INKANI IYAKUMANYILA 38
ULWIMBO 25 Ŵanthu Ŵapadera
Ka Mukubikako Amahala ku vyo Mukusokiwa?
“Weka akwiza pakusendiwa, po uyunji yula akwiza pakulekiwa.”—MATA. 24.40.
IFUNDO INKULU
Inti tunenezanye vyo tukumanyilako ku vyili vitatu vyo u Yesu akanena ivyakukwafannya na kabalilo aka bulongi bo bukwiza ukuba ku bumalilo ubwa chisu ichi.
1. Choni cho inti chibombiwe mwalunulu?
TUKWIKALA mukabalilo ko ivintu vikusinta sana! Lunulu u Yesu akwiza pakumulonga umuntu aliwesi. U Yesu akalongosola vyo vikwiza pakubombiwa bo ubulongi ubu buchili butambombiwe. Akanena ‘ichimanyisyo’ ichakulangizya ukubapo kwache ukwakusita ukuboneka sona ivyakukwafyannya nu “bumalilo ubwa chisu ichapasi.” (Mata. 24.3) Ubulaghuzi ubu bukwaghiwa mwibuku ilya Matayi chaputala 24 nu 25, Maliko chaputala 13 nu Luka chaputala 21.
2. Nkimba tukulondiwa ukubikako amahala ku choni sona choni cho ivi vingatwavwa?
2 U Yesu akanena ivyili vitatu ukuti atusoke. Akanena ichili icha ng’ozi ni mbuzi, icha balindu abamahala na bapunganu ni cha matalenti. Ichili chilichosi chikutwavwa ukwivwisya ukuti mo umuntu akubombela ivintu, vikwiza pakukwafya ubulongi bwache. Po tukunenezannya ivyili ivi, za twennye vyo tukumanyilapo na mo tungavibombezezya imbombo. Ichabwandilo inti tunenezannye ichili ichakunena ivya ng’ozi ni mbuzi.
ING’OZI NI MBUZI
3. Ka u Yesu akwiza pakubalonga lighi abantu?
3 Mu chili icha ng’ozi ni mbuzi, u Yesu akalongosola ukuti akwiza ukulonga abantu ukuyana na vyo bakubomba pisinda pakwivwa amazyu amiza sona ukuyana na vyo bakubomba pakwavwa abakamu bache abapakaziwa. (Mata. 25.31-46) Pa kabalilo ‘akantamyo inkulu,’ akwiza ukupeleka ubulongi ubu po inkondo iya Alamagedoni yichili ukubombiwa. (Mata. 24.21) U Yesu akwiza pakupaghula bo bakubavwa abapakaziwa ku bo batakubavwa, ngati mo umudimi akupaghulila ing’ozi ku mbuzi.
4. Ukuyana nu Yesaya 11.3, 4, choni cho tungaba bakusimikizya ukuti u Yesu akwiza pakubalonga akiza abantu? (Ennya sona icha pa chifwambo.)
4 Amabulaghuzi agha mu Bayibolo, ghakulangizya ukuti u Yehova amusalite u Yesu ukuba mulongi yo akwiza ukulonga mubugholosu. (Belenga Yesaya 11.3, 4.) Akwennya inkalo izya bantu, mo bakubombela ivintu na mo bakunenela na bantu abanji, ukongelezyapo mo bakubombela ivintu na bakamu bache abapakaziwa. (Mata. 12.36, 37; 25.40) U Yesu akwiza pakubamanya akiza sana bo bakabavwanga abakamu bache abapakaziwa pa mbombo yabo. a Bo bali ngati ng’ozi, bakubatula abakamu ba Kilisitu umwakubavwa pa mbombo iyakulumbilila. Bo bakubavwa muzila yiniyi bakwiza pakulongiwa ukuti ‘bagholosu’ sona bakwiza ukupokela ubumi “ubwa bwila na bwila” pachisu ichapasi. (Mata. 25.46; Ubuvu. 7.16, 17) Ichi chakuhobosya sana ku bo bakubukilila ukuba basubaliwa! Nanti pa ntamyo inkulu biza babukilila ukuba basubaliwa mupaka pabumalilo, amazina ghabo ghakwiza pakusimbiwa “mwibuku ilya bumi.”—Ubuvu. 20.15.
Muntazi, u Yehova akwiza pakulonga aliwesi pamwene ukuti ali ngati ng’ozi pamo ali ngati mbuzi (Ennya indime 4)
5. Nkimba tukumanyilako choni kuchili icha ng’ozi ni mbuzi sona bo bawenu bo bakulondiwa ukubikako amahala kuchili ichi?
5 Mulangizyanje ukuti mwe basubaliwa. Ichili icha Yesu icha ng’ozi ni mbuzi chikunena nkani ivya bantu bo bali nu lusubulo ulwakwiza ukwikala pachisu ichapasi. Batakulangizya bulo ulwitiko lwabo pakubavwa abakamu ba Kilisitu pa mbombo iyakulumbilila, loli bakubukilila ukuba basubaliwa nu kwitikizya ubulongozi ubwakufuma ku kagulu akanandi aka bakamu abapakaziwa bo u Yesu asalite. (Mata. 24.45) Loli bo bali nu lusubilo ulwakubuka kumwanya, bope bakulondiwa ukubikako amahala ku butenga ubwakusoka bo buli mu chili ichi. Chifukwa buli? Ichifukwa chakuti bope bulo u Yesu akwennya inkalo zyabo, mo bakubombela ivintu na mo bakunenela. Sona bope bulo bakulondiwa ukulangizya ukuti basubaliwa. Tukunena bunubu ichifukwa chakutiu Yesu akanena sona ivyili vibili vyo vili nu bulongozi ubwakusoka ku bapakaziwa. Tukwagha sona ivyili ivi mu Matayi chaputala 25. Pa kabalilo aka, za tunenezannye ichili ichakunena ivya balindu abamahala na bapunganu.
ABALINDU ABAMAHALA NA BAPUNGANU
6. Ka abalindu 5 bakalangizya buli-buli ukuti bamahala? (Matayi 25.6-10)
6 Mu chili icha balindu, u Yesu akanena ivya balindu 10 bo bakabuka ukuti baye bakomane nu sibwinga. (Mata. 25.1-4) Bosi bakaba nu lusubilo ukuti bakuya pakuba poka nu sibwinga pa lusekelo lyache ulwa sendwa. U Yesu akalongosola ukuti abalindu 5 bakaba “bamahala” sona abanji 5 bakaba “bapunganu.” Abalindu abamahala bakaba bakwisengannya sona bakaba maso. Bakaba bakwisengannya ukumulindilila umwenesendwa sona bakaba na vyosi vyo vikulondiwa napo angafika umwakuchedwa pakasi pabusiku. Cho chifukwa bakaghula amafuta ukuti inyale zyabo zyakaghe pabusiku. Sona bakaghula amafuta aghamwabo aghapalubazu aghakuti ghangabavwa napo umwenesendwa angachedwa. Cho chifukwa bakaba bakwisengannya ukuti inyale zyabo zibukilile ukwaka. (Belenga Matayi 25.6-10.) Pa kabalilo ko umwenesendwa akafikagha, abalindu abamahala bakaba bakuhoboka ukwingila nawe mulusekelo lwache ulwa sendwa. Umwakuyana bulo, Abakilisitu abapakaziwa bo bakwisengannya nu kubukilila ukuba maso mupaka po u Yesu akwiza ukubalonga ukuti basubaliwa, bakwiza ukuba poka nu Yesu yo Mwenesendwa mu Bumwene bwache kumwanya. b (Ubuvu. 7.1-3) Nkimba ku balindu 5 abapunganu ivintu vikaba buli-buli?
7. Choni cho chikabombiwa ku balindu 5 abapunganu sona chifukwa buli?
7 Umwakupambana na balindu abamahala, abalindu 5 abapunganu batakaba bakwisengannya po umwenesendwa akafikagha. Inyale zyabo zikaba papipi ukuzima sona batakaba na mafuta aghamwabo aghapalubazu aghakuti bangabikamo. Bakati bamanya ukuti umwenesendwa ali papipi ukwiza, bakafuma ukuti baye baghule amafuta. Umwenesendwa akafika po abene bachili ukwiza. Umwenesendwa akati afika, “abalindu 5 babo bakiyannya bala bakinjila nawe mulusekelo nu kwighalila ichighi.” (Mata. 25.10) Pisinda pache, abalindu abapunganu bakati babwelako nu kulonda ukwingila munyumba, umwenesendwa akababuzya ukuti: “Awe naloli intabamenye.” (Mata. 25.11, 12) Abalindu aba batakaba bakwisengannya ukumulindilila umwenesendwa na po angachedwa. Nkimba abapakaziwa bakumanyilako choni?
8-9. Nkimba abapakaziwa bakumanyilako ichoni kuchili icha balindu? (Ennya sona ichituzi.)
8 Mulangizyanje ukuti mwe bakwisengannya sona muli maso. U Yesu atakanena ukuti pakwiza ukuba magulu mabili aghabapakaziwa, ukuti igulu limo likwiza ukuba lyakwisengannya ukulindilila mupaka pabumalilo ubwa chisu ichi sona limo litakwiza ukuba lyakwisengannya. Mumalo mwache, akalongosola ivintu vyo vikwiza pakubombiwa ku bapakaziwa nanti te bakwisengannya ukujimba umwabusubaliwa mupaka pabumalilo. Batakwiza ukupokela umuvwalo wabo nanti te bakwisengannya. (Yoha. 14.3, 4) Iyi nkani yakulondiwa sana! Aliwesi akulondiwa ukubikapo umoyo pakwivwila ubutenga ubwakusoka, bo buli mu chili icha balindu napo ulusubilo lwitu lwakumwanya pamo pachisu ichapasi. Tukulondiwa ukubukilila ukuba maso nu kwisengannya ukuba wakujimba mupaka pabumalilo.—Mata. 24.13.
9 Akati anena ichili icha balindu pakulongosola ifundo iyakuti tukulondiwa ukubukilila ukuba bakwisengannya nu kuba maso, u Yesu akanena sona ichili ichamwabo icha matalenti. Ichili ichi chikulangizya ukulondiwa ukwakulimbikila.
Aliwesi angabomba akiza ukubikako amahala ku mazyu aghakusoka gho ghali mu chili icha balindu umwakuba wakwisengannya nu kuba maso nu kujimba mupaka pabumalilo (Ennya indime 8-9)
AMATALENTI
10. Ka abambombo babili bakalangizya buli-buli ukuti basubaliwa? (Matayi 25.19-23)
10 Mu chili icha matalenti, u Yesu akanena ivya bambombo babili bo bakaba basubaliwa kwa mwene wabo na yo atakaba musubaliwa. (Mata. 25.14-18) Abambombo babili bakalangizya ukuti basubaliwa pakubikapo umoyo pakongelezya ichuma icha mwene wabo. Po akaba ukuti achili pakuchula, akabasubalila nu kubapa amatalenti zyo zikaba ndalama izyinji sana. Abambombo babili abasubaliwa bakalimbikila nu kubombezya umwamahala indalama zyo bakabapa. Choni cho chikabombiwa? Umwene wabo akati abwelako akagha ukuti bongelezyapo indalama izyamwabo pamwanya pa ndalama zyo akabapa. Umwene wabo akabapala sana nu kubabuzya ukuti, “zagha kuno tusekelele poka.” (Belenga Matayi 25.19-23.) Loli ka ivintu vikaba buli-buli ku wambombo uwabutatu? Nkimba akabomba buli-buli ni ndalama yo umwene wache akamupa?
11. Choni cho chikabombiwa kuwambombo “mukata” sona chifukwa buli?
11 Uwambombo uwabutatu akapokela italenti lyoka loli akaba “mukata.” Umwene wache akalindililagha ukuti inti abombezye italenti ili umwamahala. Loli uwambombo uyu akakumbila pasi. Umwene wache akati abwelako ko akabuka, patakabapo nachimo-chimo cho akongelazyapo patalenti lyo akamupa. Uwambombo uyu atakabomba akiza ivintu. Mumalo mwakuti amupepesye umwene wache ichifukwa chakuti akapotwa ukongelezyapo italenti pa lyo akamupa, uwambombo uyu akamubuzya umwene wache ukuti ‘we muntu umukali.’ Uwambombo uyu, umwene wache atakahoboka nawe. Ukuchila vyosi bakamufyula italenti lyo akamupa nu kumutaghila kuzi ku nyumba iya mwene wache.—Mata. 25.24, 26-30.
12. Ka abambombo babili abasubaliwa bakwimila abawenu amasiku ghano?
12 Abambombo babili abasubaliwa bakwimila Abakilisitu abapakaziwa bo basubaliwa. Umwene wabo u Yesu akwiza pakubitizya ukuti “zagha kuno tusekelele poka.” Abakilisitu abapakaziwa bo basubaliwa, bakupokela umuvwalo wabo kumwanya pakuzyuka ukwabwandilo. (Mata. 25.21, 23; Ubuvu. 20.5b) Ichifwanikizyo icha wambombo umubibi, chikubasoka abapakaziwa. Buli-buli?
13-14. Nkimba abapakaziwa bakumanyilako choni kuchili icha matalenti? (Ennya sona ichituzi.)
13 Mulangizyanje ukuti mwe bakulimbikila. Ukuyana na mo vibeleye mu chili icha balindu, mu chili icha matalenti u Yesu atakanenagha ukuti abapakaziwa bakwiza ukuba bakata. Mumalo mwache akalongosola vyo vingabombiwa nanti baleka ukuba bakulimbikila. “U Chala akabitizya sona akabasala” loli bakwiza ukupotwa ukwagha umuvwalo wabo sona batakwiza ukubitikizya ukuti bingile mu Bumwene ubwa kumwanya.—2 Pita. 1.10.
14 Ivyili ivya Yesu ivyakukwafannya na balindu na matalenti, vikulangizya akiza ukuti Abakilisitu bosi abapakaziwa bakulondiwa ukwisengannya sona ukuba maso nu kubukilila ukulimbikila. Loli ka u Yesu akanena sona chilichosi cho chingabasoka abapakaziwa? Inga chilipo! Amazyu gho u Yesu akanena pa Matayi 24.40, 41 ghakunena sona ivyakukwafannya nu bulongi ubwabumalilo ku bapakaziwa.
U Yesu akuba wakuhoboka sana nanti abapakaziwa bakubukilila ukulimbikila (Ennya indime 13-14) d
WENU YO “AKWIZA PAKUSENDIWA”?
15-16. Ka pa Matayi 24.40, 41 pakulangizya buli-buli ukuti abapakaziwa bakulondiwa ukubukilila ukuba maso?
15 Po akaba ukuti achili atanenite ivyili vitatu, u Yesu akalongosola ubulongi ubwa bumalilo ku bapakaziwa bo akwiza ukulangizya ukuti akuhoboka nabo. Akanena ivya bantu babili bo bakabombagha mumughunda ni vya bakolo babili bo bakasyanga palwala. Muvyakubombiwa vyosi ivi, abantu babili bakabombagha imbombo yoka, loli u Yesu akanena ukuti “weka akwiza pakusendiwa po uyunji yula akwiza pakulekiwa pala-pala.” (Belenga Matayi 24.40, 41.) Pisinda pache, akabalimbikisya bo bakamukonkagha ukuti: “Po mubanje maso pakuti mutalimenye isiku lilyo u Mwene winyu akwizila.” (Mata. 24.42) U Yesu akanena ivyakuyana bulo ati anena ichili icha balindu. (Mata. 25.13) Ka inkani izi zikukolelana? Inga, vikulangizya ukuti zikukolelana. Abapakaziwa abasubaliwa bene bobo bakwiza “pakusendiwa,” u Yesu akwiza pakubapokela nu kwingila nabo Mubumwene ubwa kumwanya.—Yoha. 14.3.
16 Mulangizyanje ukuti muli maso. Umupakaziwa aliwesi yo atangabukilila ukuba maso mwabuzimu, atangize abe poka na bamwabo “abasaliwa.” (Mata. 24.31) Abantu bosi aba Chala ukusita ukusendela ulusubilo lo bali nalo, babaghiye ukwennya amazyu agha Yesu agha ukuti ghakubasoka ukuti babukilile ukuba maso nu kubukilila ukuba basubaliwa.
17. Choni cho tutakulondiwa ukupasya nanti u Yehova abasala bamo nu kubapakazya nu muzimu wache ubuzelu?
17 Tumumenye akiza sana u Yehova, cho chifukwa tukusubila ubulongi bwache. Polelo, tutakulondiwa ukupasya nanti u Yehova asala Abakilistu bamo ukuba bapakaziwa mumasiku ghitu ghano. c Tukumbukilaghe ichifwanikizyo icha Yesu cho akanena ichakukwafannya na bambombo bo bakitiziwa umwakuchedwa ukuti baye babombe imbombo mumughunda. (Mata. 20.1-16) Bo akabitizya umwakuchedwa, pabumalilo ubwisiku bakapokela amalipilo aghakuyana nagha bo akabitizya pandabi-ndabi. Umwakuyana bulo, vitakusendela akabalilo po umuntu akasaliwa nu kupakaziwa, loli bosi bakwiza ukupokela umuvwalo uwakuyana bulo kumwanya nanti biza balongiwa ukuti basubaliwa.
MUBIKAGHEKO AMAHALA KU MAZYU AGHAKUSOKA
18-19. Nkimba mu vyili ivi twamanyilamo choni?
18 Nkimba twanenezannya choni? Bo bali nu lusubilo ulwakwiza ukwikala pachisu ichipasi, ichili icha ng’ozi ni mbuzi chikubavwa ukuti bakulondiwa ukubukilila ukuba basubaliwa kwa Yehova pa kabalilo aka, na pa ntamyo inkulu. Kuntazi, u Yesu akwiza pakubalonga abasubaliwa ukuti bakwenelela ukwingila “mubumi ubwa bwila na bwila.”—Mata. 25.46.
19 Twanenezannya sona ivyili vibili vyo vili nu butenga ubwakubasoka abapakaziwa. Mu chili icha Yesu icha balindu abamahala na bapunganu, abalindu 5 bakalangizya ukuti bamahala. Bakaba bakwisengannya sona bakaba maso pakulindilila pakuba na chilichosi cho chikalondiwanga. Loli abalindu abapunganu batakaba bakwisengannya. Cho chifukwa umwenesendwa akakana ukuti bingile nawe mulusekelo. Nuswe bulo tukulondiwa ukuba bakwisengannya ukulindilila mupaka po u Yesu akwiza ukumazizya ichisu ichibibi ichi. Tubaghiye ukubomba bunubu, napo tungalindilila ukwa kabalilo akatali. Sona mu chili icha matalenti twamanyilamo ivya bambombo babili abasubaliwa bo bakalimbikilagha. Bakabikapo umoyo pakubomba imbombo vyo vikapangisya ukuti umwene wabo ahoboke nabo. Loli umwene akamukana uwambombo yo akaba mukata. Ka tukumanyilako choni? Tukulondiwa ukubukilila ukubikapo umoyo pakumubombela u Yehova mupaka pabumalilo. Twanenezannya sona mo abapakaziwa bangabombela ukuti balangizye ukuti bakubukilila ukuba maso ukuti bize ‘basendiwe’ nu Yesu nu kupokela umuvwalo wabo kumwanya. Abakilisitu aba, bakulindilila umwachinyonywa ‘ukukomana kwabo’ nu Yesu kumwanya. Pisinda apakuti inkondo iya Alamagedoni yabombiwa, bakwiza ukuba poka nu Yesu umwenesendwa kulusekelo ulwa sendwa iya mwana uwa Ng’ozi.—2 Tesa. 2.1; Ubuvu. 19.9.
20. Nkimba u Yehova akwiza ukubabombela choni bo bakubukilila ukwivwila amazyu aghakusoka?
20 Napo ubulongi bwapalamila sana, pate ivifukwa ivyakoghopela. Nanti twabukilila ukuba basubaliwa, Ubaba witu uwalughano uwakumwanya akwiza pakutupa ‘amaka ukuchila gho tuli nagho’ umwakuti ‘tungimilila pamaso pa Mwana uwa muntu.’ (2 Koli. 4.7; Luka 21.36) Napo ulwitiko lwitu lungaba lwakuya kumwanya pamo lwakwikala pachisu ichapasi, tungamuhobosya Ubaba witu nanti tukubukilila ukuba maso na mazyu aghakusoka gho ghali mu vyili vyo u Yesu akanena. Ichifukwa chakuti u Yehova ali ni chisa ichikulu nkani atakwiza pakuzimya izina lyitu “mwibuku lyache” ilya bumi.—Dani. 12.1; Ubuvu. 3.5.
ULWIMBO 26 Mukachitira Ine
a Ennya inkani iyakuti “Nkimba Tukumanya Ichoni pa Nkani iya mo u Yehova Akwiza Pakubalongela Abantu Muntazi?” mu Ichitembe cha Mulindilili icha Meyi 2024.
b Ukuti mumanye ivyinji ennya inkani iyakuti “‘Muŵenge Maso’ Nyengo Zose” mu Ichitembe cha Mulindilili icha Chitumbuka icha Malichi 15, 2015.
d AMAZYU AGHAKULONGOSOLA IVITUZI : Umuyemba umupakaziwa akumumanyisya Ibayibolo umukolo uwachilindu yo amwagha mu bulumbilili.
