Kani Kuli Abomfwa Amatembelo?
Abantu bambi balalanguluka ati ukutembela kupoosa lukoso impindi, pakuti takulipo abomfwa amatembelo. Bambi balyeseshepo ukutembela, pano balabona ati amatembelo abo taasukwapo. Umuntu umo uusumiine ati takulipo baLesa alyeseshe ukwalakanya ifi baLesa bali, kabili alitembeele ati: “Mulabileko na nebo panini lukoso.” Pano alilabiile ati baLesa “baalikele lukoso celele.”
Nangabe’fyo, Baibolo ilatubuula ati eko bali baLesa aba cinenene kabili ati balomfwa amatembelo. Mu Baibolo muli amashiwi aalabiilwe ku bantu abaliko akale, ati: “[BaLesa] bakaba ne luse kuli webo icine pa kumfwa ishiwi lya kulila kobe; pa kumfwa bakakwasuka.” (Yisaya 30:19) Nakabili, Baibolo ilalabila ati: “Ukutembela kwa ulungeme kusangalala kwabo.”—Ifisimpi 15:8.
BaYesu balitembeele kuli baWishibo, kabili ‘balibomfwile.’—AbaEbeya 5:7
Nakabili, mu Baibolo mulilembelwe ifyakubwenako fya bantu baabo amatembelo abo aasukilwe. Ilembo limo lilalabila ati baYesu ‘balilombele kuli babo abaishibile ukubapulusha’ kabili ‘balibomfwile.’ (AbaEbeya 5:7) Tulapenda ifyakubwenako na fimbi pali Danyeli 9:21 na pali 2 Ifyebo 7:1.
Pano, nindo bambi balangulukila ati amatembelo abo taasukwapo? Pakweba ati amatembelo esu aasukwe, tatwelelwepo ukutembela kuli balesa bambi neli ku fintu fimbi, sombi tulyelelwe ukutembela lukoso kuli baLesa abalabiilwepo mu Baibolo, baYawe. * Nakabili, baLesa balafwaya tulukutembela “koti kufwaya kwabo,” e kweba ati ukutembelele’fintu ifi batemenwe. BaLesa balatubuula ati kani twatembela amatembelo akube’fyo, “balatumfwa.” (1 Yoane 5:14) Popele, pakweba’ti amatembelo esu alukwasukwa, tulyelelwe ukwishiba bwino baLesa abalabiilwepo mu Baibolo ne kufwaya kwabo.
Abantu abengi balisumiine ati ukutembela talipo cintu ici umuKlistu elelwe lukoso ukucita. Sombi balisumiine ati baLesa balomfwa amatembelo ne kwasuka. Ba Isaac, abekala ku Kenya balilabiile ati: “Nalitembeele ati baLesa bangofweko ukumfwisha Baibolo. Tapapitilepo ne mpindi, kwalishile umuntu uwangofweleko.” Ba Hilda abekala ku Philippines baalukufwaya ukuleko’kupeepa fwaka. Panuma ya kufilwo’kuleka, abalume babo balibabuulile ati, “Mba nindo tekuti mulombelepo baLesa ati bamofweniko?” Balilondele uko ukufunda kabili balilabiile ati: “Nalikankamene ukubona ifi baLesa bangofweleko. Ukufwaisho’kupeepa fwaka kwalukuya lukoso ili kushila. Kabili, mu kupelako nalilekele ukupeepa.”
Kani baLesa bangaasuka amatembelo enu ao mutembela pa filukumubombomanikeni ifyelelwe ne kufwaya kwabo?
^ par. 5 Baibolo ilabuulishisha ati baYawe e shina lya baLesa.
