Tulafumya pi Indalama Tupyungisha?
Imyaka yonse, tulapulinta ne kupeela abantu amaBaibolo ne mabuuku aalabilapo pali Baibolo aakuti ubwingi. Mu calo conse, tulebaka amaofeshi amitano ne mwakupulintila amabuuku. Kabili tulatangilila ne milimo iicitwa muli yeyo imipunda. Amakelesha ukucila pali 110,000 alabunganina mu mipunda iiweme iitwa ati Imilenda ya Bufumu. Ni kwisa tufumya indalama tupyungisha ku milimo yonse iyi?
Imilimo yesu ilofweleshiwako ne ndalama ishipeelwa mu kulitemenwa. (2 AbaKolinto 9:7) Makashini ya mu 1879 yalilabiile ati: “Tulicetekele ati BAYAWE e bofwako makashini ya ‘Zion’s Watch Tower’ [efi ino makashini yalukwitwa akale], na muli fyefyo, tatukalombaishapo indalama neli ukukombetela abantu ati batupeeleko indalama.” Fyopele’fyo efi tulonda na bubuno bukumo.
Ifya mpese filatumwa ku maofeshi amitano neli filabiikwa mu tubokoshi utuli mu Milenda ya Bufumu. Pano, tatulombapo ifya pe kumi, ukupishamo imbale ati abantu babiikepo indalama, neli ukulipilisha abantu pa milimo tupyunga neli pa mabuuku tubapeela. Tatulipilwapo pa mulimo wesu uwa kutulisha, ukusambisha mwi kelesha, neli kani twaofweleshako ukwibaka imipunda ya kupempelelapo. Nacine, efi na baYesu balabiile, ati: “Mwalukupoka lukoso, kamulukupela lukoso.” (Matayo 10:8) Bonse lukoso abapyungila pa maofeshi amitano na pa maofeshi esu aakulu, ukubikako ne ba mwi Bumba Ilitangilila Ilya Bamboni sha BaYawe, balapyunga ukwa kubulo’kubalipila.
“Indalama shesho Bamboni sha BaYawe bapyungisha ni shesho abantu bapeela mu kulitemenwa, koti ni fyefyo bapyunga imilimo yabo yonse. Umo umo alalisalulwilapo umwine ubukulu bwa ‘fya mpese’ ifi akalukupeela ne miku akalukupeela.”—European Court of Human Rights, 2011
Ifya mpese ifi tupokelela filapyungishiwa na mu kofwako abali mu kukatashiwa. AbaKlistu ba kutanga baalitemenwe ukupeelako bambi abaali mu kukatashiwa. (AbaLoma 15:26) Na fwebo tulofweleshako abaponenwa ne makatasho pa kubebakila amang’anda abo ne mipunda ya kupempelelapo ne kubapeelako ifyakulya, ifyakufwala, ne miyanda.
