Umweo walifumine kuli baLesa besu, baYawe. (Amasamo 36:9) Penka, tali cingelelwa kuli fwebo ukucetekela ati aba benka baLesa bangalengesha abafwile ukuba ne mweo nakabili? Baibolo ilatubuula ati ifi fyenka efi bakacita kuntangiile. (Pendeni Ifyacitilwe 24:15) Pano nindo bakacitile’fyo?

Pa kutanga lukoso, Abalengeshi besu baalukufwaya ati abantunshi balukwikala umuyayaya. (Ifyakutanga 1:31; 2:15-17) Ukufwaya kwabo takwalukilepo na ino mpindi. Balasoomenwa ukubona fwebo tulukupenga ne kufwa.—Pendeni Jobo 14:1, 14, 15.

Kani baLesa balilengele abantunshi ati balukwikala kwiulu? Koku mwane. Balilengele inkalamba ati shilukwikala kwiulu. Eli abantunshi balibalengele ati balukwikala pa calo. (Ifyakutanga 1:28; Jobo 38:4, 7) Ukulunda pali fyefyo, langulukeni na pa fimpelampela baYesu bacitile. Abantu baYesu babuushishe balipitilishe ukulukwikala penka pano pa calo. Mu kupalako, abengi abakabuushiwa bakalukwikala penka pano pa calo.—Pendeni Yoane 5:28, 29; 11:44.

Nangabe’fyo, baLesa balisalulwile abantu ababuukila kwiulu. Aba ababuukile kwiulu balababa ne mibili ya mupashi. (Luku 12:32; 1 AbaKolinto 15:49, 50) Abo ababuukila kwiulu bakalukwikalika icalo na baKlistu.—Pendeni Ukufisulula 5:9, 10.