INKANI IYAKUMANYILA 40
ULWIMBO 30 Dada Wane, Chiuta Wane na Mubwezi Wane
U Yehova ‘Akubapozya bo Umoyo Wabo Wafwantika’
‘Akubapozya bo umoyo wabo wafwantika; akupinya ivilonda vyabo nu bandeji.’—SALI. 147.3.
IFUNDO INKULU
U Yehova akubapwelelela nkani bo umoyo wabo wafwantika. Inkani iyi inti yilangizye mo u Yehova akututulila ukuti ichitima chichepe sona inti yitwavwe ukumanya mo tungabasangalusizya abanji.
1. Ka u Yehova akwiyivwa buli-buli nanti akwennya ababombi bache?
U YEHOVA akuhoboka nanti ababombi bache bakuhoboka sona vikumubaba nanti bali ni chitima. (Sali. 37.18) Akuhoboka sana nanti akwennya ukuti tukubomba chilichosi cho tungakwanisya ukuti tumubombele napo tukukomana ni ntamyo! Loli ukuchila vyosi, akutwavwa nu kutusangalusya.
2. Nkimba u Yehova akubomba buli-buli na bo umoyo wabo wafwantika, sona tungabomba ichoni ukuti tupindulaghe?
2 Pa Salimo 147.3 pakunena ukuti u Yehova ‘akupinya ivilonda’ ivya bo amoyo ghabo ghapwayuka. Pisimbo ili, u Yehova akwifwanikizya nu muntu yo akupwelelela umuntu yo avulala. Nkimba tungabomba buli-buli ukuti tupindulaghe na mo u Yehova akutupwelelela? Inong’onela ichifwanikizyo ichi. Udokotala yo ali nu luso angabomba ivyinji ukuti amwavwe umuntu yo avulala. Loli ukuti umuntu yo avulala apole, akulondiwa ukubikapo umoyo pakukonka ubulongozi ubwa dokotala. Munkani iyi, inti twennye ivintu vyo u Yehova akubabuzya bo bakukomana ni ntamyo sona inti twennye mo tungabombezezya ubulongozi bwache.
U YEHOVA AKUTUSIMIKIZYA UKUTI SWE BAPAMWANYA
3. Choni cho bamo bangiyivwa ukuti te bakulondiwa?
3 Tukwikala muchisu cho mute ulughano sona abantu abinji bakwiyivwa ukuti te bakulondiwa nkani. Umuyemba yumo izina lyache u Helen a akanena ukuti: “Nkakulila mumbumba yo yitakaba nu lughano. Ubaba akaba wankaza sona isiku lililyosi akatukomagha, polelo tukiyivwanga ukuti te swe bakulondiwa.” Ngati we Helen, lumo numwe bulo bakubabombela ivintu ivibibi, bakubanena akabibi pamo mukwiyivwa ukuti te mwe bakulondiwa. Nanti vili bunubu, chingaba chakutamya sana ukuti musubile ukuti angabapo yumo uwakuti angalangizya ukuti akubinong’onela.
4. Ukuyana nu Salimo 34.18, nkimba u Yehova akutusimikizya ichoni?
4 Napo bamo bangababombela ivibibi, loli mungaba nu lusubilo ukuti u Yehova abaghanite sona akubennya ukuti mwe bapamwanya. U Yehova ‘akuba papipi na bo umoyo wabo wafwantika.’ (Belenga Salimo 34.18.) Nanti muli ni chitima, mukumbukilaghe ukuti u Yehova akwennya ivintu ivyiza mumoyo winyu. (Yoha. 6.44) Akabalilo kosi wakwisengannya ukubavwa ichifukwa chakuti akubennya ukuti mwe bapamwanya sana kukwache.
5. Ka tukumanyilako ichoni kwa Yesu pa mo akabombelagha ivintu na bantu bo bakabonekagha ukuti bapasi?
5 Tungamanya mo u Yehova akwiyivwila umwakwennya ichifwanikizyo icha Yesu. Pa kabalilo ko akalumbililagha pachisu ichapasi, u Yesu akabombagha nabo ivintu umwachisa abantu bo bakabonekagha ukuti bapasi. (Mata. 9.9-12) Pa kabalilo ko umukolo akakola amenda ghace nu kusubila ukuti inti apole ku mbina yo akabinagha, u Yesu akamusangalusya nu kumupalizya ukuti ali nu lwitiko ulwakughoma. (Mali. 5.25-34) U Yesu akeghelela ubuntu ubwa Baba wache. (Yoha. 14.9) Mumanye ukuti u Yehova akubennya ukuti mwe bapamwanya sona akwennya inkalo inyiza zyo muli nazyo ngati ulwitiko lo mukulangizya nu lughano.
6. Ka umuntu angabomba buli-buli nanti akwiyennya ukuti te wakulondiwa?
6 Nkimba mungabomba choni nanti muchili mukwiyivwa ukuti te mwe bakulondiwa? Mubelengaghe nu kwinong’onelapo amavesi gho ghangabasimikizya ukuti mwe bakulondiwa nkani kwa Yehova. b (Sali. 94.19) Nanti mwapotwa ukukwanilisya ivintu vyo mukibikila pamo mukupotwa ukubomba ivyinji ngati mo abanji bakubombela, mutakiyipange inongwa. U Yehova atakulindilila ukuti inti mubombe ivintu vyo umwe mutangakwanisya. (Sali. 103.13, 14) Nanti mukutamiwa ichifukwa cha nkaza zyo bakabapangilapo kwisinda mutakiyipe inongwa na vyo vikabombiwa. Te mwemwe mukalonda ukuti momo vibele! Mukumbukilaghe ukuti u Yehova akwiza pakubalonga abantu bo bakubabombela abamwabo ivibibi, loli akubavwa bo bababombela ivyankaza. (1 Pita. 3.12) U Sandra, yo bakamubombelapo ivyankaza po akaba mwana munandi akanena ukuti, “Akabalilo kosi nkumulaba u Yehova ukuti anavwe ukuti niyennyanje akiza ngati mo akunenezya.”
7. Nkimba ivintu vyo tukakomana navyo kwisinda, vingatwavwa buli-buli po tukumubombela u Yehova?
7 Mutakakayikilaghe ukuti u Yehova angababombezya imbombo ukuti mubavwe abanji. U Yehova abachindikite sana pakubapa ulusako ulwakuti mube uwambombo uwamwabo pakulumbilila amazyu amiza. (1 Koli. 3.9) Ivintu vyo mwakomana navyo pa bumi bwinyu, vingabavwa ukuti mubapelelaghe abanji ichisa nu kwivwisya mo bakwiyivwila nanti bakutamiwa. Ivi vingabavwa ukuti mubombe ivyinji ukuti mubavwe. U Helen yo twamutambula kubwandilo akapokela ubutuli sona wepe akubavwa abanji. Akanena ukuti: “U Yehova akanavwa ukusinta ukufuma pakwiyennya ukuti ‘te ne wakulondiwa’ nu kwanda ukwiyivwa ukuti ne wakughaniwa sona ne wakwavwa sana.” Pa kabalilo kano, u Helen akuhoboka sana sona akubomba ubupayiniya ubwa kabalilo kosi.
U YEHOVA AKULONDA UKUTI TWITIKIZYANJE NANTI ATUHOBOKELA
8. Ka u Yehova akutusimikizya ichoni pa Yesaya 1.18?
8 Ababombi ba Yehova bamo bachili bakwiyipa inongwa na vyo bakabomba kwisinda napo vingaba ukuti vikabombiwa po bachili pakoziwa pamo bati boziwa kale. Loli tungabomba akiza sana ukukumbukila ukuti u Yehova akatupa isembe ichifukwa chakuti atughanite. Ivi vingatwavwa ukuba bakusimikizya ukuti akulonda ukuti twitikizyanje ichabupi chache ichi. U Yehova akutusimikizya ukuti nanti ‘twagholosya ivintu’ c na yuyo, atakukumbukila sona imbibi zyitu. (Belenga Yesaya 1.18.) Tukumupalizya sana u Yehova ichifukwa chakuti atughanite vyo vikupangisya ukuti atakakumbukile imbibi zyitu! Sona te akaluvye lumo ivintu ivyiza vyo tukubomba.—Sali. 103.9, 12; Hebe. 6.10.
9. Choni cho tukulondiwa ukubikapo umoyo pa vintu vyo tukubomba pa kabalilo aka sona vyo tungize tubombe muntazi mumalo mwakwennya vyo tukabomba kwisinda?
9 Nanti mukutamiwa ukuti muluvye vyo vikabombiwa kwisinda, mungabomba akiza ukubikapo umoyo pa vyo mukubomba pa kabalilo aka na vyo mungize mubombe kuntazi. Inong’onela ichifwanikizyo icha mutumiwa u Pabuli. Akiyipanga inongwa ichifukwa chakuti kwisinda akabanyozagha Abakilisitu, loli akamanya ukuti u Yehova amuhobokeye. (1 Timo. 1.12-15) Nkimba akabukilila ukukumbukila imbibi zyo akabomba kwisinda? Tutakukayikila ukuti atakamalila kabalilo akatali pakwinong’onolela vyo akabomba po akaba Mufalisi uwakuchindikiwa. (Filipi 3.4-8, 13-15) Mumalo mwache, akabikapo umoyo pakulumbilila nu kwennya mo angabombela muntazi. Ngati we Pabuli, mutangavisinta ivintu vyo vikabombiwa kwisinda. Loli mungamuchindika u Yehova ni vintu vyo mukubomba pa kabalilo aka nu kwennya ivintu ivyiza vyo abalayizizye muntazi.
10. Nkimba tungabomba ichoni nanti vyo tukabomba kwisinda vikabakalizya abanji?
10 Vingabombiwa ukuti akabalilo kamo mungatamiwa inyinong’ono na vyo mukabomba kwisinda vyo vikabapunuzya abanji. Nanti vili bunubu, choni cho chingabavwa? Mubombe chilichosi cho mungakwanisya ukuti muyannye ivintu umwakubapepesya bo mukabanangila. (2 Koli. 7.11) Mumulabe u Yehova ukuti abavwe bo mukaba. U Yehova angabavwa umwe na bo mukabakalalizya ukuti mujimbe nu kubukilila ukuba pamutende.
11. Ka twamanyilako ichoni kwa mulaghuzi u Yona? (Ennya sona pa chifwambo.)
11 Mumanyilepo pa vyo mukapuvya kwisinda, nu kumwitikizya u Yehova ukuti ababombezye imbombo muzila yiliyosi yo akulonda. Inong’onela ichifwanikizyo ichamulaghuzi u Yona. Mumalo mwakuti abuke ku Ninive ko u Chala akamutuma, u Yona akabuka kuchisu ichinji. U Yehova akamufunda, sona u Yona akamanyilapo pa vyo akapuvya. (Yona 1.1-4, 15-17; 2.7-10) U Yehova atakamukana u Yona. U Chala akamupa sona ulusako ulwakuti abuke ku Ninive, pa kabalilo aka u Yona akivwila mwalubilo sana. U Yona atakitikizya ukuti vyo akapuvya, vimupangisye ukuti apotwe ukwitikizya imbombo yo u Yehova akamupa.—Yona 3.1-3.
Pisinda apakuti umulaghuzi u Yona apona mulwanda ulwa chiswi, u Yehova akamubuzya sona ukuti abuke ku Ninive ukuti aye alumbilile ubutenga (Ennya indime 11)
U YEHOVA AKUBOMBEZYA IMBOMBO UMUZIMU UBUZELU UKUTI ATUSANGALUSYE
12. Nkimba u Yehova angatupa buli-buli umutende nanti twakomana ni ntamyo? (Aba Filipi 4.6, 7)
12 Nanti twakomana ni ntamyo, u Yehova akutusangalusya pakubombezya umuzimu wache ubuzelu. Ennya vyo vikabombiwa kwa Ron nu Carol. Umwana wabo umunyamata akighogha. Bakanena ukuti: “Tukaba ukuti twakomanapo ni ntamyo izikulu sana loli intamyo iyi yoyo yikaba nkulu nkani ukuchila zyosi. Amasiku aghinji tutakaghonagha utulo polelo tukiputagha kwa Yehova, nanti twabomba bunubu tukiyivwanga ukuti tuli nu mutende gho ghukulongosoliwa pa Aba Filipi 4.6, 7.” (Belenga.) Nanti mwakomana ni ntamyo yo yavulazya umoyo winyu, akabalilo kosi ko mungalonda mumubuzye u Yehova chilichosi cho chili kumoyo ukwendela mulwiputo. (Sali. 86.3; 88.1) Mumulabe u Yehova umwakupyanizya-pyanizya ukuti abape umuzimu wache ubuzelu. Akabalilo kosi akwiza pakubavwa.—Luka 11.9-13.
13. Ka umuzimu ubuzelu ghungatwavwa buli-buli ukuti tubukilile ukumwiputa u Yehova umwabusubaliwa? (Aba Efeso 3.16)
13 Nkimba intamyo zyabapangisya ukuti mutakabe na maka? Umuzimu ubuzelu bungabapa amaka ukuti mubukilile ukumwiputa u Yehova umwabusubaliwa. (Belenga Aba Efeso 3.16.) Ennya vyo vikabombiwa kwa muyemba yumo zina lyache u Flora. Umuyemba uyu nu mulume wache, bakabombagha ngati bamishonale po umulume wache akaleka ukuba musubaliwa nu kumazya isendwa. U Flora akati: “Ichitima chikankola sana na vyo vikabombiwa ichifukwa chakuti ntakinong’onelaghako ukuti vyovyo angambombela. Nkiputa kwa Yehova ukuti ampe umuzimu wache ubuzelu ukuti mbukilile ukujimba. U Yehova akanavwa ukuti nkwanisye ukujimba ku ntamyo yo nkakomana nayo iyi, muzila yo pabwandilo nkennyanga ukuti vitangabombiwa.” U Flora akiyivwa ukuti u Chala akamwavwa ukuti abukilile ukuba nu lusubilo sona akakwanisya ukujimba ku ntamyo zyo akakomana nazyo. Akanena sona ukuti: “Amazyu gho ghali pa Salimo 119.32 ghakabomba imbombo kwa une, gho ghakuti: ‘Inkwiza pakukonka indaghilo zyinyu nu moyo wane ghosi ichifukwa chakuti mwanavwa ukuti izyivwisye akiza.’”
14. Nkimba tungabomba buli-buli ukuti umuzimu uwa Chala ghutwavwe?
14 Nanti mwalaba umuzimu ubuzelu, ka mungabomba buli-buli ivintu umwakukolelana na vyo mwalaba? Mukulondiwa ukuti mubombaghe ivintu vyo vingapangisya ukuti umuzimu wa Chala ghubombaghe imbombo mumwinyu. Ivintu ngati ukwaghiwapo pa nkomano nu kulumbilila. Munyinong’ono zyinyu, mungizuzyamo inyinong’ono zya Yehova umwakubelenga Amazyu ghache isiku lililyosi. (Filipi 4.8, 9) Pa kabalilo ko mukubelenga Ibayibolo, mubikepo umoyo pa nkani izya bantu bo bakakomana ni ntamyo nu kwinong’onelapo mo u Yehova akabatulila ukuti bajimbe. U Sandra yo twamutambula kubwandilo, akakomana ni ntamyo izyakupambana-pambana. Akanena ukuti: “Inkani iya Jozefu yikanavwa sana. Atakitikizya ukuti injelo ni vintu ivibibi vyo akakomana nazyo vimupangisye ukuti akomannye ubumanyani bwache nu Yehova.”—Ubwa. 39.21-23.
U YEHOVA AKUTUSANGALUSYA UKWENDELA MU BAKAMU NA BAYEMBA
15. Ka bo bawenu bo bangatusangalusya sona bangatwavwa buli-buli? (Ennya sona ichituzi.)
15 Nanti twakomana ni ntamyo, abakamu na bayemba ‘bangatusangalusya nkani.’ (Kolo. 4.11) U Yehova akutulangizya ulughano ukwendela mubakamu na bayemba. Abakilisitu abamwitu bangatusangalusya umwakututeghelezya umwachisa pa kabalilo ko tukunena pamo bangatwavwa umwakupaghula akabalilo nu kuba poka nuswe. Bangatusangalusya sona umwakutubelengela ivesi limo pamo ukwiputa poka nuswe. d (Loma 15.4) Akabalilo kamo umukamu pamo umuyemba angatukumbusya mo u Yehova akwinong’onela, vyo vingatwavwa ukuti tubukilile ukujimba. Abakilisitu abamwitu bangatwavwa sona umwakutupa ichakulya pa kabalilo ko twakomana ni ntamyo.
Abamanyani abasubaliwa na bakughoma mwabuzimu, bangatusangalusya nu kutwavwa (Ennya indime 15)
16. Ka tungabomba buli-buli ukuti abanji batwavwe?
16 Akabalilo kamo ukuti abanji batutule, tukulondiwa ukubabuzya mo ivintu vibeleye pa bumi bwitu. Abakamu na bayemba bitu batughanite sana sona bakulonda ukutwavwa. (Mbupi. 17.17) Loli batangamanya mo tukwiyivwila pamo vyo tukulondiwa. (Mbupi. 14.10) Nanti mwakomana ni ntamyo yimo, mubabuzyanjeko abamanyani binyu abakughoma mwabuzimu mo mukwiyivwila. Mubavwe ukuti bamanye mo bangabatulila. Akabalilo kamo, mungasala ukuti mukomane nu songo weka pamo babili bo mukumanya ukuti mungasatuka nu kubalongosolela mo ivintu vibeleye pa bumi bwinyu. Abayemba bamo bagha ukuti chakwavwa sana ukubabuzyako abayemba abamwabo bo bakughoma mwabuzimu.
17. Nkimba ntamyo buli zyo zingapangisya ukuti tutakasangalusiwe, sona tungamalana nazyo buli-buli?
17 Mutakipaghulaghe ku banji. Akabalilo kamo ichifukwa cha ntamyo zyo tukukomana nazyo, mungiyivwa ukuti mutakulonda ukuba poka na bantu abanji. Abakamu na bayemba akabalilo kamo batangabivwisya pamo bangapotwa ukusala akiza amazyu aghakuti banene. (Yako. 3.2) Mutakitikizye ukuti intamyo zyo mukukomana nazyo, zibapangisye ukuti mupotwe ukupokela ubutuli bo mukulondiwa. Usongo yumo izina lyache u Gavin yo akutamiwa inyinong’ono, akati: “Akabalilo akinji nkwiyivwa ukuti ntakulondiwa ukuba papipi na bamanyani bane.” U Gavin, atakanyokela munyuma ichifukwa cha mo akiyivwilagha loli akapindula ichifukwa chakuti akabikapo umoyo ukuti abanje papipi na banji. Umuyemba yumo izila lyache u Amy akanena ukuti: “Pa kabalilo aka, vikuntamya ukuti imbasubile abantu ichifukwa cha vintu vimo vyo nkakomana navyo kwisinda. Loli nkumanyila ukuti imbaghanaghe nu kubasubila abakamu na bayemba bane ngati mo u Yehova akubombela. Nkumanya ukuti ivi vikumupangisya u Yehova ukuti abe wakuhoboka sona nune bulo vingampangisya ukuti imbe wakuhoboka sana.”
IVINTU VYO U YEHOVA ALAYIZIZYE VINGATUSANGALUSYA
18. Ka tukulindilila ichoni muntazi sona pa kabalilo aka tukulondiwa ukubomba ichoni?
18 Ichifukwa chakuti tukumanya ukuti lunulu, u Yehova inti amazizye zila intamyo zyosi, vikutwavwa ukuti tube nu lusubilo ulwiza ulwa vintu ivyamuntazi. (Ubuvu. 21.3, 4) Ivintu vyosi ivyakubaba vyo tukukomana navyo pa kabalilo aka, vitakwiza ‘pakukumbukiliwa sona mumoyo.’ (Yesa. 65.17) Ngati mo twenezya munkani iyi, pa kabalilo aka u Yehova ‘akupinya ivilonda vyitu nu bandeji.’ U Yehova atupiye ivintu ivyinji vyo vingatwavwa ukuti tusangalusiwe ichifukwa chakuti atughanite. Mutakakayikilaghe ukuti u Yehova “akubapasikizya.”—1 Pita. 5.7.
ULWIMBO 7 Yehova Ndiyo Nkhongono Zithu
a Amazina ghasinta.
b Ennya ibokosi ilyakuti “ U Yehova Akubennya Ukuti mwe Bapamwanya.”
c Ukuti ‘tugholosye ivintu’ nu Yehova, tukulondiwa ukupinduka umwakumulaba ukuti atuhobokele sona tusintaghe inkalo zyitu. Nanti twapanga ubutulanongwa ubukulu, tukulondiwa sona ukulaba ubutuli ku basongo abachipanga.—Yako. 5.14, 15.
d Umwakufwanikizya, ennya amasimbo gho ghali pasi pa mutu uwakuti “Kwenjerwa” sona “Chisangulusko” mwibuku ilyakuti Malemba Ghakovwira pa Umoyo Withu Wachikhristu.
