Bakennya Ulughano mu vyakubombiwa
U YOMARA na bayemba bache u Marcelo nu Hiver bakwikala mukaya akanandi ku Guatemala. U Yomara akanda ukumanyila Ibayibolo na Bakaboni ba Yehova sona abayemba bache bope bakiza banda ukumanyila. Loli pakaba intamyo, bosi batatu batakennyanga sona batakamanya ukubelenga amabuku agha bantu bo batakwennya. Umumanyisi wabo uwa Bayibolo akababelengelagha ibuku lyo bakamanyilagha na mavesi ghosi agha mu Bayibolo ukuti bamanyile.
Chikaba chakutamya sana ukuti bakwanisye ukwaghiwapo pankomano izya chipanga. Pabeka chikaba chakutamya ukuti bende ubulendo ubwa, 40 minisi ukuti baye bafike ku Nyumba iya Bumwene. Loli ichipanga chikapanga indondomeko iyakuti baye babasendaghe nukubuka nabo kunkomano. Bo banda pakubapa inkani izya lukomano ulwa mkasi mwa sabata, abakamu bakabavwanga ukuti basungile vyo inti baye banene.
Mu Meyi 2019, inkomano izya chipanga zikanda pakubombiwa mukaya kabo. Ukufuma apo imbumba yimo yo bakaba bapayiniya bakabalilo kosi, bakiza basamila mukaya kabo. Imbumba iyi, yikalondagha ukumanyisya bosi batatu, ukubelenga nu kusimba amabuku agha banthu abambula kwennya. Nangabuli imbumba iyi yope yitakamanyagha ukubelenga nu kusimba amasimbo agha bantu bo batakwennya, loli bakalondagha ukubamanyisya abantu batatu aba ukuti vyovyo babombaghe. Bakiza babuka ku layibulale ko bakaya basenda amabuku agha banthu bo batakwennya ukuti bamanyile mo bangamanyisizya abamwabo mo bangaghabombezezya imbombo.
U Marcelo akwamulapo pakabalilo aka nkomano
Pakati penda imyezi yinandi bulo bosi batatu bakanda ukubelenga akiza amabuku agha bantu bo batakwennya, ivi vikabavwa ukuti babukilile ukukula mwabuzimu. a Pakabalilo aka u Yomala, u Marcelo sona nu Hiver ba payiniya abakabalilo kosi. U Marcelo pakabalilo aka mwavwilizyi uwa chipanga. Usabata aliwesi bakuba bakutangwanika pakumubombela u Yehova. Ichifukwa chakuti bakubikapo umoyo pakumubombela u Yehova, ivi vikwavwa ukuti abapalamani babo bope balimbikilaghe.
Bosi batatu bakuhoboka sana pakwennya ubuntu ubwa lughano bo ichipanga chikubalangizya. U Yomala akanena ukuti, “ukufuma pabwandilo po tukakomana na Bakaboni ba Yehova, bakutulangizya ulughano ulukulu nkani ulwenecho ulwa Chikilisitu.” Umarcel akongelezyapo ukuti, tuli na bamanyani abiza sana muchipanga, sona tukumanya ukuti tuli mumbumba yoka iya pachisu chosi yo yalughano sona yakukolelana. U Yomala na bayemba bache bakulindilila umwakufwasa isiku lyo u Yehova akwiza pakupangisya ichisu chosi ichapasi ukuba paladayiso.—Salimo 37.10, 11; Yes. 35.5.
a Ibulosha ilyamutu wakuti Learn to Read Braille likapangiwa ukuti libavwe bo bata kubelenga nu kusimba.
