Mulukufwaya-fwaya Ificilile Umutengo na pe Golide
Kani mulingasangepo igolide? Banini lukoso abasangilepo igolide. Nangabe’fyo, abantu abakuti ubwingi balisangile ificilile umutengo na pe golide. Balisangile amano aakufuma kuli baLesa, kabili aya amano “taeshi ukushitwa ne golide.”—Jobo 28:12, 15.
TUNGALABILA ati abasambile ba Baibolo bali koti ni babalya abantu abafwaya-fwaya igolide. Aba abasambile balyelelwe ukupyungisha ne kupitilisha ukulukufwaya-fwaya mu Malembo pakweba’ti basange amano. Kani ni findo fwe basambile ba Baibolo tungasambililako ku nshila shitatu ishi abantu balonda pa kusange’golide?
MWASANGANA IGOLIDE!
Alakanyeni ati mulukwenda mu mpelo ya cishiba kabili mwabona akabwe akanini kalukubyata pakuti pa kasuba. Mwasontama kabili mwasangalala pa kubona ati ako akabwe ligolide. Kanini makosa kabili kalicilile ukuwama na pa mabwe ambi aamutengo. Panuma ya fyefyo, mwatatika ukufwaya-fwaya pakweba ati mubone kani mungasanga na limbi igolide.
Mu kupalako, kambi kasuba, umupyungishi umo uwa baYawe aliishile pa ng’anda penu mu kwambaala na mwebo pa bucetekelo ubulembelwe mu Baibolo. Cipale munganuka ili mwaishibile fimo ifya mu Baibolo ifi mungapalanya ku kusanga igolide. Cipale ifyo fyalicitikile ili mwabwene mu Baibolo pa muku wa kutanga ishina lya baLesa ilya kweba’ti baYawe. (Amasa. 83:18) Neli cipale mwalisambilile ati mungaba icibusa ca baLesa. (Jako. 2:23) Penka apo mwalishibile ati mwasanga ificilile umutengo na pe golide! Popele mwalitatikile ne kufwaisha ukwishibilapo na fimbi ifya mu Baibolo.
MWASANGILAPO NA LIMBI IGOLIDE!
Shimbi impindi utubwe twe golide tulabungana pamo mu tunika utunini. Mu myenshi lukoso inini, abafwaya-fwaya kani bapyungisha bangasanga igolide ilingi ilingabaletela indalama ishakuti ubwingi.
Ili mwatatikile ukusambilila Baibolo na Mboni umo, cipale mwalyumfwile koti muntu uwasanga igolide ilibungene pamo. Ukwalakanya pa Malembo mwalukusambilila kwalukumofweniko ukwishibilapo na fimbi, kabili ici calimulengesheni ukulukukula mu fya baLesa. Ili mwapitilishe ukulukwalakanya pali bubu bucine bwa mu Baibolo, mwalisambilile ifi mungapalamina kuli baYawe ne kulilama mu butemwe bwabo ukufika na ku mweo wa muyayaya.—Jako. 4:8; Juda 20, 21.
Kani na mwebo mulapyungisha ukulisambisha bucine bwa mu Baibolo koti ni babalya abafwaya-fwaya igolide?
Koti ni fyopele filya uufwaya-fwaya igolide afwaisha ukusanga igolide ilibungene pamo, na mwebo mwalukufwaisha ukwishibilapo bucine bwa mu Baibolo na bumbi ubucindeme. Panuma ya kusambilila ne kwishiba bucine bwa mu Baibolo, mwalilitemenwe ukutatika ukucita ifyamulengesheni ukulituula kuli baYawe ne kubatishiwa.—Mat. 28:19, 20.
PITILISHENI UKUFWAYA-FWAYA
Uufwaya-fwaya angasanga utubwe twe golide utunini mu mabwe ambi aalibelele. Mu fiputusha fimo fimo ifya amabwe aya mulaba igolide ilingelelwa ukufumya. Popele uulukufwaya-fwaya igolide alyelelwe ukutoba ili ibwe. Pa kutanga, igolide cipale tekuti libonekepo muli lili ibwe. Mba nindo? Ni pakuti mwi bwe ililemene 1000 kg mungaba lukoso igolide ililemene 10 g. Nangabe’fyo, uulukufwaya igolide aliishi umulandu cicindamine ukufumya utu twenka utunini.
Fyopele’fyo, umuntu alyelelwe ukupyungisha kani acila “pe shiwi lya kutatike’fintu fya baKlistu.” (Ebeya 6:1, 2) Mulyelelwe ukupyungisha pakweba’ti mwishibilepo inshila na shimbi ishi mungapyungishishamo ifyebo mulukusambilila. Popele, findo mungacita pakweba’ti mupitilishe ukulukubwenamo mu kulisambisha Baibolo, nangaba’ti mulisambilile Amalembo pa myaka iingi?
Lyonse mulukufwaisha ukusambilila. Mulukubikako akalango ku fyebo fyonse. Pitilisheni ukupyungisha, kabili mukasanga amano aakufuma kuli baLesa eli mukasanga ne fyebo ifiweme ifya kumutangilileni. (Loma 11:33) Pakweba ati mwishibilepo na fimbi ifya mu Malembo, mulukupyungisha fyonse ifyakumofweniko ukusange’fyebo ifiliko mu mulaka wenu. Mulukuteeko’mutima ili mulukufwaye’fyebo ifingamutangilileni na lyelyo mulukufwaye’fyasuko ku fyakwipusha fya mu Baibolo. Mulukwipushako bambi ukumubuuleni amalembo ne fyebo fya mu mabuuku esu ifibofwako makosa ne kubakoselesha. Kani mwasange’fyebo ifiweme ili mulukulisambisha Amashiwi abaLesa, mulukubuulako bambi.
Ukuba, ifi mulukufwaya talipo kwishiba lukoso ifingi. Intangishi Paulu yalicenjeshe ati “ukwishiba kulalengelo’kulitota.” (1 Koli. 8:1) Popele, mulukwesha ukuba abalicefeshe kabili aba kucetekela ukukosele. Ukukwata amapempelo acisoolo ne kulukulisambisha Baibolo lyonse kukamofweniko ukulukulonda amafunde abaYawe kabili kukamulengesheni ukufwaisha ukulukofwako bambi. Ne cicililepo ca kweba ati, mukasangalala ni pakuti mulisangile ificilile umutengo na pe golide. —Ifisi. 3:13, 14.
