INKANI IYAKUMANYILA 36
ULWIMBO 89 Pulikirani Mutumbikike
“Mubombaye Zizyo Amazyu Ghakunena”
‘Loli mubombaye zizyo amazyu ghakunena, mutakivwange bulo.’—YAKO. 1.22.
IFUNDO INKULU
Inkani iyi te yitwavwe bulo ukuba ni chinyonywa icha kubelenga Amazyu gha Chala isiku lililyosi, loli inti yitwavwe ukuti twinong’onelaghepo nu kughabombezya umwakukwana pabumi bwitu.
1-2. Choni cho chikubapangisya ababombi ba Chala ukuti bahobokaghe? (Yakobo 1.22-25)
U YEHOVA nu Mwana wache umughaniwa, bakulonda ukuti tubanje bakuhoboka. Yo akasimba Salimo 119.2 akanena ukuti: ‘Bakuhoboka babo bakusunga vyo akubakumbusya, bo bakumulondelezya nu moyo wabo ghosi.’ U Yesu akanena sona ukuti: ‘Bakuhoboka babo bakwivwa amazyu gha Chala nu kughasunga!’—Luka 11.28.
2 Ababombi ba Yehova bakuhoboka. Chifukwa buli? Pali ivifukwa ivyinji ivyakuhobokela, loli ichifukwa choka ichakulondiwa sana chakuti tukubelenga Amazyu gha Chala akabalilo kosi nu kubombezya imbombo vyo twamanyila.—Belenga Yakobo 1.22-25.
3. Ka tukupindula buli-buli nanti tukubombezya vyo twabelenga mu Mazyu gha Chala?
3 Tukupindula sana nanti tukubomba “zizyo amazyu ghakunena.” Izila yoka yakuti tukumanya ukuti tukumuhobosya u Yehova. Ichifukwa chakuti tukumuhobosya u Yehova, vikutupangisya ukuti tube bakuhoboka. (Ndumbi. 12.13) Nanti tukubombezya vyo twamanyila mu Mazyu gha Chala, vikutwavwa ukuti tubombaghe akiza ivintu mumbumba nu kuba pabumanyani ubwakughoma na Bakilisitu abamwitu. Ivi vyovyo vibaghiye ukuti vikubombiwa pa bumi bwinyu. Ukuchila vyosi tukuleghuka intamyo zyo abantu bo batakukonka izila zya Yehova bakukomana nazyo. Naloli tukukolelana na vyo Umwene u Devedi akanena. Akati atambula indaghilo nu bulongi bwa Yehova mulwimbo lwache, akamalizya ukuti: ‘Yuyo akuvisunga akusayiwa sana.’—Sali. 19.7-11.
4. Choni cho chingaba chakutamya ukubomba zizyo Amazyu gha Chala ghakunena?
4 Ubwanaloli bwakuti chitakuba chipepe akabalilo kosi ukubomba zizyo Amazyu gha Chala ghakunena. Napo twe bakutangwanika sana, loli tukulondiwa ukupaghula akabalilo akakubelengela nu kumanyila Ibayibolo umwakuti twivwisye vyo Yehova akulonda ukuti tubombaghe. Za twennye amasakizyo ghamo gho ghangatwavwa ukuti tubelengaghe Ibayibolo akabalilo kosi. Inti twennye sona vyo vingatwavwa ukuti twinong’onelaghepo pa vyo twabelenga nu kwennya izila iya mo tungavibombezezya imbombo pabumi bwitu.
MUPAGHULE AKABALILO AKAKUBELENGELA AMAZYU GHA CHALA
5. Ka mabudindo buli gho tuli nagho gho tukumalilapo akabalilo akatali?
5 Ababombi ba Yehova abinji, bakuba bakutangwanika sana. Bakumalila akabalilo akatali pakupwelelela ivintu vyo Ibayibolo likunena ukuti vyakulondiwa sana. Umwakufwanikizya, twe binji tukubomba imbombo ukuti twiyavwe nu kwavwa imbumba zyitu. (1 Timo. 5.8) Abakilisitu abinji bakupwelelela abakamu babo bo bakubina na bagosi. Aliwesi akulondiwa ukupwelelela ubumi bwache, vyo vikulondiwa akabalilo akakukwana. Ukongelezya pa mabudindo agha, tukuba sona ni vyakubomba ku chipanga. Sona tuli nu budindo ubwakuti tubikaghepo umoyo pakulumbilila amazyu amiza. Ukuyana na mabudindo gho muli nagho pamwebene, ka mungagha buli-buli akabalilo akakuti mubelengaghe Ibayibolo akabalilo kosi, ukwinong’onelapo pa vyo mwabelenga nu kubombezya imbombo vyo mwamanyila?
6. Ka mungapanga buli-buli ukuti ukubelenga Ibayibolo koko kubanje pabwandilo? (Ennya sona ichituzi.)
6 Ukubelenga Ibayibolo ‘chintu chakulondiwa sana’ ku Bakilisitu, cho chifukwa tukulondiwa ukuchibika pabwandilo. (Filipi 1.10) Pakunena ivya muntu uwakuhoboka, isalimo ilya bwandilo likunena ukuti: ‘Akuhoboka ni ndaghilo zya Yehova sona akubelenga indaghilo nu kwinong’onelapo umusanya nu busiku.’ (Sali. 1.1, 2) Ivi vikung’anamula ukuti tupaghulaghe akabalilo akakubelengela Ibayibolo. Nkimba kabalilo buli ko kangaba kiza pakubelenga Ibayibolo? Tungamula ilalusyo ili umwakupambana-pambana. Umwabupepe tunganena ukuti kabalilo ko mukwennya ukuti mungakwanisya ukubelenga Ibayibolo akabalilo kosi. Umukamu yumo izina lyache u Victor akanena ukuti: “Une nighanite ukubelenga Ibayibolo pandabi-ndabi. Napo vikuntamya ukunyamuka pandabi-ndabi nkani, loli nkwennya ukuti koko kabalilo akiza chifukwa patakuba ivyakutangwanisya. Pa kabalilo aka, inyinong’ono zyane zikuba ukuti zili mumalo sona nkubikapo umoyo pa vyo nkubelenga.” Ka numwe momo vibeleye? Mwilalusye ukuti, ‘ka kabalilo buli ko kangaba kiza kukwane pakubelenga Ibayibolo?’
Nkimba kabalilo buli ko kiza akakuti mungakwanisya ukubelenga Ibayibolo akabalilo kosi? (Ennya indime 6)
MWINONG’ONELAGHEPO PA VYO MWABELENGA
7-8. Choni cho chingatupangisya ukuti tutakapindulaghe nanti tukubelenga Ibayibolo? Nena ichifwanikizyo.
7 Vingabombiwa ukuti akabalilo kosi mungabelengagha ivintu ivyinji ukusita ukwagha akabalilo akakwinong’onelapo pa vyo mwabelenga. Ka vibombiwepo lumo ukuti mwabelenga inkani yimo loli mukukwanisya ukukumbukila ivintu vinandi bulo? Ivi vikubombiwa kwa aliwesi. Ichachitima chakuti ivi vingabombiwa sona nanti tukubelenga Ibayibolo. Lumo vingabombiwa ukuti tungibikila ukuti tubelengaghe ama chaputala ghamo agha mu Bayibolo isiku lililyosi. Nanti tungabomba bunubu vili akiza. Twibikile ivyakubomba nu kuyezya-yezya ukuvikwanilisya. (1 Koli. 9.26) Ukubelenga Ibayibolo bwandilo ubwiza sana. Napo vili bunubu loli tukulondiwa ukubomba ivyinji ukuti tupindulaghe nkani nanti tukubelenga Amazyu gha Chala.
8 Inong’onela ichakubombiwa ichi: Amizi ghakulondiwa sana ukuti ivyakumela vibukilile ukuba nu bumi. Nanti ivula yingawa nkani ukwa kabalilo akanandi bulo, ichisu chingaba na mizi aminji. Nanti vyaba bunubu, amizi aminji ghangakomanika bulo. Itope likulondiwa akabalilo ukuti lingw’elele amizi aghakukwana gho ghangavwa ukuti ivyakumela vibukilile ukukula. Umwakuyana bulo, tubaghiye ukuleghuka ukubelenga Ibayibolo umwakuchimbilila umwakuti tupotwe ukwinong’onelapo, ukukumbukila nu kubombezya imbombo vyo twabelenga.—Yako. 1.24.
Ngati mo ichisu chikulondela akabalilo ukuti ching’welele amizi agha vula nu kughabombezya imbombo, nuswe bulo tukulondiwa akabalilo aka kwinong’onelapo nu kubombezya imbombo vyo twamanyila mu Mazyu gha Chala (Ennya indime 8)
9. Nkimba tungabomba choni nanti twamanya ukuti tukubelenga Ibayibolo umwakuchimbilila?
9 Nkimba akabalilo kamo mukubelenga Ibayibolo umwakuchimbilila? Nanti vili bunubu mungabomba choni? Mubelengaghe umwapanandi-panandi. Mubikepo umoyo ukwinong’onelapo pa vyo mwabelenga. Mungasala ukongelezyapo akabalilo akakumanyilila, umwakubikapo na kabalilo akakwinong’onelapo pa vyo mwabelenga. Mungabelenga amavesi aghakuchepa bulo, umwakuti akabalilo ko kasyala mukabombezye imbombo ukwinong’onelapo pa vyo mwabelenga. Mungasala ukuti mongelezyeko akabalilo ko mukumanyilila ukuti mubikepo na kabalilo akakwinong’onelapo. U Victor yo twamutambula kubwandilo akanena ukuti, “Nkubelenga Ibayibolo ukwa kabalilo kapimpa bulo, lumo nkusala ukubelenga ichaputala choka. Ichifukwa chakuti nkubelenga Ibayibolo pandabi-ndabi nkani, vikunavwa ukuti ninong’onelaghepo pa vyo na belenga isiku lyosi.” Mungasala ukubombezya izila yiliyosi, loli cho chikulondiwa chakuti mupindulaghe umwakukwana na vyo mukubelenga.—Sali. 119.97; ennya ibokosi ilyakuti “ Amalalusyo gho Tunginong’onelapo.”
10. Nena ichifwanikizyo icha mo mungabombezezya imbombo vyo mukumanyila. (1 Aba Tesalonika 5.17, 18)
10 Ukusita ukusendela mo mukubelengela Ibayibolo pamo akabalilo ko mukubelengela, mwenelezanje ukuti mukubombezya imbombo vyo mukubelenga. Nanti mukubelenga inkani yimo mu Mazyu gha Chala mwilalusye ukuti, ‘Ka ifundo iyi ningayibombezya buli-buli pa kabalilo aka pamo ningize injibombezye buli-buli muntazi?’ Umwakufwanikizya, inong’onela ukuti mukubelenga 1 Aba Tesalonika 5.17, 18. (Belenga.) Pisinda apakuti mwabelenga amavesi mabili agha, mungimilila nu kwinong’onelapo nanti mukwiputa pipi-pipi umwakufumila pasi pa moyo. Sona munginong’onelapo ivintu vyo mukupalizya. Lumo munginong’ona ukuti mumupalizye u Yehova pa vintu vitatu. Nanti mungapaghula amaminisi manandi bulo nu kwinong’onelapo pa vyo mwabelenga, mukwiza ukuba mwe bakwivwa nu kubomba zizyo Amazyu gha Chala ghakunena. Inong’onela mo mungapindulila nanti mukubomba bunubu isiku lililyosi, nanti mwabelenga inkani yimo mu Bayibolo! Nanti akabalilo kendapo, mukwiza ukukula nu kubomba zizyo Amazyu gha Chala ghakunena. Buli nanti mwennya ukuti pali ivintu ivyinji vyo mukulonda ukubombelapo imbombo?
MUBE NI VYAKWIBIKILA IVYIZA
11. Choni cho akabalilo kamo mungawa amaka? Nena ichifwanikizyo.
11 Nanti mukubelenga Ibayibolo nu kwennya izila izya mo mungabombezezya ifundo zyo mwamanyila, akabalilo kamo mungawa amaka. Inong’onela ichakubombiwa ichi: Pa Mande, po mukubelenga Ibayibolo, mwabwagha ubulongozi bo bukulangizya ukuti mutakasalilaghe muchimanyani. (Yako. 2.1-8) Mwamanya ukuti mukulondiwa ukubombapo zimo na mo mukubombela ivintu na banji, pisinda pache mukusala ukuti musinte ivintu vimo. Mwabomba akiza sana! Pa Chibili, mukubelenga inkani yo yikulongosola ukulondiwa ukwa kusala akiza amazyu aghakuti munene. (Yako. 3.1-12) Mwazyaghannya ukuti mutakusala akiza amazyu nanti mukunena na banji. Po mukusimikizya ukuti mubombepo zimo ukuti amazyu ghinyu ghabanje miza na ghakulimbikisya. Pa Chitatu, mukubelenga inkani yimo mu Bayibolo yo yabasoka ukuti mutakabe bamanyani ba chisu. (Yako. 4.4-12) Mwamanya ukuti mukulondiwa ukucheba pakusala ivyakusangalusya. Ukufika pa Chinaye, mungawa amaka ichifukwa chakwennya ivintu vyosi vyo mukulondiwa ukubombelapo imbombo.
12. Choni cho mutakulondiwa ukuwa amaka nanti vyo mwabelenga mu Bayibolo vyalangizya ukuti mukulondiwa ukusinta vimo? (Ennya sona amazyu aghamuntende.)
12 Nanti mwamanya ukuti pali ivintu ivyinji vyo mukulondiwa ukusinta pamo ukubombelapo imbombo, mutakawe amaka. Ivi vingalangizya ukuti muli nu moyo umwiza. Umuntu yo wakwiyisya sona wabwanaloli, akubelenga Amasimbo umwakuti amanye po akulondiwa ukubombelapo imbombo. a Sona mukumbukilaghe ukuti vikusenda akabalilo ukuti muvwale “ubuntu ubupya.” (Kolo. 3.10) Choni cho chingabavwa ukuti mubukilile ukubomba zizyo Amazyu gha Chala ghakunena?
13. Ka mungasala buli-buli ivintu vyo mukulonda ukuti mubombelepo imbombo? (Ennya sona ichituzi.)
13 Mumalo mwakuti muyezye ukubombezya vyosi vyo mwamanyila mu Bayibolo pa kabalilo koka, musale vyo mungandila pakubombelapo imbombo. (Mbupi. 11.2) Mungayezya izila iyi: Musimbe ivintu vyo mukulondiwa ukubombelapo imbombo nu kusala ichintu choka pamo vibili nu kuvileka ivyamwabo ukuti mwize mubombelepo imbombo pa kabalilo akanji. Ka mungandila pighi?
Mumalo mwakubombezya chilichosi cho mwabelenga mu Bayibolo pa kabalilo koka, mungibikila ivyakuti mubombe. Mungasala ukubombelapo imbombo pa chintu choka pamo vibili (Ennya indime 13-14)
14. Ka munganda ukubombelapo imbombo pa chakwibikila buli?
14 Mungasala ichakwibikila cho chingaba chipepe ukuti muchikwanilisye. Pamo mungasala ichintu cho mukulonda ukuti mubombaghe akiza nkani. Nanti mwasala ichintu ichakuti mubombelepo imbombo, mungafufuza mumabuku ghitu ngati ibuku ilyakuti Watch Tower Publications Index pamo Buku Lakupenjera Nkhani la Ŵakaboni ŵa Yehova. Mwipute ivyakukwafannya ni chintu cho mwasala nu kumulaba u Yehova ukuti abavwe ukuti ‘mube ni chinyonywa na maka aghakubombela vyo mwasala.’ (Filipi 2.13) Pisinda pache, mubombezye imbombo vyo mwamanyila. Nanti mwabomba akiza pachakwibikila ichabwandilo, vingabalimbikisya sana ukuti mubombelepo imbombo pachamwabo. Nanti mungabomba akiza pachigaba chimo pamo pankalo yimo, vingapangisya ukuti chibe chipepe ukubomba akiza muvigaba ivinji.
MWITIKIZYE UKUTI AMAZYU GHA CHALA ‘GHABOMBAGHE MUMWINYU’
15. Ka abantu ba Yehova bakupambana buli-buli na bantu abinji bo bakubelenga Ibayibolo? (1 Aba Tesalonika 2.13)
15 Abantu bamo bakuti bakubelenga Ibayibolo amabulendo aminji sana. Loli ka bakulisubila naloli Ibayibolo? Nkimba bakulibombezya imbombo sona bakwitikizya ukuti libavwe pa bumi bwabo? Ichachitima chakuti uansala wakuti awe. Loli ivi vikupambana sana na mo abantu ba Yehova bakubombela! Ngati Bakilisitu ababwandilo, nuswe bulo tukwitikizya Ibayibolo ukuti ‘mazyu gha Chala.’ Sona tukuyezya-yezya ukughabombezya imbombo pa bumi bwitu.—Belenga 1 Aba Tesalonika 2.13.
16. Choni cho chingatwavwa ukuti tubombaghe zizyo Amazyu ghakunena?
16 Ukunena ubwanaloli, te chipepe akabalilo kosi ukubelenga nu kughabombezya imbombo Amazyu gha Chala. Chikuba chipala sana ukuti twaghe akabalilo akakubelengela. Pamo tungabelenga umwakuchimbilila sana ukusita ukwagha akabalilo akakwinong’onelapo pa vyo twabelenga. Pamo tungawa amaka nanti tukwennya ukuti pali ivintu ivyinji vyo tukulondiwa ukuti tubombelepo imbombo. Mulimosi mo intamyo yingabela loli tungamalana nayo. U Yehova angatwavwa ukuti tukwanisye ukumalana nayo. Nge twasimikizya nu kwitikizya ubutuli bwache, umwakuti tutakabe bantu abakwivwa bulo nu kuluvya loli tubombaghe zizyo Amazyu ghache ghakunena. Tutakukayikila ukuti nanti tukubelenga nu kubombezya Amazyu gha Chala pabumi bwitu, tukuba bakuhoboka sana.—Yako. 1.25.
ULWIMBO 94 Kuwonga Chifukwa cha Mazgu gha Chiuta
a Ennya ividiyo iyakuti Vyo Abachinyamata Bakunena—Ukubelenga Ibayibolo pa jw.org.
