Tutakulondiwa ukwinong’ona ukuti abamanyili 70 bala u Yesu akaleka ukuhoboka nabo pamo akabakana ichifukwa chakuti batakabapo po akandisyanga Ichakulya Icha Chamabwila Icha Mwene. Umwabupepe, u Yesu akalondagha ukuti abe bulo na batumiwa bache pachakubombiwa ichi.

Bosi 12 na 70 bakaba ukuti bachili bamanyili bache. Pabwandilo u Yesu akasala abanavuli 12 ukufuma pa bamanyili bache abinji nu kubitizya ukuti batumiwa. (Luka 6.12-16) Akaba ku Galileya pa kabalilo ko “akabitizya abamanyili 12” nu ‘kubatuma pakulumbilila ivya Bumwene ubwa Chala nu kupozya ababine.’ (Luka 9.1-6) Pisinda pache akati abuka ku Yudeya, u Yesu “akasala abantu abanji 70 nukubatuma babili-babili.” (Luka 9.51; 10.1) Polelo vikuboneka ukuti u Yesu akaba na bamanyili abinji mumalo aghakulekana-lekana ko ubutenga bwache bukalumbililiwa.

Abayuda bo bakasinta nu kuba bamanyili ba Yesu, babaghiye ukuti bakaba ukuti bachili bakupanga Ulusekelo Ulwa Pasika lo bakapangagha umwaka ghulighosi ni mbumba zyabo. (Kuso. 12.6-11, 17-20) Bo ali papipi ukuti aghoghiwe, u Yesu na batumiwa bache bakabuka ku Yelusalemu. Loli u Yesu atakabitizya abamanyili bache bosi ukufuma ku Yudeya, ku Galileya na ku Peleya ukuti babe nu Lusekelo Ulwa Pasika ulukulu. Apa chakwivwika ukuti u Yesu akalondagha ukuti abe na batumiwa bache beka pachakubombiwa ichi. Akababuzya ukuti: ‘Nalongagha nkani ukuti indye poka namwe Ulusekelo Ulwa Pasika, bo inchili pakuyimba.’—Luka 22.15.

Akaba ni chifukwa ichiza ichakubombela bunubu. U Yesu akaba papipi ukuti afwe ngati “Mwana uwa ng’ozi uwa Chala, yuyo akwefya imbibi izya bantu aba muchisu ichapasi.” (Yoha. 1.29) Ivi vikalondiwanga ukuti vibombiwe ku Yelusalemu ko ukwa kabalilo akatali bakapelekelaghako isembe kwa Chala. Imfwa ya Yesu yikapeleka isembe iyakusatula yo yikaba yapamwanya sana ukuchila ing’ozi zyo Abaizilayeli ni mbumba zyabo bakalyanga pakukumbukila ubusiku ubwa Bulendo bwabo po bakafumagha ku Ijiputi. (1 Koli. 5.7, 8) Ivintu vyo u Yesu akabomba, vikabapangisya abatumiwa bache 12 ukuba we fawundeshoni uwa chipanga icha Chikilisitu. (Efe. 2.20-22) Ichakuhobosya chakuti, itawuni iyizelu iya Yelusalemu uwakumwanya yope yizengiwe “palwalo ulwa mabwe 12” po pakasimbiwapo “amatabwa 12 agha batumiwa aba Mwana uwa ng’ozi.” (Ubuvu. 21.10-14) Naloli, abatumiwa abasubaliwa aba bakaba nu budindo ubukulu pakukwanilisya ubwighane ubwa Chala. Cho chifukwa chakwivwika sana ukuti u Yesu akalonda ukuti babe nabo pa Lusekelo Ulwa Pasika ulwabumalilo ulu sona pa vyo vikaba papipi ukubombiwa—Ichakulya Icha Mwene Icha Chamabwila.

Abamanyili 70 na bamanyili abanji, batakabapo pakulya ichakulya nu Yesu. Napo vikaba bunubu, loli abamanyili bosi bo bakaba basubaliwa bakapindula sana na vyo u Yesu akabomba pakwandisya ichakulya Icha Mwene Icha Chamabwila. Pakati pendapo akabalilo, Abakilisitu bosi abapakaziwa bakiza baba mupangano ilya Bumwene lyo u Yesu akalitambula ku batumiwa bache pabusiku bula.—Luka 22.29, 30.