INKANI IYAKUMANYILA 42
ULWIMBO 103 Ŵaliska Ŵapelekeka Kuŵa Vyawanangwa
Mubapalizyanje Abanavuli bo u Yehova nu Yesu Bakubabombezya Imbombo
“Bo akukwela kumwanya . . . , akabapa abantu ivyabupi.” —EFE. 4.8.
IFUNDO INKULU
Inti tumanyile mo abavwilizyi, abasongo abachipanga na bakwendela idela bakututulila, sona mo tungalangizizya ukuti tukupalizya vyo abanavuli abasubaliwa aba bakubomba.
1. Nkimba vyabupi buli vimo vyo u Yesu akutupa?
PATALIPO umuntu nayumo-yumo yo wakwinong’onela abantu ngati we Yesu. Pa kabalilo ko akaba pachisu ichapasi, akabombezyanga amaka ghache pakupanga iviswigho ukuti abavwe abanji ukusita ukulipilisya. (Luka 9.12-17) Akiyipa ubumi bwache, cho chabupi ichikulu nkani kwa uswe. (Yoha. 15.13) Ukufuma bulo po akazyukila, u Yesu akubukilila ukutwavwa. Ngati mo akalayizizya, akamulaba u Yehova ukuti atupe umuzimu ubuzelu bo bukutumanyisya nu kutusangalusya. (Yoha. 14.16, 17; 16.13) Sona ukwendela mu nkomano izyapachipanga, u Yesu akubukilila ukutwavwa ukuti tubamanyisyange akiza abantu ukuti babe bamanyili bache pachisu chosi ichapasi.—Mata. 28.18-20.
2. Ukuyana na Aba Efeso 4.7, 8, ka “ivyabupi” vikongelezyapo abawenu?
2 Inong’onela ichabupi ichamwabo cho u Yesu akutupa. Umutumiwa u Pabuli akasimba ukuti, u Yesu akati akwela kumwanya “akabapa abantu ivyabupi.” (Belenga Aba Efeso 4.7, 8.) U Pabuli akalongosola ukuti u Yesu akabapa ivyabupi ivi, ukuti avwe ichipanga muzila izyakupambana-pambana. (Efe. 1.22, 23; 4.11-13) Amasiku ghano, “ivyabupi” ivi vikongelezyapo abavwilizyi muchipanga, abasonga abachipanga na bakwendela idela. a Napo vili bunubu, abantu aba bambula ukufikapo umwakuti akabalilo kamo bope bakupuvya ivintu. (Yako. 3.2) Loli Umwene witu u Yesu Kilisitu akubabombezya imbombo ukuti batwavwe.
3. Nena ichifwanikizyo cho chikulangizya mo tungabatulila abantu bo “vyabupi.”
3 U Yesu “akabapa abantu ivyabupi” ukuti baghomyanje ichipanga. (Efe. 4.12) Loli aliwesi uwa uswe angabavwa ukuti bakwanilisye ubudindo bwabo ubwakulondiwa ubu. Tungayanisya imbombo yabo na bo bakuzenga Inyumba izya Bumwene. Bamo bakwavwa pakutwala ichakulya, bamo pakunyamula ukatundu sona bamo bakubomba imbombo izinji. Umwakuyana bulo, aliwesi uwa uswe angabavwa abavwilizyi muchipanga, abasongo abachipanga na bakwendela idela, muvyakunena ni vyakubomba. Za twennye mo tukupindulila ichifukwa chakuti bakubikapo umoyo pakubomba imbombo zyabo sona mo tungalangizizya ukuti tukubapalizya nu kumupalizya u Yesu yo “akabapa abantu ivyabupi.”
ABAVWILIZYI MUCHIPANGA BALI NI CHABUPI “ICHAKUBAVWA ABANJI”
4. Ka mbombo buli zimo zyo abavwilizyi bachipanga bakabombagha?
4 Pa kabalilo aka Bakilisitu ababwandilo, abakamu bamo bakasaliwanga ukuba bavwilizyi muchipanga. (1 Timo. 3.8) Vikuboneka ukuti abavwilizyi muchipanga bakaba ni chabupi “ichakubavwa abanji” pa kabalilo ko u Pabuli akasimbagha ifundo iyi. (1 Koli. 12.28) Tutakukayikila ukuti abavwilizyi muchipanga babaghiye ukuti bakabombagha imbombo izyakulondiwa sana umwakuti abasongo abachipanga babukilile ukubikapo umoyo pakumanyisya nu kupanga ubudimi. Umwakufwanikizya, abavwilizyi muchipanga babaghiye ukuti bakavwangapo pa mbombo iyakukopela Amasimbo pamo bakalondagha ivintu vyo vikalondiwanga pakukopela.
5. Nkimba mbombo buli zimo zyo abavwilizyi bakubomba muchipanga amasiku ghano ?
5 Inong’onela imbombo zimo zyo abavwilizyi bakubomba muchipanga chinyu. (1 Pita. 4.10) Bangabapa imbombo iyakuti bapwelelelaghe indalama izyachipanga pamo ivigaba ivyakulumbililako, ukwitizya amabuku nu kubapa abalumbilili, ukupwelelela ivibombelo ivyakubombezya imbombo pa nkomano, ukubomba imbombo iyabulinda pamo ukwavwapo pakuyannya Inyumba ya Bumwene. Imbombo zyosi izi, zyakulondiwa sana ukuti pachipanga ivintu vyendaghe mwandondomeko. (1 Koli. 14.40) Umwakongelezyapo, abavwilizyi bamo muchipanga bakusendamo ichigaba munkani zyo zili mu Akabuku aka Nkomano Izya Bumi Bwitu Ubwachikilisitu nu Bulumbilili sona bakunena inkani iya bantu bosi. Umwavwilizyi, angasaliwa sona ukuti amwavwange usongo uwakwenelezya kagulu kabo akabulumbilili. Akabalilo kamo, abavwilizyi bo bakubomba akiza muchipanga, bakubavwa abasongo pa mbombo yabo iyabudimi.
6. Choni cho tukubapalizya sana abavwilizyi muchipanga chitu?
6 Ka ichipanga chikupindula buli-buli ni mbombo zyo abavwilizyi bakubomba? Umuyemba yumo izina lyache u Beberly b uwa ku Bolivia akanena ukuti, “Nkubapalizya sana imbombo zyo abavwilizyi muchipanga bakubomba mwakuti nu butuli bwabo nkupindula ni nkomano. Ichifukwa cha mbombo yo bakubomba, nkukwanisya ukwimba inyimbo, ukwamulapo pa nkomano, ukuteghelezya inkani nu kwenelezya amavidiyo ni vituzi. Bakwavwa pambombo iyabulinda sona bakubavwa bo babalumikizya pa vidiyokonfelensi. Nanti inkomano zyamala, bakwavwapo pakuswefya Inyumba ya Bumwene, ukwennya ivya ndalama nu kwenelezya ukuti tuli na mabuku gho tukulondiwa. U Leslie yo akwikala ku Colombia sona umulume wache we songo wachipanga, akanena ukuti, “Nkuhoboka sana na bavwilizyi muchipanga! Abavwilizyi bakumwavwa umulume wane ukuti akwanisye ukubomba akiza imbombo zyache. Nanti abavwilizyi aba batakabangako, nge umulume wane akutangwanika sana, polelo nkubapalizya sana ichifukwa cha kwiyipa kwabo nu moyo wabo uwakwisengannya ukulonda ukumwavwa.” Tutakukayikila ukuti numwe bulo mukupalizya sana imbombo zyo abavwilizyi bakubomba muchipanga chinyu.—1 Timo. 3.13.
7. Ka tungalangizya buli-buli ukuti tukubapalizya abavwilizyi muchipanga? (Ennya sona ichituzi.)
7 Napo tungiyivwa ukuti tukubapalizya abavwilizyi, loli Ibayibolo likutulimbikisya ukuti: ‘Mulangizanje ukuti mwe bantu abakupalizya.’ (Kolo. 3.15) Usongo yumo uwachipanga izina lyache u Kristofer uwa ku Finland, akanena ukuti akupalizya muzila iyakuti, “Nkumusimbila umwavwilizyi ikadi pamo imeseji nu kubikamo isimbo sona nkutambula ichintu chimo cho akabomba cho chandimbikisya sana pamo ichifukwa cho nkupalizizya imbombo zyo akubomba.” U Pascal nu Jael bo bakwikala ku New Caledonia, akabalilo akinji bakubiputila abavwilizyi muchipanga. U Pascal akalongosola ukuti, “Umwalunulu, tukabiputila abavwilizyi nu kumupalizya ichifukwa chakuba na bakamu aba muchipanga chitu.” U Yehova akwivwa sana inyiputo ngati izi, sona vikwavwa ukuti ichipanga chosi chipindulaghe.—2 Koli. 1.11.
ABASONGO BACHIPANGA BAKUBOMBA “IMBOMBO PAKASI PAPINYU”
8. Nkimba u Pabuli akanena ukuti abasongo abamukabalilo aka Bakilisitu ababwandilo bakabombagha buli-buli? (1 Aba Tesalonika 5.12, 13)
8 Mukabalilo aka Bakilisitu ababwandilo, abasongo bakabikaghapo umoyo pakubomba imbombo muchipanga. (Belenga 1 Aba Tesalonika 5.12, 13; 1 Timo. 5.17) Bakabikaghapo umoyo ‘pakutangilila’ ichipanga umwakupangisya inkomano nu kusala ivintu ngati kabukatila kabasongo. Bakabombagha sona ivyinji nu ‘kubamanyisya’ abakamu na bayemba pakubapa ubulongozi umwambula ukufisa loli muzila iyalughano umwakuti bafighilile ichipanga. (1 Tesa. 2.11, 12; 2 Timo. 4.2) Loli abanavuli aba, bakabikaghapo sona umoyo ukuti biyavwe nu kwavwa imbumba zyabo nu kubukilila ukuba bakughoma mwabuzimu.—1 Timo. 3.2, 4; Titi 1.6-9.
9. Ka amasiku ghano, abasongo bali sona na mabudindo buli ghamo?
9 Amasiku ghano pope abasongo bakutangwanika sana. Bakubikapo umoyo pakulumbilila. (2 Timo. 4.5) Bakulangizya ichifwanikizyo ichiza umwakubikapo umoyo pakwingila mu bulumbilili, ukupanga indondomeko iya mo tungalumbililila muchigaba chitu, nu kutumanyisya mo tungabombela nanti tukulumbilila nu kumanyisya. Bakubomba sona ngati balongi abachisa bo batakulongela muchimanyani. Nanti Umukilisitu apanga ubutulanongwa ubukulu, abasongo bakubikapo umoyo ukumwavwa ukuti abe sona pabumanyani nu Yehova. Bakwenelezya sona ukuti ichipanga chibukilile ukuba chizelu. (1 Koli. 5.12, 13; Gala. 6.1) Ukuchila vyosi, abasongo bakumanyikwa sona ngati badimi. (1 Pita. 5.1-3) Bakwisengannya nu kunena akiza sana inkani izya mu Bayibolo, bakuyezya-yezya ukuti bamumanye akiza aliwesi paweka muchipanga sona bakupanga amabulendo aghabudimi. Abasongo bamo bakwavwapo pakuzenga nu kuyannya Inyumba Izya Bumwene, bakulongozya inkomano inkulu, bakubomba Mukomiti Iyakunenezannya na Bachipatala sona Mumagulu Aghakwendela Ababine pakongelezyapo pa mbombo izyamwabo zyo bali nazyo. Ukunena ubwanaloli, abasongo bakubikapo nkani umoyo pakutubombela!
10. Choni cho tukulondiwa ukubapalizya abasongo?
10 U Yehova akanenela zila ukuti abadimi bakwiza pakutupwelelela akiza sana ‘umwakuti ing’ozi zitakwiza pakoghopa pamo ukutetema.’ (Yere. 23.4) Umuyemba yumo izina lyache u Johanna, akennya ukuti amazyu agha ghabwanaloli pa kabalilo ko umama wache akabina nkani. Akanena ukuti: “Napo chikabanga chipala sana ukuti imbabuzyeko abanji mo nkwiyivwila, loli usongo yumo akanteghelezya umwabololo po nkanenagha, akiputa nune sona akansimikizya ukuti u Yehova anganite sana. Pa kabalilo aka, ntakukumbukila ndendende vyo akanena loli nkukumbukila bulo ukuti nkiyivwa ukuti ne wakufighililiwa. Nkusubila ukuti u Yehova weyo akamutuma ukuti ize anavwe pa kabalilo kache.” Ka abasongo abamuchipanga chinyu, bakabavwapo buli-buli?
11. Nkimba tungalangizya buli-buli ukuti tukubapalizya abasongo? (Ennya sona ichituzi.)
11 U Yehova akulonda ukuti tulangizyanje ukuti tukubapalizya abasongo ichifukwa cha “mbombo yiyo bakubomba.” (1 Tesa. 5.12, 13) U Henrietta yo akwikala ku Finland akanena ukuti: “Abasongo bakuba bakwisengannya ukubavwa abanji, loli vitakung’anamula ukuti bali na kabalilo akinji, amaka pamo batakukomana ni ntamyo yiliyosi pa bumi bwabo. Akabalilo kamo nkumubuzyanga bulo usongo ukuti: ‘Ka uzimenye? We songo umwiza sana. Nalondagha bulo ukuti uyimanye ifundo iyi.’” Umuyemba yumo izina lyache u Sera uwa ku Türkiye c akanena ukuti: “Abasongo bakulondiwa ukubaghomya umwakuti babukilile ukubomba akiza imbombo yabo. Cho chifukwa tungabasimbila ikadi, ukubitizya ukuti twize tulye nabo poka ichakulya pamo ukwingila nabo mu bulumbilili.” Nkimba pali usongo yumo yo mukumupalizya sana pa mo akubombela ivintu? Mulondelezye izila izyakuti mumulangize ukuti mukumupalizya sana.—1 Koli. 16.18.
Mungabaghomya abakamu bo basaliwe umwakuti babukilile ukubomba akiza imbombo yabo (Ennya indime 7, 11, 15)
ABAKWENDELA IDELA BAKUGHOMYA SANA
12. Ka ndondomeko buli yo yikaba muvipanga ivya Bakilisitu ababwandilo? (1 Aba Tesalonika 2.7, 8)
12 U Yesu Kilisitu “akabapa abantu ivyabupi” vyo vikubomba imbombo muzila iyamwabo muchipanga. Abakavwa abasongo aba ku Yelusalemu ukuti bamutume u Pabuli, u Balanabasi na banji ukuti babe bakwendela idela. (Imbo. 11.22) Chifukwa buli? Ichifukwa chakuti akalondagha ukuti baghomyanje ivipanga ngati mo abavwilizyi na basongo abachipanga bakubombela. (Imbo. 15.40, 41) Abanavuli aba bakwiyipa sana pakubomba imbombo yabo, sona akabalilo kamo bakubikapo ubumi bwabo pangozi ukuti babamanyisye nu kubaghomya abanji.—Belenga 1 Aba Tesalonika 2.7, 8.
13. Nkimba abadela bakubomba mbombo buli?
13 Akabalilo akinji, abakwendela amadela bakwenda amabulendo amatali sana. Bamo bakwenda ubulendo ubutali ukuti baye bafike kuchipanga ichamwabo. Usabata aliwesi, uwakwendela idela akunena inkani izyakupambana-pambana, ukupangisya amabulendo agha budimi, ukupangisya ulukomano ulwa bapayiniya, nu lwabasongo sona inkomano izyakwisengannya pakwingila mu bulumbilili. Akwisengannya inkani nu kupangisya inkomano izyadela ni zyachigaba. Akupangisya isukulu izyabapayiniya, akupanga indondomeko iyakuti akomane na bapayiniya bo bali mudela lyache nu kubomba imbombo izyamwabo. Akabalilo kamo ofesi iya nthambi yingamulaba ukuti apwelelele inkani yimo mwalubilo po akubikapo umoyo pakubomba bunubu.
14. Choni cho tukubapalizya sana abakwendela idela?
14 Nkimba ivipanga vikupindula buli-buli na bakwendela idela? Umukamu yumo uwa ku Türkiye akanena ukuti: “Akabalilo kosi ko uwadela atwendela, vikunavwa sana ukuti imalilaghe akabalilo akatali pakubavwa abakamu na bayemba. Pa bumi bwane, nakomana na bakwendela idela abinji sana loli nayumo-yumo yo akaboneka ukuti atakulonda ukunena nune pamo ukulangizya niyivwe ukuti wakutangwanika sana.” U Johanna yo twamutambula kubwandilo, akingila mu bulumbili nu wakwendela idela loli po akabwelagha akagha ukuti panyumba patalipo nayumo-yumo. Akanena ukuti, “Mupaka pa kabalilo aka, nchili nkukumbukila ivintu vyo vikabombiwa pisiku lila. Abakulu bane bakafuko kuchigaba cho nkikalagha nu kusamila kubunji sona nkabasoba sana. Uwakwendela idela akandimbikisya nu kunavwa ukwennya ukuti mugulu lya Yehova tungaba pabutali kwakabalilo akanandi loli muchisu ichipya tukwiza ukwikala poka kwa bwila na bwila.” Abakwendela idela abinji bakubomba umwakuyana bulo ku bakamu na bayemba bo bakubabombela.—Imbo. 20.37–21.1.
15. (a) Ukuyana nu 3 Yohani 5-8, ka tungalangizya buli-buli ukuti tukubapalizya abakwendela idela? (Ennya sona ichituzi.) (b) Choni cho tukulondiwa ukulangizya ukuti tukubapalizya abachi ababanavuli bo basaliwe, sona tungabomba buli-buli bunubu? (Ennya sona ibokosi ilyakuti “ Mubakumbuke Abachi Babo.”)
15 Umutumiwa u Yohani akamupala u Gayo ichifukwa chakulangizya umoyo uwakupokelela abakamu umwakuti babukilile nu “bulendo bwabo umwakumuhobosya u Chala.” (Belenga 3 Yohani 5-8.) Izila iya mo tungabombela bunubu, ko kumwitizyako uwakwendela idela ukuti twize tulye nawe poka ichakulya. Izila iyamwabo, ko kwivwila indondomeko iya mu bulumbilili yo yikubapo nanti uwadela akwendela ichipanga chitu. U Leslie yo twamutambula kubwandilo akalangizya ukuti akupalizya muzila iyamwabo. Akanena ukuti: “Nkwiputa kwa Yehova ukumulaba ukuti abavwe ukwagha ivintu ivyakulondiwa pa bumi. Sona une nu mulume wane tukubasimbila amakalata nu kubabuzya mo ukutwendela kwabo kwatutulila.” Tukumbukilaghe ukuti abakwendela idela bope bantu bambula ukufikapo. Akabalilo kamo bangatamiwa ichifukwa cha mbina, ukutamiwa inyinong’ono sona bangawa amaka ichifukwa cha mo ivintu vibeleye pa bumi bwabo. Loli amazyu aghachisa gho munganena pamo ichabupi ichinandi bulo cho mungabapa, vingaba we ansala uwa lwiputo lo uwakwendela idela akalaba ukuti atuliwe!—Mbupi. 12.25.
TUKULONDIWA ABANTU BO BANGABA “IVYABUPI”
16. Ukuyana na Isya Mbupingamu 3.27, nkimba malalusyo buli gho umukamu akulondiwa ukwilalusya?
16 Pachisu chosi ichapasi, tukulondiwa abakamu abinji bo bangabomba ngati “ivyabupi” mubantu. Nanti mwe mukamu uwakoziwa, ka muli na ‘maka aghakuti mungavwapo’? (Belenga Isya Mbupingamu 3.27.) Nkimba mukulonda ukuti mungaba mwavwilizyi muchipanga? Ka mungakwanisya ukubavwa abakamu na bayemba vyo bakulondiwa ngati we songo wachipanga? d Nkimba vingabombiwa ukuti musinte ivintu vimo umwakuti mulabe ukuti muye mwingile Isukulu iya Balumbilili aba Bumwene? Isukulu iyi, yingabamanyisya nu kubavwa ukuti u Yesu ababombezye akiza imbombo. Nanti mukwiyivwa ukuti mutangakwanisya amabudindo agha, mulabe kwa Yehova. Mumulabe ukuti abavwe nu muzimu wache ubuzelu ukuti mukwanisye ukubomba imbombo yiliyosi yo angabapa.—Luka 11.13; Imbo. 20.28.
17. Nkimba abantu bo “akabapa ivyabupi” balangizya ichoni ivya Yesu Kilisitu Umwene witu?
17 Amasiku ghano, abantu bo u Yesu “akabapa ivyabupi,” balangizya ukuti u Yesu akututangilila mumasiku aghabumalilo agha. (Mata. 28.20) Nkimba mutakupalizya ukuti tuli nu Mwene yo walughano, mupi, wakwivwisya sona akutupa abakamu bo bakupwelelela vyo tukulondiwa? Cho chifukwa tukulondiwa ukuyezya-yezya ukwagha amalusako aghakuti tulangizye ukuti tukubapalizya sana abanavuli bo bakubomba imbombo nu moyo wabo ghosi. Sona tutakaluvwe ukumupalizya u Yehova yo akutupa “ichabupi chosi ichiza sona ni chakufikapo.”—Yako. 1.17.
ULWIMBO 99 Ŵabali Vikwi na Vikwi
a Abasongo bo bali mu Kagulu Akakwenelezya, abavwilizyi aba Kagulu Akakwenelezya, Ikomiti iya Nthambi na banji bo bakubomba imbombo izyamwabo bope bulo “vyabupi” mu bantu.
b Amazina ghamo ghasinta.
c Pa kabalilo aka kukwitiziwa ukuti Turkey.
d Ukuti mumanye ivyinji ivya mo mungabombela ukuti mube bakwenelela ukuba mwavwilizyi muchipanga pamo usongo, ennya inkani iyakuti “Bakamu—Ka Mwakwanisya Ukuti Mungaba Bwavwilizyi Muchipanga?” ni yakuti “Bakamu, ka Mwakwanisya Ukuti Mungabomba Ngati Basongo Bachipanga?” mu Ichitembe cha Mulindilili icha Novembala 2024.
