INKANI IYAKUMANYILA 41
ULWIMBO 13 Khristu Ntchakuwonerapo Chithu
Vyo Tukumanyilako pa mo u Yesu Akabombela pa Masiku 40 Aghabumalilo Pachisu Ichapasi
“Akabonekela mumasiku 40 mutubalilo utwinji, pakubasimikizya ukuti naloli akaba mumi. Abene bakamwennya, po akanena nabo nizya Bumwene ubwa Chala.”—IMBO 1.3.
IFUNDO INKULU
Inti tumanyile mo tungeghelela ichifwanikizyo cho u Yesu akalangizya, mumasiku 40 aghabumalilo pachisu ichapasi.
1-2. Choni cho chikabombiwa ku bamanyili babili aba Yesu po bakabukagha ku Emabusi?
Pakaba pa Nisani 16, mu 33 C.E. Abamanyili ba Yesu bakabonekagha ukuti bali ni chitima sona bakoghopagha. Abamanyili bamo babili bakafumagha ku Yelusalemu nu kubuka ku Emabusi, akaya ko kali nu bulendo ubwa makilomita 11 ukufuma ku Yelusalemu. Abanavuli aba bakadandaghulagha, ichifukwa chakuti u Yesu akaba ukuti afwa. Ulusubilo lo bakaba nalo ulwa vyo u Mesiya angababombela lukamala. Loli ichintu chimo ichakuhobosya chikabombiwa ku banavuli bala.
2 Umuntu yumo uwachilendo akabagha nu kwanda ukwenda nabo. Abamanyili bala bakanda ukumulongosolela ivintu vyo vikabombiwa kwa Yesu. Umuntu uwachilendo uyu akanda ukunenezannya nabo ivintu vyo abamanyili aba batakaviluvya lumo, “Ukwandila mumabuku agha Mozesi mupaka mumasimbo ghosi agha Balaghuzi,” akabalangosolela ichifukwa cho u Mesiya akenela ukutamiwa nu kufwa. Abanavuli bala bakati bafika ku Emabusi, umuntu uwachilendo yula akivumbula ukuti we Yesu yo azyukite ku bufwe! Inong’onela mo abamanyili bala bakahobokela pakumanya ukuti u Mesiya ali nu bumi!—Luka 24.13-35.
3-4. Choni cho chikabombiwa ku bamanyili aba Yesu sona munkani iyi inti tunenezannye choni? (Imbombo 1.3)
3 Mumasiku 40 aghabumalilo pachisu ichapasi, u Yesu akabonekela ku bamanyili bache amabulendo amingi bulo. (Belenga Imbombo 1.3.) Pa kabalilo kala, u Yesu akabavwa abamanyili bache bo bakaba ni chitima sona bakoghopagha, ukuba bakuhoboka, ukuba nu lusubilo sona ukuba basilikali abajimvu pakulumbilila nu kumanyisya ivya Bumwene. a
4 Tungapindula nanti tukumanyila mo u Yesu akabombela ivintu pa kabalilo kala. Mu nkani iyi inti tumanyile mo u Yesu akabombezya akabalilo aka, (1) pakubaghomya abamanyili bache, (2) pakubavwa ukuti bivwisyange Amasimbo, sona (3) pakubamanyisya ukuti babe na mabudindo. Ifundo yiliyosi inti yitwavwe ukwennya mo tungeghelela ichifwanikizyo cha Yesu.
UKUBAGHOMYA ABANJI
5. Choni cho abamanyili ba Yesu bakalondiwanga ukulimbikisiwa?
5 Abamanyili ba Yesu bakalondiwanga ukulimbikisiwa. Chifukwa buli? Ichifukwa chakuti bamo bakaba ukuti balekite inyumba zyabo, imbumba zyabo, na mabizinesi ghabo ukuti bamukonke u Yesu nu moyo wabo ghosi. (Mata. 19.27) Bamo bakababombelagha ivintu akabibi ichifukwa chakuti bakasinta nu kuba bamanyili ba Yesu. (Yoha. 9.22) Bakajimba ku vintu vyosi ivi ichifukwa chakuti bakasubilagha ukuti u Yesu akaba we Mesiya yuyo akalayiziwa. (Mata. 16.16) Loli u Yesu akati aghoghiwa, batakamanyagha vyo inti vibombiwe.
6. Nkimba u Yesu akabomba ichoni akati azyuka bulo?
6 Tutakukayikila ukuti u Yesu pakubennya abamanyili bache, chitakaba chimanyisyo ichakuti bate nu lwitiko loli akabivwisya ukuti momo vibaghiye ukubela. Cho chifukwa akati azyuka bulo, akanda ukubaghomya abamanyani bache. Umwakufwanikizya, akabonekela kwa Maliya Magadalena po akalilagha kwipumpa lya Yesu. (Yoha. 20.11, 16) Akabonekela sona ku bamanyili babili bo balongosoliwa ku bwandilo bwa nkani iyi. Sona akabonekela kwa mutumiwa u Pitala. (Luka 24.34) Ka tungamanyila ichoni ku chifwanikizyo icha Yesu? Za twennye vyo vikabombiwa akati azyuka bulo.
7. Ngati mo pakunenela pa Yohani 20.11-16, nkimba u Yesu akennya ukuti u Maliya akubomba choni, sona ivi vikamupangisya ukuti abombe choni? (Ennya sona ichituzi.)
7 Belenga Yohani 20.11-16. Pa Nisani 16 pandabi-ndabi nkani, abakolo abasubaliwa bakabuka kwipumpa lya Yesu. (Luka 24.1, 10) Za twennye vyo u Maliya Magadalena akabomba. Po u Maliya akafikagha akagha ukuti mwipumpa mute nachimo-chimo. Akachimbila nu kuya ukumubuzya u Pitala nu Yohani, po akabuka nabo kwipumpa. Bakati basimikizya ukuti mwipumpa mute nachimo-chimo, abanavuli bala bakanyokela ku nyumba zyabo. Loli u Maliya atakabwela. Akikala pala-pala uku akulila. Atakamanyagha ukuti u Yesu akumwennya. Akennyanga amasozi agha mukolo umusubaliwa uyu sona vikamukwafya sana. Cho chifukwa akabonekela kwa Maliya, nu kubomba ichintu ichipepe bulo cho chikamughomya sana. Akanena nawe, sona akamupa imbombo iyakuti aye ababuzye abakamu bache ukuti azyuka.—Yoha. 20.17, 18.
Mumweghelele u Yesu umwakumanya nu kubalangizya ichisa bo bakomana ni ntamyo (Ennya indime 7)
8. Ka tungamweghelela buli-buli u Yesu?
8 Ka tungamweghelela buli-buli u Yesu? Nanti tukubomba ngati mo u Yesu akabombelagha, tungabavwa abakamu na bayemba bitu ukuti babukilile ukumubombela u Yehova umwakubivwisya nu kunena nabo umwachisa. Ennya ichifwanikizyo icha muyemba yumo izina lyache u Jocelyn yo umuzuna wache akafwa pangozi. Akanena ukuti: “Nkaba wachitima ukwa myezi iyinji.” Napo vikaba bunubu umukamu nu muchi wache bakamwitizya ku nyumba yabo, bakamuteghelezya umwachisa nu kumusimikizya ukuti wapamwanya sana mumaso gha Chala. U Jocelyn akati: “Nkiyivwa ukuti u Yehova ababombezya imbombo ukuti banefyemo munyanja iyakwibila nkani, nu kumbika muboti. Ivi vikanavwa ukuti mbukilile ukumubombela u Yehova.” Nuswe bulo tungabavwa abanji umwakubateghelezya nanti bakulongosola mo bakwiyivwila mumoyo wabo, umwakunena nabo umwachisa nu kubavwa ukuti babukilile ukumubombela u Chala.—Loma 12.15.
MUBAVWE ABANJI UKUTI BIVWISYE AMASIMBO
9. Ka abamanyili ba Yesu bakakomana ni ntamyo buli, sona u Yesu akabavwa buli-buli?
9 Abamanyili ba Yesu bakitikizya nu kughabombezya imbombo Amazyu gha Chala. (Yoha. 17.6) Loli u Yesu akati aghoghiwa pikwi ilya kutamiliwapo ngati chigabenga, abamanyili bache bakavulungana inyinong’ono. U Yesu akazyaghannya ukuti abamanyili bache bakakayikilagha, te chifukwa chakuti bakaba ni myoyo imibibi, loli chifukwa chakuti batakivwisyanga. (Luka 9.44, 45; Yoha. 20.9) Akabamanyisya ukuti bivwisyange vyo Amasimbo ghakung’anamula. Ennya mo akabombela bunubu po akabonekela ku bamanyili babili bo bakabukagha ku Emabusi.
10. Ka u Yesu akabasimikizya buli-buli abamanyili bache ukuti akaba we Mesiya? (Luka 24.18-27)
10 Belenga Luka 24.18-27. Ennya ukuti u Yesu atakababuzya lubilo abanavuli bala ukuti we Mesiya. Loli akabalalusya amalalusyo. Chifukwa buli? Lumo akalondagha banene vyo vili munyinong’ono zyabo. Bakamubuzya ukuti bakalindililagha ukuti u Yesu inti abapoke Abaizilayeli ku bulaghili ubwa Baloma. Bakati banena vyo vikaba munyinong’ono zyabo, u Yesu akabombezya Amasimbo ukuti abavwe ukwivwisya vyo vikabombiwa. b Pisiku lila-lila ichamabwila, u Yesu akabamanyisya abamanyili abamwabo izya bwanaloli ubu. (Luka 24.33-48) Nkimba tungamanyilako choni pa nkani iyi?
11-12. (a) Ka tukumanyilako ichoni pa mo u Yesu akamanyisizyanga ubwanaloli ubwa mu Bayibolo? (Ennya sona ichituzi.) (b) Ka umuntu yo akamumanyisyanga u Nortey Ibayibolo akamwavwa buli-buli?
11 Ka tungamweghelela buli-buli u Yesu? Ichabwandilo nanti mukubamanyisya abamanyili binyu Ibayibolo, mubalalusyange amalusyo umwamahala ukuti mumanye vyo vili munyinong’ono zyabo. (Mbupi. 20.5) Nanti mwamanya mo bakwiyivwila, mubavwe mo bangaghila Amasimbo gho ghangabavwa ukuyana namo ivintu vibeleye pabumi bwabo. Pisinda pache, tutakababuzyanje bulo ivyakubomba. Tubavwe ukuti bamanye mo bangabombezezya ifundo izya mu Bayibolo pabumi bwabo. Ennya vyo vikabombiwa kwa mukamu yumo izina lyache u Nortey uwa ku Ghana.
12 Pa kabalilo ko u Nortey akaba ni myaka 16, akanda ukumanyila Ibayibolo. Ivi vikapangisya ukuti abamumbumba yache bande pakumususya. Choni cho chikamwavwa ukuti abukilile ukumanyila? Yo akamumanyisyanga Ibayibolo akabombezya isimbo ilya Matayi chaputala 10, ukuti amwavwe ukumanya ukuti Abakilisitu ababwanaloli bakukomana ni ntamyo. U Nortey akanena ukuti, “Bakati banda pakunjivya, nkasimikizya ukuti namwagha ubwanaloli.” Akamwavwa sona ukuti inong’onelaghe Matayi 10.16 ukuti abanje muchevu sona uwamuchizi nanti akunenezanya na bamumbumba yache ivyakukwafannya na vyo akusubila. Akati oziwa, u Nortey akalondagha ukuti abe mupayiniya, loli u baba wache akalondagha ukuti aye ku yunivesite. Mumalo mwakuti amubuzye vyo akulondiwa ukubomba, akamulalusya amalalusyo ukuti inong’onelepo ifundo izya mu Bayibolo. Choni cho chikakonkapo? U Nortey akasala ukuti ande ubupayiniya ubwakabalilo kosi. Ivi vikapangisya ukuti ubaba wache amuchimbizye panyumba. Ka u Nortey akiyivwa buli-buli? Akati, “nkamanya ukuti nasala akiza ivintu. Nanti nuswe bulo tukupaghula akabalilo ukuti tubavwe abanji na Masimbo, vingabavwa ukuti babe Bakilisitu bakughoma mwabuzimu.—Efe. 3.16-19.
Mumweghelele u Yesu pakubavwa abanji pakwivwivwisya Amasimbo (Ennya indime 11) e
MUBAVWE ABAKAMU UKUTI BABE “VYABUPI MU BANTU”
13. Ka u Yesu akabomba buli-buli ukuti imbombo iya Baba wache yibukilile ukubombiwa? (Aba Efeso 4.8)
13 Pa kabalilo ko u Yesu akaba pachisu ichapasi, akimwivwilagha Ubaba wache uwakumwanya. (Yoha. 17.4) Loli u Yesu atakaba nu moyo uwakuti ‘nanti ukulonda ichintu chimo chende akiza, ukulondiwa uchibombe wemwene.’ Ukwa myaka yitatu nu hafu iyabulumbilili bwache, akabamanyisya abanji mo bangabombela imbombo iyi. Bo achili ukunyokela kumwanya, u Yesu akabapa abamanyili bache ubudindo ubwakupwelelela ing’ozi izya Yehova nu kutangilila pambombo iya bulumbilili, lumo bamo mwa bamanyili aba bakaba ni myaka iya muma 20. (Belenga Aba Efeso 4.8.) Ka u Yesu akabombezya buli-buli amasiku 40 aghabumalilo pakubavwa abanavuli abakwiyipa, abasubaliwa na bakulimbikila ‘ukuba ivyabupi mu bantu’?
14. Pa masiku 40 aghabumalilo gho akaba pachisu ichapasi, ka u Yesu akabavwa buli-buli abamanyili bache? (Ennya sona ichituzi.)
14 U Yesu akabapanga abamanyili bache ubulongozi muzila iya lughano. Umwakufwanikizya, akamanya ukuti bamo mwa bamanyili bala bakakayikilagha po akabapa ubulongozi. (Luka 24.25-27; Yoha. 20.27) Akabavwa sona ukuti bakulondiwa ukubikapo umoyo pa mbombo iya budimi ukuchila imbombo izya kumubili. (Yoha. 21.15) Akabakumbusya ukuti batakayanisye amalusako gho bali nagho pakumubombela u Yehova na gho abanji bangaba nagho. (Yoha. 21.20-22) Sona akabagholosya panyinong’ono imbibi zyo bakaba nazyo izyakukwafannya nu Bumwene nu kubavwa ukuti babikepo umoyo pakulumbilila amazyu amiza. (Imbo. 1.6-8) Nkimba abasongo bangamanyilako ichoni kwa Yesu?
Mumweghelele u Yesu pakubavwa abanavuli ukuti babe bakwenelela ukupokela amabudindo aghakongelezya (Ennya indime 14)
15-16. (a) Ka abasongo bangamweghelela u Yesu muzila buli? Longosola. (b) Ka u Patrick akapindula buli-buli nu bulongozi bo akapokela?
15 Ka abasongo bangamweghelela buli-buli u Yesu? Bakulondiwa ukubamanyisya nu kubavwa abanavuli ukuti babe bakwenelela ukupokela amabudindo. c Abasongo bakulondiwa ukukumbukila ukuti abanavuli bo bakubamanyisya bambula ukufikapo. Bakulondiwa ukubapa ubulongozi umwalughano, ukuti abakamu abachinyamata bamanye ukuti bakulondiwa ukuba bakwiyisya, basubaliwa na bakwisengannya ukubabombela abanji.—1 Timo. 3.1; 2 Timo. 2.2; 1 Pita. 5.5.
16 Ennya mo umukamu yumo izina lyache u Patrick akapindulila nu bulongozi bo bakamupa. Pakuba wachinyamata akabalilo akinji akanenagha umwakunyonkola sona atakabombagha ivintu na bantu umwachisa, na kubayemba bulo. Usongo yumo uwachipanga akennya intamyo yo u Patrick akaba nayo po akamupa ubulongozi umwalughano loli umwambula ukufisa. U Patrick akati: “Nkahoboka sana na mo usongo uyu akabombela. Nkakalalagha sana nanti abakamu bamo bakupokela amabudindo gho nune nkaghalondagha. Ubulongozi bo usongo akampa, bukanavwa ukwennya ukuti nkulondiwa ukubomba ivintu umwachisa na bakamu na bayemba mumalo mwakubikapo umoyo ukuti imbe nu budindo muchipanga.” Ivi vikapangisya ukuti u Patrick asaliwe ukuwa we songo uwachipanga, pa kabalilo ko akaba ni myaka iya muma 20.—Mbupi. 27.9.
17. Ka u Yesu akalangizya buli-buli ukuti akabasubilagha abamanyili bache?
17 U Yesu akabapa abamanyili imbombo iyakuti balumbililaghe nu kumanyisya. Lumo abamanyili bakiyivwa ukuti batangakwanisya imbombo yo akabapa. Loli u Yesu atakabakayikila ukuti bangapotwa ukubomba imbombo iyi. U Yesu akababuzya umwakubasimikizya nu lusubilo losi ukuti: “Ukuyana namumo Utata akantumila, po momumo nane inkubatumila.”—Yoha. 20.21.
18. Ka abasongo bangamweghelela buli-buli u Yesu?
18 Ka abasongo bangamweghelela buli-buli u Yesu? Abasongo bo bamenye ivyinji bakubagabila abanji ivya kubomba. (Filipi 2.19-22) Umwakufwanikizya, abasongo bangapanga indondomeko iyakuti babagabile abachinyamata imbombo iyakuti baswefye nu kuyannya ivintu vyo vikomanikite pa Nyumba iya Bumwene. Pisinda pakubagabila imbombo, bangalangizya ukuti bakubasubila pakubamanyisya nu kusubila ukuti inti bakwanisye ukubomba akiza. Umukamu yumo izina lyache u Matthew yo we songo yo asaliwa mwalunulu, akanena ukuti akubapalizya abasongo bo bamenye ivyinji bo bakamumanyisya mo angabombela imbombo yache nu kusubila ukuti inti akwanisye. Akati, “Nkapindulagha sana nanti bakwennya ivintu vyo nkupuvya ukuti chigaba chakumanyisizya nu kunavwa ukuti imbombe akiza.” d
19. Nkimba twasimikizya ukubomba ichoni?
19 U Yesu akabombezya amasiku 40 aghabumalilo pachisu ichapasi, pakubaghomya, ukubavwa nu bamanyisya abanji. Nuswe bulo tukulondiwa ukubikapo umoyo pakukonka ichifwanikizyo chache. (1 Pita. 2.21) Ichakuhobosya chakuti inti atwavwe ukuti tubombe bunubu. Ukuchila vyosi atulayizizye ukuti: “Inkwiza pakuba namwe akabalilo kosi mupaka kubumalilo ubwachisu ichapasi.”—Mata. 28.20.
ULWIMBO 15 Lumbani Mwana Wakwamba wa Yehova!
a Amazyu Amiza na mabuku aghanji agha mu Bayibolo, ghakulongosola umwakupyanizya-pyanizya vyo vikabombiwa pa kabalilo ko u Yesu akazyuka nu kubonekela: ku banji ngati kwa Maliya Magadalena. (Yoha. 20.11-18); ku bakolo abanji (Mata. 28.8-10; Luka 24.8-11); ku bamanyili babili (Luka 24.13-15); kwa Pitala (Luka 24.34); ku batumiwa ukupaghulako u Tomasi (Yoha. 20.19-24); ku batumiwa ukongelezyako u Tomasi (Yoha. 20.26); ku bamanyili 7 (Yoha. 21.1, 2); kubamanyili abakupululila 500 (Mata. 28.16; 1 Koli. 15.6); kwa muzuna wache u Yakobo (1 Koli. 15.7); ku batumiwa bosi (Imbo. 1.4); sona ku batumiwa abanji kupipi na ku Betaniya. (Luka 24.50-52) Abaghiye ukuti akabonekela sona ku bantu abanji bo bakamukonkagha mutubalilo utwakupambana-pambana to Ibayibolo litatambuye.—Yoha. 21.25.
b Ukuti mumanye amabulaghuzi gho ghakanena ukwiza ukwa Mesiya, ennya inkani iyakuti, “Kasi Mauchimi Ghakuyowoya vya Mesiya Ghakulongora Nadi Kuti Yesu Wakaŵa Mesiya?” pa jw.org.
c Akabalilo kamo, abanavuli abamyaka iya muma 20 bangasaliwa nu kuba bakwendela idela. Napo vili bunubu, loli bakulondiwa ukuba tasi basongo abachipanga ukuti bamanyile ivyinji.
d Ukuti mwennye amasakizyo aghakongelezyapo agha mo mungabatulila abakamu abachinyamata, ukuti babe bakwenelela ukupokela amabudindo, munyokelemo mu Ichitembe cha Mulindili icha Ogasiti 2018, pp. 11-12, indime 15-17, sona icha Epulelo 15, 2015, pp 3-13.
e AMAZYU AGHAKULONGOSOLA IVITUZI: Pisinda pakumwavwa ukwivwisya Amasimbo, umuntu yo akumanyila Ibayibolo akutagha ivintu ivyakupangila dekoleshoni pa Kilisimasi.
