INYIMBO zikaba zyakulondiwa sana mukikalile aka Baizilayeli. Akabalilo akinji, Ibayibolo likunena ukuti abantu bakimbagha inyimbo pakubombezya ivibombelo ivyakupambana-pambana. Umwakufwanikizya, ichigaba ichikulu icha Bayibolo chipangiwe ni nyimbo, ngati ibuku ilya Salimo, Ulwimbo Ulukulumba ni Nguto ghasimbiwe ngati nyimbo. Ibuku limo lyo likulongosola mo ubumi bukabela mukabalilo akakale, likunena ukuti Ibayibolo likulangizya akiza ukuti “Abaizilayeli bakabombezyanga inyimbo muvyakubombiwa ivyakupambana-pambana pa bumi bwabo.”—Music in Biblical Life

Inyimbo pa bumi bwabo ubwi siku ni siku. Abaizilayeli bakimbagha inyimbo ukuti balangizye mo bakwiyivwila. (Yesa. 30.29) Abakolo bakalizyanga utung’oma nu kwimba inyimbo umwakuhoboka, bakatyongagha mumalusekelo sona nanti abasilikali babo bawina inkondo. (Balo. 11.34; 1 Samu. 18.6, 7; 1 Nyafya. 1.39, 40) Nanti yumo afwa, Abaizilayeli bakimbagha sona inyimbo izyakulangizya ukuti bali ni chitima. (2 Syambu. 35.25) Ibuku limo likanena ukuti “chakwivwika ukuti Abaizilayeli bakazighanagha sana inyimbo.”—McClintock and Strong’s Cyclopedia.

Ukwimba inyimbo kunyumba iya chimwene. Abamwene Abachiizilayeli, bakahobokagha sana nanti bakuteghelezya inyimbo. Umwene u Sauli akamwitizya u Devedi ukuti aye kunyumba iyachimwene ukuti aye amwimbilaghe inyimbo. (1 Samu. 16.18, 23) Pisinda pache, u Devedi akati aba we mwene, akapanga ivibombelo ivyakwimbila, akasimba inyimbo sona akapanga indondomeko iyakuti abantu bimbaghe pitempeli lya Yehova. (2 Syambu. 7.6; Amo. 6.5) Umwene u Solomoni wepe akasala abanavuli na bakolo bo bakimbagha munyumba yache iyachimwene.—Ndumbi. 2.8.

Inyimbo pakwiputa. Akabalilo kosi Abaizilayeli bakimbagha inyimbo pakumwiputa u Yehova. Pa tempeli ku Yelusalemu, pakaba abanavuli 4,000 bo bakimbagha inyimbo. (1 Syambu. 23.5) Bakalizyanga ivintu vyo vikabonekagha ngati vimbale ivyamukuba, ivyakwimbila ivya vingwe, amagitala na vuvuzela. (2 Syambu. 5.12) Loli te abakwimba aba bene bo bakabombezganga inyimbo pakumwiputa u Yehova. Abaizilayeli abinji bakimbagha inyimbo zyo zikitiziwanga ukuti Inyimbo Izyakukwelela ku Tawuni nanti bakubuka ku lusekelo ku Yelusalemu. (Sali. 120–134) Sona ukuyana ni vyakusimba ivya Bayuda, Abaizilayeli bakimbagha Inyimbo Izya Masalimo a pa kabalilo aka Chakulya Icha Pasika.

Inyimbo zichili zyakulondiwa sana pakasi pa bantu ba Chala amasiku ghano. (Yako. 5.13) Tukwimba inyimbo ichifukwa chakuti lubazu lumo ulwakumwiputa u Yehova. (Efe. 5.19) Inyimbo zikutwavwa sana ukukolelana na Bakilisitu abamwitu. (Kolo. 3.16) Sona zikutughomya nanti twakomana ni ntamyo. (Imbo. 16.25) Ukwimba inyimbo, zila inyiza sana iyakulangizya ukuti tuli nu lwitiko mwa Yehova sona tukulangizya ukuti tumughanite sana.