Mwe Banice—Mungalyanshika Shani Ukubatishiwa?
“Ndukutemwo’kucita koti kufwaya kwenu, mwe baLesa banji.”—AMASAMO 40:8.
INYIMBO: 51, 58
1, 2. (a) Buulishisheni umulandu ukubatishiwa takubeleelepo cintu ici tungapufya. (b) Findo ifi umuntu elelwe ukushininwa ili tangabatishiwa, kabili nindo?
KANI uli mwanice uulukufwaya ukubatishiwa? Kani efi cili, ici e cintu lukoso iciweme makosa ici ungacita. Koti ni fyenka filya twalabiilepo mu ciputusha cafumako, ukubatishiwa talipo cintu ici twelelwe ukupufya. Kulabuulishisha bambi ati mulilituulile kuli baYawe, e kweba’ti, mulilaile ati mukalukupyungila baYawe umuyayaya kabili ati ukucita ukufwaya kwabo e kucindeme makosa mu mweo wenu. Pakuti uku ukulaya kucindeme makosa, mulyelelwe ukubatishiwa lukoso kani mwakula mu mano, kani mwasalululapo mwe bene kabili ili mwaumfwisha ifi caalula ukulituula kuli baLesa.
2 Nangabe’fyo, cipale mulukumfwa koti tamungalyanshika ukubatishiwa. Neli cipale mungalukumfwa koti mulilyanshikile pano abafyashi benu balukumubuuleni ukupembelela mukakule ne kwishiba ifyakwikala mu calo. Kani findo mwelelwe ukucita? Tekumfwo’bufila yo. Sombi, pyungisheni ino impindi ukukula mu fya baLesa pakweba’ti mukelelwe ukubatishiwa bukumo. Ili mulukucite’fyo, mungafwaisha ne kuwamyako mu fintu fitatu: (1) ifi musumiinemo, neli mucetekelemo (2) ifi mucita, na (3) fyefyo mulangisha ukutoota.
IFI MUSUMIINEMO
3, 4. Findo abanice bangasambililako kuli Timote?
3 Alakanyeni pali fyefyo mungaasuka ifi ifyakwipusha: Nindo nsuminiine ati baLesa eko bali? Nindo iindengeshe ukucetekela ati Baibolo ilifumine kuli baLesa? Nindo nsalulwililepo ukumfwila amafunde abaLesa pa mupunda wa kutuntulula imibelo ya bantu ba mu calo? Ifi ifyakwipusha fingamofweniko ukulonda ukufunda kwakwe Paulu ukwa kweba’ti: “Mwishibe bwino ukufwaya kwa baLesa ukuweme ukwa mpokelelo, ukwa kuwaminina.” (AbaLoma 12:2) Mba nindo mwelelwe ukucitile’fyo?
4 Icakubwenako cakwe Timote cingamofweniko. Alishibile bwino Amalembo ni pakuti banyina na bakaapa balimusambishe ukupyungisha Amalembo. Nangabe’fyo, Paulu alibuuulile Timote ati: “Ngolukwikele mu fintu ifyo ifi wasambilile ne kushininwa ati fya cine.” (2 Timote 3:14, 15, NWT) Ishiwi lya kweba’ti ‘ukushininwa’ lilaalula “ukucetekela ifintu fimo ati fya cine.” Popele, Timote alyelelwe ukushininwa ati bucine bwali lukoso mu Malembo. Alicetekele bucine asambilile, talipo ni pakuti efi banyina na bakaapa bamubuulile, sombi ni pakuti alukwalakanyapo makosa pali fyefyo asambilile kabili alificetekele.—Pendeni AbaLoma 12:1.
5, 6. Nindo cicindamine ukusambilila ukupyungisha bwino “amano” ili muli abanice?
5 Nga mwebo? Cipale muliishi bucine pa myaka iyakuti ubwingi. Kani ifyo efi cili, mulukwalakanya makosa pa milandu iilengeshe mucetekele fyonse ifi musumiinemo. Ici cikamofweniko makosa ukukosha ukucetekela kwenu ne kusalalululapo bwino ifyakucita nangaba na fyefyo ifibusa fingamupangilisheni ukucita, fyefyo aba mu calo balanguluka, neli ifi mulukumfwa lukoso.
6 Kani mwasambilila ifyakupyungisha ‘amano enu’ ili muli abanice, mukalukukonsha ukwasuka ifyakwipusha ifingafuma ku babyenu ifili koti ni fifi: ‘Muliishi shani ati icine baLesa eko bali? Kani baLesa balitutemenwe, nindo basuminishisha ifibipile ukucitika? Kani baLesa ebalengele ifintu fyonse, ni bani abalengele baLesa?’ Kani muli ne munkonsha wa kulisambisha Baibolo, ifyakwipusha fya kube’fyo tafikamulengeshenipo ukukanika sombi fikakosha ukucetekela kwenu.
7-9. Mungakosha shani ukucetekela kwenu.
7 Ukulisambisha bwino Baibolo kukamofweniko ukwishiba ifyasuko ku fyakwipusha mukwete, ukushilisho’kukanika, ne kukosho’kucetekela kwenu. (Ifyacitilwe 17:11) Tuli ne mabuuku aakuti ubwingi aangamofweniko ukucite’fyo. Abengi balisangile ati ciweme ukulisambisha akabuuka aka The Origin of Life—Five Questions Worth Asking ne kabuuku ka Is There a Creator Who Cares About You?
8 Mulasambilila Baibolo, popele cipale muliishi kale ifyasuko ku fyakwipusha fya fisambililo fya kutanga ifya mu Baibolo. Pano, kani muliishi umulandu ifyo ifyasuko fibeelele ifya cine? Mungafwaya-fwailapo ifyebo na fimbi mu mabuuku esu ifingamofweniko ukukosha ukucetekela kwenu. Ukucite’fyo kukamofweniko ukwishiba ifyakubuulishisha ifi musumiinemo ku bantu bambi.
9 Mulyelelwe ukushininwa ati ubu e bucine. Ico cikamofweniko ukulyanshikila ukubatishiwa. Inkashi yesu iyanice yalilabile ati: “Ili nshingasalululapo ukubatishiwa, nalukusambilila Baibolo. Nakabili, nalibwene ati uku e kupempela kwa cine. Kabili akasuba ne kasuba, ubucetekelo bwangi bulakoseleko.”
IFI MUCITA
10. Nindo tungacetekela ati ifyakucita fya muKlistu uubatishiwe filyelelwe ukulangisho’kucetekala kwakwe?
10 Baibolo ilalabila ati: “Fyopele’fyo ne kucetekela, kani takukwete ifyakucita, kulifwile ukwine.” (Jakobo 2:17) Kani mulicetekele makosa muli fyefyo musumiinemo, mukalangishe’fyo ukupitila muli fyefyo mucita. Mukalukucita koti ni fyefyo Baibolo ita ati “ukwikala mu myeo iswetelele na mu kutemwa baLesa.”—Pendeni 2 Petilo 3:11.
11. Buulishisheni ifi “ukwikala mu myeo iswetelele” kwalula.
11 Kani “ukwikala mu myeo iswetelele” kulaalule’ndo? Kani ifi mucita fiswetelele ninshi ne mibelo yenu iweme kabili ilungeme. Ku cakubwenako, alakanyeni pa fimucitikiilenipo pa myenshi 6 iyapita. Ili mwaeshiwe ukucita ifibipile, kani mwalyalakenyepo makosa ne kulekanya ifilungeme ne fibipile? (AbaEbeya 5:14) Kani mulukwanukako impindi ili mwakeene ukweshiwa? Ili muli ku sukuulu, kani muli cakubwenako iciweme kuli bambi? Kani mulapitilisha ukuba aba bucine kuli baYawe neli mulatatiko’kucita ifi ababyenu balukucita pakweba’ti belukumucoboleni? (1 Petilo 4:3, 4) Ukuba, takulipo umuntunshi umuwaminine. Shimbi impindi, na baabo abapyungile baYawe pa myaka iyakuti ubwingi balomfwe’nsoni kabili cilabakatasha ukutulisha kuli bambi. Pano uulituulile kuli baLesa akalukusangalalila mukuba Imboni ya BaYawe, kabili alalangishe’fyo ukupitila mu kulukuli ne mekalilo aswetelele.
12. Ni fisa fintu ifisankenemo mu ‘mekalilo akutemwa baLesa,’ kabili mulyelelwe ukufibona shani?
12 Kani ‘amekalilo akutemwa baLesa’ alaalule’ndo? Ici cilisankenemo ifi mucita mwi kelesha, ifili koti kubungana ne kutulisha. Pano cilisankenemo ne fintu ifi bambi tababonapo, ifili koti kulisambisha ne kutembela kuli baYawe ili muli mwenka. Umuntu uulituulile kuli baYawe takalukubonapo ati ukucite’fi fyonse cipinto. Akalukumfwa koti ni fifilya ifyalukumfwa Imfumu Dafidi, iyalabiile ati: “Ndukutemwo’kucita koti kufwaya kwenu, mwe baLesa banji, icine ifunde lyenu lili mu mutima wanji.”—Amasamo 40:8.
13, 14. Findo fingamofweniko ukucita ifili ‘mu mekalilo akutemwa baLesa,’ kabili kani abanice bambi balibwenenemo shani mu kucite’fyo?
13 Pa kumofweniko ukwishiba umu mwelelwe ukuwamyako, kuli ifyakwipusha ifi mungalangulukapo kabili mungalemba ne fyasuko ku fyakwipusha ifili koti ni fifi: “Kani ulashinkamika pa kutembela, kabili kani amatembelo obe alalangisha ati ulitemwe baYawe?” “Findo fimbi ulisambisha?” “Kani ulaya mu kutulisha nangaba’ti abafyashi bobe tabayapo?” [1] (Boneni tumashiwi twa pa mpelo.) Lembeni ifyasuko kuli fifi ifyakwipusha. Ukucite’fi kukamofweniko ukuwamyako amatembelo enu, ukulisambisha kwenu, ne kutulisha kwenu.
14 Abanice abengi abalanguluka pa kubatishiwa balibwenenemo mu kulemba ifi bafwaya ukukonsha ukucita. Tilda, nkashi umwanice alibuulishishe ati alukulemba ifi alukufwaya ukukonsha ukucita, pakuti pali fyefyo alukukonsha ifi aanshikile ukucita panini kabili ili papitile lukoso umwaka umo alilyanshikile ukubatishiwa. Fyopele’fyo efyacitile na Patrick, umukwabesu umwanice. Alilabiile ati, “Nalishibile ifi nalukufwayo’kucita kuntangiile, pano ukufilemba kwalindengeshe ukufwaisha makosa ukukonsha ukucite’fyo.”
Kani mukalukupyungila baYawe nangaba’ti abafyashi benu baleka? (Boneni palakalafu 15)
15. Buulishisheni umulandu umuntu elelwe ukulisalulwilapo umwine ukubatishiwa.
15 Icakwipusha cimo icicindeme ni cici: “Kani ungapitilisho’kupyungila baYawe nangaba’ti abafyashi bobe neli ababyobe baleka?” Kani mwalituula kuli baYawe ne kubatishiwa, ninshi muli na bucibusa bwa pa lwenu na baYawe. Popele, ifi mwasalululapo ukucitila baYawe tafyelelwepo ukweyamina pa bafyashi benu neli abantu bambi. Ukwikala ne myeo iswetelele ne mekalilo akutemwa baLesa kukalukulangisha ati mulicetekele makosa ati mulisangene bucine kabili mulafwaisho’kulonda amafunde abaLesa. Bukumo mukaba abelelwe ukubatishiwa.
UKULANGISHA UKUTOOTA
16, 17. (a) Cindo icelelwe ukulengesho’muntu ukusalululapo ukuba umuKlistu? (b) Labileni icakupalanya icilukubuulishisha ifi tungalangisha ati tulatoota pa mulubulo.
16 Kambi kasuba, umuntu uwaishi bwino Amafunde akwe Mose alipwishe baYesu ati: “Mba lise’funde lya kucila ubukulu pa mafunde onse?” BaYesu balimwasukile ati: “Ulukutemwa baShikulu Lesa wobe, ne mutima wobe wonse, ne mupashi wobe wonse, ne mano obe onse.” (Matayo 22:35-37) BaYesu balibuulishishe ati ukutemwa baYawe ekwelelwe ukulengesho’muntu ukubatishiwa ne kuba umuKlistu. Inshila imo iiweme yeyo mungakushishamo ukutemwa baYawe kwalakanya pa mulubulo, impese iikulu makosa yeyo baLesa bapeele abantunshi. (Pendeni 2 AbaKolinto 5:14, 15; 1 Yoane 4:9, 19.) Ili mwacite’fyo, mukalukufwaisho’kulangisha ati mulatoota pali yiyi impese iyakuti ubune.
17 Ukulangisho’kutoota tungakubuulishisha muli yiyi inshila: Alakanyeni ati mulukwibila mu menda eli umuntu umbi amupulusheni. Kani mungasalululapo ukuya lukoso ku ng’anda ne kulubako kuli fyefyo ulya muntu acimucitileni? Koku mwane! Lyonse mukalukutoota pali fyefyo ulya muntu amupulwisheni! Mu nshila intu imo, tulyelelwe ukulukutoota baYawe na baYesu pakuti pa mulubulo. Tuli ne mweo pakuti pali bo! Balitupulwishe ku kubifya ne mfwa. Pakuti pali fyefyo batutemenwe, tulikwete ubucetekelo bwa kwikala umuyayaya muli Paladaiso pa calo!
18, 19. (a) Mba nindo tekuti mutiininepo ukulituula kuli baYawe? (b) Kani ukupyungila baYawe kungalengesha shani amekalilo enu ukulukuwaminako?
18 Kani mulatoota pali fyefyo baYawe bamucitileni? Kani mulatoota, ninshi mulyelelwe ukulituula ne kubatishiwa. Ukulituula kwenu kuli baLesa kukaalula ati mwalaya ukulukucito’kufwaya kwabo umuyayaya. Kani mulyelelwe ukutiina ukulaya ukucite’fyo? Koku mwane! BaYawe balafwaya ifingamuwamineni, kabili bakashukisha bonse abacito’kufwaya Kwabo. (AbaEbeya 11:6) Ili mwalituula kuli baLesa ne kubatishiwa, amekalilo enu takalukubipilako, sombi akalukuwaminako lukoso! Umukwabesu uli ne myaka 24 kabili uwabatishiwe ili tangacila imyaka 12 alilabiile ati, “Cipale nga nalukumfwisha ifintu ili nali umukulu, pano ukusalululapo ukubatishiwa ili nali umwanice kulingofweleko makosa ukupitila mu kubulo’kucita ifya mu calo.”
19 BaYawe balafwaya ifingamuwamineni makosa. Mukupusanako, Satana wakulitemwa kabili tafwayapo ne fiweme ukumucitikileni. Kani mwamulonda, tapalipo ifiweme ifi angamupeeleni. Angamupeeleni shani ifiweme ifi takwetepo? Takwetepo icebo iciweme, kabili takwetepo ubucetekelo bwa kuntangiile. Angalengesha lukoso ifibipiile ukumucitikileni kuntangiile, ni pakuti efikamucitikila ye!—Ukufisulula 20:10.
20. Findo ifi umuntu angacita pa kwelelwa ukulituula ne kubatishiwa? (Boneni akabokoshi akali ne mutwi wa kweba’ti “Ifingamofweniko Ukulyanshika.”)
20 Ukulituula kuli baYawe e cintu lukoso iciweme ici mungacita mu mweo wenu onse. Kani mwalyanshika ukucite’fyo? Kani mwalyanshika, tekutiina ukulituula kuli baYawe. Pano kani tamungalyanshika, pyungisheni ifyebo ifili muli cicino iciputusha ukumofweniko ukupitilisha ukulukukula mu fya baLesa. (AbaFilipoi 3:16) Kani mwalonda uku ukufunda, bukumo lukoso mukafwaisho’kulituula kuli baYawe ne kubatishiwa.
