Findo Bamboni sha BaYawe Basumiinemo?
Bamboni sha BaYawe balicetekele ati ‘Amalembo onse alunjicilwe alifumine kuli baLesa.’ (2 Timote 3:16) Baibolo eitofwako ukwishiba bwino Abalengeshi besu, kabili ukulonda ifilembelwemo kulatofwako ukwikala amekalilo aaweme.
Baibolo ilalabila ati: “[Abantu] beshibe ati mwebo mwenka, mwe muli ne shina lya baYawe, nimwe Bacilile lukoso na pa calo conse.” (Amasamo 83:18) Pakuti pali fyefyo, tulapempela baLesa bamo lukoso, baYawe. Kabili, pakuti tuli Imboni shabo, tulesha ukulengeshe’shina lyabo ukwishibikwa.—Yisaya 43:10-12.
Tulicetekele ati baYesu, ‘Umwana wa baLesa,’ * baalishile pa calo ne kuba baMasaya. (Yoane 1:34, 41; 4:25, 26) Ili baYesu bafwile, balibuushiwe ne kuya kwiulu. (1 AbaKolinto 15:3, 4) Mu kupita kwa mpindi, balibele ni Mfumu ya Bufumu bwa baLesa. (Ukufisulula 11:15) Ubo Ubufumu buteko bwa cinenene ubukaleta Paladaiso pa calo. (Danyeli 2:44) Baibolo ilalabila ati: “Abatekenye mu mitima e bakapyane’calo; bakalukulitemwesha mu kufula kwa butende.”—Amasamo 37:11, 29.
“Ili balukupenda Baibolo, balacetekela ati ifi balukupenda mashiwi abaLesa. Kani bali ne makatasho, balafwaya-fwaye’fyebo mu Mashiwi abaLesa ifingabofwako ukushilisha ayo amakatasho. . . . Kuli bo, Amashiwi abaLesa ali ne mweo.”—Intangishi mwi calici lya Katolika, Benjamin Cherayath, mu nyunshipepala ya Münsterländische Volkszeitung, Germany
Bamboni sha BaYawe balicetekele ati na bubuno bukumo, ukufunda kwa mu Baibolo kulapyunga. (Yisaya 48:17, 18) Pakuti pali fyefyo, tulalonda makosa ukufunda kwa mu Baibolo. Ku cakubwenako, pakuti Baibolo ilatucenjesha ati twilukucitako ifintu ifingabifya ukulanguluka kwesu ne mibili yesu, tatupeepapo fwaka neli ukupyungishe’miyanda mu nshila iitayelelwepo. (2 AbaKolinto 7:1) Nakabili, tatucitapo ifintu ifi Baibolo ikeenye apaswetele, ifili koti kupendwa, ubucencemeshi, ne kwiba.—1 AbaKolinto 6:9-11.
^ par. 4 Nakabili, Baibolo ilalabila ati baYesu ‘Mwana wa baLesa uuli enka’ ni pakuti ebo baYawe batatikiilepo ukulenga, kabili e benka lukoso abo baYawe abene baalengele.—Yoane 3:18; AbaKolosai 1:13-15.
Cipale Mungapendako Nafifi:
IFYAKWIPUSHA IFIPUSHIWA MAKOSA
Kani Bamboni sha BaYawe Balisumine ati Ukupempela Kwabo Lukoso Ekwa Cine?
Kani baYesu baalilabile ati kuli imilyango iingi iitangilila ku kupuluka?
