1, 2. (a) Ni kwisa ukupusana kuli pali baabo abatangilila Bamboni sha BaYawe na baabo abatangilila mu mapempelo ambi? (b) Findo twakusambilila muli cicino iciputusha ne cakonkapo?

“INTANGISHI yenu ni bani?” Impindi ishingi ico e cakwipusha abantu bepusha Bamboni sha BaYawe. Tekuti tukankamanepo ni pakuti mu mapampelo aengi, umwalalume neli umwanakashi e utangilila. Fwebo tulipuseneko, tulaba abasangalele ukubuulako bambi ati, tatutangililwapo ne muntunshi utawamininepo. Sombi tulatangililwa na baYesu, abatangililwa na baWishibo, baYawe.—Mat. 23:10.

² Nangabe’fyo, kuli ibumba lya balalume, ilitwa ati ‘umupyungishi ucetekelwe,’ ili baLesa bapyungisha ukututangilila pali bulelo. (Mat. 24:45) Popele, tulishi shani ati mu cinenene ni baYawe abalukututangilila ukupyungisha Abana babo abatababonekapo? Muli cicino iciputusha ne cakonkapo, twakwambaala pali fyefyo baYawe pa myaka iyakuti ubwingi baofweleko abalalume basalulwile ukulukutangilila. Ifiputusha fyonse fibili filukulabila pa fintu fitatu ifishinina ati baYawe e bofwako aba abalalume, ukulangisha ati e batangilila abantu babo mu cinenene.—Yisa. 58:11.

3. Cindo caofweleko Mose ukutangilila abaIshilaeli?

³ Umupashi uswetelele walyofweleko abalukwimakaninako baLesa. Langulukeni pa cakubwenako cakwe Mose, uwali ne mulimo wa kutangilila  abaIshilaeli. Findo fyamofweleko ukupyunga umulimo uwali uukulu? BaYawe ‘e bapeele umupashi wabo uswetelele mukati muli ye.’ (Pendeni Yisaya 63:11-14.) BaYawe baalipitilishe ukutangilila abantu babo ukupyungisha Mose woyo baofweleko ne mupashi wabo uswetelele.

4. Kani abaIshilaeli baali ne kwishiba shani ati Mose alukutangililwa ne mupashi uswetelele? (Boneni icikope icili pe buula 18.)

⁴ Pakuti umupashi uswetelele, makosa aatabonekapo, kani abaIshilaeli baali ne kwishiba shani ati walukupyunga muli Mose? Umupashi uswetelele walyofweleko Mose ukucita ifimpelampela ne kutulisha ishina lya baLesa kuli Falo. (Ifyakufu. 7:1-3) Nakabili umupashi uswetelele walilengeshe Mose ukuba ne mibelo iyakuti ubune ili koti butemwe ne kutekanya, iyamulengeshe ukwelelwa ukupyunga umulimo wa kutangilila abaIshilaeli. Mame’fi Mose apuseneko ku ntangishi ishibipile kabili isha kulitemwa ishali mu fyalo fimbi! (Ifyakufu. 5:2, 6-9) Calibwenekele apaswetele ati baYawe baalisalulwile Mose ukuba uwa kutangilila abantu babo.

5. Buulishisheni ifi baYawe baofweleko abalalume bambi abaIshilaeli ukutangilila abantu babo.

⁵ Mu kukonkapo, umupashi uswetelele walyofweleko abalalume bambi baabo baYawe basalulwile ukutangilila abantu babo. “Joshua, umwana wakwe Nuni, waliiswile umupashi wa mano.” (Ndute. 34:9) “Umupashi wa baYawe waliselukile na pali Gidyoni.” (Abasol. 6:34) Kabili “umupashi wa baYawe waliishile ne makosa pali Dafidi.” (1 Sam. 16:13) Bonse aba abalalume balyeyamine pa mupashi wa baLesa ukubofwako, kabili walibofweleko ukucita ifintu ifi tabaali ne kucita ku makosa abo. (Jos. 11:16, 17; Abasol. 7:7, 22; 1 Sam. 17:37, 50) Na muli fyefyo, baYawe balilemiwe pakuti pali fyefyo aba abalalume baacitile.

6. Nindo baLesa baalukufwaila abantu babo ukucindika abalukutangilila mu Ishilaeli?

⁶ Findo abaIshilaeli baelelwe ukucita pa kubona ati umupashi uswetelele e waofweleko aba abalalume? Ili abantu batamakile pa kutangilila kwakwe Mose, baYawe baalipwishe ati: “Impindi ya shani aba bantu bakalukunjefya nebo?” (Ifyakupe. 14:2, 11) Bucine bwa kweba’ti baYawe e baasalulwile Mose, Joshua, Gidyoni na Dafidi ukubemakaninako pa kutangilila abantu babo. Lyonse ili abantu baalukumfwila aba abalalume, calukwalula ati baalukutangililwa na baYawe.

7. Kani inkalamba shalyofweleko shani Mose?

⁷ Inkalamba shalyofweleko abalukwimakaninako baLesa. (Pendeni AbaEbeya 1:14.) BaYawe baalipyungishe inkalamba pa kupeela Mose umulimo, ukumubuula ifyakucita, ne kumutangilila. BaLesa “e batumine [Mose] ku minwe ya nkalamba, iya bwenekele kuli ye mu cinsokela, ati ekale bufumu bwa kupulusha.” (Ifyacit. 7:35) BaYawe ‘balyanshikile ku nkalamba’ Ifunde ili Mose apyungishe pa kufunda abaIshilaeli ifi baelelwe ukulukucita. (Galatya 3:19) Kabili baYawe baalimubuulile ati: “Ulukubatanjilila abantu apo apa nakubulile; bona, inkalamba yanji ikalukukutanjilila.” (Ifyakufu. 32:34) Baibolo taibuulishishapo kani abaIshilaeli baalukubona inkalamba ilukupyunga iyi milimo. Nangabe’fyo, ifi Mose afundile ne kutangilila abantu fyalilangishe ati ni nkalamba shamofweleko.

8. Kani inkalamba shalyofweleko shani Joshua na Esikaya?

⁸ Ili Mose afwile, Joshua uwa mupyene, alikoshiwe ku “cilolo ce bumba lya baYawe” ukutangilila abantu ba baLesa ku kulwa ne baKanani; kabili abaIshilaeli baalicimfishe. (Jos. 5:13-15; 6:2, 21) Panuma Imfumu Esikaya baalitiinishe ku bashilikani aba Ashiliya abaalukufwaya ukonaala Jelusalemi. Mu bushiku bumo lukoso, “inkalamba ya baYawe yaliimine, ne kupama  ifita amasausande umwanda umo ne makumi asanu na atatu ne masausande asanu peulu [185,000].”—2 Imf. 19:35.

9. Findo abaIshilaeli baelelwe ukulukucita nangaba’ti abalukubatangilila tabaalipo abawaminine?

⁹ Nangaba’ti inkalamba shiwaminine, pano abalalume shalukofwako bo tabaalipo abawaminine. Imbi impindi Mose alifililwe ukulemya baYawe. (Ifyakupe. 20:12) Joshua taipwishe baLesa ukumutangilila ili tangalayana ne baGibyoni. (Jos. 9:14, 15) Pa mpindi imo “umutima wakwe [Esikaya] walukulitota.” (2 Ifye. 32:25, 26) Pano, nangaba’ti aba abalalume tabaalipo abawaminine, abaIshilaeli balyelelwe ukulukulonda ukutangilila kwabo. BaYawe balukofwako balya abalalume ukupyungisha inkalamba. Mu cinenene, baYawe baalukuntangilila abantu babo.

10. Kani Mose alitangililwe shani ne Funde lya baLesa?

¹⁰ Abantunshi abalukwimakaninako baLesa balukutangililwa ne Mashiwi abaLesa. Baibolo ilalosha kwi funde baLesa bapeele abaIshilaeli ati “Ifunde lyakwe Mose.” (1 Imf. 2:3) Nangabe’fyo, Amalembo aleshibisha baYawe ati e babapeele Ifunde, kabili na Mose naye alukulonda lyopele’lyo Ifunde. (2 Ifye. 34:14) Panuma ili baYawe bashilile ukufunda Mose ifya kwibaka isema, Baibolo ilabuulishisha ati: “Mose walicitile’fyo; koti ni fyefyo fyonse ifi bamufundile baYawe, koti ni fyopele’fyo kaacita.”—Ifyakufu. 40:1-16.

11, 12. (a) Findo Joshua ne mfumu ishalukwikalika abantu ba baLesa baelelwe ukucita? (b) Kani Amashiwi a baLesa alyofweleko shani aba abalalume abalukutangilila?

¹¹ Ukufuma lukoso ili atatikile ukutangilila abantu ba baLesa, Joshua alikwete Amashiwi abaLesa aalembelwe. BaLesa baalimubuulile ati: “Ukalukwalakanishishamo akasuba ne bushiku, ati ukalukucita koti ni fyefyo fyonse ifilembelwemo.” (Jos. 1:8) Mu kukonkapo, imfumu nasho ishalukwikalika abantu ba baLesa shalilondele fyopele’fyo. Shalyelelwe ukulukupenda Ifunde inshiku shonse, ukulilembela icakutuntulula ce Funde, ne “kulukulama amashiwi onse e Funde ili, ne kufunda uku, ukulukukucita.”—Pendeni Ndutelonomi 17:18-20.

¹² Kani Amashiwi abaLesa alyofweleko shani aba abalalume abalukutangilila? Alakanyeni pa cakubwenako ca Mfumu Josaya. Ili basangile icakupeta umwali Ifunde lyakwe Mose, Josaya alikutikile ili umulembeshi wakwe alukumupendela. * Kani imfumu yalicitile shani? “Pa kumfwa imfumu amashiwi amwi buku lye Funde, palibele ati yalipandwile ifya kufwala fyaiyo.” Pano alicitile na fimbi. Pakuti Josaya alukutangililwa ne Mashiwi abaLesa, alitatikile ukonaala ifibumbwabumbwa fyonse ifi abantu baalukupempela kabili alyanshikile ne citenje ca Muciluko. (2 Imf. 22:11; 23:1-23) Pakuti Josaya na bambi aba bucine balukutangililwa ne Mashiwi abaLesa, balilitemenwe ukwaluka eli ne kubuulishisha bwino ifi abantu ba baLesa baelelwe ukulonda. Uko ukwaluka kwalilengeshe abantu ba baLesa aba kale ukulukucita ifintu ukwelelwa ne kufwaya kwa baLesa.

13. Kani abaalukutangilila abantu ba baLesa baalipuseneko shani ne baalukutangilila abena fyalo?

¹³ Mame’fi ishi imfumu sha bucine shapuseneko ne shali mu fyalo fimbi, ishalukutangililwa ne mano abuntunshi kabili ishi tashalukulangulukapo pa fya kutangiile! Ili abaKanani balukutangilila, abantu balukucita ifyakunekasha, ifyasankenemo ukulaala ne bakwababo, abanakashi ukulala ne abanakashi babyabo fyopele’fyo abalalume nabo ukulaana ne balalume babyabo, ukulaala ne finama, ukupeela abana imilambu ne kupempela ifibumbwabumbwa. (IfyabaLef. 18:6, 21-25) Icabipile makosa cakweba’ti abalukutangilila Babiloni na Ijipiti tabalukulondapo amafunde alabila pa bunjino yayo baLesa bapeele abaIshilaeli. (Ifyakupe. 19:13) Mu kupusanako, abantu ba baLesa aba kale balibwene fyefyo bucine bwa balukubatangilila  bwabofweleko ukuba aba bunjino mu fya baLesa, mu mibelo na ku munefu. Mu cinenene, baYawe baalukutangilila abo basalulwile ukulukutangilila abantu babo.

14. Nindo yalengeshe baYawe ukucenjesha bambi abaalukutangilila abantu Babo?

¹⁴ Talipo ni mfumu shonse ishalukutangilila abantu ba baLesa akale ishalukulonda ukufunda kwa baLesa. Abo abatabalukumfwilapo baYawe baalikene ukutangililwa ne mupashi uswetelele uwa baLesa, inkalamba, ne Mashiwi abaLesa. Shimbi mpindi, baYawe baalukucenjesha abaalukutangilila neli ukupyanikapo bambi. (1 Sam. 13:13, 14) Mu mpindi yabo iyelelwe, baalisalulwile intangishi iicilile pa ntangishi shonse isha buntunshi ishi bapyungishepo kunuma.

15. (a) Findo abakushimika baalabile ifyalukulangilila ati intangishi iilibelele yali ne kwisa? (b) Kani ni isa intangishi bashimikile?

¹⁵ Pa myaka iyakuti bwingi, baYawe baalishimikile ati bakasalulula uwakutangilila abantu babo uwelelwe kabili uulibelele. Mose alibuulile abaIshilaeli ati: “BaYawe Lesa wobe bakakubushisha uwakushimika, uwa kufuma mukati muli mwebo, uwa pa bakwabenu, uwa kupalana na nebo; mukalukumumfwa ye.” (Ndute. 18:15) Yisaya alishimikile ati uyu ali ne kuba “ni mfumu ne mwikalikishi pa bantu.” (Yisa. 55:4) Kabili Danyeli alishimikile pa kwisa kwa ‘baMasaya, imfumu.’ (Dan. 9:25) Mu kupelako, baYesu Klistu abene balilibuulishishe ati ni Ntangishi ya bantu ba baLesa. (Pendeni Matayo 23:10.) Abasambile ba baYesu mu kulitemenwa baalilondele baYesu, kabili baalishininwe ati ni baYawe babasalulwile. (Yoa. 6:68, 69) Nindo yalengeshe abasambile ukusumina ati baYawe balukutangilila abantu babo ukupyungisha baYesu Klistu?

16. Findo fyalangishe ati umupashi uswetelele walyofweleko baYesu?

¹⁶ Umupashi uswetelele walyofweleko baYesu. Ili baYesu baalukubatishiwa, Yoane Uwakubatisha kabona “kwiulu kwapanduka, ne mupashi koti ni ciba ulukubaselukila.” Mu kukonkapo “umupashi walipulilile ukubatwala mu mpanga.” (Mako 1:10-12) Ukufumo’lo, ili baYesu balukutulisha, umupashi uswetelele uwa baLesa walukubofwako ukucita ifimpelampela, ne kulabila ifyalukufuma kuli baLesa. (Ifyacit. 10:38) Nakabili, umupashi uswetelele walyofweleko baYesu ukulangisha mu kuwaminina imibelo ili koti butemwe, ukusangalala, ne kucetekela. (Yoa. 15:9; Ebeya 12:2) Takwalipo intangishi imbi iyacitile ifyakube’fyo. BaYesu ebo baYawe basalulwile.

17. Findo inkalamba shacitile pa kofwako baYesu?

¹⁷ Inkalamba shalyofweleko baYesu. Impindi iinini ukufuma apa baYesu babatishiwe, ne “nkalamba shaliishile ne kubatabatabila.” (Mat. 4:11) Impindi iinini ili tabangafwa,  “yalibwenekele kuli bo inkalamba ya kwiulu, iyalukubakosha.” (Luku 22:43) BaYesu balicetekele ati baYawe bangabofwako ukupyungisha inkalamba ili balukupengela ukubofwako pakweba’ti bakonshe ukufwaya kwa baLesa.—Mat. 26:53.

18, 19. Kani Amashiwi abaLesa alyofweleko shani baYesu mu mekalilo abo na muli fyefyo balukusambisha?

¹⁸ BaYesu balukutangililwa ne Mashiwi abaLesa. Ili batatikile lukoso ukutulisha, baYesu balukutangililwa ne Malembo. (Mat. 4:4) Na cine, icumfwila cabo ku Mashiwi abaLesa calibalengeshe ukulitemenwa ukufwa imfwa ibipile pa citi. Nakabili, na lyelyo baalukufwa baalyambwile ne fyakushimika ifyalukulabila pali baMasaya. (Mat. 27:46; Luku 23:46) Ukupusanako, intangishi sha mapempelo ishaliko pali ilya impindi shalukupufya Amashiwi abaLesa kani shabona ati apusana ne fyakutantaka fya shisho. BaYesu balyambwile ukushimika kwakwe Yisaya ukwalukulabila pali sho ati: “Sombi uko ukundemya nebo kwa lukoso; ili basambisha ubusambishi bwa mafunde abantu.” (Mat. 15:7-9) Kani baYawe baali ne kusalulula abalalume bakube’fyo ukutangilila abantu babo?

¹⁹ BaYesu baalukulonda amashiwi abaLesa muli fyefyo balukucita na muli fyefyo baalukusambisha. Ili aba mapempelo balukwipusha baYesu ifikumine amapempelo, tabaeyaminepo pa mano abo neli ifi baishi, sombi baalyeyamine pa Malembo. (Mat. 22:33-40) Kabili pa mupunda wa kubuula abaalukubakutika ifi kwiulu kuli neli ifya bulengeshi bonse, “baliiswilemo mu mitima yabo ati beshibe bwino amalembo.” (Luku 24:32, 45) BaYesu baalitemenwe Amashiwi abaLesa kabili balukulitemwesha ukubuulako bambi.

20. (a) Kani baYesu baalilangishe shani ati baalukumfwila baLesa? (b) Kani filya baYesu bapuseneko makosa kuli Elode Ajilipa uwa kutanga filatusambishe’ndo pali fyefyo baYawe basalulula uwa kutangilila?

²⁰ Nangaba’ti baYesu baalilengeshe abaalukubakutika ukukankamana ku “mashiwi aluse,” ubuleme baalipele baYawe, abasambishi babo. (Luku 4:22) Ili umwalalume wa maboni afwaile ukulemya baYesu pa kubeta ati “Abasambishi Abaweme,” mu kutekanya baYesu baalyasukile ati: “Mba nindo ulukunjilika nebo ati uweme? Tapalipo umuntu uweme, sombi benka, e baLesa.” (Mako 10:17, 18) Baalipuseneko ne mfumu Elode Ajilipa uwa kutanga, uwatatikile ukwikalika neli ukutangilila mu Judiya cipale imyaka 8 panuma ya mfwa ya baYesu. Pa bushiku bwa citenje Elode aalifwite “ifyakufwala ifya bufumu.” Abantu baalibilikishe ati: “Ishiwi ili lyakwe lesa, talili lya muntu!” Ukwakubula ne kukanika Elode alyumfwile bwino filya balukumutotaisha. Findo fyacitikile? “Impindi iyo yopele inkalamba ya baShikulu [baYawe] yalimupamine, pakuti taalemeshe baLesa; naye alilikilwe ku matila ne kufwa.” (Ifyacit. 12:21-23) Na cine, takwalipo neli umo pa balukubonako uwalangulukile ati Elode ni baYawe bamusalulwile ukuba uwa kutangilila. Ku kabeya kambi, baYesu baalipeele ubushininkisho bwa cine ati baalisalulwilwe na baLesa, kabili lyonse balukulemya baLesa pakuti e Ntangishi Iicilile iya bantu babo.

21. Findo tukambaalapo mu ciputusha cakonkapo?

²¹ Ukutangalila kwa baYesu kwa muyayaya. Ili baYesu babuushiwe, baalilabiile ati: “Ubukulu bonse bulipelwe kuli nebo, ubwa kwiulu ne bwa pa calo ca panshi . . . lomba boneni, ndi nenu inshiku shonse, ukufika na ku kushila kwa mpindi.” (Mat. 28:18-20) Pakuti tababonekapo, kani baYesu bangatangilila shani abantu ba baLesa pa calo? Ni bani baYawe baali ne kusalulula ukupyunga na baYesu kabili ne kutangilila abantu babo? Kabili kani abaKlistu baali ne kwishiba shani abaali ne kulukwimakaninako baLesa? Iciputusha cakonkapo cikasuuka ifi ifyakwipusha.