Abakamu ku Beteli bakabomba imbombo ukupululila umwaka ukuti bapange iwayilesi iya WBBR ku Staten Island, New York City. Bakati bayannya amalo, bakazenga inyumba yo bakikalaghamo bo bakabombagha imbombo iyi ni yamwabo iyakusungilamo ukatundu. Imbombo iyi yikati yamala, abakamu bakanda ukubunganika ukatundu yo akalondiwanga ukuti “amazyu ghande ukwivwika pa wayilesi.” Loli bakakomana ni ntamyo.

Abakamu bakazyaghannya ukuti chipala sana ukuyannya ivintu ukuti iwayilesi yande pakwivwika. Bakabika itilazimita iya mamita 91 pamwanya pa vimatabwa vibili vyo vikaba vitali amamita 61. Ukuyezya akabwandilo kutakakola. Pabumalilo abakamu bakakwanisya ichifukwa chakumusubila u Yehova. U Calvin Prosser yo akabombako imbombo iyi akati: “Nanti pabwandilo tukakwanisya ukubomba akiza nge tukituvya nu kunena ukuti, ‘ennya vyo twabomba!’” Abakamu bakapeleka umuchizi ghosi kwa Yehova, loli intamyo zitakamala.

Pa kabalilo aka chikaba chakutamya sana ukuti baghule ivintu vyo vikalondiwanga pakupanga isiteshoni iya wayilesi. Loli abakamu bakasala ukughula itilazimita yo umuntu yumo akazenga kale. Mumalo mwakuti baghule imayikofoni bakabombezya itelefoni. Ubusiku bumo mu Febuluwale, abakamu bakasala ukuti bayezye iwayilesi. Bakalondagha ipulogilamu iyakuti yivwike pa wayilesi, po abakamu bakimba inyimbo zya Bumwene. U Ernest Lowe akukumbukila ukuti po bakimbagha bakapokela ifoni ukufuma kwa Judge Rutherford, b yo akivwa pawayilesi  wache ku Brooklyn ulwimbo lo bakimbagha napo akaba pabutali na makilomita 25.

Umukamu u Rutherford akati, “Leka pakwimba. Mukwivwika ngati abapusi abinji!” Umwalubilo, abakamu bakighalila itilazimita loli bakaba nu lusubilo ukuti inti bize bivwike pa wayilesi.

Iwayilesi iyi yikati yanda ukubomba imbombo pa 24 Febuluwale, 1924, Umukamu u Rutherford akighulila iwayilesi iyi ukuti “yibombaghe imbombo iya bumwene ubwa Mesiya.” Akati: “Tukulonda ukuti iwayilesi iyi yibavwe abantu ukwivwisya ubuzelu bwa mu Bayibolo nu kumanya ukulondiwa ukwa kabalilo ko tukwikalamo.”

Isiku ilyabwandilo vikenda akiza sana. Iwayilesi iya WBBR iyi yikabomba imbombo ukwa myaka 33, pakufumusya ubutenga ubwakukwafannya nu Yehova.

Mu Julayi 1924, Abamanyili ba Bayibolo bakapanga ulukomano ku Columbus, Ohio. Abalendo bakafuma pachisu chosi ichapasi, sona inkani zikaneniwa Mu Chialabiki, Chingelezi, Chifulenchi, Chijelemani, Chigiliki, Chihungaliya, Chiitaliya, Chilituweniya, Chipolishi, Chilasha, ivinenelo ivya Chisikandineviya na Chiyukileniya. Inkani zimo zikivwikagha pa wayilesi sona bakapanga ivyakuti aba nyuzi iya Ohio State Journal basimbaghe ivya ulukomano lwa chigaba.

Pa Chinayi pa 24 Julayi, abakamu na bayemba bo bakiza palukomano ulu abakupululila 5,000 bakingila mu bulumbilili mutawuni yo bakabombelaghako ulukomano uku. Bakagabila amabuku 30,000 sona bakanda ukumanyila Ibayibolo na bantu amasawuzandi. Ichitembe chikitizya isiku ili ukuti “isiku ili lyakuhobosya sana.”

Pachisano pa 25 Julayi, pa lukomano ulu pakabombiwa ichintu chimo Umukamu u Rutherford akabelenga umwabujimvu ichakufumusya ichakususannya na balongozi aba vipanga. Muchakufumusya ichi akanena ukuti, “abandale, abalongozi aba vipanga na balongozi aba bizinezi bakabakanizyanga abantu ukuti bamanyighe ubwanaloli ubwakukwafannya nu bumwene bwa Chala bo u Chala akwiza pakububombezya imbombo ukuti abasaye abantu.” Akanena sona ukuti abanavuli aba, bakupuvya sana ichifukwa chakuti ‘bakwavwa ibungwe ilya League of Nations nu kunena ukuti zila yo u chala akulaghilila ichisu.’” Abamanyili ba Bayibolo bakalondiwanga ubujimvu ukuti bakwanisye ukufumusya ubutenga ubu.

Pakunena vyo vikabombiwa pa lukomano ulu, Ichitembe chikanena ukuti: “Po bakabwelagha  abasilikali ba Mwene bo bakabungana pa Lukomano ulu lo lukabombiwa ku Columbus, ulwitiko lwabo lukaghoma sana. . . , bakaba bakwisengannya ukulimbana na chilichosi cho abalwani babo bangababombela.” U Leo Claus, yo akabapo pa lukomano ulu akukumbukila ukuti: “Po tukafumagha pa lukomano ulu, tukalimbikisiwa sona tukaba bakwisengannya ukubabuzyako abanji ivyakukwafannya ni chakufumusya ichi.”

Mu Okutobala, Abamanyili ba Bayibolo bakanda ukugabila utumapepala amamiliyoni aghinji utwa mutu uwakuti Ecclesiastics Indicted, to mukapulintiwa inkani yo Umukamu u Rutherford akanena iyakususannya na balongozi aba vipanga. Mutawuni iyinandi iya Cleveland, Oklahoma, u Frank Johnson akamalizya ukugabila utumapepala muchigaba cho bakamupa ukwa 20 minisi bulo. Pisinda pache akavwama ukuti abalindilile abalumbilili abanji ichifukwa chakuti abanavuli abakufuma mutawuni iyi, bo bakakalalagha ni mbombo iyakulumbilila bakamulondagha. Umukamu u Johnson akinong’ona ukuti aye avwame muchalichi cho chikaba papipi. Akagha ukuti muchalichi mute nayumo-yumo, po akaleka utumapepala utu mu Bayibolo ilya muputi na pamupando ghulighosi. Akati abomba bunubu, akafumamo muchalichi mula umwalubilo. Akaba ukuti achili ali na kabalilo umwakuti akabuka sona kumachalichi aghanji mabili nu kubomba umwakuyana bulo.

Umwalubilo u Frank akanyokela sona kumalo gho akalonda ukuti aye akomane na bakamu na bayemba. Akavwama kuseli kwa filing’i siteshoni nu kubukilila ukubennya abanavuli bo bakamulondagha. Abanavuli bakapululila pamalo ghala loli batakamwennya. Abanavuli aba bakati babuka bulo, abakamu na bayemba bo bakalumbililagha kupipi na ko u Frank akaba bakamusenda nu kubuka nawe.

Umukamu yumo akukumbukila ukuti, “po tukafumagha mutawuni iyi, tukapululila ivyalichi vitatu. Pa chalichi chilichosi pakaghiwanga abantu abinji lumo bakabanga cha muma 50, bimiliye pazi. Abantu bamo bakabelengagha utupepala, po bamo bakaghakola bulo kunyobe ukuti umuputi wabo ize. Tukafumamo pakabalilo kache ukusita ukwaghanapo ni ntamyo yiliyosi! Tukamupalizya sana u Yehova u Chala witu, ichifukwa chakuti akatufighilila nu kutupa amahala ukuti tulimbane na balwani aba Bumwene aba.”

Abamanyili aba Bayibolo aba muvyisu ivinji bo pe bakalumbililagha umwabujimvu. U Józef Krett akalumbililagha ku mupoto ukwa France ku bantu bo bakabombagha imbombo ku migodi loli bakafuma ku Poland. Akapanga indondomeko iyakuti anene inkani iyakuti, “Lunulu Abafwe Inti Bazyuke.” Pa kabalilo ko bakabitizyanga abantu mutawuni iyi, uwasembe akabasoka abantu ukuti batakayeko. Loli batakamwivwila ichifukwa abantu abakupululila 5,000 bakateghelezya inkani iyi ukongelezyapo nu wasembe! Umukamu Krett akamwitizya uwasembe ukuti ize afighilile vyo akusubila loli akakana. Umukamu Krett akagabila amabuku ghosi gho akaba nagho sona akamanya ukuti abantu aba bakaba ni nyota iya Mazyu gha Chala.—Amo. 8.11.

Ku Africa, u Claude Brown akalumbililagha amazyu amiza ku Gold Coast, ichisu cho amasiku ghano chikumanyikwa ukuti Ghana. Inkani zyo akanenagha na mabuku gho akagabilagha vikavwa ukuti ubwanaloli busate mwalubilo. U John Blankson, yo akamanyilagha isukulu iyakumanyisya ivya milembo akivwisya inkani yimo iya Mukamu Brown. Akamanya ukuti abwagha ubwanaloli. U John akati: “Ubwanaloli ubu bukahobosya sana. Nkababuzyangako umwakusatuka abamwitu bo nkamanyilagha nabo isukulu ivyakukwafannya nu bwanaloli ubu.”

Isiku limo, u John akabuka ku Chalichi icha Anglican ukuti aye amulalusye uwasembe ivyakukwafannya  na bachala batatu, pa kabalilo aka u John akaba ukuti ivwisya ukuti ichimanyisyo ichi te cha mu Masimbo. Uwasembe akamusamazya sona akamukalipila ukuti: “Te we Mukilisitu uli pasi pa Mubibi. Fumapo pano!”

Akati abwela kunyumba, u John akamusimbila ukalata uwasembe uwakuti ize afighilile ichimanyisyo ichakukwafannya na bachala batatu pigulu ilya bantu. Pakwamula, uwasembe akamubuzya ukuti baye bakomane kuofesi iya mumanyisi usongo pa sukulu yo akamanyilaghapo. Umumanyisi akamulalusya nanti akamusimbila uwasembe ukalata.

U John akamula ukuti: “Inga.”

Umumanyisi akamulamula u John ukuti amusimbile uwasembe ukalata uwakumupepesya. Po u John akasimba ukuti:

“Wakuchindikiwa, umumanyisi wane ambuzya ukuti imbasimbile ukalata uwakupepesya sona ne wakwisengannya ukubasimbila nanti umwe mungitikizya ukuti vyo mukumanyisya vyabumyasi.”

Ivi vikamukalalizya sana umumanyisi, po akamulalusya ukuti, “Blankson, ka ivi vyovyo walondagha ukusimba?”

“Inga Mumanyisi, vyo vyo nalondagha ukusimba.”

“Isukulu inti yikumalile. Ka ungaba buli-buli pa sukulu po ukususannya nu wasembe uwa Chalichi cho iboma lichisubaliye nu kubukilila ukuba nu lusubilo ulwakuti wize ubombe imbombo muboma?”

“Loli Mumanyisi . . . nanti mwatumanyisya ichimanyilo chimo nu kutubuzya ifundo zimo zyo tutakuzyivwisya, ka tutakulalusyanga amalalusyo?”

“Inga momo vikubelagha.”

“Inga mumanyisi ivi vyovyo vikabombiwa. Uwasembe akatumanyisyanga Ibayibolo, po une nkamulalusya ilalusyo. Nanti akapotwa ukwamula ilalusyo, choni cho une imusimbile ukalata uwakumupepesya?”

U Blankson isukulu yitakamumalila sona atakasimba ukalata uwakupepesya.

Pakwennya vyo vikabombiwa mu mwaka ghula, Ichitembe cha Mulindilili chikalongosola ukuti: “Tukukolelana na vyo u Devedi akanena ukuti: ‘Inti mumpe amaka aghakulwila inkondo, inti mupangisye ukuti abalwani bawe pasi pane.’ (Sali. 18.39) Twennya ukuti umwaka ughu wali wakughomya sana ichifukwa chakuti Umwene . . . abikitepo inyobe pababombi bache abakwipeleka . . . balumbililagha umwakuhoboka.”

Kubumalilo ubwa mwaka ughu, abakamu bakapanga amapulani aghakuti babe ni wayilesi iyamwabo. Imbombo iyakupanga isiteshoni iyamwabo yikanda kupipi na ku Chicago. Isiteshoni impya iyi yikitiziwanga ukuti AMAZYU ichifukwa chakuti yikalumbililagha amazyu agha Chala. Ichifukwa chakuti bakabombezya itilazimita yo yikaba na mawati 5,000, yikavwa ukuti ubutenga ubwa Bumwene ghufike pabutali mupaka ku mupoto ukwa Canada.

Umwaka uwa 1925, u Yehova akabavwa Abamanyili ba Bayibolo ukuti bivwisye Ubuvumbuli chaputala 12. Ivi vikapangisya ukuti bamo baleke ukumubombela u Yehova. Loli abantu abinji bakakapokelela akiza akivwisizye akapya akakukwafannya ni vintu vyo vikabombiwa kumwanya, vyo vikutambuliwa muchaputala ichi sona mo vikubakwafizya abantu aba Chala pachisu ichapasi.