Pa kabalilo ko tukwisengannya ukuti tumanyile, tungilalusya ukuti, ‘Nkimba inti imanyile choni?’ Tungabomba akiza sana ukuba bakucheba ukuti, ivintu vyo tuvighanite ukumanyila vitupangisyanje ukuti tupotwe ukumanyila ivintu ivipya vyo u Yehova akutumanyisya. Ka tungabomba buli-buli ukuti tumanyilaghe muzila iyakuti tumanye ivintu ivipya?

Mulabe amahala. Mwipute kwa Yehova ukuti abavwe ukwivwisya akiza vyo mukulonda ukumanyila pa kabalilo ako. (Yako. 1.5) Muleghuke ukusubila nkani ivintu vyo mukivwisya kwisinda.—Mbupi. 3.5, 6.

Mwitikizye ukuti amaka gho ghali mu Bayibolo ghabombaghe imbombo pa bumi bwinyu. “Pakuti Amazyu agha Chala mumi.” (Hebe. 4.12) Ichifukwa chakuti Amazyu agha Chala “mumi” ghangatwavwa pa kabalilo ko tukubelenga Ibayibolo, loli peka nanti tukwitikizya ukuti tumanyilepo ivintu ivipya pa nkani yo tukumanyila pamo nanti tukupindula pa vyo tukubelenga.

Mupalizyanje chilichosi cho u Yehova akubombezya imbombo pakubamanyisya. Ichakulya ichabuzimu cho u Yehova akubapa, chili ngati ‘pwando ilya vyakulya ivyakunona.’ (Yesa. 25.6) Mutakavilekaghe bulo ‘ivyakulya’ vimo vyo mukwennya ukuti mutangahoboka navyo. Nanti mungabomba bunubu, vingapangisya ukuti u Chala abavwe ukuba muntu umwiza sona ukunena ubwanaloli inti muhobokaghe sana nanti mukumanyila pamweka!