Ili tamungatatika ukucite’cintu, cipale mungalukulanguluka ati, ‘Ni bwisa bune ubulimo mu kucite’fi?’ Kani cibipile ukulanguluke’fyo na pe tembelo? Koku mwane. Mu cifyalilwa lukoso, tulafwayo’kwishiba ubune ubulimo mwi tembelo.

Mu fiputusha ifyafumako, twalabila pa filangisha ati itembelo talipo cintu ici umuKlistu elelwe lukoso ukucita neli ati cintu icimulengesha ukumfwako bwino. Muli bucine, baLesa balaasuka amatembelo. Kani twatembela mu nshila iyelelwe kabili pa fintu ifyelelwe, bakatumfwa. Nakabili, balatukoselesha ukupalamina kuli bo. (Jakobo 4:8) Pano, findo tukabwenamo kani tulukutembela inshiku shonse? Nga tulabilepo pali fimo fimo ifi tukabwenamo.

Kani mulabombomana makosa ili muli ne makatasho aakulu mu mekalilo enu? Baibolo ilalabila ati “mulukutembela ukwa kubulo’kuleka” pa mpindi sha kube’fyo, kabili ati “nga kukeshibwe kuli baLesa ukulomba kwenu.” (1 AbaTesalonike 5:17; AbaFilipoi 4:6) Baibolo ilatubuulishisha ati kani twatembela kuli baLesa, “ubutende bwa baLesa, ubukango’kwishibwa konse, bukalame’mitima [yesu] ne malangulushi [esu].” (AbaFilipoi 4:7) Kanshi, ukutembela kuli baWishifwe aba kwiulu kulatulengesha ukubulo’kubombomana makosa. E mulandu batukoselesesha ukucita fyopele’fyo. Amasamo 55:22 alalabila ati: “Bika icipinto cobe pali baYawe, bo bakakukosha.”

Abantu abengi mu calo conse balibwene ati itembelo lilabofwako. Ba Hee Ran, aba ku South Korea, balilabiile ati: “Nangaba ati ndi ne makatasho aakulu, kani natembela, ndomfwa koti natuula icipinto icilemene kabili ndaba ne makosa aakupitilisha ukupyungila baLesa.” Ba Cecilia aba ku Philippines, balilabiile  ati: “Ndi ne bana babili abanakashi kabili ndalama na bamayo abafilwa ukunjishiba pakuti balwashi. Ifi fyonse filambombomanika. Pano, ukutembela kulangofwako ukubulo’kubombomana makosa inshiku na nshiku. Ndiishi ati baYawe bakangofwako ukulame’cisoolo canji.”

Kani muli ne makatasho aakulu aamulengesheni ukubombomana makosa? Ukutembela kuli “baLesa ba kusangalasha konse” kukamofweniko ukubulo’kubombomana makosa. Baibolo ilalabila ati baLesa ‘balatusangalasha fwebo pa kupenga kwesu konse.’ (2 AbaKolinto 1:3, 4) Ku cakubwenako, kambi kasuba ili baYesu babombomene makosa, ‘balifukeme ne kutembela.’ Kani baLesa baalibofweleko shani? Baibolo ilalabila ati: “Yalibwenekele kuli bo inkalamba ya kwiulu, iyalukubakosha.” (Luku 22:41, 43) Neyamiya,  umwalalume na umbi uwa bucetekelo, balukumutiinisha ku bantu abalukufwaya ukumuciicila ukupyunga imilimo ya baLesa. Pano, alitembeele ati: “Kamukosha amaboko anji!” Ifyacitikile panuma filalangisha ati icine baLesa balimofweleko ukubulo’kutiina ne kukonsha ukupyungo’mulimo apeelwe. (Neyamiya 6:9-16) Ba Reginald, aba ku Ghana, balibuulishishe ifi itembelo libofwako, ati: “Kani natembela, tanje cine ili ndi ne makatasho, ndomfwa koti nabuulako umuntu uuli ne makosa akungofwako kabili uunkoselesha ati ndeke ukutiina.” Mu cinenene, baLesa bakatusangalasha kani twatembela kuli bo.

Fimbi ifi tusalululapo ukucita fingalengesha amekalilo esu ne abakwabesu ukuwaminako neli ukubipilako. Pano findo fingatofwako ukusalululapo bwino? Baibolo ilalabila ati: “Kani pali mwebo umbi taakwete-mano [makosa makosa ili alukupita mu makatasho], nga alombe kuli baLesa, ababapela lukoso bonse, abatabapatapo; popele akapelwa kuli ye.” (Jakobo 1:5) Kani twalomba amano, baLesa bangapyungisha umupashi uswetelele pa kutofwako ukusalululapo bwino ifyakucita. Eli, tungalomba mu kushinkamika lukoso kuli baLesa ati batupeele umupashi uswetelele ni pakuti baYesu balilabiile ati ‘baWishifwe aba kwiulu bakabapela umupashi uswetelele abo abalukubalomba.’—Luku 11:13.

BaYesu nabo balukulomba baWishibo ukubofwako ili balukusalululapo ukucite’fintu ificindeme. Baibolo ilalabila ati ili baYesu tabangasalulula abalalume 12 abaali ne kuba intangishi shabo, ‘baalitembeele kuli baLesa ubushiku bonse.’—Luku 6:12.

Koti ni fyefyo ifyacitikile kuli baYesu, abantu abengi balikoshiwe panuma ya kubona ifi baLesa baasukile ukulomba kwabo ukwa kubofwako ukusalululapo bwino ifyakucita. Ba Regina aba ku Philippines baalilabiile pa makatasho bapitililemo. Pakuti abalume babo balifwile, balakatashiwa ukulama icisoolo cabo, incito baalukupyunga ilishilile, kabili bali ne bukatasho bwa kukusha abana babili abanakashi. Findo fibofwako ukusalululapo bwino ifyakucita? Baalilabiile ati, “Ndatembela lyonse kuli baYawe.” Ba Kwabena, aba ku Ghana, balilabiile umulandu baalombeele baLesa ukubofwako. Baalilabiile ati, “Incito nalukupyunga yeyo nalukufolelapo indalama ishingi yalishilile.” Ili balukusalululapo incito baali ne kutatika ukupyunga, baalilabiile ati, “Nalukutembela kuli baYawe ati bangofweko ukusalululapo bwino incito ya kupyunga.” Nakabili balilabiile ati, “Nalibwene ati baYawe baalingofweleko ukusalululapo incito iimpeelako impindi ya kupyunga imilimo ya baLesa ne kukumanisha ifi mpengela ifya ku munefu.” BaLesa bangamofweniko na mwebo kani mulukutembela kuli bo pa fintu ifingakuma bucibusa bwenu nabo.

Twalabilako lukoso ifinini ifilangisha ubune ubulimo mu kutembela. (Kani mulukufwaya ukumfwilapo na fimbi, boneni akabokoshi akalukulabila ati “ Ifi Tubwenamo mu Kutembela.”) Pano, pakweba ati na mwebo mukabwenemo, mulyelelwe tange ukwishiba baLesa ne kufwaya kwabo. Kani ifi efi mulukufwaya, mwane mukalombe Bamboni sha BaYawe ukumofweniko ukumfwisha ifilembelwe mu Baibolo. * Ici e cintu ca kutanga icikamofweniko ukupalamina ku ‘Bomfwa ukutembela.’—Amasamo 65:2.