“Tulukuya Nenu”
“Tulukuya nenu, pakuti twaumfwa ati baLesa bali nenu.”—SAKALIYA 8:23.
INYIMBO: 65, 122
1, 2. (a) Findo baYawe balabiile ati efikacitika mu nshiku shesu? (b) Ni fiisa fyakwipusha twakwambaalapo? (Boneni icikope icili peulu.)
BAYAWE balilabiile ati mu nshiku shesu, “abantu ikumi, aba pa milaka yonse ya bena fyalo, bakekata ne mukombelo wa ngubo ya muntu umuJuda, ne kulabila ati: Tulukuya nenu, pakuti twaumfwa ati baLesa bali nenu.” (Sakaliya 8:23) “UmuJuda” alemakaninako abasufishiwe ne mupashi uswetelele uwa baLesa. Nakabili baletwa ati ‘Ishilaeli wa baLesa.’ (AbaGalatya 6:16) “Abantu ikumi” balemakaninako abacetekele ukwikala umuyayaya pa calo. Baliishi ukweba ati baYawe balishukishe ili ibumba lya basufishiwe kabili balabona ati lishuko ukwakuti ukupempela baYawe pamo nabo.
2 Koti ni fyefyo Sakaliya alabiile, baYesu nabo balilabiile ati abantu ba baLesa bakaba abekateene. Balibuulishishe ati abo abacetekele ukuya kwiulu e ‘tanga ilinini’ kabili ati abo abacetekele ukwikala umuyayaya pa calo e ‘mbelele shimbi.’ Pano baYesu balilabiile ati onse aya amabumba obilo akaba “litanga limo” kabili bakalukulonda “ne mwembeshi umo.” (Luku 12:32; Yoane 10:16) Pakuti kuli amabumba abili, cipale bambi bangalanguluka ati: (1) Kani imbelele shimbi shilyelelwe ukwishiba amashina abasufishiwe bonse? (2) Kani abaKlistu abasufishiwe balyelelwe ukulibona shani? (3) Kani ndyelelwe ukumubona shani uwa mwi kelesha uwatatika ukulyako shinkwa ne kunwako imfaina pa Cakwanuka? (4) Kani ndyelelwe ukubombomana ili nabona ati inambala ilukukulilako iya balyako shinkwa ne kunwako imfaina pa Cakwanuka? Cino iciputusha cakwasuka ifi ifyakwipusha.
KANI TULYELELWE UKWISHIBA AMASHINA ABASUFISHIWE BONSE?
3. Nindo tekuti twishibilepo bonse lukoso abakaba pali ba 144,000?
3 Kani imbelele shimbi shilyelelwe ukwishiba amashina abasufishiwe bonse? Koku. Mba nindo? Ni pakuti tekuti twishibepo mu cinenene ukweba ati bonse lukoso abalabila ati basufishiwe bakaya kwiulu. [1] (Boneni tumashiwi twa pa mpelo.) Nangaba ati baLesa balibetile ukuya kwiulu, bakapoka ilyo ilambulo kani bakapitilishe ukuba aba bucine. Satana aliishi ifi, kabili angapyungisha “ne bakushimika abakutumpaika” ukwesha “ukubapasusha.” (Matayo 24:24) Abasufishiwe tekuti bacetekelepo ati bakapoke’lambulo mpaka ili baYawe bababuulishisha ukweba ati ba bucine. BaYawe balababuulishishe’fyo, neli ati balabalemba akeshibilo ka kupelako ili tabangafwa. Kuli bambi baYawe bakacite’fyo ili kukashala lukoso impindi iinini ukweba ati ‘ukukululuka ukukulu’ kutatike.—Ukufisulula 2:10; 7:3, 14.
4. Pakuti tekuti twishibepo amashina abasufishiwe bonse lukoso abacili pa calo, kani ‘tungaya’ shani nabo?
4 Pakuti tekuti twishibepo amashina abasufishiwe bonse lukoso abacili pa calo, kani imbelele shimbi ‘shingaya’ shani nabo? Baibolo ilalabila ati “abantu ikumi . . . bakekata ne mukombelo wa ngubo ya muntu umuJuda, ne kulabila ati: Tulukuya nenu, pakuti twaumfwa ati baLesa bali nenu.” Pali lili ilembo, Baibolo yalabila lukoso pa muJuda umo. Nangabe’fyo, ishiwi lya kweba ati “nenu” lilukubuulishisha lukoso apaswetele ati bantu abengi lilukulabilapo. Ici cilukwalula ati umuJuda talipo muntu umo lukoso, sombi alemakaninako abasufishiwe bonse lukoso. Imbelele shimbi shiliishi ifi, kabili shilapyungila baYawe pamo ne basufishiwe. Tabapengelapo ukwishiba ishina lya musufishiwe umo umo ne kulukumulonda. BaYesu e bakutufunda amano, neli ati e ntangishi yesu, kabili Baibolo ilatubuula ati ebo twelelwe lukoso ukulukulonda.—Matayo 23:10.
KANI ABASUFISHIWE BALYELELWE UKULIBONA SHANI?
5. Ni kwisa ukucenjesha abasufishiwe belelwe ukwalakanyapo makosa, kabili nindo?
5 Abasufishiwe balyelelwe ukwalakanya makosa pa kucenjesha ukuli pali 1 AbaKolinto 11:27-29. (Pendeni.) Kani umusufishiwe angalyako shani shinkwa ne kunwako imfaina pa Cakwanuka mu nshila ‘iitayelelwe’? Kani umuntu takwetepo ubulunda ubuweme na baYawe kabili aleka ukuba uwa bucine kuli bo, eli alyako shinkwa ne kunwako imfaina pa Cakwanuka, ninshi alukupufya umulubulo. (AbaEbeya 6:4-6; 10:26-29) Uku ukucenjesha kulanushako abasufishiwe ati balyelelwe ukulukuli aba bucine pakweba ati bakapoke ‘ukulambulwa kwa kwita kwiulu ukwa baLesa muli baKlistu Yesu.’—AbaFilipoi 3:13-16.
6. Kani abasufishiwe balyelelwe ukulibona shani?
6 Paulu alibuulile abaKlistu abasufishiwe ati: “Ne kaili uwa muli baShikulu, ndukumukombeteleni ati mulukwenda ukwelelwe ukwito’ko uku mwaitilweko.” Kani balyelelwe ukucita shani ifi? Paulu alibuulishishe ati: “Ne kulicefya konse ne kutekanya, pamo ne nkumbu, ili musuminanshanya mu butemwe; ne kulukusantuka ukulukulamo’mupashi ati umo ubulubulu mu cakupamba ica butende.” (AbaEfesa 4:1-3) Umupashi uswetelele uwa baYawe ulofwako abapyungishi babo ukubulo’kulitoota, sombi ukuba abalicefeshe. (AbaKolosai 3: 12) Popele, abasufishiwe tabalangulukapo ati bacindeme ukucila bambi. Baliishi ukweba ati baYawe tabapeelapo abasufishiwe umupashi uswetelele uwingi ukucila ifi bapeela bambi. Nakabili, tabalangulukapo ati nibo ebangomfwisha bucine bwa mu Baibolo ukucila bambi. Kabili tekuti babuulepo umuntu neli umo ati alisufishiwe kabili alyelelwe ukutatika ukulyako shinkwa ne kunwako imfaina pa Cakwanuka. Sombi, balilicefeshe kabili baliishi ati ni baYawe lukoso e beta abantu ukuya kwiulu.
7, 8. Findo abaKlistu abasufishiwe tabalangulukapo, kabili nindo?
7 Nangaba ati abasufishiwe balabona ati lishuko ilya kuti ubukulu ukwitwa ukuya kwiulu, tabalangulukapo ati bambi balyelelwe ukubalemya makosa. (AbaEfesa 1:18, 19; pendeni AbaFilipoi 2:2, 3.) Nakabili, balaanuka ati ili basufishiwe, baYawe tababuulileko abantu bambi. Popele, umusufishiwe takankamanapo kani bambi balukukanika ati alisufishiwe. Alaanuka ifi Baibolo itubuulishisha ati twilukusumina bwangu uwalabila ati baLesa bamupeele’milimo iilibelele. (Ukufisulula 2:2) Pakuti abasufishiwe tabalangulukapo ati balyelelwe ukulemiwa makosa, tababuulako onse lukoso woyo bakumanya ati balisufishiwe. Na cine, tekuti babuuleko neli umo ati balisufishiwe. Nakabili, tekuti balukulitootapo pa milimo iingi yeyo bakapyunga kwiulu.—1 AbaKolinto 1:28, 29; pendeni 1 AbaKolinto 4:6-8.
8 AbaKlistu abasufishiwe tabalangulukapo ati balyelelwe ukulukusangwa lukoso ne basufishiwe bambi. Tabayapo ili bafwaya-fwaya abasufishiwe bambi pakweba ati balukwambaala pa kusufiwa kwabo neli ati balukusalaala Baibolo pamo. (AbaGalatya 1:15-17) Kani abasufishiwe balukucite’fyo, mwi kelesha mungaba amalekano. Bangalukulwisha umupashi uswetelele, uofwako abantu ba baLesa ukuba abekatene kabili aba mutende.—Pendeni AbaLoma 16:17, 18.
KANI TULYELELWE UKUBABONA SHANI?
9. Findo fingacitika kani mulukulemya makosa abalyako shinkwa ne kunwako imfaina pa Cakwanuka? (Boneni akabokoshi ka kweba ati “ Ubutemwe ‘Tabucitapo Ifitafyelelwe.’”)
9 Kani mulyelelwe ukubabona shani abasufishiwe? BaYesu balibuulile abasambile ati: “Mwebo mwense muli bana-bankashi. . . . Nakabili abantu bonse ukalilemya akacefiwa; ne ukalicefya eukalemiwa.” (Matayo 23:8-12) Popele, taciwemepo ukulemya makosa umuntu, nangaba ati mukwabo baKlistu umusufishiwe. Ukuba, Baibolo ilatukoselesha ukulukutenteka ukucetekela kwa bakulu ba mwi kelesha, pano taitubuulapo ati tulyelelwe ukupanga umuntunshi ukuba ni ntangishi yesu. (AbaEbeya 13:7) Fya cine ukweba’ti Baibolo ilalabila ati bambi bali abelelwe “ukucindikwa kubili.” Pano, ilatubuula ifyo ni pakuti aba abantu ‘balekalika bwino’ kabili ‘balapyungisha mwi shiwi na mu busambishi,’ talipo ni pakuti balisufishiwe koku. (1 Timote 5:17) Kani tulukulemya makosa abasufishiwe, tungabanshe’nsoni. Nakabili, tungabalengesha ukutatika ukulitoota. (AbaLoma 12:3) Na cine, tatulukufwayapo ukulengesha neli umo umukwabo baKlistu umusufishiwe ukucita ifya kube’fyo.—Luku 17:2.
Kani mulyelelwe ukumubona shani uwalyako shinkwa ne kunwako imfaina pa Cakwanuka? (Boneni amapalakalafu 9-11)
10. Mungalangisha shani ati mulacindika abaKlistu abasufishiwe?
10 Tungalangisha shani ati tulacindika abasufishiwe? Tatwelelwepo ukubepusha ifi basufishiwe. Ifi fyabo abene, fyefyo tatwelelwepo ukwishiba. (1 AbaTesalonike 4:11; 2 AbaTesalonike 3:11) Nakabili, tatwelelwepo ukulanguluka ati abalume neli abakashi babo, abafyashi, neli bambi lukoso aba mu cisoolo cabo nabo balisufishiwe. BaYawe e basalulula uku umuntu akaba kuntangiile, talipo ba mu cisoolo cakwe. (1 AbaTesalonike 2:12) Nakabili, tatwelelwepo ukwipusha ifyakwipusha ifingasoomesha bambi. Ku cakubwenako, tatwelelwepo ukwipusha abakashi ba musufishiwe ifi bomfwa kani balanguluka pa kwikala umuyayaya pa calo ukwabula abalume. Ni pakuti tulicetekele ati mu calo ca bukumo, baYawe ‘bakekusha ukufwaya kwa fintu fyonse ifilabi.’—Amasamo 145:16.
11. Kani ukubulo’kulemya makosa abantu kulatulama shani?
11 Ukubulo’kulemya makosa abasufishiwe kulatulama. Muli isa nshila? Baibolo ilatubuula ati mwi kelesha mungaba ‘abakwasu abakutumpaika’ abangalukulabila ati balisufishiwe. (AbaGalatya 2:4, 5; 1 Yoane 2:19) Nakabili, bambi abasufishiwe tekuti bapitilishepo ukuba aba bucine. (Matayo 25:10-12; 2 Petilo 2:20, 21) Pano, ukubulo’kulemya makosa abantu kukatulengesha ukubulo’kubalonda, ukubikako ne basufishiwe, abakwasu abeshibikilwe makosa, neli abapyungiile baYawe pa myaka iingi. Eli, kani baleka ukuba aba bucine neli kani bafumamo mwi kelesha, fwebo tatukalekapo ukucetekela baYawe neli ukubapyungila.—Juda 16.
KANI TULYELELWE UKUBOMBOMANA ILI INAMBALA ILUKUKULILAKO?
12, 13. Mba nindo tatwelelwepo ukubombomana pakuti pa nambala ya balyako shinkwa ne kunwako imfaina pa Cakwanuka?
12 Pa myake’ingi, inambala ya balyako shinkwa ne kunwako imfaina pa Cakwanuka yalukuya ili icepa. Pano bukumo, iyi inambala ilukuya ili ikulilako umwaka ne mwaka. Kani tulyelelwe ukubombomana pali cici? Koku. Nga tubone imilandu tatwelelwepo ukubombomanina.
13 “BaShikulu balibeshibile ababo.” (2 Timote 2:19) Ukupusanako na baYawe, abakwabesu abapenda abalyako shinkwa ne kunwako imfaina pa Cakwanuka tabeshibapo abasufishiwe mu cinenene. Popele, pali baabo bapenda palaba ne balanguluka ati balisufishiwe, pano mu cinenene tabasufishiwepo. Ku cakubwenako, bambi abaalukulyako shinkwa ne kunwako imfaina baalilekele ukucite’fyo mu kupita kwa mpindi. Bambi balwele mu kalango neli bali ne makatasho ambi lukoso. Pakuti pali fyefyo balicetekele ati bakaya mu kwikalika na baKlistu kwiulu. Kanshi, tekuti twishibepo inambala ya cinenene iya basufishiwe abashelepo pa calo.
14. Findo Baibolo ilabiilepo pa nambala ya basufishiwe abakashalapo pa calo ili ukukululuka ukukulu kukatatika?
14 Abasufishiwe bakalukuli mu mipunda iilekenelekene pa calo ili baYesu bakesa mu kubapinta. Baibolo ilalabila ati Umwana wa muntushi, baYesu, “akatuma inkalamba shakwe ne kulila ukwakuti ukwa lupenga; na sho shikabunganya abasalulwilwe bakwe ku fipupu fyonane, na ku lubali lumo lwa kwiulu ukufika na ku lubyakwe.” (Matayo 24:31) Nakabili, Baibolo ilabuulishisha ati mu nshiku sha kupelako, kukaba abasufishiwe abanini lukoso abakashalapo pa calo. (Ukufisulula 12:17) Pano, taibuulishishepo inambala ya bakashalapo ili ukukululuka ukukulu kukatatika.
15, 16. Findo twelelwe ukwishiba pali baabo baYawe basalulula ukuba pali ba 144,000?
15 BaYawe e basalulula impindi ya kusufya abantu. (AbaLoma 8:28-30) BaYawe balitatikile ukusufya aba kuya kwiulu panuma ili baYesu babuushiwe. Cilaboneka koti mu mpindi ya basambile ba kutanga, abaKlistu ba cine bonse lukoso baalisufishiwe. Pano ili papitile imyaka iingi, abengi abaalukulabila ati baKlistu balilekele ukulonda baYesu mu cinenene. Nangabe’fyo, baYawe balipitilishe ukusufya abo abaKlistu abali ba bucine muli yeyo imyaka. Baali koti ni tiligu yeyo baYesu balabiilepo ukweba ati ikakulila pamo ne bamba. (Matayo 13:24-30) Mu nshiku sha kupelako, baYawe balipitilishe ukusalulula abantu abakaba pali ba 144,000. [2] (Boneni tumashiwi twa pa mpelo.) Popele, baLesa kani basalululapo ukusufya na bambi ili kwashala lukoso impindi inini ati ukushila kufike, icine tekuti tukanikepo ati baLesa balukucite’fyelelwe. (Yisaya 45:9; Danyeli 4:35; pendeni AbaLoma 9:11, 16.) [3] (Boneni tumashiwi twa pa mpelo.) Tulyelelwe ukucenjela pakweba ati tatuling’wing’wishepo koti ni fifilya abapyungishi bacitile pa kubone’fi umwine we bala asalulwilepo ukulambula abapyungishi abatatikile ukupyunga mwi bala lyakwe ninshi kwashala lukoso iwala limo ukwinuka.—Pendeni Matayo 20:8-15.
16 Talipo ni bonse lukoso abacetekele ukuya kwiulu abali e ‘mupyungishi umucetekelwe kabili uwa mano.’ (Matayo 24:45-47) Koti ni fyefyo cali mu mpindi ya basambile ba kutanga, baYawe na baYesu balukupyungisha abantu abanini ukuliisha, neli ukusambisha, abengi. Banini lukoso abaKlistu ba kutanga abasufishiwe abapyungishiwe ukulembako Amalembo AbuKlistu AaciGiliki. Na bubuno bukumo, banini lukoso abasufishiwe abapeelwe umulimo wa kupeela abantu ba baLesa “ifyakulya fyabo pa mpindi ishelelwe.”
17. Findo mwasambililamo muli cicino iciputusha?
17 Findo twasambililamo muli cicino iciputusha? BaYawe bakapeela umweo wa muyayaya ku bantu babo abengi pa calo ca panshi ne mweo wa muyayaya kuli baabo abakekalika na baYesu kwiulu. BaYawe balalambula abapyungishi babo bonse, “umuJuda” ne ‘bantu ikumi,’ kabili balafwaya ati bonse lukoso abapyungishi babo balukulonda amafunde antu amo ne kulukuli aba bucine. Bonse balyelelwe ukulicefya. Bonse balyelelwe ukupyungila pamo ne kulukuli abekatene. Nakabili, bonse balyelelwe ukofwako ikelesha ukuba ilya mutende. Ili tulukupalamina ku kushila, nga tupitilishe ukupyungila baYawe ne kulukulonda baKlistu koti litanga limo.
[Tumashiwi twa pa mpelo]
^ [1] (palakalafu 3) Ukwelelwa na Amasamo 87:5, 6, cipale kuntangiile baLesa bakafisulula amashina abonse lukoso abakalukwikalika na baYesu kwiulu.—AbaLoma 8:19.
^ [2] (palakalafu 15) Nangaba’ti Ifyacitilwe 2:33 filalangisha ati baYawe na baYesu balapyungila pamo pa kusufya umuntu, pano baYawe abene e beta umuntu ukuya kwiulu.
^ [3] (palakalafu 15) Kani mulukufwaya ukumfwilapo ifyebo na fimbi, boneni iciputusha ca “Ifyakwipusha Abantu Bepusha” mu Akatambo ka Wakulama aka Cibemba, aka May 1, 2007, amabuula 30-31.
