Umutumiwa u Pabuli akabasimbila Abakilisitu aba ku Tesalonika ukuti: Nanthi “alimo weka mumwinyu yuyo atakwivwila amazyu ghagho twasimba mwakalata uyu, mumwenelezye akiza [mumubike ichidindo, NW.]” (2 Tesa. 3.14) Kwisinda uku, tukanenagha ukuti abasongo bobo babaghiye ukubombezya ubulongozi ubu. Tukanenagha ukuti nanthi umunthu yumo akubukilila ukukana ifundo izya mu Bayibolo napo bamupa ubulongozi umwakupyanizyapyanizya, abasongo babaghiye ukunena ku chipanga inkhani iyakusoka. Pisinda pache, abalumbilili aliwesi paweka akasalagha ukuti aleke ukwangala nawe.

Pa kabalilo aka twennya ukuti pakulondiwa ukusintha akivwisizye kitu pa nkhani iyi. Tutakukayikila ukuti ubulongozi ubwa Pabuli bukabukagha kwa Mukilisitu aliwesi paweka ukuyana na mo ivinthu vikabelagha pa bumi bwache. Cho chifukwa pa kabalilo aka, patakulondiwa sona ukuti abasongo banenaghe inkhani iyakusoka. Choni cho twasintha? Ennya ubulongozi bo u Pabuli akanena pa nkhani iyi.

U Pabuli akamanya ukuti bamo muchipanga, ‘batakendagha akiza.’ Bakasulagha ubulongozi ubwakufuma mu Masimbo. Pa kabalilo ko akabendela, akabapa ubulongozi ubwakuti: Umunthu “wesi yuyo akukana pakubomba imbombo, atakalye nukulya bulo.” Napo vikaba bunubu, bamo bakakanagha ukuti babombe imbombo izyakuti biyavwe beka napo bakaba na maka. Sona bakingililagha pa vinthu ivya banji. Ka Abakilisitu bakalondiwanga ukubomba bulibuli na banthu aba?—2 Tesa. 3.6, 10-12.

U Pabuli akanena ukuti “mumwenelezye akiza [mumubike ichidindo, NW.]” Mu Chigiliki amazyu agha, ghakang’anamulagha ukumumanya akiza umunthu nu kumanya mo mungabombela ukuti mutakasendele inkhalo zyache. U Pabuli atakapeleka ubulongozi ubu ku basongo abachipanga bene, loli akabupeleka ku chipanga chosi. (2 Tesa. 1.1; 3.6) Cho chifukwa Umukilisitu aliwesi paweka yo akamanyagha ukuti Umukilisitu uwamwabo atakwivwila ubulongozi ubwa mu Masimbo, akaba nu bwabuke ubwakusala ukwivwila ubulongozi ubwakuti “mutakamanyane nawe.”

Ka ivi vikung’anamula ukuti bakalondiwanga ukubomba nawe ivinthu ngati munthu yo epusiwa muchipanga? Awee, u Pabuli akongelezyapo ukuti: “Mumusoke pakuti mukamu winyu.” Polelo Umukilisitu aliwesi paweka akabukililagha ukubomba nawe ivinthu pa nkhomano na mu bulumbilili, loli aliwesi akalondiwanga ukusala weka ukuti aleke ukwangala nawe nanthi bali pigulu. Chifukwa buli? U Pabuli akanena ukuti “mutakamanyane nawe ukuti isoni zimuleme.” Nanthi bamwenelezya akiza, Umukilisitu yo atakivwilagha ubulongozi ubwa mu Masimbo, isoni zikamulemagha pa nkhalo yache imbibi yo akaba nayo sona vikamwavwanga ukuti asinthe.—2 Tesa. 3.14, 15.

Ka amasiku ghano, Abakilisitu bangabubombezya bulibuli ubulongozi ubu? Ichabwandilo, tukulondiwa ukusimikizya naloli ukuti umunthu ‘atakubomba akiza’ ivinthu ngati mo u Pabuli akalongosolela. Loli apa atakanenagha abanthu bo tukupambana nabo akasalile ka vinthu vyo tuvighanite sona vyo umunthu akwendela umabyebye wache pakusala. Sona atakang’anamulagha abanthu bo batukalalizya. Mumalo mwache, u Pabuli akanenagha abanthu bo bakusalila dala ukuleka ukwivwila indaghilo zyo u Chala akutupa nu kuleka ukumwivwila.

Amasiku ghano, nanthi twamanya ukuti Umukilisitu yumo akulangizya umoyo uwakusita ukwivwila, a tungasala twebene ukuleka ukwangala nawe. Ichifukwa chakuti aliwesi akulondiwa ukusala weka, tutakulondiwa ukunenezannya na banthu abanji bo tutakwikala nabo vyo uswe twasala. Sona tungabukilila ukubomba nawe ivinthu pa nkhomano na mu bulumbilili. Nanthi asintha inkhalo yache, tunganda ukubomba nawe ivinthu ngati mo tukabombelagha nawe pabwandilo.