INKANI IYAKUMANYILA 16
“Umuyemba Wako Akwiza Pakuzyuka Kubufwe”!
“U Yesu akamubuzya u Malita akati: ‘Umuyemba wako akwiza pakuzyuka kubufwe.’”—YOHA. 11.23.
ULWIMBO 151 Wazamuchema
VYO INTI TUMANYILE a
1. Ka umulumendo yumo akalangizya buli-buli ukuti ali nu lusubilo ulwakuti abafwe bakwiza pakuzyuka?
UMULUMENDO yumo izina lyache u Matthew, akabina imbina iyikulu nkani yo yikalondiwanga ukuti bamupange amaopaleshoni ayinji. Pakabalilo ko akaba ni myaka 7, u Matthew ni mbumba yache bakenelezyanga JW Broadcasting®. Kubumalilo ubwa pulogilamu iyi, bakenelezya ulwimbo lo lukalangizyanga abantu bakubapokelela abakamu babo bo bakafwa ukuti bazyuka. b Ipulongilamu iyi yati yamala, u Matthew akapalamila ku bapapi bache nu kubakola inyobe nu kunena ukuti: “Baba nu Mama mwennya? napo ningafwa, kwiza pakuzyuka. Mukwiza pakundindilila, chikwiza pakuba akiza bulo.” Ka mukwinong’ona ukuti abapapi bache bakiyivwa buli-buli, chifukwa chakumanya ukuti umwana wabo ali nu lusubilo ulwakughoma ukuti napo angafwa akwiza pakuzyuka?
2-3. Choni cho chiza ukwinong’onelapo ilayizyo ilyakuti abafwe bakwiza pakuzyuka?
2 Chingaba akiza ukuti akabalilo kosi, twinong’onelaghepo ivya lusubilo lo Ibayibolo litulayizizye ulwakuti abafwe bakwiza pakuzyuka. (Yoha. 5.28, 29) Chifukwa buli? Ichifukwa chakuti tutakumanya akabalilo ko tungabina nkani pamo akabalilo ko umuntu yo tumughanite angafwa umwakuchenusya. (Ndumbi. 9.11; Yako. 4.13, 14) Ulusubilo ulwakuti abafwe bakwiza pakuzyuka, lungatwavwa ukuti tujimbe ku ntamyo zyo tukukomana nazyo. (1 Tesa. 4.13) Amasimbo ghakutwavwa ukumanya ukuti, u Baba witu uwa kumwanya atumenye akiza nkani sona atughanite akabalilo kosi. (Luka 12.7) Yehova u Chala atumenye akiza nkani umwakuti akwiza pakutuzusya nu buntu bwitu bo tukaba nabo na mo tukinong’onelagha. U Yehova atughanite sana sona atupelite ukuti tungikala nu bumi kwa bwila na bwila! Umwakuti napo tungafwa, akwiza pakutuzusya!
3 Munkani iyi, ichabwandilo inti tunenezannye ivifukwa vyo tukulondiwa ukusubila ukuti abafwe bakwiza pakuzyuka. Pisinda pache, inti tunenezannye inkani iya mu Bayibolo iyakughomya ulwitiko lwitu yo amazyu ghache ghali mu mutu uwa nkani iyi aghakuti: “Umuyemba wako akwiza pakuzyuka kubufwe.” (Yoha. 11.23) Pabumalilo, inti tumanyile vyo tungabomba ukuti ulusubilo ulwakuti abafwe bakwiza pakuzyuka lube lwabwanaloli kwa uswe.
ICHIFUKWA CHO TUKULONDIWA UKUSUBILA UKUTI ABAFWE BAKWIZA PAKUZYUKA
4. Choni cho chingapangisya ukuti tusubile vyo umuntu yumo atulayizya? Nena ichifwanikizyo.
4 Ukuti tusubile vyo umuntu yumo atulayizya, tukulondiwa ukusimikizya ukuti yo atulayizya ali ni chinyonywa na maka ukuti angakwanilisya ukubomba vyo atulayizya. Umwakufwanikizya: Inong’onela ukuti inyumba yinyu yakomanika ni chimpepo. Umumanyani winu yumo iza nu kubalayizya ukuti, ‘Inti nkwavwe ukuzenga sona inyumba yako.’ Umuntu uyu musubaliwa, sona numwe mwikutisiwa ukuti ali ni chinyonywa ichakulonda naloli ukubavwa. Umumanyani winu ali nu luso ulwakuzenga sona ali ni vibombelo vyosi vyo vikulondiwa pa mbombo iyi, mukumanya ukuti angakwanisya ukubavwa. Po mukusubila ukuti inti akwanilisye vyo abalayizizye. Buli pakunena vyo u Chala alayizizye ivyakukwafannya nukuti abafwe bakwiza pakuzyuka? Ka ali ni chinyonywa na maka aghakukwanilisizya vyo alayizizye?
5-6. Choni cho tukusubila ukuti u Yehova ali ni chinyonywa ichakuti ize abazusye abantu bo bafuye?
5 Ka u Yehova ali ni chinyonywa ichakuti ize abazusye abantu bo bafuye? Tutakukayikila ukuti akwiza pakubazusya. Akabavwa abantu abanji bo bakasimba Ibayibolo ukuti basimbe ilayizyo ilyakuti abafwe bakwiza pakuzyuka. (Yesa. 26.19; Hose. 13.14; Ubuvu. 20.11-13) Akabalilo kosi nanti u Yehova alayizya ichintu, akukwanilisya. (Yoswa 23.14) U Yehova akulonda sana ukuti ize abazusye abantu bo bafuye. Choni cho tukunena bunubu?
6 Inong’onela vyo u Yobu akanena. Akasubilagha ukuti napo angafwa, u Yehova akwiza pakumuzusya. (Jobu 14.14, 15) U Yehova akuyivwa umwakuyana bulo ivyakukwafannya na babombi bache abanji bo bafuye. Akulonda nkani ukuti ize abazusye umwakuti bize babe nu bumi ubwiza sona ubwakuhobosya. Ka u Yehova akubinong’onela ichoni abantu bo bafuye loli batakaba nu lusako ulwakumanyila ubwanaloli? U Chala uwalughano akulonda ukuti bope bulo ize abazusye. (Imbo. 24.15) Akulonda ukuti bope bulo bize babe nu lusako ulwakuba bamanyani bache nu kwikala pachisu ichapasi kwa bwila na bwila. (Yoha. 3.16) Naloli, u Yehova ali ni chinyonywa ichakuti ize abazusye bo bafuye.
7-8. Choni cho tukusubila ukuti u Yehova ali na maka aghakuzusya abantu bo bafuye?
7 Ka u Yehova ali na maka aghakuti angabazusya abafwe? Tutakukayikila! Ichifukwa chakuti we Chala “Uwamaka ghosi.” (Ubuvu. 1.8) U Yehova ali na maka aghakuti angapota abalwani bache bosi, nu bufwe bulo. (1 Koli. 15.26) Pakumanya ifundo iyi, yikutughomya nu kutusangalusya. Ennya vyo vikamuchitikila Umuyemba Emma Arnold. Umuyemba uyu ni mbumba yache, bakakomana ni ntanyo zyo zikayezya ulwitiko lwabo pa Nkondo iya Bubili iya Pachisu Chosi. U Emma akamusangalusya umwana wache umulindu ichifukwa abantu bo akabaghana, bakafwila kumakampu agha ku Nazi. Akabuzya ukuti: “Nanti abantu bo bafuye te bize bazyuke, ichi chingang’anamula ukuti umulwani witu imfwa ali na maka nkani ukumuchila u Yehova. Loli ubu bumyasi. Naloli, patalipo nachimo-chimo cho chili na maka nkani ukuchila u Yehova! Ali na maka aghakwiza pakunyosezyapo ubumi ku bantu bo bafuye.
8 Ichifukwa ichinji cho tukumanya ukuti u Chala akwiza pakubazusya abantu bo bafuye, chakuti ate ni chiluvya. Akwitizya izina intondwa yiliyosi. (Yesa. 40.26) Umwakuyana bulo, akukumbukila bosi bo bafuye. (Jobu 14.13; Luka 20.37, 38) Akukumbukila utuntu tunandi-nandi utwakukwafannya na bantu bo akwiza pakubazusya, ukuyana na mo bakabonekelagha, ubuntu bwabo, mo bakabombelagha ivintu sona ukuti bakakumbukilaghe vyo bakabombagha po bakaba nu bumi.
9. Choni cho mukusubila ukuti muntazi u Yehova akwiza pakuzusya abantu bo bafuye?
9 Naloli, tukusubila ukuti u Yehova akwiza pakuzusya abantu bo bafuye, ichifukwa chakuti tukumanya ukuti ali ni chinyonywa sona amaka aghakubombela bunubu. Ennya ichifukwa ichamwabo cho tukusubila vyo u Chala atulayizizye, ivyakuti abafwe bakwiza pakuzyuka: Kunyuma uku, u Yehova akazusyapo kale abantu bamo. Mukabalilo akakwisinda, u Yehova akabapa abanavuli abasubaliwa bamo nu Yesu amaka aghakuzusya abantu. Zatwennye inkani yoka yo yikulongosola mo u Yesu akazusizya umuntu yumo, yo yikwayiwa pa Yohani chaputala 11.
UMUMANYANI UWA YESU AKAFWA
10. Choni cho chikabombiwa po u Yesu akalumbililagha kwisila ukwa lusoko ulwa Yolondani, sona ka akabomba ichoni? (Yohani 11.1-3)
10 Belenga Yohani 11.1-3. Inong’onela vyo vikabombiwa ku Betaniya chakubumalilo ukwa 32 C.E. Mukaya aka, u Yesu akaba na bamanyani bache u Lazalo na bayemba bache babili, u Maliya nu Malita. (Luka 10.38-42) Umwakuchenusya u Lazalo akabina, abayemba bache bakanda pakupasya. Bakatumizya ubutenga kwa Yesu, yo akaba kwisila ukwa lusoko ulwa Yolodani. Ubu bukaba ubulendo ubwakwenda pasi amasiku mabili ukufuma ku Betaniya. (Yoha. 10.40) Ichachitima chakuti, u Lazalo akafwa bo ubutenga bwafika bulo kwa Yesu. Napo u Yesu akamanya ukuti umumanyani wache afwa, loli akabukilila ukwikala kula-kula ukwa masiku mabili. Pisinda pache, po akanda ubulendo ubwakubuka ku Betaniya. Po u Yesu akafikagha ku Betaniya, pakaba ukuti pendapo amasiku 4 ukufuma po u Lazalo akafwila. U Yesu akabuka ukuti aye abombe ichintu chimo cho abamanyani bache inti bapindule nacho sona inti chipeleke ubuchindamu kwa Chala.—Yoha. 11.4, 6, 11, 17.
11. Nkimba tukumanyilako ichoni ku nkani iyi, ivyakukwafannya nu bumanyani?
11 Tukumanyilapo zimo izyakukwafannya nu bumanyani munkani iyi. Ennya ifundo iyi: U Maliya nu Malita bati batumizya ubutenga kwa Yesu, batakamubuzya ukuti abuke ku Betaniya. Bakatumizya bulo ubutenga ubwakuti umumanyani wache umughaniwa abinite. (Yoha. 11.3) U Lazalo akati afwa, u Yesu akaba na maka aghakuti angamuzusya napo akaba kubutali. Mumalo mwache, u Yesu akasala ukubuka ku Betaniya ukuti aye abe poka na bamanyani bache, u Maliya nu Malita. Ka muli nu mumanyani yo angabavwa napo mutamulabite? Mubaghiye ukuti mungamusubalila ukuti angabavwa ‘pakabalilo ko muli ni ntamyo.’ (Mbupi. 17.17) Ngati we Yesu, nuswe bulo tube swe bamanyani abiza ku bamwitu! Pakabalilo aka zatunyokele sona ku nkani yitu nu kwennya vyo vikabombiwa.
12. Ka u Yesu akamulayizya ichoni u Malita, sona choni cho u Malita akalondiwanga ukusubila vyo u Yesu akamulayizya? (Yohani 11.23-26)
12 Belenga Yohani 11.23-26. U Malita akamanya ukuti u Yesu ali kupipi na ku Betaniya. Umwalubilo akachimbila ukuti aye akomane nawe, akati akomana nawe akanena ukuti: “Mwene nanti ukabangapo panapa, ngali umuyemba wane atafuye!” (Yoha. 11.21) Bwanaloli ukuti nanti u Yesu akabangapo nge akamupozya u Lazalo. Loli u Yesu akalondagha ukuti abombe ichintu chimo cho chikaba chikulu nkani. Akamubuzya ukuti: “Umuyemba wako akwiza pakuzyuka kubufwe.” Akamubuzya sona u Malita ichifukwa ichamwabo cho akalondiwanga ukusubila ivintu vyo akanena ivi, po akanena ukuti: “Ane [une] ne yuyo akuzusya abantu nukubapa ubumi.” Naloli, u Chala akamupa u Yesu amaka aghakuzusizya abafwe. Pakabalilo kamo u Yesu akazusya umwana umulindu nu munyamata bo bakaba ukuti bafwa mwalunulu. (Luka 7.11-15; 8.49-55) Ka u Yesu angazusya umuntu yo akaba ukuti pendapo amasiku 4 ukufuma po akafwila sona umubili bwache bukanda pakubola?
“LAZALO EPAMO!”
U Yesu akaba ni chitima nkani akati ennya abamanyani bache bakulila (Ennya indime 13-14)
13. Ukuyana namo pakunenela pa Yohani 11.32-35, ka u Yesu akabomba ichoni akati ennya u Maliya na bantu abanji bakulila? (Ennya sona ichituzi.)
13 Belenga Yohani 11.32-35. Inong’onela vyo vikabombiwa u Yesu akati afika. U Maliya nu Malita, bakafuma ukuti baye bakomane nu Yesu. U Maliya akapyanizya vyo umukulu wache akanena, akati: “Mwene nanti ukabangapo panapa, ngali umuyemba wane atafuye.” U Maliya poka na bantu abanji bo bakaba nabo pamalo ghala, bakaba ni chitima sana. Bo u Yesu ennya nu kwivwa abantu bala bakulila, ichitima chikamulema sana. Ichifukwa chakuti akabapelela ichisa abamanyani bache bala, ichitima chikamulema akayimba nkani mumoyo, pisinda pache u Yesu akalila. Akwivwisya mo chikubabila nanti umuntu yo tumughanite afwa. Naloli, u Yesu akulonda nkani ukuti ize efyepo ivintu vyo vikupangisya ukuti abantu balilaghe!
14. Nkimba tukumanyilako ichoni ivyakukwafannya nu Yehova ukufuma ku vyo u Yesu akabomba ati ennya u Maliya akulila?
14 Mo u Yesu akabombela ati ennya ukuti u Maliya akulila, vikutumanyisya ukuti u Yehova we Chala uwachisa nkani. Choni cho tukunena bunubu? Ngati mo tukamanyilila munkani iya bwandilo, u Yesu akumweghelela u Baba wache, mukinong’onele na muvyakubomba. (Yoha. 12.45) U Yesu akalila ichifukwa chakuti akabapelela ichisa abamanyani bache bo bakalilagha. Tukumanya ukuti u Yehova wepe akuyivwa umwakuyana bulo nanti akwennya ukuti tukulila. (Sali. 56.8) Ka ivi vitakubavwa ukuti mupalamile kupipi nu Chala witu uwachisa nkani?
U Yesu akalangizya ukuti ali na maka aghakuzusya abantu (Ennya indime 15-16)
15. Ukuyana nu Yohani 11.41-44, choni cho chikabombiwa pipumpa ilya Lazalo? (Ennya sona ichituzi.)
15 Belenga Yohani 11.41-44. Bo u Yesu afika pipumpa ilya Lazalo, akabalamula ukuti befyepo ibwe lyo likaba pamulyango uwipumpa. U Malita akanena ukuti pakabalilo aka umubili wache ghukwenela ukuti wanda ukununka. U Yesu akamubuzya akati: “Nkimba intakakubuzya ukuti nanti ukusubila ukwiza pakwennya ubuchindamu ubwa Chala?” (Yoha. 11.39, 40) U Yesu akennya amaso ghache kumwanya nu kwiputa pibumba lila. Akalondagha ukuti vyo inti vibombiwe apa, vipeleke umuchizi kwa Yehova. Pisinda pache, u Yesu akakitizya nizyu ilyapamwanya nkani akati: “Lazalo epamo!” U Lazalo akafumamo mwipumpa! Apa u Yesu akabomba ichintu cho abantu bakinong’onagha ukuti chitangabombiwa.
16. Ka inkani yo yili pa Yohani chaputala 11 yikughomya buli-buli ulwitiko lwitu mwi layizyo ilyakuti abafwe bakwiza pakuzyuka?
16 Inkani yo yikwayiwa pa Yohani chaputala 11, yikughomya ulwitiko lwitu ukuti abafwe bakwiza pakuzyuka. Buli-buli? Kumbukila ilayizyo lyo u Yesu akamubuzya u Malita ilyakuti: “Umuyemba wako akwiza pakuzyuka kubufwe.” (Yoha. 11.23) Ngati we Tata wache, u Yesu ali ni chinyonywa na maka umwakuti akwiza pakukwanilisya vyo alayizizye. Akulonda nkani ukuti ize abazusye abantu bo bafuye nu kwefyapo ichitima cho abantu bakuba nacho ichifukwa cha bufwe. Ichifukwa chakuti u Lazalo akazyuka, u Yesu akalangizya sona ukuti ali na maka aghakuzusya abafwe. Inong’onela sona vyo u Yesu akamukumbusya u Malita, akamukumbusya ukuti: “Nkimba intakakubuzya ukuti nanti ukusubila ukwiza pakwennya ubuchindamu ubwa Chala?” (Yoha. 11.40) Tuli ni chifukwa ichiza ichakusubila ukuti u Chala akwiza pakukwanilisya ilayizyo lyache ilyakuti abafwe bakwiza pakuzyuka. Ka tungabomba buli-buli ukuti tulisubilaghe ilayizyo ili?
MO TUNGABOMBELA UKUTI TULISUBILAGHE ILAYIZYO ILI
17. Nkimba tukulondiwa ukwinong’ona ichoni nanti tukubelenga inkani izya mu Bayibolo, izyakukwafannya na bantu bo bakazyuka?
17 Mubelengaghe nu kwinong’onelapo inkani izya bantu bo bakazyuka. Mu Bayibolo muli inkani 8 izya bantu bo bakazyusyiwa nu kuba nu bumi pachisu ichapasi. c Choni cho tukulondiwa ukumanyila inkani izi? Nanti mukumanyila inkani izi, mukumbikilaye ukuti bo bakazyuka bakaba bantu naloli. Pakaba abanavuli, abakolo na bana. Mwennyange vyo mukumanyilapo. Mwinong’onelaye mo inkani yo mukubelenga yikulangizizya ukuti u Chala akulonda hee sona ali na maka aghakuzusizya abantu bo bakafwa. Ukuchila vyosi ivi, mwinong’onele nkani ukuzyuka kwa Yesu ko kwakulondiwa hee. Mukumbukile ukuti ukuzyuka kwa Yesu, abantu abingi bakennya na maso ghabo nu kusimikizya ukuti akazyuka naloli, ichi chikutwavwa ukuti tube nu lwitiko ulwa kughoma.—1 Koli. 15.3-6, 20-22.
18. Ka inyimbo zyo zikulongosola ukuti abafwe bakwiza pakuzyuka zingatwavwa buli-buli? (Ennya sona amazyu aghamuntende.)
18 Mwimbaghe “inyimbo izya buzimu” zyo zikulongosola ukuti abafwe bakwiza pakuzyuka. d (Efe. 5.19) Inyimbo izi, zikutwavwa ukughomya ulusubilo nu lwitiko lwitu ukuti abafwe bakwiza pakuzyuka. Nanti mukwimba inyimbo izi muzivwisyange akiza, munozgekelaghe pakwiputa kwinyu ukwa pambumba ukuti mwimbaghe akiza nu kunenezannya vyo amazyu gho ghali munyimbo izi ghakung’anamula. Ukuti inyimbo izi zitufike pa moyo witu sona ukuti zitwavwe ukughomya ulwitiko lwitu, tukulondiwa ukusungila nu kwinong’onelapo amazyu gho ghali munyimbo. Nanti mukubomba bunubu, vikwiza pakubavwa nanti mwakomana ni ntamyo pamo nanti umuntu yo mumughanite afwa, umuzimu uwa Yehova ghukwiza pakubavwa ukuti mukumbukile inyimbo izi, zyo zikwiza pakubaghomya nu kubasangalusya.
19. Nkimba tukulondiwa ukwinong’onelapo ichoni pa nkani iyakuti abafwe bakwiza pakuzyuka? (Ennya ibokosi ilya mutu uwakuti “ Nkimba Mungamulalusya Ichoni?”)
19 Mwinong’onelaghepo. U Yehova atupiye amahala aghakuti twinong’onelaghepo ngati tuli muchisu ichipya. Umuyemba yumo akalongosola ukuti: “Akabalilo akinji nkwinong’onelaghapo ngati indi muchisu ichipya icha paladayiso mo muli akamunusi akiza aka maluba.” Mwisende ngati ukuti mwakomana na banavuli na bakolo abasubaliwa bo bakutambuliwa mu Bayibolo. Ka mungalonda ukuti mukomane nu wenu? Nkimba mungamulalusya ichoni umuntu uyo? Inong’onela sona ukuti mwakomana nu muntu yo mukamughanagha nkani loli akafwa. Inong’onela ivintu vyo mungamubuzya nanti mwakomana bulo, mo mungamupokelela na mo mungayivwila nanti mwakomana nawe.
20. Ka tukulondiwa ukubomba ichoni?
20 Tukumupalizya nkani u Yehova ichifukwa chakutulayizya ukuti abafwe bakwiza pakuzyuka! Tuli nu lusubilo ukuti ilayizyo ili, likwiza pakukwanilisyiwa ichifukwa chakuti u Yehova akulonda sona ali na maka aghakukwanilisizya ilayizyo ili. Za tubukilile ukughomya ulwitiko lwitu mwilayizyo ili. Nanti tukubomba bunubu, inti vitwavwe ukuti tupalamile nkani kwa Chala, yo atulayizisye ukuti ‘Abakamu bitu bakwiza pakuzyuka!’
ULWIMBO 147 Umoyo Wamuyirayira Walayizgika
a Nanti umuntu yumo yo mumughanite afuye, tutakukayikila ukuti ilayizyo ilyakuti abafwe bakwiza pakuzyuka likubasangalusya sana. Ka mungabalongosolela buli-buli abantu abanji ichifukwa cho mukusubila ukuti abafwe bakwiza pakuzyuka? Ka mungaghomya buli-buli ulwitiko lwinyu mulayizyo ilyakuti abafwe bakwiza pakuzyuka? Inkani iyi yasimbiwa ukuti yitwavwe ukughomya ulwitiko lwitu mu lusubilo ulwakuti abafwe bakwiza pakuzyuka.
b Ulwimbo ulwa mutu wakuti Dziko Latsopano Lili Pafupi luli mu broadcasting iya Novembala 2016, iya Chichewa.
c “Inkani izi zikwayiwa pa masimbo agha: 1 Nyafya. 17.17-24; 2 Nyafya. 4.32-37; 13.20, 21; Luka 7.11-15; 8.41-56; Yoha. 11.38-44; Imbo. 9.36-42; 20.7-12.”
d Ennya inyimbo izi mwibuku ilyakuti ‘Yimbirani Yehova Mwakukondwa’: “Mujiwone Kuti Muli mu Charu Chiphya” (Ulwimbo 139), “Laŵiskaninge pa Njombe” (Ulwimbo 144), sona “Wazamuchema” (Ulwimbo 151). Ennya sona pa jw.org pachigaba ichakuti sumu “Dziko Latsopano Lili Pafupi,” “Charu Chiphya Icho Chizenge,” sona “Mwamuwona.”
