1, 2. Mba nindo twelelwe ukubwena ati itembelo lishuko, kabili nindo twelelwe ukwishibila ifi Baibolo isambisha pali lyo?

KANI kulinganya icalo neulu, icalo cinini ukwakuti. Mucinenene, kuli baYehova, “Abaleŋgele iulu necalo capansi,” imishobo ya bantunshi ili koti mundondo wa menda ukufuma mu mbeketi. (Amasamo 115:15; Yisaya 40:15) Nangabe’fyo, Baibolo ilalabila ati: “BaYawe [baYehova] bali apepi pali babo bonse abalukubeta, pali babo bonse abalukubeta icine. Bakacita koti kufwaya kwababo abalukubatonda; kabili bakomfwa ukulila kwabo, nekubapulusya.” (Amasamo 145:18, 19) Langulukeni pali ceco! Abacilile mu Bulengeshi bali apepi na fwebo kabili bakatumfwa ‘kani tulukubeta icine.’ Mame’shuko tukwete ilya kulabila na baLesa mwi tembelo!

² Pakuti pali fyefyo, kani tulukufwaya baYehova ukukutika amatembelo esu, tulyelelwe ukutembela kuli bo mu nshila iibasuminishe. Pakucita koti ni fyopele’fyo sombi katwishiba ifi Baibolo isambisha pa matembelo. Cicindeme kuli fwebo ukwishiba ifi Amalembo alabilapo pali uyu’mulandu, nipakuti amatembelo alatofwako ukupalamina kuli baYehova.

3. Ngo’mulandu umo uukulu uutwelelwe ukutembelela kuli baYehova niwisa?

³ Umulandu umo uwakutembelela kuli baYehova wakweba’ti  balatwita fwebo ukulukutembela kuli bo. Amashiwi abo alatukosha ati: “Tekubamba mumitima neli fyacintu cimo; sombi mufintu fyonse kukutembela nekukombetela nekutota pamo, ŋgakukesibwe kuli baLesa ukulomba kwenu. Popele ubutende bwabaLesa, ubukaŋgo’kwisibwa konse, bukalame’mitima yenu nemalaŋgulusi enu muli baKlistu Yesu.” (AbaFilipoi 4:6, 7) Fya cine, tatulukufwayapo ukubikako iminsuula kuli lyelyo ishuko lya kutembela ilitupeelwe ukufuma ku Bekalikishi Abacilile pa calo ponse!

4. Kani ukutembela kuli baYehova lyonse kungakosha shani bucibusa bwesu nabo?

⁴ Umulandu na umbi uwa kutembelela impindi shonse kuli baYehova nipakuti eli tungakosha bucibusa bwesu na bo. Ifibusa fya cinenene tafyambalapo lukoso ili filukufwayapo fimbi ku mubyakwe. Tanje cine, ifibusa filatemwanshanya, kabili ububyabo bulakoselako ili balukwambala ifyakulanguluka kwabo, ne fyakubamba mu mitima yabo. Koti ni fyefyo na bucibusa bwesu efi buli ili caisa kuli baYehova Lesa. Mukuba ne kofwako kwa lilino ibuuku, mwasambilila ifyakuti ubwingi pali fyefyo Baibolo isambisha pali baYehova, ubuntu bwabo, ne kulandakanya kwabo. Mwasambilila ne kweba’ti koti mwaba cibusa ca baLesa. Itembelo lilalenga mwababuula  baWishinweni ba kwiulu ifi mulukulanguluka ne fili ku mutima wenu. Ukucita koti ni fyopele’fyo kulamupalamisheni kuli baYehova.—Jakobo 4:8.

5. Cindo citubuulishisha ati baYehova tabakutikapo ku matembelo onse?

⁵ Kani baYehova balakutika ku matembelo onse? Boneni ifi baYehova babuulile abaIsilaeli ababafutukiile mu nshiku sha wakushimika Yisaya ati: “Kabili pakutambika mwebo amaboko enu, ŋkamusibatileni; icine pakulabila mwebo ifyakutembela ifinji, tesi ŋumfwe-po; iminwe yenu iliiswile imilopa.” (Yisaya 1:15) Pano kanshi, fimbi ifitupyunga fingalenga baLesa ukubula ukukutika ku matembelo esu. Kani tulukufwaya ati baLesa bomfwe amatembelo esu, pali fimbi ifi twelelwe ukucita.

6. Pakuti baLesa bakutike ku matembelo esu, cindo cimo icikulu icipengelwa, kabili tungalanga shani ati tuli naco?

⁶ Icipengelwa ici twelelwe ukucita kuba ne bucetekelo. (Mako 11:24) Intangishi Paulu yalilembele ati: “Apakubulo’kucetekela tapeshiba ukubatemwesya [baLesa]: pakuti uyo uwakwisa kuli baLesa euŋgacetekela ati epo bali, nakabili ati bo bakubalambula abalukubafwaya-fwaya.” (AbaEbeya 11:6) Ukulukuli ne bucetekelo talipo ati kuba ne lwishibila lukoso ati baLesa eko bali ne kweba ati balasuka amatembelo. Ubucetekelo bulabonekela ku fyakucita fyesu. Ifyakucita fyesu inshiku shonse mu bwikashi bwesu filyelelwe ukutubuulishisha ati tuli ne bucetekelo.—Jakobo 2:26.

7. (a) Mba nindo twelelwe ukubela ne mucinshi ili tulukutembela kuli baYehova? (b) Ili tulukutembela kuli baLesa, tungalanga shani ukulicefya ne kulabila ukufuma panshi pa mutima?

⁷ BaYehova balafwaya baabo abalukupalamina kuli bo mwi tembelo ukucite’fyo mu kulicefya kabili muli bucine. Kani lomba tatwelelwe ukulicefya kani tulukulabila na baYehova? Kani abantu baba ne shuko lya kulabila ne mfumu neli umwikalicishi wa calo, balalabila ne mucinshi, balanuko’kweba’ti  balukulabila ne mwikalicishi wa calo neli imfumu. Ico cilukutubula ifi twelelwe ukuba ne mucinshi uukulu ili tulukulabila na baYehova! (Amasamo 138:6) Ukucila na pa fya kube’fyo ni ‘baLesa Bamakosa onse.’ (Ifyakutaŋga 17:1) Ili tulukutembela kuli baLesa, indabililo yesu ilyelelwe ukulango’kweba’ti twalicefya kuli bo pa kwanuka ifi tuli kani kulipalanya kuli bo. Ukulicefya kwa fyefyo kungatulenga tulukutembela ukufuma panshi pa mutima wesu, kabili tekulukushimbula lukoso icishimbuleshimbule ili tulukutembela.—Matayo 6:7, 8.

8. Kani tungapyunga shani koti matembelo tulukutembela?

⁸ Icipengelwa cimbi pakweba ati amatembelo esu omfwanike kuli baLesa kupyunge’fyelelwe ne matembelo esu. BaYehova balafwaya fwebo ukupyunga ifyelelwe koti ni fyefyo tulukutembelela. Ku cakubwenako, kani twatembela ati, “Mutupele lelo ifyakulya fyesu ifyalelo,” tulyelelwe ukupyunga ne makosa imilimo iili yonse iitungapyunga. (Matayo 6:11; 2 AbaTesalonike 3:10) Kani twatembela ukweba ati batofweko ukucicila imibelo iibipile, tulyelelwe ukucenjela pa kufumako ku fingatulengesha ukucito’kusendama. (AbaKolosai 3:5) Ukubikapo na fimbi pali fifi ifipengelwa, pano kuli ifyakwipusha ifipengelwa ukwasukwa ifi abantu bepusha pa matembelo.

9. Mba ni kuli bani twelelwe ukutembela, kabili ukupitila muli bani?

⁹ Ni kuli bani twelelwe ukutembela? BaYesu balibuulile abasambile babo ukutembela kuli ‘baWishifwe aba kwiulu.’ (Matayo 6:9) Amatembelo esu, lomba, alyelelwe ukulungama lukoso kuli baYehova Lesa. Nangabe’fyo, baYehova balafwaya ukweba ati twapeelo’buleme umupunda wa Mwana wabo uufyelwe enka, baYesu Klistu. Koti ni fyefyo twasambilile mu Capitala 5, baYesu balibatumine pa calo kukupa icakutulubula ku kubifya ne mfwa. (Yoane 3:16; AbaLoma 5:12) Ebo bekalikile ukuba Abapapatilishi Abakulu kabili Abasololweshi. (Yoane 5:22; AbaEbeya 6:20) Namulifyefyo, Amalembo alatubuulishisha ukutembela amatembelo esu ukupitila muli  baYesu. Abene benka baYesu kabalabila ati: “Nebo eneNshila, eneBucine, eneMweo; papo’muntu uwakwisa kuli baTata, apakubula nebo.” (Yoane 14:6) Pakuti amatembelo esu asukwe, tulyelelwe ukutembela kuli baYehova benka lukoso ukupitila mu Mwana wabo.

10. Mba nindo tatwelelwe ukucitapo fimbi ifilibelele ili tulukutembela?

¹⁰ Kani tulyelelwe ukucitapo fimbi ifilibelele ili tulukutembela? Koku. BaYehova tabafwayapo fwebo ukucite’filibelele ilitulukutembela, ku maboko neli ku mubili onse. Baibolo ilasambisha ati ifili fyonse lukoso ifilimo umucinshi filyelelwe kuli bo. Ifi filukusankanamo ukutembelo’bwikele, ukwinama, ubwifukeme, ne kwimakana. (1 Ifyebo 17:16; Neyamiya 8:6; Danyeli 6:10; Mako 11:25) Icicindeme muli bucine talipo ati ni njikalilo iilibelele koku, sombi mutima wa uyo muntu. Mu mekalo esu aanshiku shonse neli ili twaba ne makatasho, tungatembela ili tukutumene konse ukutungalukuli. BaYehova balomfwa amatembelo esu nangaba ati babo tuli nabo tabakutikile kuli yo.—Neyamiya 2:1-6.

11. Mba findo fimo ifyakubamba mu mutima ifi twelelwe ukutembelela?

¹¹ Findo twelelwe ukutembelela? Baibolo ilatubuulishisha ati: “Kani tulombe icintu koti kufwaya kwabo [baYehova], balatumfwa.” (1 Yoane 5:14) Koti ni fyopele’fyo koti twatembelela icili conse kani cilukwelelwa bwino ne kufwaya kwa baLesa. Kani kufwaya kwabo baLesa ati mu matembelo tulukulabila ifi tulukubamba mu mitima yesu? Inya! Ukutembela kuli baYehova kuli koti kulabila ku cibuse’cipalamishe. Koti twalabila na ku mutima ukukakulukile, ‘ukwitulula umutima wesu’ kuli baLesa. (Amasamo 62:8) Cilyelelwe fwebo ukutembelela umupashi uswetelele, pakuti ukatofwa ukupyunge’filungeme. (Luku 11:13) Tungatembela kani tulukufwaya ukusololola ukuweme pa fintu ne kuba ne kukoselela ili tulukupita mu makatasho. (Jakobo 1:5) Ili twabifya, tulyelelwe ukutembela ati batufitulukile ukupitila mu cakulubula ca baKlistu. (AbaEfesa 1:3, 7) Fya cine, mu matembelo esu  tatwelelwe ukulukulomba lukoso ifi tulukufwaya. Tulyelelwe ukutembelelako ne bantu bambi, abakwabesu ne batupempela nabo.—Ifyacitilwe 12:5; AbaKolosai 4:12.

12. Koti twabika shani ifintu ifyelelwe baWishifwe aba kwiulu pantangile mu matembelo esu?

¹² Imilandu iikumine baYehova Lesa e yelelwe ukuba pantangile mu matembelo esu. Ukwakubula ne kupicisha tuli ne kushimbula amashiwi akulemya aakufuma panshi pa mutima kabili ne kutota kuli bo pa bune bwabo. (1 Ifyebo 29:10-13) BaYesu balitubuulile mwi tembelo lya mwe baWishifwe, ililembelwe pali Matayo 6:9-13, umu batubuulile ukutembelela ishina lya baLesa ati licindikwe, neli ati lisweshiwe. (Pendeni.) Ubufumu bwa baLesa bwise kabili ati ukufwaya kwabo ku ngacitwa, panshi pano koti ni kwiulu efi bashimbwile ulwakonkelepo. Panuma ya kulabila pa ficindeme ifyelelwe baYehova eli pano baYesu balabile pali fyefyo umuntu afwaya. Na fwebo ili twabika fyefyo baLesa bafwaya pantangile mu matembelo esu, fikabuulishisha ati tatwangwapo ifyesu fwebene.

13. Findo Amalembo alabilapo pa kutalimpa kwa matembelo baLesa bangasumina?

¹³ Amatembelo esu alyelelwe ukutalimpa shani? Baibolo tailabilepo ifi amatembelo aawenka neli aapa bengi elelwe ukutalimpa. Koti lyabe’lipi kani umuntu alukutembela pa kulya, kabili koti lyatalimpa kani umuntu ali enka alukufwaya ukulabila ifili ku mukoshi wakwe kuli baYehova. (1 Samweli 1:12, 15) Nangabe’fyo, baYesu balishinine abalukulibona ukulungama makosa abalukutembela amatembelo aatali pakweba ati balibweneshe ku bantu. (Luku 20:46, 47) Amatembelo afyefyo taasangalashapo baYehova. Icicindeme kutembela ukufuma panshi pa mutima wesu. Pakuti pali fyefyo, amatembelo baLesa bangasumina angapusanapusana koti kwelelwa kwa fyefyo ifilukupengelwa neli ifilukucitwa.

14. Kani Baibolo ilaalule’ndo ili itukosha ati “mulukutembela ukwakubulo’kuleka,” kabili nindo citusangalashisha fwebo pali fifi?

¹⁴ Kani tulyelelwe ukutembela linga? Baibolo ilatukosha ati “kamulukukosya ukulukutembela” kabili “mulukutembela  ukwakubulo’kuleka.” (AbaLoma 12:12; 1 AbaTesolonike 5:17) Fya cine, aya mashiwi taalulapo ati tulyelelwe ukulukutembela impindi shonse mpaka kawa. Tanje cine, Baibolo ilatubuulishisha fwebo ukulukutembela lyonse, ukulukutota baYehova lyonse pa bune batucitile kabili tulyelelwe ukulolesha kuli bo ku kututangilila, ukutusangalasha, ne kutukosha. Tali ico cilatusangalasha ukwishiba ati baYehova tababikilepo umupaka wa fyefyo amatembelo esu elelwe ukutalimpa neli ubwingi bwa mpindi twelelwe ukutembela kuli bo? Kani muli bucine tulatota pe shuko lye tembelo, tukafwaya inshila ishelelwe isha kutembelelamo kuli baWishifwe ba kwiulu.

15. Mba nindo twelelwe ukulabilila ati “Ameni” pa kushila kwe tembelo lya wenka ne lya pa bengi?

¹⁵ Mba nindo twelelwe ukulabilila ati “Ameni” pa kushila kwe tembelo? Ishiwi lya kweba ati “Ameni” lilalula ati “fya cine,” neli ati “nga cibe fyenke’fyo.” Ifyakubwenako fya mu Malembo filatubuula ati cilyelelwe ukulabila ati “Ameni” pa kushila kwe tembelo lya wenka neli ilya pa bengi. (1 Ifyebo 16:36; Amasamo 41:13) Kani twalabila ati “Ameni” pa kushila kwe tembelo lyesu, cilaalula ukweba’ti ifi twalabila fyafuma panshi pa mutima. Ili twalabila ati “Ameni”—mu bukutumene neli mu kulabilisha—pa kushila kwe tembelo lya pa bengi kani umbi alukutembela, cakwishibilako ati twasuminishako kwi langulushi lya woyo uwatembela.—1 AbaKolinto 14:16.

16. Mba nibwisa bucetekelo tungakwata pa matembelo esu?

¹⁶ Kani baYehova muli bucine balasuka amatembelo esu? Inya, balasuka! Tuli ne bucetekelo bwa kweba’ti ‘Abomfwa ukutembela’ balasuka amatembelo akufuma panshi pa mitima ya mamilyoni ya bantunshi. (Amasamo 65:2) Ukwasuka kwa baYehova ku matembelo esu kungesa mu nshila ishipusenepusene.

17. Mba nindo tungalabilila ati baLesa bangapyungisha inkalamba ne bapyungishi babo aba pa calo ku kwasuka amatembelo esu?

¹⁷ BaYehova balapyungisha inkalamba shabo ne bapyungishi  babo aba pa calo pa kwasuka amatembelo. (AbaEbeya 1:13, 14) Kuli abantu abakuti ubwingi abatembeele kuli baLesa pakweba ati babofweko ukumfwisha Baibolo, panuma ya kushila ukutembela ne bapyungishi ba baYehova balafakasha kuli bo. Ifyakucitika fya fyefyo filukutubuula ati inkalamba e shili pantangile mu kushimika icebo iciweme ica Bufumu. (Ukufisulula 14:6) Pa kwasuka amatembelo aatembelwa mu mpindi ya makatasho, baYehova bangalenga umuKlistu mubyesu ukutofwako.—Ifisimpi 12:25; Jakobo 2:16.

18. Kani baYehova balapyungisha shani umupashi uswetelele na Baibolo pa kwasuka amatembelo abapyungishi babo?

 ¹⁸ BaYehova Lesa nakabili koti bapyungisha umupashi uswetelele ne Shiwi lyabo, Baibolo, ukwasuka amatembelo abapyungishi babo. Bangasuka amatembelo esu aakweba ati batofweko mu fyakwesha pa kutulange’nshila ya kusololwelamo ifintu kabili ne kutupa’makosa ukupitila mu mupashi uswetelele. (2 AbaKolinto 4:7) Impindi ne mpindi ifyasuko ku matembelo esu filesa ukufuma mu Baibolo, mopele umo baYehova batofwela pakuti tupinike bwino imilandu. Amalembo aangatofwa koti twaasangana kani tulukusambilila isambililo lya Baibolo ilya pa lwesu kabili na pa kulukupenda amabuuku abuKlistu, aali koti ni lilino ibuuku. Amalembo ambi aangatofwa koti alabilwapo pa kubungana kwa buKlistu neli cipale pa kubuulishisha kwa baeluda abatulama mwi kelesha.—AbaGalatya 6:1.

19. Findo twelelwe ukulukwanuka kani twabona koti amatembelo esu taalukwasukwapo?

¹⁹ Kani baYehova baboneka koti bakokola ukwasuka amatembelo esu, talipo kweba ati bafilwa ukwasuka amatembelo. Tanje cine, tulyelelwe ukwanuka ati baYehova balasuka amatembelo esu koti kwelelwa kwa kufwaya kwabo kabili pa mpindi iyelelwe. Baliishi ifitufwaya nefi bangapyungapo pali fyefyo ukucila na pafi twishi. Impindi ne mpindi balatusumina fwebo ukubula ukuleka ‘ukulukulomba, ukulukufwaya-fwaya, kabili ne kulukukonkonsha.’ (Luku 11:5-10) Ukuba ne munkonsha wa fyefyo kulalanga kuli baLesa ati tulukufwaisha  kabili ati tuli ne cicetekelo icinenene. Nakabili, baYehova koti baasuka amatembelo esu ukwakubula ne kwishiba fwebene. Ku cakubwenako, koti baasuka amatembelo esu ili tulukupita mu fyakwesha, pambi tekuti bafumyepo ayo amakatasho, nangabe’fyo bangatupeela amakosa akuteko’mutima mu fyakwesha.—Pendeni AbaFilipoi 4:13.

20. Mba nindo twelelwe ukupyungisha bwino ili shuko lya kutembela impindi shonse?

²⁰ Mama ifi tutota ku Balengeshi ba calo conse abali apepi na babo bonse abatembela mu kwelelwa kuli bo! (Pendeni Amasamo 145:18) Nga tulukutembela lyonse kuli baYehova pakuti itembelo lishuko ilyakuti ubune kuli fwebo. Kani twacita koti ni fyopele’fyo, tukalukupalamina kuli baYehova impindi shonse, Abomfwa ukutembela.