1, 2. (a) Ni bwisa bukatasho abafyashi bakwata, kabili bangabushilisha shani? (b) Ni fisa fintu fine ifi twakwambaalapo?

ABOPEENE ku France baalilabiile ati, “Tulicetekele muli baYawe, pano ico tacaalulapo ati abana besu nabo bakacetekela muli baYawe. Ukucetekela tatufyalwapo nako. Abana besu balaya ili bakukwata panini panini.” Umukwabesu ku Australia aalilembele ati: “Cikateshe makosa ukukosha ukucetekela mu mutima wa mwana. Mulyelelwe ukupyungisha. Mungabuulishisha bwino icasuko ku cakwipusha ca mwana wenu, ica kweba’ti aumfwisha. Pano ili pakapite’mpindi, akepusha ica kwipusha cintu cimo! Ifi mungaasuka umwana wenu lelo, tafikabapo ifikumanine kuli ye mailo. Kanshi cingawama ukulukulabila pa malyashi antu amo imiku iingi.”

² Mwe bafyashi, kani mulomfwapo shimbi impindi ati tekuti mukonshepo ukusambisha ne kofwako abana benu ukuba ne bucetekelo? Muli bucine, fwe bene fwenka tekuti tukonshepo! (Jele. 10:23) Pano kani twaeyamina pali baLesa bakatofwako ukukonsha. Boneni ifintu fine ifi mungacita pa kofwako abana benu ukukosha ukucetekela kwabo: (1) Ishibeni bwino abana benu. (2) Mulukubasambisha ukufuma panshi ya mutima wenu.  (3) Mulukupyungisha ifya kupalanya ifiweme. (4) Mulukuli abatekeenye kabili mulukutembela.

3. Kani abafyashi bangatuntulula shani icakubwenako ca baYesu ili balukusambisha?

³ BaYesu tabalukutiinapo ukwipusha ifi abasambile babo basumiinemo. (Mat. 16:13-15) Tuntululeni icakubwenako ca baYesu. Pa mpindi ya kutuusha, mungeta abana benu ukumubuuleniko ifili mu mutima wabo. Mungambaala na pa fibabombomanika. Umukwabesu ku Australia, uuli ne myaka 15 aalilembele ati: “Impindi ishingi, tulambaala na batata pa kucetekela kwanji kabili balangofwako ukulukwalakanya. Balanjipusha ati: ‘Findo Baibolo ilabila?’ ‘Ulicetekele ifi ilabila?’ ‘Nindo ucetekele ifi ilabila?’ Balafwaya ndukwasuka mu mashiwi anji kabili ukubulo’kubweleshapo ifi bo neli bamama bacilabila. Ili nalukukulilako, nalukuya ili ngwamyako ifyasuko fyanji.”

4. Nindo cicindamiine ukubikako makosa akalango ku fyakwipusha fya mwana? Labileni pa cakubwenako.

⁴ Kani umwana tacetekele ifi alukusambilila, mwilukukalipa bwangu neli ukwasuka koti kulipokolola. Mu mutima-nteeka mofweniko ukumfwisha. Umufyashi umo umwalalume alilabiile ati, “Mulukubikako akalango ku fyakwipusha fya mwana wenu. Mwilukufibona koti taficindemepo makosa, kabili tekweshapo ukubulo’kulabila pali fyefyo umwana amwipusheni pakuti filukumulengesheni insoni.” Na cine, ifyakwipusha fya mwana wenu filyelelwe ukumofweniko ukubona ati alukufwaya ukumfwisha. Na baYesu ili baali ne myaka 12 baalukwipusha ifyakwipusha ificindeme. (Pendeni Luku 2:46.) Umusankwa ku Denmark uuli ne myaka 15 alanuka ati: “Ili nalabiile ati ndakanika kani kulipo ukupempela kwa cine, abafyashi banji baalinteekanishishe, nangaba ati balibombomene pali fyefyo nalabiile. Balyasukile fyonse ifyakwipusha fyanji ukupyungisha Baibolo.”

5. Findo abafyashi bangacita pa kofwako abana babo ukukwata ukucetekela?

⁵ Ishibeni bwino abana benu, ifi balanguluka, ifi bomfwa, ne fibabombomanika. Tamwelelwepo ukulanguka ati balikwete ukucetekela pakuti mulaya nabo mu kubungana na mu kutulisha. Ili mulukupyunga imilimo ya lyonse, mulukulabilako na pa fya baLesa. Mulukutembela pamo nabo kabili mulukubatembelelako. Esheni ukwishiba ifinganasha ukucetekela kwabo, ne kubofwako ukwishiba ifi bangacita.

6. Kani ukulisambisha bucine bwa mu Baibolo kungofwako shani abafyashi ukulukusambisha bwino?

⁶ BaYesu baalukufika aba baalukusambisha pa mutima ni pakuti baalitemenwe baYawe, Amashiwi abaLesa, ne bantu. (Luku 24:32; Yoa. 7:46) Ukutemwa kwa kube’fyo kungofwako abafyashi ukufika abana babo pa mutima. (Pendeni Ndutelonomi 6:5-8; Luku 6:45.) Popele, mwe bafyashi, mulukulisambisha Baibolo ne mabuuku esu. Fwaisheni ukusambilila pa bulengeshi eli na pa fyebo ifili mu mabuuku esu aalabila pa bulengeshi. (Mat. 6:26, 28) Kani mwacite’fyo mukeshibe’fingi, mukabatemenwako baYawe, kabili mukaba abalyanshikile ukusambisha abana benu.—Luku 6:40.

7, 8. Findo fikafumamo kani bucine bwa mu Baibolo bwafika pa mutima wa bafyashi? Labileni pa cakubwenako.

⁷ Ili bucine bwa mu Baibolo bwafika pa mutima wenu, mukafwaisha ukubuulako icisoolo cenu. Mungacite’fyo impindi iili yonse, talipo ni lyelyo lukoso mulukwanshikilo’kubungana neli pa mapempelo acisoolo. Na muli fyefyo, ukwambaala takwelelwepo ukuba kwa kupangilisha, pano kulyelelwe ukucitwa mu kulitemenwa, koti ni fyenka filya mulabila inshiku  shonse. Abopeene ku United States balalabila pali baYawe ili aba mu cisoolo balukulitemwesha ukutamba ifilengelwe neli ili balukulya ifyakulya fimo. Balilabiile ati, “Tulanushako abana besu pa butemwe bwa baYawe ne mano ifibwenekela muli fyonse ifi batupeele.” Ili balukupyungila mu kalateni ne bana babo abanakashi babili, abopeene ku South Africa balalabila pali fyefyo cikankamika ukubona ifi imbuto shimena ne kukula. Balilabiile ati, “Tulesha ukofwako abana besu ukucindika makosa umweo na fyefyo ulengelwe mu nshila ya kukankamika.”

⁸ Umufyashi umo umwalalume ku Australia aliile mu kufakasha ne mwana wakwe umwalalume uwali ne myaka 10, uku balamine ifintu ifipusenepusene, kumo ne fya kale, pakweba’ti ofweko umwana wakwe ukukosha ukucetekela kwakwe muli baLesa na mu bulengeshi. Alilabiile ati, “Twalibwene ifilengelwe fya mu menda ifili koti ni bakofwa, bafulwe eli ne fili koti tulongolo. Twalikankamene ukubone’fi ishi inama shalukuboneka bwino ne kulengwa mu nshila ishipusenepusene koti ni fyopele’fi tubona na muli shishino inshiku. Pano kani ifya mweo fyalisangukiile lukoso mu fibyakwe, nindo ne filengelwe fya kale fyabelele ifya kukankamika? Nalisambilileko isambililo iliweme ili nabuulileko ne mwana wanji.”

9. Nindo ifyakupalanya fipyungila bwino, kabili umufyashi umo alilangishe shani ifyo?

⁹ BaYesu baalukupyungisha ifyakupalanya ifyalengeshe abantu ukwalakanya, ifyakubafika pa mutima, kabili ifipubile ukwanuka. (Mat. 13:34, 35) Abana balalakanya makosa. Popele, mwe bafyashi, mulukupyungisha makosa ifyakupalanya mu kusambisha kwenu. Umufyashi umo umwanakashi ku Japan efi acitile. Ili abana bakwe abalalume babili baali ne myaka 8 na 10, alibasambishe pali fyefyo icalo cilengelwe na fyefyo baYawe baabikileko makosa akalango pa kucilenga. Pa kucite’fyo, alibapeele amandili, insukale, na kofi. Eli abuulile umwana wakwe umo umo ukumupangilako kofi. Alilabiile ati, “Baalibikileko makosa akalango pa kupanga kofi. Ili nabepwishe umulandu baabikiileko makosa akalango, baalilabiile ati balukufwaya kofi ukumfwika fyenka filya ntemenwe. Nalibabuulile ati ili baYawe baalukulenga icalo, baalibikileko makosa akalango pa kupanga kabesha pakweba’ti tulukulitemwesha ukwikala mu calo.” Cilya icakupalanya calyelelwe ne myaka yabo, kabili calibofweleko ukumfwisha. Ukwakubula ne kukanika, tabaalubilemo ifi basambilile!

10, 11. (a) Ni fisa fyakupalanya mungapyungisha pa kofwako umwana wenu ukucetekela makosa muli baYawe? (Boneni icikope pe buula 27.) (b) Ni fisa fyakupalanya mubwene ati filapyunga bwino?

¹⁰ Mungapyungisha ibuuku umuli inshila sha kulonda pa kwipika fimo ili mulukofwako umwana wenu ukukosha ukucetekela kwakwe muli baLesa. Mungacita shani ifyo? Panuma ya kupanga cipale keke, buulishisheni umulandu cicindamine ukulonda ifibuulishishiwe  pa kupanga keke. Eli pano, mupeeleni icisepo, cipale iapele, ne kumwipusha ati: “Kani ulishi ati kuli ifi balukulonda pa kulenga iapele ili?” Liputulenimo, ne kumupeela uluseke. Mungambaala ati ifi balukulonda “fyalilembelwe” mu luseke pano mu nshila iicilile pali fyefyo ibuuku umuli ifya kulonda pa kwipika lilembelwe. Mungepusha ati: “Kani kuli uwalembele ifyakulonda pa kupanga keke, ngo walembele ifyakulonda pa kulenga iapele ni nani?” Kani umwana mukulu, mungabuulishisha ati ifi balondele pa kulenga iapele na pakweba’ti iciti conse cikule fyali muli DNA. Mungambaalako ne fikope pa mabuula 10 ukufika ku 20 muli bloshuwa ya The Origin of Life—Five Questions Worth Asking.

¹¹ Abafyashi abengi balalitemwesha ukwambaala ne bana babo iciputusha ca muli Loleni! icilabila ati “Ifilangilila Ukuti Kwaliba Kabumba.” Neli balapyungisha ici iciputusha pa kusambisha abana babo abanini ifyebo ifipubile. Ku cakubwenako, abopeene ku Denmark balipalenye indeke ku fyuni. Kabalabila ati, “Indeke shilaboneka lukoso koti fyuni. Pano, kani indeke shingafyala amandanda eli atootoka ne kufumamo utudeke? Kani ifyuni filapengela icibansa apa kuselukila? Kani mungapalanya ukulila kwa ndeke ku kwimba kwa cuni? Mungalabila ati ni bani abakwatiishe amano, abapangile indeke neli Abalengeshi ba fyuni?” Ifyasuko ne fyakwipusha fya kube’fyo fingofwako umwana ukuba ‘umucenjele’ ne kucetekela makosa muli baLesa.—Ifisi. 2:10-12.

12. Kani ifyakupalanya fingofwako shani abana ukucetekela makosa muli Baibolo?

¹² Ifyakupalanya ifiweme fingakosha ukucetekela kwa mwana muli Baibolo. Ku cakubwenako, langulukeni pali Jobo 26:7. (Pendeni.) Mungalangisha shani ati amashiwi pali lili ilembo alifumine kuli baLesa? Pa mupunda wa kumubuulishisha lukoso bucine umwana wenu, mulengesheni ukulukwalakanya makosa. Buulishisheni ati ili Jobo aali pa calo, takwalipo ama telesikopu ne tudeke utu abantu bendelamo. Mungamubuula ukulangisha ifi bambi bangakatashiwa ukusumina ati icintu icikulu, icili koti calo, cilikobekelwe ukuntu kwa lukoso. Angabuulishisha ati ifintu ifili koti ni bola neli ibwe filyelelwe ukweyaminapo kumo. Ukusambisha kwa kube’fyo kungofwako umwana wenu ukwishiba ati ili abantunshi baishibile bucine pa lwa calo ninshi baYawe kale baalembele mu Baibolo.—Neya. 9:6.

13, 14. Kani abafyashi bangasambisha shani abana babo ukubona ifi ukufunda kwa mu Baibolo kutofwako?

¹³ Cicindeme ukusambisha abana benu ifi ukufunda kwa mu Baibolo kutofwako. (Pendeni Amasamo 1:1-3.) Kuli inshila ishingi mungabasambishishamo. Ku cakubwenako, mungabuula abana benu ukwalakanya ati balukukuukila pa nsumbu imo kabili balyelelwe ukusalulula abantu aba bakaya mu kwikala nabo palya. Eli mungepusha ati, “Ni isa mibelo ingelelwa ku muntu umo umo ukukwata pakweba’ti bakekale pamo mu mutende?” Mungambaala na pa kufunda ukuweme ukuli pa AbaGalatya 5:19-23.

¹⁴ Kani mwacite’fyo mungasambisha abana benu ifintu fibili. Ica kutanga, Amafunde abaLesa alofwako abantu ukuba aba mutende kabili abekatene. Ica bubili, baYawe balatusambisha buno bukumo pakweba’ti twishibe ifi tukekala mu calo ca bukumo. (Yisa. 54:13; Yoa. 17:3) Pa kubofwako ukulukwanuka ifi ifyebo, mungabalangishako ifyakubwenako ifili mu mabuuku esu. Mungapyungisha iciputusha ca kweba’ti “Baibolo Ilaalula Abantu,” icisangwa mu Akatambo ka Wakulama. Neli kani kulipo umo mwi kelesha muli, uwalwileko amekalilo  akwe pakweba’ti alukucite’fisangalasha baYawe, mungamwita ku ng’anda kwenu ati amubuuleniko ifi acitile. Ifyakubwenako fya kube’fyo filofwako ukubona ati ukufunda kwa mu Baibolo kulapyunga!—Ebeya 4:12.

15. Findo mwelelwe ukubikako makosa akalango ili mulukusambisha abana benu?

¹⁵ Icebo icikulu ni cici: Ili mulukusambisha abana benu, balengesheni ukulitemwesha ukusambilila. Mulukwalakanya makosa. Bofweniko ukulukwalakanya ukwelelwa ne myaka yabo. Basambisheni ifingabofwako ukukosha ukucetekela kwabo. Umufyashi umo umwalalume alilabiile ati, “Lyonse mulukufwaya-fwaya inshila sha bukumo isha kubuulishishamo ifyebo.”

16. Nindo ukuteekanya kucindamiine pa kusambisha abana? Labileni pa cakubwenako.

¹⁶ Umupashi wa baLesa ulapengelwa pa kukosha ukucetekela. (Galatya 5:22, 23) Palapite’mpindi pa kuba ne kucetekela ukukosele, koti ni fyenka filya icisepo cikokola ukukula. Popele mulyelelwe ukuba abatekeenye kabili aba munkonsha ili mulukusambisha abana benu. Umufyashi umo umwalalume uuli ne bana babili ku Japan aalilabiile ati, “Abakashi banji na nebo twalibikileko makosa akalango ku bana besu. Ukufuma lukoso ili baali abanice, nalukubasambisha inshiku shonse pa mamineti 15, ukufumyako lukoso inshiku ishi twalukubunganamo. Amamineti 15 alyelelwe kuli bo na kuli fwebo.” Umupyungishi wa luteta aalilembele ati: “Ili nali umwanice, nali ne fyakwipusha ifingi pano nshalukwipushapo makosa. Mu kupita kwa mpindi, nalisangile ifyasuko ukupitila mu kubungana, pa mapempelo acisoolo neli pa kulisambisha. E mulandu cicindamine ku bafyashi ukulukusambisha lyonse.”

17. Nindo icakubwenako ca bafyashi iciweme cicindamiine, kabili aboopene bamo balibeele shani cakubwenako iciweme ku bana babo?

¹⁷ Icintu icicindeme makosa, ni fyefyo mwebo muli aba bucetekelo. Abana benu bakabona ifi mucita, kabili efi bakalukucita nabo. Popele, mwe bafyashi, pitilisheni ukukosha ukucetekela kwenu. Lekeni balibwene ati baYawe ba cinenene kuli mwebo. Ili abopeene ku Bermuda baba ababombomene, balatembela pamo ne bana babo ati baYawe balukubatangilila, kabili balakoselesha abana babo ukutembela pa lwabo. Balilabiile ati, “Kabili tulabuula umwana wesu moye ati, ‘Ulukucetekela makosa muli baYawe, ulukupyungisha mu milimo ya Bufumu, ne kubulo’kubamba makosa.’ Ili abona ififumamo, aleshiba ati baYawe balukutofwako. Ukucetekela kwakwe muli baLesa na muli Baibolo kulikoseleko.”

18. Cindo icicindeme ici abafyashi belelwe ukwishiba?

¹⁸ Mu kupelako, abana balyelelwe ukuba ne kucetekela abene benka. Mwe bafyashi, mungabyala ne kutapilila. Ni baLesa lukoso e bamesha. (1 Koli. 3:6) Popele, lombeni umupashi wa baYawe, kabili kani mwapyungisha ukusambisha abana benu, baYawe bakamushukisheni.—Efesa 6:4.