INKANI IYAKUMANYILA 43
ULWIMBO 90 Tikhwimiskane Yumoza na Munyake
Vyo Vingabavwa Nanti Mwanda Ukukayikila
“Muviyelaye ivintu vyosi.”—1 TESA. 5.21.
IFUNDO INKULU
Inti tumanyile vyo tungabomba nanti twanda ukukayikila ukuti u Yehova akutupwelelela.
1-2. (a) Ka ababombi ba Yehova bamo banganda ukukayikila ichoni? (b) Nkimba munkani iyi, inti tunenezannye choni?
AKABALILO kamo, abantu abamisinku yosi bope bakukayikila. a Umwakufwanikizya, inong’onela ukaboni uwachinyamata yo anda ukukayikila nanti u Yehova ali nawe ni mbombo. Anganda ukukayikila ukuti oziwe. Pamo inong’onela umukamu uwachasongo yo pa kabalilo ko akaba wachinyamata akasala ukubika ivya Bumwene pabwandilo mumalo mwakubomba imbombo ku chisu ichi. Pa kabalilo aka, ali bulo ni ndalama izyakupwelelela imbumba yache, po anganda ukukayikila nanti po akaba wachinyamata akasala akiza. Sona inong’onela umuyemba umugosi yo ate na maka. Angawa amaka ichifukwa chakuti akupotwa ukubomba ivintu ngati mo akabombelagha po akaba mulindu. Mwilalusizyepo lumo amalalusyo ngati aghakuti: ‘Nkimba u Yehova akunennya une? Ka u Yehova akuvyennya ivintu vyo nkubomba umwakwiyipa, ukuti vyapamwanya? Nkimba nchili ne wakulondiwa kwa Yehova?’
2 Nanti tungapotwa ukwamula amalalusyo agha, vingakwafya akiputile kitu. Munkani iyi, inti twennye mo ifundo zya mu Bayibolo zingatutulila nanti twanda ukukayikila, (1) waghe u Yehova ali nuswe ni mbombo, (2) nanti vyo tukasala kwisinda vikaba akiza, pamo (3) nanti tuchili swe bakulondiwa kwa Yehova.
VYO VINGATWAVWA NANTI TWANDA UKUKAYIKILA
3. Nkimba zila buli yo yingatwavwa nanti tukukayikila?
3 Izila yoka yo yingatwavwa nanti twanda ukukayikila, ko kwennya mu Mazyu gha Chala gho ghangatwavwa ukwagha amaansala agha malalusyo gho tuli nagho. Nanti tungabomba bunubu tungalimbikisiwa, ukukula mwabuzimu nu kuba ni vintu vyosi vyo vikulondiwa ukuti “twimaye nkani palwitiko.”—1 Koli. 16.13.
4. Ka tungaviyezya buli-buli “ivintu vyosi”? (1 Aba Tesalonika 5.21)
4 Belenga 1 Aba Tesalonika 5.21. Ennya ukuti Ibayibolo likutubuzya ukuti “muviyelaye ivintu vyosi.” Ka tungabomba buli-buli bunubu? Tungabomba bunubu nanti tukusimikizya ukuti vyo tukusubila vyabwanaloli nanti tukuyanisya na vyo Ibayibolo likunena. Umwakufwanikizya, inong’onela ivya munyamata yo anganda ukayikila nanti wakulondiwa kwa Chala. Ka angitikizya bulo ukuti vyo akusubila vyabwanaloli? Awe, abaghiye ‘ukuviyela ivintu vyosi’ umwakuti amanye mo u Yehova akwinong’onela.
5. Ka ‘tukwivwa’ buli-buli ukuti u Yehova akwamula amalalusyo ghitu?
5 Pa kabalilo ko tukubelenga Amazyu gha Chala ‘tukwivwa’ ukuti u Chala akunena nuswe. Loli tukulondiwa ukukubomba ivyinji ukuti tumanye inyinong’ono zyache. Nanti tukubelenga Ibayibolo tukulondiwa ukubikapo umoyo pa nkani yo yingamula ilalusyo lyitu. Tungafufuza ivya nkani iyi pakubombezya ivibombelo vyo igulu likupeleka. (Mbupi. 2.3-6) Tungiputa kwa Yehova ukuti atwavwe pa kabalilo ko tukufufuza nu kutwavwa ukuti tumanye inyinong’ono zyache. Pisinda pache, tungalondelezya ifundo izya mu Bayibolo nu kwennya mo tungazibombezezya pa bumi bwitu ukuyana na mo ivintu vibeleye. Tungapindula sona nanti tukwinong’onela inkani izya mu Bayibolo izya bantu bo bakakomana ni ntamyo iyakuyana ni yitu.
6. Nkimba ukwaghiwapo pa nkomano akabalilo kosi kungatwavwa buli-buli?
6 Tukwivwa sona ukuti u Yehova akunena nuswe pa kabalilo ko tuli pa nkomano. Nanti tukwaghiwapo pa nkomano akabalilo kosi, tungivwa ifundo yimo ukwendela munkani pamo mundemanga yo yumo anganena yo yingatwavwa ukuti tumalane ni ntamyo iyakukayikila. (Mbupi. 27.17) Za twennye mo tungabombela nanti twanda ukukayikila.
NANTI MWANDA UKUKAYIKILA WAGHE U YEHOVA ALI NUMWE NI MBOMBO
7. Nkimba bamo bangilalusya lalusyo buli?
7 Mwilalusizyepo lumo ukuti, ‘ka u Yehova akunennya une?’ Nanti mwanda ukwiyennya ukuti mute ni mbombo, munganda ukwinong’ona ukuti vitangabombiwa ukuba pabumanyani nu Mupeli uwa vintu vyosi, vyo vingapangisya ukuti mupotwe ukukwanilisya vyo mukulonda ukubomba. Umwene u Devedi wepe abaghiye ukuti akaba ni nyinong’ono izyakuyana bulo. Akaswigha ukuti u Yehova akubennya abantu nu kulalusya ukuti: ‘Mwe Yehova, ka umuntu wewenu ukuti mumwinong’onelaghe, umwana wa muntu wewenu ukuti mubikeko amahala?’ (Sali. 144.3) Ka tungamula buli-buli ilalusyo ili?
8. Ukuyana nu 1 Samueli 16.6, 7, 10-12, Ka u Yehova akwennya choni mu bantu?
8 Ibayibolo likutubuzya ukuti u Yehova akabennya abantu bo abanji bakabenyanga ukuti te bakulondiwa. Umwakufwanikizya, u Yehova akamutuma u Samuyeli ku nyumba iya Jese ukuti aye amupakazye umwana wache yumo, uwakuti ize abe we mwene uwa Izilayeli. U Jese akaba na bana abalumendo 8, polelo akabitizya abana bache 7 ukuti bakomane nu Samuyeli loli atakamwitizya u Devedi yo akaba munandi nkani pa bosi. b Loli u Devedi weyo u Yehova akamusala. (Belenga 1 Samueli 16.6, 7, 10-12.) U Yehova akamumanyagha akiza u Devedi ukuti akaba munyamata yo akachindikagha sana ivintu ivyabuzimu.
9. Choni cho chingabavwa ukusimikizya ukuti u Yehova ali numwe ni mbombo? (Ennya sona ichituzi.)
9 Inong’onela mo u Yehova alangizizya kale ukuti akubennya. Akubapa ubulongozi bo bukukolelana na vyo mukulondiwa. (Sali. 32.8) Choni cho akubomba bunubu? (Sali. 139.1) Nanti mukubombezya ubulongozi bwa Yehova nu kwennya mo akubatulila, vingabavwa ukusimikizya ukuti ali numwe ni mbombo. (1 Syambu. 28.9; Imbo. 17.26, 27) U Yehova akwennya vyo mukuyezya-yezya ukubomba. Akwennya inkalo inyiza zyo muli nazyo sona akulonda ukuti mube mumanyani wache. (Yere. 17.10) Akulonda ukuti numwe bulo mwitikizye ukuba mumanyani wache.—1 Yoha. 4.19.
‘Nanti ukumulondelezya [u Yehova] po wepe akwiza ukwaghiwa kukwako.’ —1 Syambu. 28.9 (Ennya indime 9) c
NANTI MWANDA UKUKAYIKILA WAGHE MUKASALA AKIZA IVINTU
10. Nanti tukwinong’onelapo pa vintu vyo tukasala kwisinda, ka tungilalusya malalusyo buli?
10 Akabalilo kamo, bamo banganda ukwinong’onelapo waghe bakasala akiza ivintu kwisinda. Lumo bakasala ukuleka imbombo yimo inyiza pamo ibizinesi ukuti bamubombele u Yehova umwakukwana. Pangaba ukuti pendapo akabalilo akatali pamo imyaka iyinji. Bangaba ukuti bakwennya abantu bo bakabombagha nabo imbombo ukuti bali ni vintu ivyinji sona bakuhoboka nu bumi ubwapamwanya. Ivi vingapangisya ukuti bande ukwinong’ona ukuti: ‘Ka ukwiyipa ko nkapanga ukuti imubombele u Yehova kwakulondiwa? Pamo ka vyapangisya ukuti induze ivintu vimo?’
11. Nkimba yo akasimba Salimo 73 akatamiwanga ni choni?
11 Nanti mukwilalusya amalalusyo aghakuyana bulo, ennya mo yo akisimba Salimo 73 akiyivwilagha. Akennyanga ukuti abantu bo batakumubombela u Yehova bakwikala ubumi ubwiza, bakabi sona bakabonekagha ukuti bate ni ntamyo nayimo-yimo. (Sali. 73.3-5, 12) Ichifukwa chakuti akennyanga ukuti ivintu vikubendela akiza, akanda kwennya ukuti ukumubombela u Yehova kute ni mbombo. ‘Akatamiwanga isiku lililyosi’ ni nyinong’ono izyakunyosezya kwisinda izi. (Sali. 73.13, 14) Nkimba akabomba buli-buli ukuti amalane ni nyinong’ono izi?
12. Ukuyana nu Salimo 73.16-18, choni cho chikamwavwa uwamasalimo ukuti asinte inyinong’ono zyache?
12 Belenga Salimo 73.16-18. Uwamasalimo akingila mumalo aghakupaghuliwa agha Yehova. Akati ingila mumalo agha, akanda ukwinong’ona akiza. Akivwisya ukuti napo ivintu vikabendelagha akiza, loli batakaba nu lusubulo nalumo-lumo ulwa vintu ivyiza ivyamuntazi. Akati ivwisya, akaba nu mutende sona akamanya ukuti ukubika ivintu ivyabuzimu pabwandilo cho chintu chiza sana. Ivi vikamwavwa ukuti abukilile ukumubombela u Yehova.—Sali. 73.23-28.
13. Ka mungagha buli-buli umutende nanti mwanda ukwinong’ona ukuti mutakasala akiza? (Ennya sona ichituzi.)
13 Nuswe bulo Amazyu agha Chala ghangatwavwa ukuti tube nu mutende uwa mumoyo. Buli-buli? Mwinong’onele ivintu ivyapamwanya vyo muli navyo, ukongelezyapo ubukabi ubwakumwanya nu kuyanisya ni vintu vyo abantu aba muchisu ichi bo bakuboneka ukuti bakuhoboka bali navyo. Bakuhoboka bulo ni vintu vyo bali navyo pa kabalilo aka, ichifukwa chakuti patalipo nachimo-chimo cho bakulindilila muntazi. Loli kwa umwe ivintu vyo u Yehova abalayizizye, vyapamwanya sana ukuchila ichintu chilichosi cho munginong’ona. (Sali. 145.16) Inong’onela sona ifundo iyi, ka mukumanya akiza mo ubumi bwinyu nge bubeleye nanti mukasalagha ivintu umwakupambana na mo mukasalila? Ichintu choka cho tukumanya chakuti: Bosi bo basala ivintu ichifukwa chakuti bamughanite u Yehova na bapalamani babo, akabalilo kosi ivintu vikubendela akiza.
Mwinong’onelaghe ivintu vyo u Yehova abalayizizye (Ennya indime 13) d
NANTI MWANDA UKUKAYIKILA WAGHE MWE BAKULONDIWA KWA YEHOVA
14. Choni cho bamo bangiyivwa ukuti bate ni mbombo, sona lalusyo buli lyo bangilalusya?
14 Ababombi ba Yehova bamo, bakwiyivwa ukuti te bakulondiwa ichifukwa chakuti bagosi, bakubina-bina pamo balemaye. Intamyo izi, zingabapangisya ukuti biyivwange ukuti te bakulondiwa nkani kwa Yehova. Lumo bangilalusya ukuti, ‘nkimba nchili ne wakulondiwa kwa Yehova?’
15. Nkimba yo akasimba Salimo 71 akasimikizya ichoni?
15 Umuntu yo akasimba Salimo 71, wepe akiyivwanga umwakuyana bulo. Akiputa ukuti: ‘Mutakandeke neka nanti amaka ghane ghachepa.’ (Sali. 71.9, 18) Uwamasalimo, akasimikizya ukuti nanti angabukilila ukumubombela u Chala umwabusubaliwa, u Yehova akwiza pakumutangilila nu kumwavwa. Umuntu uyu akamanya ukuti u Yehova, akuhoboka na bantu bo bakuyezya-yezya ukubomba chilichosi cho bangakwanisya ukuti bamubombele napo ivintu vingaba ukuti vite akiza pabumi bwabo.—Sali. 37.23-25.
16. Ka u Yehova akubennya buli-buli abagosi? (Salimo 92.12-15)
16 Mwebagosi, mwennyanje ivintu ngati mo u Yehova akuvyenezya. Angabavwa ukuti mukwanisye ukubomba ivintu ivyabuzimu napo akabalilo kamo mukutamiwa mumubili. (Belenga Salimo 92.12-15.) Mumalo mwakulimbana ni vintu vyo mutangakwanisya ukubomba, mubikepo umoyo pa vintu vyo mungakwanisya ukubomba. Umwakufwanikizya, mungabaghomya abanji ni chifwanikizyo chinyu ichiza ichakuba basubaliwa na mo mukubombela ivintu. Mungababuzyako abanji mo u Yehova abasungila ukwa myaka iyinji na vyo vikubavwa ukusubila ukuti ivintu vyo atulayizizye vikwiza pakukwanilisiwa. (1 Pita. 3.12) Swebosi tuli ni chintu chimo cho tungamupa u Yehova na banji, ukusita ukusendela mo ivintu vibeleye pabumi bwitu.
17. Choni cho mutakulondiwa ukwiyanisya na banji?
17 Nanti mukwiyivwa ukuti mutakumubombela ivyinji u Yehova, mumanye ukuti akupalizya sana chilichosi cho mukukwanisya ukubomba. Lumo munganda ukuyanisya vyo mukubomba na vyo abanji bakubomba. Mutakulondiwa ukubomba bunubu! Chifukwa buli? Ichifukwa chakuti, u Yehova atakuyanisya abantu. (Gala. 6.4) Umwakufwanikizya, u Maliya akamupa u Yesu ichakubupi, cho ghakaba mafuta aghakudula sana. (Yoha. 12.3-5) Umwakupambana na vyo u Maliya akabomba, umukolo umufwilwe akasopa isalabazya zibili mutempeli zyo tukaba tundalama utunandi sana. (Luka 21.1-4) Loli u Yesu akennya ukuti ivyabupi vyosi ivi, vikalangizya ukuti bali nu lwitiko. Umwakuyana bulo, u Baba wache u Yehova akuhoboka na chilichosi cho mukukwanisya ukubomba ichifukwa chakuti mukwiyipa sona mumughanite napo umwe mungennya ukuti vyo mukubomba vinandi bulo.
18. Choni cho chingatwavwa ukuti tuleke ukukayikila? (Ennya sona ibokosi ilyakuti “ Amazyu gha Yehova Ghangabavwa Ukuti Muleke Ukukayikila.”)
18 Akabalilo kamo aliwesi anganda ukukayikila. Ngati mo twenezya, Ibayibolo lingatwavwa ukuti tumalane ni ntamyo iyi. So mubombe chilichosi cho mungakwanisya ukuti mumalane ni ntamyo iyi sona mube nu lusubilo mumalo mwakukayikila. U Yehova abamenye akiza sana. Akupalizya chilichosi cho mukumubombela sona wakwisengannya ukubasaya. Mube bakusimikizya ukuti abaghanite sona akubapwelelela ababombi bache bosi bo basubaliwa.
ULWIMBO 111 Vifukwa Vyakuŵira na Chimwemwe
a AMAZYU GHO GHALONGOSOLIWA: Munkani iyi tukunenezannya ukukayikila ko kukupangisya ukuti twiyivwange ukuti te swe bakulondiwa kwa Yehova pamo nanti tukukayikila waghe tukasala akiza ivintu kwisinda. Ukukayikila uku te mutundu uwakukayikila ko Ibayibolo likunena ukwakulangizya ukuti tute nu lwitiko mwa Yehova ni vintu vyo atulayizizye.
b Napo Ibayibolo litakutubuzya imyaka iyenecho yo u Devedi akaba nayo pa kabalilo ko u Yehova akamusalagha, loli tutakukayikila ukuti akaba mwana munandi.—Ennya Ichitembe cha Mulindilili icha Chitumbuka icha Seputembala 1, 2011, pp. 29, indime 2.
