INKANI IYAKUMANYILA 18
Tukazannyanje pa Nkomano Izya pa Chipanga
“Zagha twinong’onelanaghe . . . , tukazannyanje.” —HEBE. 10.24, 25.
ULWIMBO 88 Nimanyiskani Mendero Ghinu
VYO INTI TUMANYILE a
1. Choni cho tukwamulapo pa nkomano?
CHONI cho tukwayiwapo pa nkomano? Tukwayiwapo pa nkomano ukuti tumupale u Yehova. (Sali. 26.12; 111.1) Tukwayiwapo sona pa nkomano ukuti tukazannyange mukabalilo aka ntamyo aka. (1 Tesa. 5.11) Tukubomba vyosi ivi, nanti tukwimika nu kwamulapo pa nkomano.
2. Nkimba kabalilo buli ko tukuba nu lusako ulwakwamulapo pa nkomano?
2 Usabata aliwesi tukubanga nu lusako ulwakwamulapo pa pa nkomano. Umwakufwanikizya, kubumalilo ubwa sabata tukuba nu lusako ulwakwamulapo pa Ichitembe cha Mulindilili icha Kumanyila. Pa nkomano izya mukasi mwasabata tukuba nu lusako ulwakwamulapo pa Vyo Twamanyila, Ukumanyila Ibayibolo Ukwa pa Chipanga ni vyamwabo.
3. Nkimba vintu buli vyo vingapangisya ukuti tupotwe ukwamulapo, sona ka isimbo ilya Aba Hebeli 10.24, 25 lingatwavwa buli-buli?
3 Twebosi tukulonda ukumupala u Yehova nu kukazya abakilisitu Abamwitu. Pali ivintu vyo vingapangisya ukuti tupotwe ukwamula. Tungaba ni lyogha ukuti twamulepo pamo uswe tungalonda ukuti twamule akinji pa nkomano, loli abakamu batangatusala po twimika inyobe. Choni cho chingatwavwa ukuti tumalane ni ntamyo izi? Vyo umutumiwa u Pabuli akabalembela Abahebeli vingatwavwa ukuti twaghe u ansala uwa lalusyo ili. Nanti tukunenezannya izya ubwiza ubwa kukomana poka, u Pabuli akanena ukuti chakulondiwa ukuti “tukazannyanje.” (Belenga Aba Hebeli 10.24, 25.) Tungachepesya ilyogha, nanti twamanya ukuti abamwitu bakukaziwa napo tungamula akaansala akafupi bulo akakunena izya lusubilo lwitu. Tukwiza ukuba bakuhoboka nanti abamwitu baba nu lusako ulwakuti bamulepo napo uswe batatusala ukuti twamulepo.—1 Pita. 3.8.
4. Ka fundo buli zitatu zyo inti tunenezannye munkani iyi?
4 Munkani iyi inti tunenezannye mo tungabombela ukuti tukazyanje abamwitu mu chipanga cho muli abantu abadono sona bo bakwamula badono. Inti tunenezannye sona mo tungabombela ukuti tubakazyanje abamwitu mu chipanga cho muli abantu abinji sona mo muli abinji bo bakwamulapo. Pabumalilo, inti tunenezyannye mo tungabakazizya abamwitu na maansala gho tukwamula.
TUKAZANNYANJE MU CHIPANGA CHO ABANTU BADONO
5. Ka tungakazannya buli-buli mu chipanga mo muli abantu abadono?
5 Mu chipanga cho abantu badono pamo akagulu, mutakuba abantu abinji bo bakulonda ukwamulapo. Umukamu yo akulongozya angalondiwa ukulindililapo ukuti yumo imike inyobe ukuti amulepo. Inkomano zingaboneka ukuti te zyakuhobosya sona zitangatukazya. Nkimba tungabomba ichoni? Mubikepo umoyo ukwimika inyobe kabili-kabili. Ukubomba bunubu kungabavwa abanji ukuti bope bamulaghepo.
6-7. Ka tungachepesya buli-buli ilyogha nanti tukulonda ukwamula?
6 Nkimba mungabomba ichoni nanti mukoghopa ukwamulapo? Abantu abinji bakwiyivwa bunubu. Ukuti mubalimbikisyange abakamu na bayemba, mubaghiye ukulondelezya izila zyo zingabavwa ukuti muchepesye ilyogha nu kubukilila ukwamulapo pa nkomano. Ka mungabomba buli-buli?
7 Ukuti bwaghe ubutuli, mubelenge inkani izya mu Ichitembe cha Mulindilili izya kwisinda ukuti mwennye ifundo zyo zingabavwa mo mungamulila pa nkomano. b Umwakufwanikizya, mwisenyannye akiza. (Mbupi. 21.5) Nanti mwayimanya akiza inkani chitangaba chipala ukuti muye mwamulepo. Mwamulaghe umwabupimpa. (Mbupi. 15.23; 17.27) Nanti mukwamula amaansala aghafupi vingabapangisya ukuti muchepesye ilyogha. Nanti mukwamula amaansala aghafupi gho ghangaba nu muzele ghoka pamo yibili ghangavwa ukuti abakamu na bayemba bivwisye akiza ukuchila ukwamula amaansala aghatali gho ghangaba ni fundo izyinji. Nanti mukwamula amaansala aghafupi mu mazyu aghinyu na ghinyu, vikulangizya ukuti mwisenganizye akiza sona inkani iyo muyimenye akiza.
8. Ka u Yehova akutwennya buli-buli nanti tukuyezya ukubomba vyo tungakwanisya?
8 Nkimba mungabomba ichoni nanti mwalwisya ukubombezya amasakizyo agha, loli mukupotwa ukuchepesya ilyogha ilyakuti mwamulaghepo lyoka pamo kabili? Mumanye ukuti u Yehova akupalizya ukulwisya kwinyu pakubomba vyosi vyo mungakwanisya. (Luka 21.1-4) U Yehova atakutupatikizya ukuti tubombaghe vyo tutangakwanisya. (Filipi 4.5) Inong’onela vyo mungabomba, mwibikile ivyakubomba nu kwiputa ukuti umoyo wikale pasi. Nanti tungabomba bunubu vingatwavwa ukuti twamulaghe amaansala aghafupi.
TUKAZANNYANJE MU CHIPANGA CHO ABANTU BINJI
9. Nkimba ntamyo wuli zyo tungakumana nazyo mu chipanga cho muli abantu abinji?
9 Nanti mu chipanga chinyu muli abalumbilili abinji, mungakomana ni ntamyo izyinji. Ichifukwa chakuti muli abakamu na bayemba abinji bo bakwamulapo, vingapagisya ukuti batakakusale nanti wimika inyobe. Umwakufwanikizya, u Danielle akabalilo kosi akahobokagha ukwamulapo pa nkomano. c Akennyanga ukuti lubazu lumo ulwakwiputa, ulwakukazya abamwabo sona akennyanga ukuti zila yimo iyakughomya ulwitiko lwache mu vyo Ibayibolo likumanyisya. Loli bo asamila mu chipanga mo muli abantu abinji, akabalilo kamo batakamusalagha ukuti amulepo. Umuyemba uyu akanena ukuti “Nkakalalagha, nkaba ngati natagha ulusako ulwakwamulapo. Nanti ivintu ivi vikubombiwa kabili-kabili vikuba ngati akupangila umufulo.”
10. Nkimba tungabomba buli-buli ukuti tube nu lusako ulwakwamulapo pa nkomano?
10 Nkimba numwe vibachitikiye lumo ngati we Danielle? Nanti vili bunubu vingabapangisya ukuti muleke ukwamulapo nukwanda ukwivwisya bulo. Loli mutakalekaghe ukwamulapo. Ka mungabomba ichoni? Mwisengannyanje ifundo izyinji nanti mukunozyekela inkani yiliyosi. Nanti batakusala ukuti wamulepo kubwandilo po mukumanyila mukuba ukuti muchili muli nu lusako ulwakuti mungamulapo po mukubukilila ukumanyila. Nanti mukunozyekela Ichitembe cha Mulindilili mwinong’onele mo indime yiliyosi yikukolelana nu mutu wa nkani. Nanti mukubomba bunubu inti mwaghe amaansala aghamalalusyo gho ghakwayiwa munkani. Umwakongelezyapo munganozyekela ifundo izya kutamya pakulongosola izya mu Bayibolo. (1 Koli. 2.10) Chifukwa choni? Ichifukwa bantu badono bulo bo bangiyipa ukuti bamulepo pa ndime izyo. Nkimba nanti mwayezya amasakizyo ghosi agha, loli mwagha ukuti batakubasala ukuti mwamulepo? Mungakomana na yo akutangilila po inkomano zichili zitandite nu kumubuzya ilalusyo lyo mukulonda ukuti mwize mwamule.
11. Nkimba ifundo yo yili pa Aba Filipi 2.4 yikutukazya ukuti tubombe ichoni?
11 Belenga Aba Filipi 2.4. Umutumiwa u Pabuli akabakazya Abakilisitu ukuti bennyange abamwabo ukuti bakulondiwa. Ka tungabombezya buli-buli ifundo iyi nanti tuli pa nkomano? Tukumbukilaghe ukuti abamwitu bope bakulonda ukuti bamulaghepo ngati mo uswe tukwamulila.
Ngati mo mukubalekela abamwinyu ukuti banenepo po muli pakwangala, umwakuyana bulo mubalekelagheko abamwinyu ukuti bamulepo pa nkomano (Ennya indime 12)
12. Ka tungabomba buli-buli ukuti tubaghomyanje abamwitu pa nkamano? (Ennya sona ichituzi.)
12 Inong’onela ichakubombiwa ichi. Muli pakwangala na bamanyani binyu, ka munganenagha bulo mwebene ukusita ukubapako ulusako ulwakunenako? Awee! Ichifukwa chakuti mukulonda ukuti bope banenagheko. Umwakuyana bulo, nanti tuli pa nkomano tukulonda ukuti abamwitu bope bamulaghepo. Tungalangizya ukuti tukulonda ukubakazya abakamu na bayemba bitu, nanti tukubapako ulusako ulwakunenapo izya lwitiko lwabo pa nkomano. (1 Koli. 10.24) Za twennye mo tungabombela bunubu.
13. Ka tungabomba buli-buli ukuti abamwitu bope bamulaghepo?
13 Twamulaghe amaansala aghafupi sona aghakwivwika akiza, ivi vingavwa ukuti abantu abanji bope bamulaghepo. Abasongo na balumbilili abakughoma mwabuzimu bobo babaghiye ukulangizya ichifwanikizyo ichiza pakwamula. Napo mungamula uansala umufupi, mutabaghiye pakunena ifundo izyinji pakabalilo koka. Nanti mukunena chilichosi mundime, inti mupangisye ukuti abamwinyu batakamulepo. Umwakufwanikizya, mundime iyi muli ifundo zibili, mwamule umwabupimpa sona mutakamule ifundo zyosi. Yezya ukwamula ifundo yoka nanti mwe babwandilo pakwamulapo mundime.
Kabalilo buli ko tungasala ukuti tutakimike inyobe pa nkomano? (Ennya indime 14) f
14. Choni cho te chiza ukwimika inyobe papipi-papipi? (Ennya sona ichituzi.)
14 Mungasala po mukulonda ukuti mwamulepo. Nanti tukwimika inyobe papipi-papipi tungapangisya ukuti yo akulongozya atusalaghe kabili-kabili po abamwitu batamuyepo. Ivi vingapangisya ukuti abanji bagongowe ukwimika inyobe.—Ndumbi. 3.7.
15. (a) Ka tungabomba buli-buli nanti batatusalite ukuti twamulepo? (b) Ka yo akulongozya, angabomba buli-buli ukuti asalaghe aliwesi? (Ennya ibokosi ilyakuti “ Nanti Mwemwe Mukulongozya.”)
15 Nanti abalumbilili abinji bimika inyobe pakabalilo akakumanyila, tutangamula akinji ngati mo twalondelagha. Akabalilo kamo vingabombiwa ukuti yo akulongozya atatusalapo. Ivi vingaba vyakukalalizya, loli tutakavibikaye ku moyo nanti batatusalite ukuti twamulepo.—Ndumbi. 7.9.
16. Nkimba tungabakazya buli-buli abamwitu bo bamuyepo?
16 Nanti batabasalite ukuti mwamulepo ngati mo mwalondelagha, mungabomba akiza ukwivwisya po abamwinyu bakwamula nu kubapalizya nanti inkomano zyamala. Nanti mwabapalizya abakamu na bayemba bangakaziwa ngati mo nge mwabakazizya ni fundo zyo mwalondagha ukwamula. (Mbupi. 10.21) Ukubapalizya abamwitu kungabavwa ukuti bakaziwe.
IZILA IZYAMWABO ZYO TUNGABAKAZIZYA ABAMWITU
17. (a) Nkimba abapapi bangabavwa buli-buli abana babo ukunozyekela ukwamula? (b) Ukuyana na vyo vili mu vidiyo, ka fundo buli 4 zyo zingavwa ukunozyekela ukwamulapo? (Ennya sona amazyu aghamuntende.)
17 Ka tungabaghomya buli-buli sona abamwitu pa nkomano? Nanti mwe bapapi, mubavwe abana binyu ukunozyekela amaansala ukuti baye bamulepo ukuyana ni sayizi yabo. (Mata. 21.16) Akabalilo kamo, pakuba inkani izyakutamya ngati zyo zikulongosola intamyo zyo imbumba zikukomana nazyo pamo inkani iyakusala pakasi pa ichiza ni ichibibi. Loli pakabalilo akakumanyila pangaba indime yoka pamo zibili zyo abana bangamulapo. Mubaghiye sona ukubalongosolela abana binyu ukuti te kabalilo kosi ko bangabasala nanti bimika inyobe ukuti bamulepo. Nanti mungababuzizya zila, vingabavwa ukuti batakakalalaghe nanti abamwabo bamulapo loli abene batabasalite ukuti bamulepo.—1 Timo. 6.18. d
18. Ka tungabomba buli-buli ukuti tuleke ukunena ivyinji ivya uswe nanti tukwamula? (Isya Mbupingamu 27.2)
18 Twebosi tungisengannya akiza nu kupeleka amaansala aghakughomya gho ghangapeleka umuchizi kwa Yehova nu kubakazya Abakilisitu abamwitu. (Mbupi. 25.11) Akabalilo kamo tungaba nu lusako ulwakunena vyo tukomanitepo navyo pa bumi bwitu, loli tubaghiye ukuchepesya ukulongosola ivyinji ivyakukwafyannya nuswe. (Belenga Isya Mbupingamu 27.2; 2 Koli. 10.18) Mumalo mwache tukubikapo umoyo ukumusubila u Yehova, amazyu ghache sona na bantu bache. (Ubuvu. 4.11) Nanti mu ndime muli ilalusyo ilyakuti mulongosole ivya bumi bwinyu, mungabomba akiza ukulongosola. Ichifwanikizyo chili mu ndime iya kukonkapo.
19. (a) Ka bwiza buli bo bungabapo nanti tukwinong’onelana po tuli pa nkomano? (Aba Loma 1.11, 12) (b) Choni cho chikubahobosya umwe pa nkani iyakwamulapo pa nkomano?
19 Napo pa te indaghilo izya mo tungamulila, loli swebosi tungayezesya ukubaghomya abamwitu. Ivi vikung’anamula ukuti napo tutangamula akinji, pamo vingang’anamula ukwikutisiwa nu lusako lo twali nalo pakwamula nu kuba bakuhoboka pakuti abamwitu bope bali nu lusako ulwakwamulapo. Nanti tukwinong’onela abamwitu pa nkomano “tukwiza pakukazannya.”—Belenga Aba Loma 1.11, 12.
ULWIMBO 93 Tumbikani Ungano Withu
a Tukukazannya nanti tukwamulapo pa nkomano. Bamo bakuba ni soni ukuti bamule. Bamo bakuhoboka pakwamula loli bakulonda babasalaghe papipi-papipi. Mulimosi mo vingabela, ka tungabomba buli-buli ukuti twinong’onelanaghe nu kukazannya? Ka tungamula buli-buli ukuti tubaghomye abakamu na bayemba ukuti babukilile ukughanana nu kubomba imbombo inyiza? Inkani iyi inti yamule.
b Ukuti mumanye ivyinji munganyokelamo mu Ichitembe cha Mulindilili icha Chitumbuka icha Janiwale 2019, peji. 8-13; sona icha Chichewa icha Seputembala 1, 2003, peji. 19-22.
c Amazina ghamo munkani iyi ghasinta
d Enelezya ividiyo iya pa jw.org iya mutu uwakuti Mube mwe Bamanyani ba Yehova—Mwisengannye Ukwamulapo pa Nkomano.
f AMAZYU AGHAKULONGOSOLA ICHITUZI: Mu chipanga cho muli abantu abinji, umukamu yo amuyepo kale abalekela abamwabo ukuti bope bamulepo.
