1, 2. Kani Paulu alilangishe shani ati aalukutoota pali fyefyo baLesa balangishe uluse kuli ye?

INTANGISHI Paulu yalilabiile ati: “Uluse lwabo [baLesa] ulwa kuli nebo talwabele lwa lukoso.” (Pendeni 1 AbaKolinto 15:9, 10.) Paulu aliishibile ati talipo kupyungisha kwakwe ukwalengeshe baLesa ukumumfwile’nkumbu kabili ati taelelwepo ukumumfwile’nkumbu. Aliishibile’fi ni pakuti aalukukululusha abaKlistu akale.

² Ili Paulu aali apepi ne kufwa, alilembele inkalata kuli Timote umupyungishi mubyakwe, ati: “Ndukubatota abo abampele amakosa, e baKlistu Yesu baShikulu besu, pakuti balingebele ati wakucetekelwa, ne kunjikalika bupyunjishi bwabo.” (1 Tim. 1:12-14) Ni bwisa ubo ubupyungishi? Paulu alibuulile abakulu ba mwi kelesha lya mu Efesa ati: “Nshilukuweba kantu umweo wanji ati euntemenwe, ati nkeshibe ukukonsha ulwendo lwanji, ne milimo iyo napokele kuli baShikulu Yesu,  iya kushimika icebo iciweme ica luse lwa baLesa.”—Ifyacit. 20:24.

3. Ni wisa umulimo wa kutulisha uulibelele woyo Paulu apeelwe? (Boneni icikope icili pe buula 25.)

³ Ni ciisa “icebo iciweme” ici Paulu alukutulisha icalukubuulishisha uluse lwa baYawe? Alibuulile abaKlistu abaEfesa ati: “Muliumfwile ifya kwikalika kwa luse lwa baLesa ulo ulwapelwe kuli nebo ulwa kuli mwebo.” (Efesa 3:1, 2) Paulu alipeelwe umulimo wa kutulishe’cebo iciweme ku bena fyalo pakweba ati nabo bangaba pali baabo abakalukwikalika na baKlistu mu Bufumu bwa buMasaya. (Pendeni AbaEfesa 3:5-8.) Pakuti Paulu aali ne munkonsha wa kutulisha, ali cakubwenako iciweme ku baKlistu ino mpindi kabili aalilangishe ati uluse lwa baLesa talwali “lwa lukoso” kuli ye.

4, 5. Mba nindo tungalabilila ati ‘icebo iciweme ica Bufumu’ ni cintu cimo ne cebo iciweme “ica luse lwa baLesa”?

⁴ Muli shishino inshiku sha kupelako, abantu ba baYawe balipeelwe umulimo wa kutulisha ‘icebo iciweme ica Bufumu monse mu calo ca panshi, koti ni bumboni ku mikoka yonse ya bantu.’ (Mat. 24:14) Icebo tutulisha ciletwa ne kweba ati “icebo iciweme ica luse lwa baLesa” ni pakuti amashuko onse lukoso ao tucetekele ukulitemwesha ili Ubufumu bwa baLesa bukalukwikalika akesako pakuti pa luse lwa baYawe. (Efesa 1:3) Kani fwense umo umo tulalangisha ati tulatoota pa luse lwa baYawe koti ni fyefyo Paulu acitile ukupitila mu kulukutulishe’cebo iciweme ne munkonsha?—Pendeni AbaLoma 1:14-16.

⁵ Mu ciputusha cafumako, twalisambilile ifi fwe bakubifya tulukubwenamo mu luse lwa baYawe mu nshila ishipusenepusene. Na muli fyefyo, tulyelelwe ukupyungisha apapelele amakosa esu ukubuulako abantu bonse ifi baYawe balukulangisha ubutemwe na fyefyo abantu bangabwenamo mu butemwe bwabo. Ni shisa inshila ipusenepusene ishi baYawe balangishishemo uluse lwabo shesho twelelwe ukubuulako abantu bambi?

6, 7. Nindo tungalabilila ati kani tulukubuulishisha abantu pa mulubulo ninshi tulukutulishe’cebo iciweme ica luse lwa baLesa?

⁶ Muli cicino icalo ca bumbifi, abantu balilekele ukumfwo’bubi kani babifya. Popele, abengi tabalangulukapo ati balapengela ukulubulwa. Nangabe’fyo, abantu abengi balibwene ati ukulukucita bumbifi takulengeshapo umuntu ukuba umusangalele mu cinenene. Abantu abengi tabeshipo ifi ukubifya kuli, ifi kutukuma, na fyefyo twelelwe ukucita pakweba ati tukalubulwe ku kubifya. Kani baambaalapo na Bamboni sha BaYawe, eli abantu beshiba ifya kube’fi. Abafwaisha ukwishiba bucine balomfwa bwino ukwishiba ati pakuti pa butemwe bwa baYawe ne luse lwabo, baalitumine Umwana wabo pa calo ca panshi ati atulubule ku kubifya ne mfwa.—1 Yoane 4:9, 10.

⁷ Ukulabila pa Mwana wa baYawe uutemiwe, Paulu alilembele ati: “Muli bo [baYesu] tuli ne kulubuka pakuti pa milopa yabo, ukufitulucilwa kwa fyakubifya, koti bubile bwa luse lwabo [baYawe].” (Efesa 1:7) Umulubulo baKlistu bapeele e nshila iikulu yeyo baLesa balangishishemo ati balitutemenwe kabili ulabuulishisha ubukulu bwa luse lwa baLesa. Cakusangalasha makosa ukwishiba ati kani twalangisha ati tulicetekele mu mulambu wa baYesu, ifyakubifya fyesu fikafitulukilwa  kabili bacimanga besu bakasweshiwa. (Ebeya 9:14) Ici cebo iciweme ici twelelwe ukubuulako bambi.

8. Nindo abantu abakubulo’kuwaminina belelwe ukulamwinwa kuli baLesa?

⁸ Tulipeelwe umulimo wa kubuulako abantu ati bangaba ifibusa fya Balengeshi babo. Ili abantu tabangalangisha ati balicetekele mu mulambu wa baYesu, baLesa balababona ati bapate babo. Intangishi Yoane yalilembele ati: “Uyo ulukupemamo mu Mwana euli ne mweo uwa muyayaya; sombi uyo utaasuminino’Mwana taakabonapo umweo; sombi ubukali bwa baLesa bulukwikala pali ye.” (Yoa. 3:36) Pano, icakusangalasha ca kweba ati umulambu wa baKlistu ulilengeshe abantu ukulamwinwa kuli baLesa. Paulu alilabiile ati: “Na mwebo, mwe mwabele akale balekene nabo, bapate mu mitima yenu mu milimo ibipile, nangabe’fyo bukumo balimulamwinineni, mu mubili wa munefu wabo pakuti pa mfwa.”—AbaKolo. 1: 21, 22.

9, 10. (a) Ni wisa mulimo baKlistu bapeele abasambile babo abasufishiwe? (b) Kani ‘imbelele shimbi’ shilofwako shani abasufishiwe?

⁹ BaKlistu balipeele abasambile babo abasufishiwe umulimo woyo Paulu aitile ati “ubupyunjishi ubwa kulamwina.” Paulu alibuulishishe uyu umulimo ili alembele inkalata ku baKlistu ba kutanga abasufishiwe, ati: “Ifintu fyonse filifumine kuli baLesa, abatulamwinine nabo abene muli baKlistu, ne kutupela fwebo ubupyunjishi ubwa kulamwina; pakuti baLesa, ukupitila muli baKlistu, balukulamwina ifilengelwe ifya panshi pamo nabo abene; tabalukubapendela ifyakupulaisha fyabo; balibicile muli fwebo ishiwi lya kulamwina. Pakuti pali baKlistu lomba tuli ni nkalamba, koti kweba ati baLesa balukucenjesha abantu kuli fwebo; pakuti pali baKlistu tulukukombetela ati kamulamwinwa kuli baLesa.”—2 Koli. 5:18-20, NWT.

¹⁰ ‘Imbelele shimbi’ shilabona ati lishuko ukwakuti ukofwako abaKlistu abasufishiwe muli wuyu umulimo. (Yoa. 10:16) Balapyunga koti ni ntumi sha baYesu, kabili e balukupyungako makosa umulimo wa kusambisha abantu bucine bwa mu Baibolo ne kubofwako ukuba ifibusa fya baYawe. Iyi e nshila na imbi iicindeme iya mulimo wa kutulisha icebo iciweme ica luse lwa baLesa.

11, 12. Nindo cibelele cebo iciweme ku bantu ukwishiba ati bangatembela kuli baYawe?

¹¹ Abantu abengi balatembela ni pakuti itembelo lilabofwako ukumfwako bwino. Nangabe’fyo, tabacetekelepo mu cinenene ati baLesa balomfwa amatembelo abo. Balyelelwe ukwishiba ati baYawe ‘balomfwa ukutembela.’ Dafidi, umwimbishi wa masamo, alilembele ati: “Mwe mumfwapo ukutembela, aba munefu bonse bakesa kuli mwebo. Ifyakusendama filacila pali nebo: sombi ifyakupulaisha fyesu mukafiswesha ukufifumya.”—Amasa. 65:2, 3.

¹² BaYesu balibuulile abasambile babo ati: “Ifintu fyonse, kani mukalombe icintu mwi shina lyanji, ico nkacicita.” (Yoa. 14:14) Amashiwi akweba ati “ifintu fyonse” alukwalula ati ni fyonse lukoso ifyelelwe ne kufwaya kwa baYawe. Yoane alibuulishishe ati: “Imitima ya lupata, ituli na yo kuli bo, ni yiyi, ati, kani tulombe icintu koti kufwaya kwabo, balatumfwa.” (1 Yoa. 5: 14) Cakusangalasha kuli fwebo ukusambisha abantu ati itembelo talipo cintu icitulengesha lukoso ukumfwako bwino, sombi e nshila iiweme iya kupalamininamo “kwi tebe lya luse” ilya baYawe. (Ebeya 4:16) Kani twabasambisha ukutembela mu nshila iyelelwe, ukulomba ifyelelwe, kabili ku bangomfwa amatembelo, tungabofwako ukupalamina kuli baYawe ne kusangalashiwa mu mpindi sha makatasho.—Amasa. 4:1; 145:18.

13, 14. (a) Ni esa amashuko abasufishiwe bakalitemwesha kuntangiile? (b) Ni fisa fintu ifiweme abasufishiwe bakacitila abantunshi?

¹³ BaYawe bakapitilisha ukulangisho’luse lwabo na panuma ya konaala cino icalo icibipile. Paulu alilabiilepo pe shuko ilikulu baLesa bapeele ba 144,000 abetilwe ati bakalukwikalika na baKlistu mu Bufumu bwa kwiulu. Alilembele ati: “BaLesa ababile ne nkumbu, pakuti pa butemwe bwabo ubukulu ubo ubu batutemenwe, nangaba ati twalifwile pakuti pa kupulaisha, balitushinshimwine pamo na baKlistu (ni ku luse mwapulucile), ne kutubusha pamo nabo, ne kutwikalika pamo mu maulu muli baKlistu Yesu; ati pa mpindi ishikesa bakalanjishe ububile ubwakuti lukoso ubwa luse lwabo, ku kutuwamina kwabo ukwa muli baKlistu Yesu.”—Efesa 2:4-7.

¹⁴ Cikateshe ukwalakanya pa mashuko baYawe bakapeela abaKlistu abasufishiwe ili bakalukwikalika na baKlistu kwiulu. (Luku 22:28-30; Filip. 3:20, 21; 1 Yoa. 3:2) Kuli bo, baYawe ‘bakalangisha ububile ubwakuti lukoso ubwa luse lwabo.’ Bakaba ni “Jelusalemi wa bukumo,” uwakuupwa wa baKlistu. (Ukufisulula 3:12; 17:14; 21:2, 9, 10) Bakapyungila pamo na baYesu “ukutendulusha imikoka ya bantu,” ukutangilila abantunshi bacumfwila ku fingabalengesha ukulubulwa ku kubifya ne mfwa ne kubofwako ukuba abawaminine.—Pendeni Ukufisulula 22:2, 17.

15, 16. Kani baYawe bakalangisha shani uluse ku ‘mbelele shimbi’?

¹⁵ Pa AbaEfesa 2:7, tulapendapo ati baLesa bakalangisho’luse lwabo “pa mpindi ishikesa.” Ukwakubula ne kukanika, mu calo ca bukumo ica baYawe, tukabona “ububile ubwakuti lukoso ubwa luse lwabo.” (Luku 18:29, 30) Na cine, icintu icikulu makosa ici baYawe bakalangishishamo uluse lwabo pa calo kubuusha abafwile abali “mu Sheoli,” neli ati mu Manda. (Jobo 14:13-15; Yoa. 5:28, 29) Bonse lukoso abalalume ne banakashi abaafwile ili baKlistu tabangafwila abantunshi, kumo na baabo bonse aba bucetekelo abafwa mu nshiku sha kupelako, bakabuushiwa ne kupitilisha ukupyungila baYawe.

¹⁶ Amamilyoni abantunshi abafwile ukwakubulo’kwishiba baLesa, nabo bakabuushiwa. Yoane alilembele ati: “Nalibwene abafwile abacepele ne bacindeme, baliimakene pa menso etebe; lomba amabuku aliifunwinwepo; ne buku limbi na lyo lyaliifunwinwepo, ilyo libuku lya mweo: popele imilandu ya bafwile yalisololwelwe ku fintu ifyo ifyalembelwe mu mabuku, koti milimo yabo. Kabili icishiba calibweseshe abafwile abalimo, kabili ne mfwa na Sheoli [Imanda] fyalibweseshe abafwile abalimo; nabo imilandu yabo yalisololwelwe bonse koti milimo yabo yabo.” (Ukufisulula 20:12, 13) Muli bucine, abo abakabuushiwa bakapeelwa ishuko lya kusambilila ifya kulonda ukufunda kwa mu Baibolo ne kulangisha kani balukufwaya ukutangililwa na baYawe. Nakabili, bakelelwa  ukulonda ukufunda kwa bukumo ukukaba “mu mabuku” ukukabuulishisha ifi baYawe bakafwaya abantunshi ukulukucita pakweba ati bakekale mu calo ca bukumo.

17. Findo twelelwe ukulukwanuka ili tulukutulisha?

¹⁷ Ukufuma ne kale, umulimo tupeelwe wa kutulishe’cebo iciweme ica Bufumu. (Mako 13:10) Ukwakubula ne kukanika, uluse lwa baYawe lulabwenekela mu kutulishe’cebo iciweme. Tulyelelwe ukulukwanuke’fi ili tulukutulisha. Tulafwaisha ukulemya baYawe ili tulukutulisha. Tungacite’fi ukupitila mu kubuulako abantu ati onse lukoso amashuko tukalitemwesha mu calo ca bukumo akabako pakuti pa luse lwa baYawe.

18, 19. Tulalemya shani uluse lwa baYawe?

¹⁸ Ili tulukutulisha, tungabuulishisha abantu ati ili baKlistu bakalukwikalike’calo, abantunshi bakabwenamo makosa mu mulubulo, kabili ati mu kupita kwa mpindi bakaba abawaminine. Baibolo ilalabila ati: “Ifilengelwe ifine na fyo fikakakululwa kuli bukalume bwe boshi ne kwinjila mu bwana-bwabene ubwa buleme bwa bana ba baLesa.” (Loma 8:21) Ici cikakonshiwa ni pakuti baYawe ba luse ukwakuti.

¹⁹ Tuli ne shuko lya kubuulako abantu bonse lukoso abangomfwa uku ukulaya ukuli pa Ukufisulula 21:4, 5 ukwa kweba ati: “BaLesa bakabasumwina iminsoshi yonse ku menso abo; tapakalukuli imfwa libili, neli ni nsoni, neli kulila, neli kusomenwa konse, tau; pakuti ifintu ifya kutanga filipitilile.” Kabili baYawe, abekele pe tebe, balilabiile ati: “Bona! Ndukufilenge’fintu fyonse fya bukumo.” Nakabili, balilabiile ati: “Ulembe, pakuti amashiwi aya akucetekelwa acine!” Kani tuli aba munkonsha mu kutulishe’cebo iciweme, ninshi tulukulemya uluse lwa baYawe!