1. Nkimba u Yesu akababuzya ichoni abamanyili bache mo ubumalilo bukwiza pakubela, sona akabasoka ichoni?

 BO KWASYALA amasiku ghanandi bulo ukuti u Yesu afwe, abamanyili bache 4, bakamulalusya ukuti: “Nkimba choni chicho chikwiza pakuboneka ukuti aka kokabalilo kakwizila kwako, nubumalilo ubwa chisu ichapasi?” (Mat. 24.3) Abamanyili aba bakalondagha ukumanya akabalilo ko u Yelusalemu ni tempeli lyache vikwiza pakumongoliwa. U Yesu pakubamula, atakanena ivya bumalilo ubwa Yelusalemu weka loli akanena sona ivya “masiku agha bumalilo” gho tukwikalamo agha. Pakunena ivya masiku agha bumalilo agha, u Yesu akanena ukuti: “Loli nayumo umuntu yuyo akumanya isiku pamo akabalilo, bate ba ntumi kumwanya, ate Mwana, Utata mwene we yuyo akumanya.” Ukufuma apo u Yesu akabasoka aba manyili bache ukuti, “muchebaghe” sona “mubanje maso”—Mlko. 13.32-37.

2. Choni cho chikaba chakulondiwa ukuti bosi bo bakikalagha mu Yelusalemu babukilile ukuba maso?

² Abakilisitu Abachiyuda aba bwandilo, bakalondiwa ukubukilila ukuba maso ukuti baponosye ubumi bwabo. U Yesu akababuzya bo bakamukonkagha ivintu vyo vingize vibavwe ukumanya ukuti u Yelusalemu ali papipi pakumongoliwa. Akanena ukuti: “Nanti mukwennya u Yelusalemu azyunguliliwe na balwani, muzimanye ukuti ali papipi pakumongoliwa.” Pakabalilo kala bakalondiwanga ukwivwila ubulongozi bo u Yesu akababuzya ukuti “bachimbililaye mu maghamba.” (Luka 21.20, 21) Pakabalilo ko Abaloma bakamongolagha u Yelusalemu, abantu bosi bo bakivwila vyo u Yesu akabasoka bakapona.

3. Ka munkani iyi inti tunenezyannye ichoni?

 ³ Amasiku ghano tukwikala mukabalilo akabumalilo ko kizuye ni vintu ivibibi. Umwakuyana bulo, nuswe tubanje maso. Munkani iyi inti tunenezyannye vyo vingatwavwa ukuti tubukilile ukuba maso po tukwennya ivintu vyo vikubombiwa muchisu ichibibi ichi, sona inti twennye mo tungabombezezya akiza akabalilo kitu ko kasyala akanandi bulo aka.

4. Choni cho tukulondiwa ukwennya ivintu vyo vikubombiwa muchisu ukuti vikukwanilisya amabuchimi agha mu Bayibolo?

⁴ Pakabalilo aka, swe bakuhoboka ukwennya ivintu vyo vikubombiwa muchisu ukuti vikukwanilisya amabuchimi gho ghali mu Bayibolo. U Yesu akanenela zila ivintu vimo vyo vingatwavwa ukumanya ukuti, ubumalilo ubwa chisu icha Satana ichi buli papipi. (Mat. 24.3-14) U mutumiwa u Pitala akutukazya ukuti tubukilile ukubikako amahala ku mabuchimi gho ghakukwanilisiwa, ukuti ulwitiko lwitu lubukilile ukughoma. (2 Pit. 1.19-21) Ibuku ilya bumalilo mu Bayibolo likwanda na mazyu aghakuti: “Ibuku ili likulingannya nizya buvumbuli bubo u Yesu Kilisitu akavumbula, u Chala akamupa ubuvumbuli ubu, umwakuti abalangizye ababombi bache ivintu vivyo vibaghiye pakubombiwa lunulu.” (Ubuvu. 1.1) Cho chifukwa tuli ni chinyonnywa ukwennya ivintu vyo vikubombiwa muchisu ichi sona tukumanya ukuti vikukwanilisya amabuchimi agha mu Bayibolo. Tukulonda sana ukuti tunenezannyanje na bamwitu ivintu vyo vikubombiwa ivi.

5. Ka tutakulondiwa ukubomba ichoni, loli tubombaghe ichoni? (Ennya sona ichituzi.)

⁵ Pala tukunenezyannya amabuchimi agha mu Bayibolo na bamwitu manyi tusakizyange bulo vyo inti vyize vibombiwe. Chifukwa buli? Ichifukwa chakuti tutakulonda ukunena chilichosi cho chingapangisya ukuti tuvulungannye ukukolelana kwitu muchipanga. Tungivwa abalongozi aba chisu bakunena ivya kukwafannya na mo bangabombela ukuti pachisu patakabe inkondo, pamo bangapangisya ukuti pabe umutende sona nu kufighililiwa. Mumalo mwakuti tusakizyange bulo ukuti ivyakubombiwa ivi, vikukwanilisya ubuchimi bo buli pa 1 Aba Tesalonika 5.3, Loli tukulondiwa ukumanya inkani zyo zyafuma lunulu. Nanti vyo tukunenezyannya na bamwitu vikufuma mu mabuku gho igulu ilya Yehova likufumya, vikwiza pakwavwa ukuti ichipanga chibukilile ukukolelana sona “mubanje poka munyinong’ono.”—1 Kol. 1.10; 4.6.

6. Nkimba twamanyilapo ichoni pa 2 Pitala 3.11-13?

⁶ Belenga 2 Pitala 3.11-13. U mutumiwa u Pitala akutwavwa ukuti tubukilile ukuba maso nanti tukwennya ama buchimi gho ghali mu Bayibolo. Akatulimbikisya ukuti tukulondiwa “ukubukilila ukulindilila isiku ilya Mwene [Yehova].” Chifukwa buli? Te chifukwa chakuti tukulonda bulo ukuti twize tupone “isiku pamo pakabalilo” ko u Yehova akwiza nu Alamagedoni pa chisu ichapasi, loli tukulonda ukubombezya akiza akabalilo kitu ko twasyala nako, ukuti tubanje swe bantu “abazelu sona na bakumunyila u Chala.” (Mat. 24.36; Luka 12.40) Mu mazyu ghamo tunganena ukuti, tubukilile ukuba swe bagholosu mu vyakubomba vyitu, sona twenelezyange ukuti vyosi vyo tukubomba pakumubombela u Yehova vilangizye ukuti tumughanite nkani. Ukuti tubombe bunubu tukulondiwa ukuti akabalilo kosi tubanje maso.

7. Ka tungalangizya buli-buli ukuti tuchebite? (Luka 21.34)

⁷ U Yesu akababuzya abamanyili bache ukuti batakabange maso ni vintu vyeka vyo vikubombiwa muchisu ichi, loli bope babukilile ukuba maso. Ifundo iyi yikuboneka akiza mubulongozi ubwa kusoka bo buli pa Luka 21.34. (Belenga.) Ennya amazyu gho u Yesu akanena ukuti, “muchebaye.” Umuntu yo achebite akuba maso ni chintu chilichosi cho chingananga ubumanyani  bwache nu Yehova sona akuyezya-yezya ukuti atakabombe ivintu ivibibi. Pala akubomba bunubu akubukilila ukwikala mulughano ulwa Chala.—Mbupi. 22.3; Yuda 20, 21.

8. Nkimba umutumiwa u Pabuli akababuzya Abakilisitu ukuti babombaghe ichoni?

⁸ Umutumiwa u pabuli akababuzya Abakilisitu ukuti bachebaghe. Akababuzya Abakilisitu bo bakikalagha ku Efeso ukuti: “Po muchebaghe na mumo mukwendela mutakabanje ngati mwe bantu abasita mahala, loli mubanje mwe bantu aba mahala.” (Efe. 5.15, 16) Usatana akuyezya-yezya ukunanga ubumanyani bwitu nu Yehova, cho chifukwa Ibayibolo likunena kuti ‘mubwivwisyanje ubwighane ubwa Yehova.’ Ivi vingatwavwa ukuti tulimbane na chilichosi cho usatana akuchibombezya ukuti tunange ubumanyani bwitu nu Yehova.—Efe. 5.17.

9. Ka tungabwivwisya buli-buli ubwighane ubwa Yehova kwa uswe?

⁹ Ibayibolo litakunena chilichosi cho chingananga ubumanyani bwitu nu Yehova. Tukulondiwa ukuti tusalaghe akiza, ivintu vyo Amasimbo ghatakunena umwa kusimikizya. Ukuti tusale ivintu umwa mahala tukulondiwa ukusala ivintu vyo vikukolelana nu “bwighane ubwa Yehova.” Tungabomba bunubu nanti akabalilo kosi tukumanyila Amazyu agha Chala sona pala tukukonkha vyo tukumanyila. Pala tukwivwisya akiza ubwighane ubwa Yehova sona tukuyezya-yezya ukuba ni “nyinong’ono izya Kilisitu.” Ivi vikwiza pakutwavwa ukuti tubukilile ukwenda ngati muntu uwa mahala, napo tute ni ndaghilo izyakuti zitulongozyange pa chilichosi. (1 Kol. 2.14-16) Akabalilo kamo tungamanya ivintu vyo tubaghiye ukubomba, loli akabalilo kamo vingaba vyakutamya ukuti tuvimanye akiza vyo tukulondiwa ukubomba.

10. Ka vintu buli ivyakoghofya vyo tukulondiwa ukuvikana?

¹⁰ Ivintu vimo ivyakoghofya nkani vyo tutakulondiwa ukuba navyo ko, kukopana, ubwaching’wela, ukuvimbilwa, ukunena ivintu vyo vingabakalalizya abamwitu, ukuba na bamanyani ababibi, inkaza, sona ukwenelezya ivituzi ivya musikuzi sona nivinji ivyamwabo. (Salimo 101.3) Umulwani witu umubibi akuzyungulila-zyungulila ukuti anange ubumanyani bwitu nu Yehova. (1 Pit. 5.8) Nanti tute maso u satana angabyala imbeyu iyibibi mu moyo witu iya vinthu ngati, akabini, ulubengo, ubukali, ukwighana, ubupavu, ubusita busubaliwa sona nukubomba ivintu vyo vingabavulazya abamwitu. (Gal. 5.19-21) Pabwandilo ivi vingaboneka ngati vipepe loli nanti tutakubombapo zimo umwalubilo ukuti tuvikanizye ivintu ivi, vingabukilila ukukula ngati ikwi ilya poyizoni vyo vingapangisya intamyo izikulu.—Yak. 1.14, 15.

11. Ka chipingo buli chimo cho tukulondiwa ukuba nacho maso sona chifukwa buli?

¹¹ Ichintu choka ichakoghofya nkani, ko kuba na bamanyani ababibi. Zatwennye ichakubombiwa ichi. Mukubomba imbombo nu muntu yumo yote we Kaboni wa Yehova. Mukulonda ukuti uwamwinyu uyu inong’onaghe ivintu ivyiza ivyakukwafannya na Bakaboni ba Yehova, mukwanda ukumulangizya ichisa sona mukumwavwa. Akabalilo kamo mukwitikizya ukuti mulye nawe poka ichakulya icha pamusanya. Ukufuma apo mwanda ukulya nawe ichakulya akabalilo kosi. Akabalilo kati kendapo mukwanda pakunenezyannya inkani izibibi zyo pabwandilo mukazikanagha sona mutakamulilaghako. Pabumalilo numwe mukwanda ukuzighana inkani izi sona mutakukalala nazyo. Isiku limo uwamwinyu uyu angabitizya ukuti muye mung’wele poka pala mwabwela ku mbombo, sona umwe mungitikizya. Tukumanya ukuti pala akabalilo kangendapo numwe munganda ukwinong’ona ngati uwamwinyu yo mukubomba nawe uyu. Nkimba pangenda akabalilo akatali ukuti numwe mwande pakupanga inkalo zyo uwamwinyu uyu ali nazyo? Naloli tukulondiwa ukuba swe bantu abachisa sona abamuchizi ku bantu bosi, loli tukumbukaghe ukuti abantu bo tukwikala nabo  akabalilo akatali pamo bo tukubomba nabo ivintu kwa kabalilo akatali tunganda pakusendelako inkalo zyo bali nazyo. (1 Kol. 15.33) Pala tukubukilila ukuba maso ngati mo u Yesu akanenela, vikwiza pakutwavwa ukuti tutakakolelanaghe na bantu bo batakukonka indaghilo izya Yehova. (2 Kol. 6.15) Nanti tukubomba bunubu tukwiza pakuchipota ichipingo ichi.

12. Ka abamanyili aba Yesu bakalondiwa ukuti babombaghe ichoni po bakulindilila ubumalilo ubwa chisu?

¹² U Yesu atakalondagha ukuti abamanyili bache bikalaghe bulo, loli batangwanikaghe po bakulindilila ubumalilo ubwa chisu ichi. U Yesu akabapa imbombo iyakuti babombaghe. Akabalamula abamanyili bache ukuti balumbililaghe amazyu amiza “mu Yelusalemu, na mu Yudeya mosi, sona na mu Samaliya mupaka na kumpaka iya chisu ichapasi.” (Imbo. 1.6-8) Ka mbombo buli iyikulu yo u Yesu akabapa abamanyili bache ukuti babombaghe? Abamanyili bache bakabombagha chilichosi cho bangakwanisya pakulumbilila ku bantu, abene bakalangizya ukuti bakabombezyanga akabalilo kabo umwamahala.

13. Choni cho tukulondiwa ukubombezya akiza akabalilo kitu? (Aba Kolosi 4.5)

¹³ Belenga Aba Kolosi 4.5. Ukuti tulangizye ukuti tuchebite tukulondiwa ukubombezya akiza akabalilo kosi ko tulinako. ‘Aliwesi bulo, ivintu  ivyakuchenusya vingamuwila akabalilo kalikosi.’ (Ndumbi. 9.11) Umuntu aliwesi angafwa umwakudumuka bulo.

14-15. Nkimba tungabombezya buli-buli akabalilo kitu akiza? (Aba Hebeli 6.11, 12) (Ennya sona ichituzi.)

¹⁴ Tungabombezya akiza akabalilo kitu, nanti tukubomba ubwighane ubwa Yehova sona pala tukughomya ubumanyani bwitu. (Yoh. 14.21) Mukulondiwa ukuti “mwimaghe nkani sona mutakayinganaghe, akabalilo kosi mukolesyannyanje pakumubombela umwene.” (1 Kol. 15.58) Pala tungabomba bunubu tutakwiza pakudandabula ukuti tutabombite ivyingi pakumubombela u Yehova pakabalilo ko tukwennya ukuti ubumi bwitu buli kubumalilo, pamo ubumalilo ubwa chisu ichi.—Mat. 24.13; Lom. 14.8.

¹⁵ Amasiku ghano u Yesu akubukilila ukubalongozya abamanyili bache, pambombo iyakulumbilila ivya Bumwene ubwa Chala pachisu chosi ichapasi. Akukwanilisya vyosi vyo atulayizizye. Ukwizila mu gulu ilya Yehova, u Yesu akutumanyisya mo tungalumbililila sona akutupa amabuku gho ghakutwavwa ukuti tulumbilile akiza amazyu amiza. (Mat. 28.18-20) Tukubomba vyosi vyo tungakwanisya pambombo iyakulumbilila nu kumanyisya. Tukubukilila ukuba maso, po tukulindilila ukuti u Yehova ize amazye ichisu ichibibi ichi. Pala tukukonka ubulongozi bo buli pa Aba Hebeli 6.11, 12, inti tukolesye ulusubilo lwitu “mpaka pabumalilo.”—Belenga.

16. Nkimba tukulondiwa ukuti tubombe ichoni?

¹⁶ U Yehova asalite kale isiku sona na kabalilo ko akwiza pakumazizya ichisu icha Satana ichi. Pala isiku ili lyizya lyakwana, u Yehova atakwiza pakupotwa ukukwanilisya amabuchimi ghosi gho anenite mu Mazyu ghache. Akabalilo kamo tunganda pakwennya ukuti ubumalilo ubwa chisu ichi bukuchedwa, loli isiku ilya Yehova ‘litakuchedwa!’ (Haba. 2.3) Pakabalilo aka, ‘tubukilile ukwennya kwa Yehova’ umwakuti tulangizye ukuti ‘tukulindilila u Chala umpoki witu.’—Mika 7.7.