Kani munganukako impindi ili mwaponene ninshi muli banice? Cipale mwali ne cilonda pa kuboko neli pe kufi. Kani munganuka ifi banyinenwe bamusangalesheni? Cipale baliwemye pa cilonda ne ku kakapo bwino. Mwalililile, pano amashiwi abo aaweme na fyefyo bamufukatiileni fyalimulengesheni ukumfwako bwino. Pali yeyo impindi, aba kumusangalasheni baali lukoso apepi.

Pano ifintu filaaluka kani twakula. Amakatasho alaya ili akulilako, kabili takubapo aba kutusangalasha. Amakatasho ao abakulu bapitamo, taashilapo koti ni fyefyo ukusoomenwa kwa mwana kungashila ukupitila mu kumukaka pa cilonda ne kumufukatila kuli banyina. Langulukeni pa fyakubwenako fimo fimo.

• Mulingomfwepo ifi cumfwanika kani incito yashila? Ba Julian baalilabiile ati ili babatamfishe incito, baalikalipile kabili baalibombomene. Balukulanguluka ati, ‘Kani nkalukulama shani icisoolo canji? Cindo calengesha kampani ukumbona uwa lukoso panuma ya kupyungisha pa myaka iingi?’

• Cipale mulibombomene pakuti icupo cenu calishilile. Ba Raquel baalibuulishishe ati, “Ili abalume banji banshile imyenshi 18 kunuma, nalibombomene ukwakuti. Cali koti umutima wanji waabanika pabili. Talipo mutima wanji lukoso, pano ne mubili walukusoomena. Nali ne mwenso.”

• Cipale mulilwele ubulwashi ubukateshe ubulukuboneka koti tekuti bupolepo. Kungaba impindi ili mungomfwa koti ni fyefyo Jobo aumfwile, uwalabiile ati: “Ndukukanamina umweo wanji; nshilukufwaya ukwikalilila ne mweo.” (Jobo 7:16) Cipale na mwebo mungomfwa koti ni fyefyo ba Luis abacilile imyaka 80 baumfwile. Balilabiile ati, “Shimbi impindi ndomfwa koti ndukupembelela lukoso ukufwa.”

• Neli cipale mulukufwaya ukusangalashiwa ni pakuti umukwabenu alifwile. Ba Robert baalibuulishishe ati, “Ili umwana wanji umwalalume afwile ili indeke yaponene, pa kutanga nshasumiinepo, eli panuma naumfwile ukusoomenwa, ukusoomenwa uku Baibolo ipalanya kuli fyefyo umuntu angomfwa kani bamulasa impoko.”​—⁠Luku 2:⁠35.

Ba Robert, ba Luis, ba Raquel, na ba Julian baalisangalashiwe, nangaba’ti baalipitile muli aya amakatasho aakulu. Baalisangalashiwe ku Muntu uungapeela lukoso ukusangalasha ukwelelwe—BaLesa ba Makosa onse. Kani baLesa balasangalasha shani abantu? Kani na mwebo bangamusangalasheni