UMUTWI WA INO MAKASHINI
Kani Bamboni sha BaYawe ni Bani?
“Mike nalimwishi pa myaka iingi. Ni Mboni ya BaYawe. Pano ukupempela kwakwe kwalukunshimanganya akalango. Kani baYawe ni bani? Mba nindo Bamboni tabasefeshapo amaolide? Kani uku Mike aya ni ku kebumba ka mapempelo?”—Ba Becky aba ku California, U.S.A.
“Ili abalukwikala apepi na nebo batatikile ukusambilila Baibolo na Bamboni sha BaYawe, nalitatikile ukulipusha ati: ‘Kani ishina lya kweba ati Bamboni sha BaYawe lilaalule’ndo? Nshingofwapo ukupempela ukuli ne shina lya kube’fyo!’”—Ba Zenon aba ku Ontario, Canada.
“Nebo ne bakashi banji twalukulanguluka ati ici Bamboni sha BaYawe batufakashishe kutulengesha ukulyumfwa aba mulandu pakuti tatwalukuyapo ku calici. Nakabili twalilangulukile ati kani ku calici ilikulu uku twalukupempela takwalipo ifi twalukupengela, ninshi ku kebumba akanini akali koti ni Bamboni sha BaYawe, tekuti tusanganeko ifi twalukupengela.”—Ba Kent aba ku Washington, U.S.A.
“Ukulabila lukoso bucine, nshinaishipo ifili fyonse pali bo na fyefyo basumiinemo.”—Ba Cecilie aba ku Esbjerg, Denmark.
Cipale na mwebo mulibabwenepo balukutulisha ku mang’anda onse neli pa mipunda imbi, balukupeela amabuuku alabila pali Baibolo, ne kusambisha abantu Baibolo apa kubulo’kubalipilisha. Cipale e bamupeeleni na ino makashini mulukupenda. Nangabe’fyo, mungafwayo’kwishiba bwino Bamboni sha BaYawe. Cipale mulalanguluka koti ni fyefyo abalabilwapo peulu baalukulanguluka.
Kani na mwebo efi mulanguluka, ni bani abangamubuulishisheni ifya cine? Kani mungeshiba shani ifi Bamboni sha BaYawe basumiinemo, uku bafumya indalama bapyungisha mu milimo yabo ne kwibakila imipunda bapempelapo, ne mulandu beshila pa mang’anda penu ne kutulisha kuli mwebo ponse lukoso apa bamusanganeni?
Ba Cecilie, abalabilwapo pa kutanga, balilabiile ati: “Nalipendele ifyebo ifingi pali Bamboni sha BaYawe pa Intaneti. Nalukumfwa ifilekenelekene pali bo ne fyebo ifibipile. Pakuti pali fyefyo, nalitatikile ukulanguluka ifibipile pali Bamboni sha BaYawe.” Nangabe’fyo, mu kupita kwa mpindi, ba Cecilie balipwishe Bamboni sha BaYawe abene, kabili balibabuulishishe bucine.
Kani na mwebo mungatemwa ukwishiba ifyasuko ku fyakwipusha mukwete pali Bamboni sha BaYawe? Twamukombeteleni ukwipusha Bamboni sha BaYawe abene, abalembele ino makashini, pakweba ati mukasangane bucine. (Ifisimpi 14:15) Twacetekela ati ifyebo ifili pa mabuula aakonkapo fyakumofweniko ukutwishiba bwino, ukwishiba ifi tusumiinemo, ne milimo yesu.
