INKANI IYAKUMANYILA 10
Choni Cho Mubaghiye Ukoziwa?
“Mwebosi mupinduke nukuzileka imbibi zyinyu nukoziwa.”—IMBO. 2.38.
ULWIMBO 34 Kwenda mu Urunji
VYO INTI TUMANYILE a
1-2. Ka choni cho chikubombiwa nanti abantu bakoziwa, sona ka umwe mubaghiye ukumanya ichoni?
NKIMBA mwenizyepo igulu ilya bantu bo bakulonda ukoziwa? Tukusubila ukuti mukivwa amazyu aghakulangizya ukuti bahobokite po bakamulagha amalalusyo ghabili bo bachili pakoziwa. Mukennya aba mumbumba yabo na bamanyani babo ukuti bahobokite sana. Bo abamanyili aba bazubuka mumizi mukivwa nu kwennya ukukoma ukwa manja sona ivyeni vyabo vikaboneka ukuti vyakuhoboka. Usabata aliwesi abantu amasauzandi aghingi bakusenda indondomeko iyi umwakwiyipa nu koziwa ukuba Bakaboni ba Yehova u Chala.
2 Ka umwe vili buli-buli? Nanti mukwinong’ona ivyakuti moziwe, mukuba mwe bapamwanya nkani muchisu ichibibi ichi, ichifukwa chakuti ‘mukumulonda-londa u Yehova.’ (Sali. 14.1, 2) Inkani iyi yisimbiwe ukuti yavwe umuntu aliwesi, uwachinyamata pamo uwachasongo. Loli swebosi swe toziwe kale tukulondiwa ukubukilila ukughomya ubwighane bwitu pakumubombela u Yehova kwa bwila na bwila. Pakabalilo aka zatunenezyannye ivifukwa vitatu vyo tubaghiye ukubukilila ukumubombela u Yehova.
MUBUGHANITE UBWANALOLI NU BUGHOLOSU
U Satana ananga izina ilyiza ilya Yehova kwa myaka iyinji sona akubukilila ukubomba bunubu (Ennya indime 3-4)
3. Choni cho ababombi ba Yehova babughanite ubwanaloli nu bugholosu? (Salimo 119.128, 163)
3 U Yehova akabalamula abantu bache ukuti ‘babughane ubwanaloli.’ (Zeka. 8.19) U Yesu akabalimbikisya bo bakamukonkagha ukuti babughanaghe ubugholosu. (Mata. 5.6) Ivi vikung’anamula ukuti aliwesi akulondiwa ukuba ni chinyonywa ichakulonda ukubomba ubugholosu, ubwiza sona ivintu ivyiza mumaso agha Chala. Nkimba mubughanite ubwanaloli nu bugholosu? Tukusubila ukuti mubughanite. Mububengite ubumyasi nu bunanzi ubwa mtundu ghulighosi ni vintu ivibibi. (Belenga Salimo 119.128, 163.) Umuntu umumyasi akulangizya inkalo izya Satana yo mulaghili uwachisu ichi. (Yoha. 8.44; 12.31) Ichintu choka cho u Satana akulonda, chakuti anange izina izelu ilya Yehova u Chala. U Satana akunena amabumyasi aghakupambana-pambana aghakukwafannya nu Chala, ukufuma bulo po akabavulungannya abantu mumughunda uwa Edeni. Akubapangisya abantu ukwinong’ona ukuti u Yehova mulili, sona Mulaghili yo te musubaliwa, akubafisila abantu bache ivintu ivyiza. (Ubwa. 3.1, 4, 5) Amabumyasi gho u Satana akunena aghakukwafannya nu Yehova ghakubukilila ukunanga inyinong’ono izya bantu ukuti binong’onaghe ivintu ivibibi ivyakukwafannya nu Yehova. Pala abantu bakukana ukusala ‘ukubughana ubwanaloli,’ u Satana angababombezya imbombo ukuti babombaghe ivintu ivibibi—Loma 1.25-31.
4. Ka u Yehova alangizya buli-buli ukuti ‘we Chala uwabwanaloli’? (Ennya sona ichituzi.)
4 U Yehova we ‘Chala uwabwanaloli’ sona akulonda ukubamanyisya ubwanaloli abantu bosi bo bamughanite. (Sali. 31.5) Akubomba bunubu ukuti abavwe ukumanya amabumyasi agha Satana. U Yehova akubamanyisya sona ababombi bache ukuti babanje basubaliwa sona bagholosu. Ivi vikubavwa ukuti bichindikaghe sona ukuti babe nu mutende uwa mu moyo. (Mbupi. 13.5, 6) Ka vyovyo abombite numwe po mukumanyila Ibayibolo? Mwamanyila ukuti izila izya Yehova zyakwavwa kubantu bosi sona kwa aliwesi pamwene. (Sali. 77.13) Ivi vingabavwa ukulonda ukubomba ivintu vyo u Chala akuti vigholosu. (Mata. 6.33) Mukulonda ukufighilila ubwanaloli, nu kwavwa ukususya amabumyasi gho u Satana akumunena u Chala, u Yehova. Ka mungavwapo buli-buli?
5. Ka mungafighilila buli-buli ubwanaloli nu bugholosu?
5 Mungasala ukwikala ubumi bo bungalangizya ngati mukunena ukuti: “Nkukana amabumyasi ghosi agha Satana nu kufighilila ubwanaloli. Nkulonda ukuti u Yehova weyo abe Mulaghili wane, sona nkulonda ukubomba vyo akunena ukuti vyiza.” Ka mungabomba buli-buli bunubu? Umwakumubuzya u Yehova mulwiputo ukuti mukumulayizya ukuti inti mumubombelaghe ubumi bwinyu bosi ukufuma apo mukoziwa. Ukughana ivintu vyo vyabwanaloli sona ivigholosu, vili na maka gho ghangabavwa ukuti musale ukuti moziwe.
MUMUGHANITE U YESU KILISITU
6. Nkimba vifukwa buli vyo vili pa Salimo 45.4 vyo vingabapangisya ukumughana u Yesu Kilisitu?
6 Choni cho mumughanite u Yesu Kilisitu? Ennya ivifukwa vimo ivyiza vyo vikwaghiwa pa Salimo 45.4. (Belenga.) U Yesu abughanite ubwanaloli, ukwiyisya nu bugholosu. Pala mubughanite ubwanaloli nu bugholosu, kokuti mumughanite sona u Yesu Kilisitu. Inong’onela mo u Yesu akafighilila ubwanaloli nu bugholosu. (Yoha. 18.37) Ka u Yesu akulimbikisya buli-buli ukwiyisya?
7. Ka mukwiyivwa buli-buli nukwiyisya ukwa Yesu?
7 U Yesu akalimbikisya ukwiyisya muvyakubombiwa vyache. Umwakufwanikizya, u Yesu akapeleka ubuchindamu bosi kwa Tata wache. (Mali. 10.17, 18; Yoha. 5.19) Ka mukwiyivwa buli-buli pala mukwennya ukwiyisya ukwa Yesu? Ka ivi vitakubapangisya ukumughana u Mwana uwa Chala nu kumukonka? Tutakukayikila ukuti mungabomba bunubu. Choni cho u Yesu wakwiyisya? Ichifukwa chakuti amughanite sona akweghelela kwa Baba wache, yo wakwiyisya nkani. (Sali. 18.35; Hebe. 1.3) Nkimba mutangamuyezya u Yesu yo umwakufikapo akuyezya inkalo izya Yehova?
8. Choni cho tumughanite u Yesu Umwene witu?
8 Tumughanite u Yesu Umwene witu, ichifukwa chakuti Mulaghili witu umwiza. U Yehova akamumanyisya u Mwana wache nu kumusala ukuba we mwene. (Yesa. 50.4, 5) Zatwinong’onele ukwiyipa ukwa lughano ko u Yesu akalangizya. (Yoha. 13.1) Pakuti u Yesu we Mwene winyu, akwenelela ulughano lwinyu. Akalongosola ukuti bosi bo bakulangizya ulughano ulwa bwanaloli akubitizya ukuti bamanyani bache. Akubitizya bunubu ichifukwa chakuti bakulangizya ulughano ulu pakwivwila amalamulo ghache. (Yoha. 14.15; 15.14, 15) Vyakuhobosya nkani hee ukuba mumanyani uwa Mwana wa Yehova!
9. Ka ukoziwa ukwa Bakilisitu kukuyana buli-buli nu kwa Kilisitu?
9 Ilamulo lyoka ilya Yesu lyakuti abamanyili bache boziwanje. (Mata. 28.19, 20) Akalangizya mo bangabombela. Muzila zimo, ukoziwa kwache nu kwa bamanyili bache kupambanite. (Ennya ibokosi ilyakuti “ Ka Ukoziwa Ukwa Yesu Kupambanite Buli-buli nu kwa Bamanyili Bache?”) Loli muzila zimo, tunganena ukuti kuyanite. Pakabalilo ko akoziwanga, u Yesu akalangizya ukuti ipeleka pakubomba ubwighane ubwa Wise. (Hebe. 10.7) Umwakuyana bulo, Abamanyili aba Kilisitu nanti bakoziwa bakulangizya pabuzelu ukuti bakwipeleka pakumubombela u Yehova u Chala. Pakabalilo aka ichintu ichakulondiwa nkani pa bumi bwabo, ko kubomba ubwighane ubwa Chala. Pala bakubomba bunubu bakulangizya ukuti bakukonka vyo Umwene wabo akabomba.
10. Choni cho ukumughana u Yesu kungabapangisya ukuti moziwe?
10 Tukumanya ukuti mukusubila ukuti u Yesu Mwana weka umughaniwa uwa Yehova yo amwimikite ukuba we Mwene winyu. Mukumwennya u Yesu ukuti wakufikapo sona wakwiyisya ngati we Baba wache. Mwamanyila ukuti akalyesya abantu bo bakaba ni zala, akabakazya bo bakaba bakufoka sona akapozya bo bakaba babine. (Mata. 14.14-21) Mukwennya mo akulongozezya ichipanga amasiku ghano. (Mata. 23.10) Sona mukumanya ukuti akwiza pakubomba ivinji muntazi pakuba we Mwene uwa Bumwene ubwa Chala. Ka mungalangizya buli-buli ukuti mumughanite? Umwakukonka vyo akabombagha. (Yoha. 14.21) Ichintu choka ichakulondiwa nkani cho mungabomba, ko kwipeleka kwa Yehova nu koziwa.
MUMUGHANITE U YEHOVA U CHALA
11. Choni cho mukulondiwa ukoziwa sona chifukwa buli?
11 Nkimba chifukwa buli ichakulondiwa hee cho mukulondiwa ukoziwa? U Yesu akanena ichintu chakulondiwa nkani mundaghilo izya Chala, akanena ukuti: “Umughanaghe Umwene [Yehova] u Chala wako nu moyo wako ghosi nu muzimu wako ghosi ni nyinong’ono zyako zyosi na maka ghako ghosi.” (Mali. 12.30) Ka amazyu agha ghakulangizya mo mumughaniye u Chala?
U Yehova weyo Chiziba icha vintu vyosi ivyiza vyo mukuhoboka navyo akabalilo kosi sona navyo inti mwize muhoboke navyo muntazi (Ennya indime 12-13)
12. Choni cho mumughanite u Yehova? (Ennya sona ichituzi.)
12 Pali ivifukwa ivyinji ivyakumughanila u Yehova. Atupiye ulusako ulwakumumanya ukuti ‘umwene chiziba icha bumi’ sona akutupa “ichabupi chosi ichiza sona ni chakufikapo.” (Sali. 36.9; Yako. 1.17) Ichintu chilichosi ichiza cho mukuhoboka nacho, chikufuma kwa Chala uwalughano.
13. Choni cho isembe chabupi ichapamwanya nkani?
13 Isembe chabupi ichapamwanya nkani cho u Yehova akutupiye. Choni cho tukunena bunubu? Inong’onela ukukolelana ko kulipo pakasi pa Yehova nu Mwana wache. U Yesu akanena ukuti: “U Tata anganite” sona “Imughanite u Tata.” (Yoha. 10.17; 14.31) Ubumanyani bwabo, bukabukilila ukughoma kwamaka amingi po bakikalagha poka. (Yoha. 3.16; Gala. 2.20) Pakabalilo aka, inong’onela mo vikamubabila u Chala po akitikizya U Mwana wache ukuti atamiwe nu kufwa. U Yehova abaghanite hee abantu numwe bulo pamwebene, cho chifukwa akatupa u Mwana wache ukuba chakwiyipa ukuti umwe na bantu bosi mwize mubwaghe ubumi ubwa bwila na bwila. (Yoha. 3.16; Gala. 2.20) Patalipo ichifukwa cho chingapangisya ukuti manyi tumumanye u Chala.
14. Nkimba mungasala ichoni pa bumi bwinyu?
14 Ulughano lwinyu pa Yehova lwakula nkani mwati mwamanyila ivingi ivyache. Naloli mukulonda ukupalamila kukwache pakabalilo aka sona kwa bwila na bwila. Ivi vingabombiwa naloli. Umwachisa u Yehova akubakazya ukuti muhobosyanje umoyo wache. (Mbupi. 8.22, 23, 30) Mutangabomba bunubu mu vyakunena bulo, loli na mu vyakubombiwa. Mo mukwikalila pa bumi bwinyu mungalangizya ukuti mumughanite naloli u Yehova. (Yoha. 3.16; Gala. 2.20) Ichi chakusala ichiza sana cho mutasalite lumo pa bumi bwinyu.
15. Ka mungalangizya buli-buli ulughano lwinyu kwa Yehova?
15 Ka mungalangizya buli-buli ulughano lwinyu kwa Yehova? Ichabwandilo, mukwiputa kwa mwebene ulwiputo lo mukwipeleka kwa Chala weka uwa bwanaloli. (Sali. 40.8) Ukufuma apo, mukulangizya ukwipeleka kwinyu kula pabuzelu umwakoziwa. Ngati mo twanenezanizya kubwandilo ubwa nkani iyi, ichi chikuba chakubombiwa ichakuhobosya hee sona kakuba kabalilo akakusinta. Mukwanda ubumi ubupya, ubwakuti akabalilo kosi te mubombaghe ivyakuti mwihobosyange mwebene loli inti mumuhobosyange u Yehova. (Loma 14.8; 1 Pita. 4.1, 2) Ivi vingaboneka ngati vyakutamya ukuti tusale, inga vingaboneka bunubu. Loli vikwighula izila iyakuba nu bumi ubwiza nkani. Buli-buli?
16. Ukuyana nu Salimo 41.12 , ka u Yehova akwiza pakubasaya buli-buli abantu bo bakwipeleka nu bumi bwabo bosi pakumubombela?
16 U Yehova mupi nkani ukulusya abantu bosi. Chilichosi cho mungamupa u Yehova, akabalilo kosi akwiza pakubapa sona ivintu ivyingi. (Mali. 10.29, 30) Akwiza pakubapa ivintu ivyakuhobosya sona ukuti mube mwe bakwikutisiwa nu bumi bwinyu, nangabuli tuli muchisu icha kale ichi. Ivi bwandilo bulo. Ubumi bo mwanda mwati moziwa, butabaghiye ukumala. Mubukilile ukumubombela u Baba winyu yo mumughanite kwa bwila na bwila. Ulughano lo lulipo pakasi pa umwe nu Baba winyu, lukwiza pakubukilila ukukula sona mukwiza pakwikala ngati mo akwikalila kwa bumi bwinyu bosi.—Belenga Salimo 41.12.
17. Ka mungamupa ichoni u Yehova cho ate nacho kale?
17 Pala mwasala ukwipeleka nu koziwa, mukuba nu lusako ulwakupeleka ichintu chimo cho chapamwanya sana kwa Tata winyu. Abapiye ivintu vyosi ivyiza, ivyakuhobosya vyo mukuhoboka navyo. Mungamunyosezya vyo ababombeye, mungamupa Umwenecho uwakumwanya ni chisu ichapasi ichintu cho ate nacho, ko kwipeleka kwinyu pakumubombela. (Jobu 1.8; 41.11; Mbupi. 27.11) Iyi yoyo zila iyakwikala nu bumi ubwiza sana! Tutakukayikila ukuti ulughano lwinyu kwa Yehova inti lubapangisye ukuti moziwe.
KA MWISENGANNYA UKUTI MOZIWE?
18. Ka malalusyo buli gho mungilalusya?
18 Ka mungamula buli-buli ilalusyo ilyakuti, Ka inti moziwe? Aliwesi angamula paweka. Loli vingabavwa nanti mungilalusya ukuti, ‘Choni cho nkulindilila?’ (Imbo. 8.36) Kumbukila ivifukwa vitatu vyo twanenezannya mu nkani iyi. Ichabwandilo, mubughanite ubwanaloli nu bugholosu. Mwilalusye ukuti, ‘Nkimba nkulonda pakwiza ukwennya isiku lyo umuntu aliwesi akwiza pakunena ubwanaloli nu kubomba bugholosu?’ Ichabubili, mumughanite u Yesu Kilisitu. Mwilalusye ukuti, ‘Ka nkulonda ukuti U Mwana uwa Chala abe we Mwene wane sona nkulonda ukubomba vyo akabombagha?’ Ichabutatu, cho chapamwanya nkani pa vyosi, mumughanite u Yehova. Mwilalusye ukuti, ‘Nkimba nkulonda ukumuhobosya u Yehova pakumubombela ngati we Chala wane?’ Nanti mwamula amalalusyo ghosi agha ukuti inga, po choni cho mutakoziwa? Chifukwa buli cho chikubapangisya ukuti pakabalilo aka mutakoziwa?—Imbo. 16.33.
19. Choni cho mukuchedwa ukoziwa? Longosola. (Yohani 4.34)
19 Pala ubukata bukubakola ukuti moziwe, ennya vyo vikamwavwa u Yesu. (Belenga Yohani 4.34.) U Yesu akayanisya ukubomba ubwighane ubwa Baba wache ni chakulya. Choni cho tukunena bunubu? Tukunena bunubu ichifukwa chakuti ichakulya chakulondiwa sana kukwitu. U Yesu akamanya ukuti chilichosi cho u Yehova akutubuzya ukuti tubombe chikuba chiza kukwitu. U Yehova atakulonda ukuti tubombaghe chintu chilichosi cho chingatuvulazya. Ka u Yehova akulonda ukuti moziwe? Inga akulonda. (Imbo. 2.38) Mungaba nu lusubilo ukuti nanti mukwivwila ilamulo ilyakuti moziwe mukwiza pakupindula. Ka mutakuchedwa pakuhoboka ni chakulya cho mutaliye lumo? Pala mutakuchedwa pakuhoboka ni chakulya cho mutaliye lumo, choni cho mukuchedwa ukoziwa?
20. Nkimba tukwiza pakumanyila ichoni mu nkani iyakukonkapo?
20 Choni cho bamo bakulindila? Abantu abingi bangamula ukuti, “Inchili pakwisengannya.” Ubwanaloli bwakuti, nanti mungasala ukwipeleka kwa Yehova nu koziwa, chakusala ichapamwanya nkani cho mutabombitepo nalumo-lumo. Cho chifukwa mukulondiwa akabalilo akakukwana, ukwinong’onelepo akiza pa vyo mukulonda ukusala nu kubikapo umoyo ukuti mukwanisye vyo mwasala. Loli pala muli nichinyonywa ichakuti moziwe, ka pakabalilo aka mungabomba ichoni ukuti mwisengannye? Tukwiza pakunenezannya uansala uwalalusyo ili mu nkani iyakukonkapo.
ULWIMBO 28 Kuŵa Ŵabwezi ŵa Yehova
a Ukoziwa chintu chakulondiwa hee kwa muntu aliwesi yo akumanyila Ibayibolo. Choni cho chingamwavwa umumanyili uwa Bayibolo ukuti oziwe? Lo lughano. Ka akughana ichoni sona uwenu? Munkani iyi inti twaghe amaansala sona inti tunenezannye mo tungikalila nu bumi ngati Bakilisitu abakoziwa.
