Ifyasuko ku Fyakwipusha fya mu Baibolo
Kani ubu e bwikashi bwenka ubuliko?
kani shimbi impindi mulalanguluka ati abantu balekala lukoso imyaka iinini?
Kani mulingalangulukepo ati kuliko fimbi ifiliko mu bwikashi ukucila pa kwangala, ukupyunga, ukuupa neli ukuupwa, ukukwate’cisoolo, ne kucekula? (Jobo 14:1, 2) Baibolo ilabuulishisha ati ne ba mano balilangulukilepo pa fya kube’fyo.—Pendeni Uwakutulisya 2:11.
Kani kuliko umulandu tubelele pa calo? Tulyelelwe ukutango’kwishiba icasuko kuli cici icakwipusha, Kani umweo walitatikile shani? Panuma ya kwalakanya makosa pali fyefyo tompwe ne filewa fimbi ifya mubili wesu filengelwe, abengi balisumiine ati mu cinenene Abalengeshi eko bali. (Pendeni Amasamo 139:14.) Popele, kuli umulandu baLesa baatulengeele. Ukwishiba uyo umulandu kucindeme makosa kuli fwebo.
Mba nindo baLesa balengeele abantunshi?
BaLesa balishukishe abantunshi babili aba kutanga ne kubapeelo’mulimo uweme. Baalukufwaya ati bakakumane mu calo, ukulenge’calo conse ukuba paladaiso, ne kwikala umuyayaya.—Pendeni Ifyakutanga 1:28, 31.
Ifi baLesa baalukufwaya tafyacitikilepo ni pakuti abantunshi baalifutukiile ubwikalikishi bwabo. Pano baLesa tabakeenepo abantunshi ne kwalulo’kufwaya kwabo. Baibolo ilabuulishisha ati baLesa balafwaya ukupulusha abantu ba bucetekelo kabili ati balafwaya ukukonsha fyonse lukoso ifi baalukufwaya pa kutanga! BaLesa balafwaya mwebo ukulukwikala koti ni fyefyo baalukufwaya! (Pendeni Amasamo 37:29.) Sambilileni mu Baibolo pali fyefyo mungabwenamo mu fintu ifi baLesa bafwayo’kucita.