Ka akabalilo kamo vibatamizyepo lumo ukukumbukila ifundo zyo mwamanyila mwalunulu? Akabalilo akinji ivi vikubombiwa kwa aliwesi uwa uswe. Choni cho chingabavwa? Munyokelaghemo mu fundo izikulu.

Po mukumanyila, mwimililagheko panandi nu kwinong’onela ifundo izikulu zyo mwamanyila. Ennya vyo umutumiwa u Pabuli akababuzya bo akabasimbila ukalata wache ukuti babombe umwakuti abavwe ukuti bivwisye akiza po akasimba ukuti: “Ifundo iyenecho yiyo tukunena yo iyi.” (Hebe. 8.1) Ichifukwa chakuti akanena amazyu agha, akabavwa bo bakamuteghelezyanga ukwivwisya vyo akang’anamulagha, sona ukumanya ukuti chilichosi cho inti anene chakukolelana.

Nanti mwamala pakumanyila, mungapaghula akabalilo pamo 10 minisi ukuti mwinong’onelepo ifundo inkulu zyo mwamanyila. Nanti mutakukumbukila vyo mwamanyila mwennye sona utumitu utunandi-nandi pamo mubelenge amazyu aghabwandilo pa ndime yiliyosi ukuti mukumbukile. Nanti mwamanyila ichintu cho chachilendo kwa umwe muyezye ukuchilongosola mu mazyu aghinyu na ghinyu. Nanti mukunyokelamo mu fundo izikulu zyo mwamanyila, te vibavwe bulo ukuti mukumbukilaghe loli inti vibavwe sona ukwennya mo mungabombezezya sona ifundo izi pabumi bwinyu.