Abanshikilwe Ukwelelwa ne Fibuulishishiwe Mwi Buuku lya BaLesa
“BaYawe balilengele icalo ne mano; ne kwikalika iulu ne kalango.”—IFISI. 3:19.
INYIMBO: 6, 24
1, 2. (a) Findo bambi balabilapo kani baumfwa ati baLesa balikwete ukwanshika? (b) Findo twakwambaalapo muli cicino iciputusha?
KANI baLesa balikwete ukwanshika? Bambi balalabila ati, “Tawelelwepo ukuba mu kwanshika ukuli konse. Icicindeme lukoso kuba na bucibusa na baLesa.” Kani ilangulushi lya kube’fyo lili lukoso bwino? Findo Baibolo ilabilapo?
2 Muli cicino iciputusha, twakwambaala pa filangisha ati baYawe, baLesa ba bunjino, baliishi ukwanshika bwino ifintu. Nakabili, twakusambilila pali fyefyo tungalangisha ati tulomfwila ifi ukwanshika kwa baYawe kutubuula. (1 Koli. 14:33, 40) Mu mpindi ya basambile ba kutanga na muli shishino inshiku, amalembo alyofweleko makosa abali mu kwanshika kwa baYawe ukwa pa calo ukupyunga umulimo uukulu uwa kutulisha icebo iciweme. Pakuti tulalonda ifi Baibolo ilabila na fyefyo ukwanshika kwa baLesa kutubuula, tulofwako ikelesha ukuba iliswetele, ilya mutende, kabili ilikateene.
BAYAWE BALISHI UKWANSHIKA BWINO IFINTU
3. Findo fimulengesheni ukucetekela ati baYawe balishi ukwanshika bwino ifintu?
3 Ubulengeshi bulalangisha ati baLesa balishi ukwanshika bwino ifintu. Baibolo ilalabila ati, “BaYawe balilengele icalo ne mano; ne Ifisi. 3:19) Ifi twishiko “mikombelo lukoso ya micitilo [ya baLesa],” kabili “ukutepeta kunini lukoso uku tumfwa ukwa kuli bo.” (Jobo 26:14) Nangabe’fyo, ifinini ifi twishi pa mapulaneti, utubangabanga, ne milalafuti filatulengesha ukusumina ati ifintu fya mwiulu fyonse filyanshikilwe bwino. (Amasa. 8:3, 4) Mu milalafuti muli amamilyoni atubangabanga. Tonse utu utubangabanga tulatela mu nshila iyanshikilwe bwino. Eli, amapulaneti alenda mu tuli koti tushila utu beta ati amaorbit pa kushinguluka akasuba, kabili alenda aanshikilwe bwino koti alukulonda amafunde apa musebo! Ukwakubula ne kukanika ukubona ifi ifya mwiulu fyanshikilwe bwino kulatofwako ukwishiba ati baYawe, “abalengele amaulu ku kalango” eli ne calo, balyelelwe ukulemiwa, ukubapempela ne kuba aba bucine kuli bo.—Amasa. 136:1, 5-9.
kwikalika iulu ne kalango.” (4. Nindo aba fyasansi bafililwe ukwasuka ifyakwipusha ifingi?
4 Aba fya sayansi balibuulishishe ifingi pa fya mwiulu na pa calo cesu, kabili ifi babuulishishe filatofwako makosa mu mweo wesu. Pano kuli ifyakwipusha ifingi ifi aba fya sayansi tekuti basukepo. Ku cakubwenako, abasambilila ifya mwiulu tekuti batubuulepo ifi ifya mwiulu fyabeeleko neli umulandu fwe bantu tubelele pali pulaneti ya Earth apasangwa ne filengelwe fya mweo fimbi. Nakabili tapalipo umuntu uuli onse uungabuulishisha umulandu abantunshi bafwaila ukwikala umuyayaya. (Uwaku. 3:11) Nindo kubelele ifyakwipusha ifingi ificindeme ifi tafyasukilwepo? Umulandu umo wakweba’ti aba fyasansi ne bantu bambi balilengeshe abengi ukulukulanguluka ati takulipo baLesa kabili balasambisha ne busambishi bwa kweba’ti ifintu fyalisangukile lukoso. Pano baYawe, mwi Buuku lyabo, balyasukile ifyakwipusha ifipesenshe abantu mu calo conse.
5. Findo filangisha ati amafunde aatangilila ifilengelwe ao baYawe babikileko alatofwako?
5 Amafunde aatangilila ifilengelwe fyonse ao baYawe babikileko alatofwako makosa mu mweo wesu. Abalungisha ifya malaiti, ababika imipaipi ya menda, abapanga ifyakupanga-panga, abensha indeke, ne balaye ba mu cipatela bonse balalonda aya amafunde ili balukupyunga imilimo yabo. Ku cakubwenako abalaye ba ku cipatela balishi ati ifilewa fya mubili wa muntu tafitelapo. Popele, ili umulaye alukupyungila pa mulwashi tapengelapo ukufwaya-fwaya apabelele umutima. Nakabili, fwense tulalonda amafunde aatangilila ifilengelwe fyonse. Ukwesha ukupufya ifunde lya makosa aatintila panshi ukupitila mu kunina iciti ne kwesha ukupalala koti cuni, kungatulengesha ne kufwa!
BALESA E BAANSHIKILE FYONSE
6. Nindo tungalabilila ati abantu ba baYawe balyelelwe ukuba abanshikilwe bwino?
6 Mu cinenene ifilengelelwe filyanshikilwe bwino. Kanshi, tungacetekela ati baYawe balafwaya abantu babo ukuba abanshikilwe bwino. Na cine, baLesa balibuulishishe mu Baibolo ifya kututangilila. Ukubulo’kulonda ifyakututangilila ifi baLesa ne kwanshika kwabo batupeela kungatulengesha ukubulo’kuba abasangalele.
7. Findo filangisha ati Baibolo libuuku ilyanshikilwe bwino?
7 Baibolo talipo libuuku umuli lukoso ifyebo fya baJuda ne baKlistu ifipusene makosa. Sombi, libuuku ilyanshikilwe bwino kuli baLesa. Amabuuku aalekenelekene aali mu Baibolo alikateene. Ukufuma lukoso kwi buuku lya Ifyakutanga ukufika kwi buuku lya Ukufisulula, icebo icikulu icilabiilwepo mu Baibolo cilibuulishishiwe. Ici icebo cakweba’ti baYawe e belelwe ukwikalika kabili cilalabila na fyefyo bakakonsha ukufwaya kwabo ukwa pa kutanga ukupitila Ifyakutanga 3:15; Matayo 6:10; Ukufisulula 11:15.
mu Bufumu bwabo ubutangililwa na baKlistu, “umwana” uwalailwe.—Pendeni8. Nindo tungalabilila ati abaIshilaeli balyanshikilwe bwino?
8 Abantu ba muIshilaeli nabo baalyanshikilwe bwino. Ku cakubwenako, mwi Funde baLesa bapeele abaIshilaeli, kwali abanakashi “abalukupyunjila ku mulyango uwa ku citente ce bungano.” (Ifyakufu. 38:8) Pa kutesha icisasa ca baIshilaeli ne sema baalukucita ifintu mu nshila iyanshikilwe bwino. Panuma, Imfumu Dafidi yalyanshikile abena Lefai ne bapapatilishi mu mabumba aelelwe. (1 Ifye. 23:1-6; 24:1-3) Kabili abaIshilaeli kani baumfwila baYawe, balukubashukisha pa kuba abanshikilwe bwino, aba mutende, kabili abekateene.—Ndute. 11:26, 27; 28:1-14.
9. Findo filangisha ati ikelesha lya buKlistu ilyaliko mu mpindi ya basambile lyalyanshikilwe bwino?
9 Ikelesha lya buKlistu ilyaliko mu mpindi ya basambile lyalyanshikilwe bwino, kabili lyalukubwenamo mu kutangililwa ne bumba ilitangilila, ilyapangilwe pa kutanga ne ntangishi. (Ifyacit. 6:1-6) Panuma, abaKlistu bambi balilundilweko kwi bumba ilitangilila. (Ifyacit. 15:6) Nakabili, ukufunda kwalukupeelwa ukupitila mu nkalata ishi abalalume abalukupyungila pamo neli abali mwi bumba ilitangilila baalukulemba. (1 Tim. 3:1-13; Tito 1:5-9) Kani amakelesha alibwenenemo shani mu kulonda ifi ibumba ilitangilila lyalukulabila?
10. Findo fyafuminemo ili amakelesha akale alondele ukufunda kwe bumba ilitangilila? (Boneni icikope icili pe buula 12.)
10 Pendeni Ifyacitilwe 16:4, 5. Abalalume abo ibumba ilitangilila lyalukutuma baalukubuulako bambi amafunde “ayo asalulwilwe ku ntanjishi ne bakulu aba ku Jelusalemi.” Ili amakelesha alukulonda ayo amafunde, “alikoshiwe mu kucetekela, ne kufula abantu abenji inshiku na nshiku.” Kani pali ifi abali mu kwanshika kwa baLesa pali ino mpindi bangasambililako kuli lili ilyashi lya mu Baibolo?
KANI MULOMFWILA ABALUKUTANGILILA?
11. Findo abalalume abalukutangilila belelwe ukucita kani bapokelela ifya kulonda ukufuma mu kwanshika kwa baLesa?
11 Findo abali muli Komiti ya Mutano, abapyungishi ba nteeta, ne bakulu ba mwi kelesha belelwe ukucita kani bapokelela ifya kubatangilila ukufuma mu kwanshika kwa baLesa? Ibuuku lya baYawe lilatubuula fwense ukuba ne cumfwila. (Ndute. 30:16; Ebeya 13:7, 17) Mu kwanshika kwa baLesa tamwelelwepo ukuba abantuabalitamaasha, ni pakuti ukuba ne mibelo ya kube’fyo kungonaala umutende uuli mu makelesha esu aekateene. Ukuba, tapalipo umuKlistu wa bucine uungafwaya ukulangisha imibelo ya kubulo’kuba ne mucinshi ne kubulo’kuba uwa bucine koti ni yeyo Dyotilefe ali nayo. (Pendeni 3 Yoane 9, 10.) Nakabili tungalipusha ati: ‘Kani ndofwako bambi ukukula mu fya baLesa? Kani ndacita bwangu ifi abakwabesu abalukutangilila balabila?’
12. Ni kwisa kwaluka ukucitilwe ukulosha kuli fyefyo abakulu ba mwi kelesha ne bapyungishi ba kofwako basalululwa?
12 Langulukeni pa kwaluka ukwacitilwe ne Bumba Ilitangilila bukumo. Iciputusha ca “Ifyakwipusha Abantu Bepusha” icali mu Akatambo ka Wakulama aka November 15, 2014, calibuulishishe ukwaluka ukulosha kuli fyefyo abakulu ba mwi kelesha ne bapyungishi ba kofwako basalululwa. Ici iciputusha calibuulishishe ati mu mpindi ya basambile ba kutanga ibumba ilitangilila lyalibuulile abapyungishi ba kwenda ukulukusalulula aba kutangilila mwi kelesha. Pakuti pali fyefyo, ukufuma pa 1 September 2014, abapyungishi ba nteeta e basalulula abakulu ba mwi kelesha ne bapyungishi ba kofwako. Umupyungishi wa luteta alesha ukwishiba aba abalalume 1 Tim. 3:4, 5) Abakulu ba mwi kelesha ne mupyungishi wa luteta balapituluka bwino mu fipengelwa ifibuulishishiwe mu Malembo pakweba’ti babone umuntu kani aelelwa ukuba umupyungishi wa kofwako neli umukulu wa mwi kelesha.—1 Tim. 3:1-10, 12, 13; 1 Pet. 5:1-3.
kabili ne kwesha ukupyunga nabo mu mulimo wa kutulisha kani cingelelwa. Alabona ifi icisoolo ca mukwabesu uulukufwaya ukusalululwa cipyunga. (13. Kani tungalangisha shani ati tulalonda ukufunda ukufuma ku bakulu ba mwi kelesha?
13 Tulyelelwe ukulukulonda ukufunda kwa mu Baibolo uku abakulu ba mwi kelesha batubuula. Aba abembeshi ba bucine abali mu kwanshika kwa baLesa balatangililwa ne ‘mashiwi aakosele’ aasangwa mwi Buuku lya baLesa. (1 Tim. 6:3) Anukeni ukufunda Paulu alabiilepo ukulosha kuli baabo abaalukucita ifya kubifya mwi kelesha. Bambi aba mwi kelesha “tabalukucite’milimo, sombi balukufulunganya imilimo ya babyabo.” Cilaboneka koti aba kube’fyo balibafundilepo ku bakulu ba mwi kelesha pano tabaalondelepo ukufunda. Findo ikelesha lyali ne kucita ku muntu wa kube’fyo? Paulu alilabiile ati: “Kamumuceta uyo, mwingesa kwambala nakwe.” Ukulunda pali kuku ukufunda alilundilepo ne kufunda kwa kweba’ti tabaelelwepo ukucita uyo umuntu koti alitamfiwilwe. (2 Tesa. 3:11-15) Pali bubuno bukumo, abakulu ba mwi kelesha bangalabila ilyashi lya kucenjesha pa muntu uulukucita ifintu ifibipile mwi kelesha, ifili koti kwambisha uutapempelapo baYawe. (1 Koli. 7:39) Findo mucita kani abakulu ba mwi kelesha bacibona ukuba icelelwe ukulabila ilyashi lya kube’fyo? Tulabile ati mulimwishi uucita ifi balukulabilapo mu lyashi, kani mukalonda uko kufunda pa kubulo’kuba icibusa ca muntu wa kube’fyo? Kani muli aba bucine mungofwako uyo umuntu ukuleka ukucite’fibipile. [1]
MULUKULI ABASWETELE, ABA MUTENDE, KABILI ABEKATEENE
14. Kani tungofwako shani ikelesha ukulukuli iliswetele?
14 Tungofwako ikelesha ukuba iliswetele kani tulukulonda ukufunda ukusangwa mu Mashiwi abaLesa. Langulukeni pa fyalukucitika mu Kolinto. Paulu alipyungile apapelele amakosa akwe ukutulisha muli uyu umushi, kabili alitemenwe ‘abalungeme’ babyakwe abalimo. (1 Koli. 1:1, 2) Pano, calimubombomanikile ukulabila pa lyashi lya bucencemeshi ilyalukucitwa mwi kelesha. Paulu alibuulile abakulu ba mwi kelesha ukupeela umwalalume uwalukucita ubucencemeshi kuli Satana, e kweba’ti ukumutamfya mwi kelesha. Pakweba’ti ikelesha lipitilishe ukulukuli iliswetele, abakulu ba mwi kelesha baalyelelwe ukufumyamo “umusunga.” (1 Koli. 5:1, 5-7, 12) Kani twalonda ukusalululapo kwa bakulu ba mwi kelesha ukwa kutamfya umuntu uutalapilapo, tulofwako ikelesha ukulukuli iliswetele. Nakabili, ukucite’fyo cipale kungofwako ne wabifishe ukulapila ne kulomba baYawe ukumufitulukila.
15. Kani tungofwako shani ukulama umutende wa mwi kelesha?
15 Mu Kolinto mwali ubukatasho na bumbi ubwaelelwe ukupyungilwapo. Bambi abaKlistu balukutwala abaKlistu babyabo kwi solololo. Paulu alibepwishe icakwipusha cakweba’ti: “Mba nindo tekuti mulubileko lukoso?” (1 Koli. 6:1-8; NWT) Ifyakube’fi filacitika na ino mpindi. Shimbi impindi, umutende pa baKlistu ulonaika pakuti balilufishe indalama mu busulwishi neli pakuti umo alitumpaikile umubyakwe. Bambi balitwelepo abaKlistu babyabo kwi solololo, pano Ibuuku lya baLesa lilatofwako ukwishiba ati ukulufya ifintu fyesu kwawamapo ukucila ukulengesha ishina lya baLesa ukucobolwa neli ukonaala umutende wa mwi kelesha. [2] Pakushilisha amakatasho aakulu, tulyelelwe ukulonda ukufunda baYesu balabiilepo. (Pendeni Matayo 5:23, 24; 18:15-17.) Kani twacite’fyo, tulaba abekateene mu cisoolo ca bapyungishi ba baYawe.
16. Nindo tungacetekela abantu ba baLesa ukuba abekateene?
16 Ibuuku lya baYawe lilalangisha umulandu abantu babo belelwe ukubeela abekateene. Umwimbishi wa masamo alimbile ati: “Boneni, filiweme filielelwe ati abana bankashi balukwikalana ne butende!” (Amasa. 133:1) Ili abaIshilaeli baalukumfwila baYawe, baalukuba abekateene kabili abanshikilwe bwino. BaLesa balilabiilepo ukulosha kuli fyefyo abantu babo baali ne kuba kuntangiile ati: “Nkababika pamo koti ni mbelele.” (Mika 2:12) Eli, baYawe baalishimikile ukupitila mu wakushimika wabo Sefaniya ati: “Nkaalula umulaka wa bena fyalo ati ube mulaka uswetele [bucine bwa mu Malembo], ati bonse bakaliite ishina lya baYawe, mu kubapyunjila ne mutima umo.” (Sefa. 3:9) Mame’shuko tukwete ilya kupempela baYawe mu kwikatana!
Abakulu ba mwi kelesha balafwaisha ukofwako umuKlistu uwabifya ukuwamya bucibusa bwakwe na baLesa (Boneni palakalafu 17)
17. Kani abakulu ba mwi kelesha balyelelwe ukupyungila shani pa milandu pakweba’ti ikelesha lilukuli iliswetele kabili ilikateene?
17 Pakweba’ti ikelesha libe ilikateene kabili iliswetele, abakulu ba mwi kelesha balyelelwe ukupyungila bwangu pa milandu. Paulu aliishibile ati ubutemwe bwa baLesa tabutangililwapo lukoso na fyefyo abene balukumfwa, kabili tabalekapo lukoso abantu ukulukucita ifyakubifya. (Ifisi. 15:3) E mulandu Paulu alembeele ku baKolinto inkalata iikosele pano iyalukulangisha ati aalibatemenwe. Inkalata ya bubili yeyo alembele ku baKolinto panuma ya myenshi imo, ilalangisha ati ifintu fyaliwemeko pakuti abakulu ba mwi kelesha baalilondele ifi ababuulile. UmuKlistu kani abifya ukwakubulo’kwishiba, abakulu ba mwi kelesha balyelelwe ukumofwako mu nshila ya butemwe.—Galatya 6:1.
18. (a) Kani ukufunda kwa mu Mashiwi abaLesa kwalyofweleko shani amakelesha akale? (b) Findo tukambaalapo mu ciputusha cakonkapo?
18 Caboneka apaswetele ati ukufunda ukusangwa mwi Buuku lya baLesa kwalyofweleko abaKlistu mu Kolinto ne bali kumbi ukuba abaswetele, aba mutende, kabili abekateene mu makelesha abo. (1 Koli. 1:10; Efesa 4:11-13, 1 Pet. 3:8) Pakuti pali fyefyo, abaKlistu abaaliko pali ilye’mpindi baalukupyungisha mu mulimo wa kutulisha. Na cine, Paulu alilabiile ati icebo iciweme ‘caalitulikile ku filengelwe fyonse panshi pano.’ (AbaKolo. 1:23) Pali bubuno bukumo, abantu abakuti ubwingi mu calo conse baliishi ifi baLesa bakacita kuntangiile pakuti pa kupyungisha kwa baabo abali mwi bumba lya bantu ilyanshikilwe bwino. Iciputusha cakonkapo cikalangisha ati aba abantu balicindikile makosa Baibolo kabili balafwaisha ukulemya baShikulu besu baYawe.—Amasa. 71:15, 16.
^ [1] (palakalafu 13) Boneni ibuuku lya Abateyanishiwa ku Kucita Ukufwaya kwa kwa Yehova, amabu. 134-136.
^ [2] (palakalafu 15) Kani mulukufwaya ukwishiba imilandu iingalengesha umuKlistu ukutwala umuKlistu mubyakwe kwi solololo, boneni ibuuku lya “Mulukulilama mu Butemwe bwa BaLesa,” ibu. 223, boneni na tumashiwi twa panshi.