 32) U Yehova akuhoboka sana nanthi akwennya abanthu bakupinduka, ichifukwa chakuti akulonda ukuti babukilile ukuba nu bumi kwa bwila na bwila! U Yehova atakulindilila tasi ukuti abanthu bapinduke po achili ukubavwa. Za twennye ivifwanikizyo vimo.
Akabalilo akinji, u Yehova akabombezyanga abalaghuzi ukuti babavwe abanthu ukuti bapinduke (Ennya indime 6-7)
7. Ukuyana ni nkhani iya mulaghuzi u Hoseya nu muchi wache, ka u Yehova akabombagha bulibuli na banthu bache?
7 Ennya mo u Yehova akabamanyisizya abanthu bache pakubombezya ichifwanikizyo icha Gomeli umuchi wa mulaghuzi u Hoseya. Akati abomba ubwamalaya, akamuleka u Hoseya nu kubuka ku banavuli abanji. Ka akaba wakuti atangapinduka? U Yehova yo akwennya mumoyo akamubuzya u Hoseya ukuti: ‘Buka sona uye umughane umukolo yo aghaniwe nu mwanavuli uyunji sona akupanga ubwamalaya. Uye umughane ngati mo u Yehova akubaghanila Abaizilayeli napo bang’anamukila ku bachala abanji.’ (Hose. 3.1; Mbupi. 16.2) Umuchi uwa Hoseya akaba ukuti achili akubukilila ukupanga ubwamalaya. Loli u Yehova akamubuzya u Hoseya ukuti, amuhobokele nu kumusenda sona ukuba muchi wache. a Umwakuyana bulo, u Yehova atakabalekela zila abanthu bache abatulanongwa. Loli akabukilila ukubavwa ukuti bapinduke nu kuzileka izila zyabo imbibi. Ka ichifwanikizyo ichi, chikulangizya ukuti u Yehova angennya umunthu yo akubukilila ukupanga ubutulanongwa nu kumwavwa ukuti apinduke? (Mbupi. 17.3) Za twennye mo akubombela.
U YEHOVA AKUBAVWA ABATULANONGWA UKUTI BAPINDUKE
8. Ka u Yehova akamwavwa bulibuli u Kayini ukuti apinduke? (Ubwandilo 4.3-7) (Ennya sona ichithuzi.)
8 U Kayini akaba we katote wa Adamu nu Eva. Akapyana imbibi ukufuma ku bapapi bache. Umwakongelezyapo, Ibayibolo likunena ukuti: ‘Ivinthu vyo umwene akabombagha vikaba vibibi.’ (1 Yoha. 3.12) Cho chifukwa Ibayibolo likulongosola ichifukwa cho u Yehova ‘atakahoboka nu Kayini sona isembe yache.’ Mumalo mwakuti asinthe inkhalo zyache, ‘u Kayini akabukilila ukukalala sona icheni chache chikawa ichifukwa cha chitima.’ Nkhimba u Yehova akabomba ichoni? Akanena nu Kayini. (Belenga Ubwandilo 4.3-7.) Ennya ukuti u Yehova akanena nu Kayini umwachisa sona akamupa ulusubilo nu kumubuzya ububibi bo bungabapo nanthi abomba imbibi. Ichachitima chakuti u Kayini atakivwila. Atakitikizya ukuti u Yehova amwavwe ukuti apinduke. Ichifukwa chakuti u Kayini atakivwila, ka u Yehova akaleka ukubavwa abanthu bo babomba imbibi ukuti bapinduke? Awee!
U Yehova akayezya ukumwavwa u Kayini ukuti apinduke sona akamulayizya ukuti inthi amusaye nanthi apinduka (Ennya indime 8)
9. Ka u Yehova akamwavwa bulibuli u Devedi ukuti apinduke?
9 U Yehova akamughanagha sana Umwene u Devedi. Akamwitizya ukuti ‘munthu uwa pamoyo wane.’ (Imbo. 13.22) Loli u Devedi akabomba imbibi zimo inkhulu ngati ubwamalaya nu kughogha. Ukuyana ni Ndaghilo izya Mozesi, u Devedi akalondiwanga ukughoghiwa. (Levi. 20.10; Kuba. 35.31) Umwachisa, u Yehova akamwavwa u Devedi ukuti apinduke. b Akatuma umulaghuzi wache u Natani ukuti abuke kwa Devedi napo atakalangizya ukuti apinduka. U Natani akanena ichifwanikizyo cho chikamufika u Devedi pa moyo. Ichifwanikizyo ichi, chikamwavwa u Devedi ukuti apinduke. (2 Samu. 12.1-14) Akasimba ulwimbo lo lukalangizya ukuti akapinduka ukufuma pasi pa moyo. (Sali. 51, umutu) Ulwimbo ulu, lwabasangalusya abinji bo bakabombapo ubutulanongwa ubukulu ukuti bapinduke. Ka te chakuhobosya ukuti u Yehova akamwavwa umubombi wache u Devedi umwalughano ukuti apinduke?
10. Ka tukwiyivwa bulibuli ichifukwa chakuti u Yehova mufisalyoyo sona wakuhobokela?
10 U Yehova azibengite imbibi zyosi. (Sali. 5.4, 5) Akumanya ukuti swebosi swe batulanongwa loli ichifukwa chakuti atughanite, akutwavwa ukuti tulimbane ni mbibi. Akabalilo kosi, akuyezyayezya ukubavwa abanthu bo babomba ubutulanongwa ubukulu ukuti bapinduke nu kupalamila kukwache. Chakusangalusya sana ukumanya ifundo iyi! Nanthi tukwinong’onelapo mo u Yehova abeleye mufisalyoyo nu wakuhobokela, vikutwavwa ukuti tubukilile ukuba basubaliwa sona tukupinduka lubilo nanthi twabomba ubutulanongwa. Pa kabalilo aka, inthi tumanyile vyo u Yesu akabamanyisya abamanyili bache pa nkhani iyakupinduka.
VYO ABAMANYILI BA YESU BAKAMANYILA PA NKHANI IYAKUPINDUKA
11-12. Nkhimba u Yesu akabamanyisya bulibuli bo bakateghelezyanga ukuti u Baba wache waluhobokelo? (Ennya pachifwambo.)
11 Mu kabalilo aka Bakilisitu ababwandilo, akabalilo kakakwana akakuti u Mesiya abonekele. Ngati mo tukanenela munkhani iya pisinda, u Yehova akabombezya u Yohani Uwalozyo nu Yesu Kilisitu pakubamanyisya abanthu ukulondiwa ukwa kupinduka.—Mata. 3.1, 2; 4.17.
12 Mu bulumbilili bwache, u Yesu akabamanyisya bo bakateghelezyanga ukuti u Baba wache waluhobokelo. U Yesu akanena ichili icha mwana uwakusobela ukuti abavwe ukwivwisya ifundo iyi. Umwana uyu, akanda ukubomba ivinthu ivibibi. Loli “bo azyaghannya” akanyokela kunyumba. Ka ubaba wache akamupokelela bulibuli? U Yesu akanena ukuti, po umwana akaba “achili ali pa butali ni nyumba, uwise akamwennya. Umoyo wache ghukizula ni chitima akachimbila pakumukukila, sona akamulamuka nu lughano.” Umwana akamubuzya ubaba wache ukuti abe wambombo, loli ubaba wache akamwitizya ukuti we ‘mwana wane,’ nu kumunyosezya sona mumbumba yabo. Ubaba akanena ukuti: ‘Akasobela, loli ilelo aghiwa.’ (Luka 15.11-32) Pa kabalilo ko u Yesu akaba kumwanya, tutakukayikila ukuti akamwennyanga u Baba wache akulangizya ichisa ku banthu bo bapinduka. Chakughomya sana ukuti u Yesu akalangizya mo u Baba wache u Yehova abeleye ni chisa!
Ubaba uwa muchili icha mwana uwakusobela cho u Yesu akanena, akumupokelela umwana wache yo anyokela kunyumba(Ennya indime 11-12)
13-14. Ka umutumiwa u Pitala akamanyila choni pa nkhani iyakupinduka, sona akabamanyisya bulibuli abanji? (Ennya sona ichithuzi.)
13 Umutumiwa u Pitala akamanyila ivyinji kwa Yesu pa nkhani iyakupinduka nu kuhobokela. Akabalilo akinji, u Pitala akalondiwanga ukuhobokeliwa sona u Yesu akamuhobokelagha. Umwakufwanikizya, u Pitala akati amukana Umwene wache katatu, akatamiwa inyinong’ono pa vyo akabomba. (Mata. 26.34, 35, 69-75) Loli u Yesu akati azyuka, akabonekela kwa Pitala po akaba kwaweka. (Luka 24.33, 34; 1 Koli. 15.3-5) Tutakukayikila ukuti pa kabalilo kala, u Yesu akamusimikizya umutumiwa wache uwakupinduka uyu ukuti amuhobokela.—Ennya Maliko 16.7.
14 Ichifukwa chakuti u Pitala akahobokeliwa, vikamwavwa ukuti wepe abamanyisye abanji pa nkhani iyakupinduka nu kuhobokela. Pisinda pa lusekelo ulwa Pentekositi, u Pitala akababuzya abanthu bo batakaba Bayuda ukuti bakamughogha u Mesiya. Loli umwalughano akabalimbikisya ukuti: ‘Muzileke imbibi zyinyu nu kupindukila kwa Chala, ukuti azimye imbibi zyinyu. Nanthi mukubomba bunubu Umwene akwiza pakubapa akabalilo akakutuzizya.’ (Imbo. 3.14, 15, 17, 19) Cho chifukwa, u Pitala akalangizya ukuti ukupinduka kukumwavwa umunthu ukuti asinthe inkhalo zyache imbibi nu kwanda ukubomba ivinthu ivyakumuhobosya u Chala. Umutumiwa uyu, akalangizya sona ukuti u Yehova akwiza ukuzimya imbibi zyabo pamo ukupangisya ukuti zibe ngati ukuti zitakabombiwa. Imyaka yikati yendapo, u Pitala akabasimikizya ukuti: ‘U Mwene . . . atakulonda ukuti umunthu yumo apyutiwe, loli ukuti umunthu wesi apinduke nu kuzileka imbibi zyache.’ (2 Pita. 3.9) Ulu lukaba lusubilo ulwiza sana ku Bakilisitu bo bakabomba ubutulanongwa ubukulu!
U Yesu akamuhobokela u Pitala nu kumusimikizya ukuti amughanite (Ennya indime 13-14)
15-16. (a) Ka umutumiwa u Pabuli akamanya choni ivyakukwafannya nu kuhobokela? (1 Timoti 1.12-15) (b) Ka munkhani iyakukonkhapo inthi twize twennye ichoni?
15 Banthu banandi bulo bo bakalondiwanga ukupinduka nu kuhobokeliwa ukulusya u Sabuli uwa ku Talisa. Akabayivyanga sana abamanyili aba Yesu. Tutakukayikila ukuti Abakilisitu abinji bakamwennyanga ukuti atangasintha nu kupinduka. Loli u Yesu akennyanga ivinthu umwakupambana nkhani na mo abanthu bakenezyanga. U Yesu nu Baba wache, bakennyamo inkhalo inyiza mwa Sabuli. U Yesu akanena ukuti: “Namusala ukuti ambombele.” (Imbo. 9.15) U Yesu akabombezya ichiswigho ukuti amwavwe u Sabuli ukuti apinduke. (Imbo. 7.58–8.3; 9.1-9, 17-20) U Sabuli akati aba Mukilisitu, akanda ukumanyikwa ukuti umutumiwa u Pabuli sona akabalilo akinji, akalangizyanga ukuti akupalizya sana ichisa cho bakamulangizya. (Belenga 1 Timoti 1.12-15.) Umutumiwa uyu akanena umwakuhoboka ukuti: ‘U Chala uwa chisa akuyezya pakukulongozya ukuti upinduke nu kuzileka imbibi zyako.’—Loma 2.4.
16 U Pabuli akati ivwa inkhani iya bwamalaya yo yikabombiwanga muchipanga icha Bakilisitu aba ku Kolinti, nkhimba akabomba bulibuli? Akabomba muzila yo yikutumanyisya mo u Yehova akufundila umwalughano, nu kulondiwa ukwakulangizya ichisa. Munkhani iyakukonkhapo, inthi twize twennye mo akabombela.
ULWIMBO 33 Katundu Wako Umuthwikiske Yehova
a Inkhani iyi, yikupambanako na mo vikubela amasiku ghano. U Yehova atabikite indaghilo izyakuti umunthu angabukilila ukuba pa sendwa na yo abomba ubwamalaya. Mumalo mwache, u Yehova akabombezya Umwana wache ukuti alongosole ifundo iyakuti umunthu angasala weka ukuti isendwa yimale pamo awe.—Mata. 5.32; 19.9.
b Ennya inkhani iyakuti “Kasi Tingasanga Wuli Candulo Cifukwa Cakuti Yehova Ngwakugowokera?” mu Ichitembe cha Mulindilili icha Chitumbuka icha Novembala 15, 2012, pp. 21-23, indime 3-10.
