1. Findo filangisha ati Ubufumu bwalicindeme kuli baYesu?

BAYESU baalitemenwe makosa ukulabila pa Bufumu. Ili baali pa calo, Ubufumu ebo balukulabilapo makosa ukucila ifintu fyonse. Balilabiile pa Bufumu ukucila pa miku 100. Mu cinenene, Ubufumu bwalicindeme kuli baYesu.—Pendeni Matayo 12:34.

2. Ni banga baumfwileko ifunde ilili pali Matayo 28:19, 20, kabili nindo twalabilile’fyo?

² Ili baYesu babuushiwe lukoso, baalikumene ne bantu ukucila pali 500. (1 AbaKolinto 15:6) Cipale iyi e mpindi ili baYesu bapeele ifunde ilya kutulisha ‘ku mishobo yonse iya bantu.’ Uyu umulimo tawalipo upubile. * Balibabuulile ati ukutulisha kwali ne kupitilisha pa mpindi iitali, “ukufika na ku kushila kwa mpindi.” Ili mulukutulisha icebo iciweme, ninshi mulukukonsha uku ukushimika.—Matayo 28:19, 20.

3. Kani ni fisa fitatu ifitofweleko ukutulisha icebo iciweme?

³ Ili baYesu bapeele ifunde lya kutulisha, baalilabiile ne kweba’ti:  “Ndi nenu.” (Matayo 28:20) Kanshi baYesu balilaile abasambile babo ati baali ne kubatangilila ne kubofwako ukutulisha mu calo conse. Mu kupalako, baYawe bali na fwebo. Balitupeele ‘ifintu fyonse ifiweme’ ifitofwako ukutulisha. (AbaEbeya 13:20, 21) Muli cicino iciputusha, twakwambaala pali fifi fitatu: (1) ifyakupyungisha tupeelwe, (2) inshila tupyungishe pa kutulisha, na (3) ifi tusambishiwe. Ica kutanga, nga tulabile pa fyakupyungisha tupyungishe pa myaka 100 iipitilepo.

4. Kani ifyakupyungisha ifingi filitofweleko shani mu kutulisha kwesu?

⁴ BaYesu balipalenye icebo ca Bufumu ku kuminse’mbuto pa mushili ulekenelekene. (Matayo 13:18, 19) Umulimi alapyungisha ifyakuliminako ifilekenelekene. Mu kupalako, Imfumu yesu ilitupeele ifi tungapyungisha pa kofwako abantu ukusumina ifi tutulisha. Fimbi fyalipyungishiwe pa mpindi inini, pano fimbi ficipyungishiwa. Nangabe’fyo, fyonse ifyakupyungisha filitofweleko ukuwamyako ukusambisha kwesu.

5. Kani kadi ya kutulishishapo yali nindo, kabili yalukupyungishiwa shani?

⁵ Mu 1933, abakutulisha balitatikile ukupyungisha kadi ya kutulishishapo. Iyi kadi yalukubofwako ukutatika ukutulisha. Pali yiyi kadi inini palilembelwe amashiwi amu Baibolo aanini. Shimbi impindi balukulemba kadi ya bukumo. Umukwabesu Erlenmeyer ali ne myaka 10 ili apyungishepo kadi ya kutulishishapo pa muku wa kutanga. Alibuulishishe ati: “Twalukulabila lukoso ati, ‘Kani mungapenda ifili pali yiyi kadi?’ Umwine wa ng’anda kani apenda ifili pali kadi, twalukumupeela lukoso amabuuku ne kuya.”

6. Kani kadi ya kutulishishapo yalyofweleko shani abakutulisha?

⁶ Kadi ya kutulishishapo yalyofweleko abakutulisha mu nshila ishilekenelekene. Ku cakubwenako, bambi baali ne nsoni, kabili nangaba’ti balukufwaya ukutulisha, tabaishibilepo ifya kulabila. Bambi abakutulisha baali ne lupata. Aba abaali ne lupata baalukulabila ifyebo ifingi ku mwine wa ng’anda mu mamineti lukoso anini, pano tabalukufilabilapo mu nshila iyelelwe. Kadi ya kutulishishapo yalyofweleko abakutulisha ukutulisha icebo icali icipubile ukumfwa ku bantu bonse.

7. Kani ni esa amakatasho aaliko ili balukupyungisha kadi ya kutulishishapo?

⁷ Nangabe’fyo, kwali ne makatasho. Bankashi Grace Estep kabalabila ati: “Shimbi impindi, balukutwipusha ati, ‘Kani ilukulabile’ndo? Mba nindo tekuti mumbuulishishe lukoso ifilipo?’ ” Nakabili, bambi abo twalukutulishako tabaalukupendapo ifyali pali kadi. Bambi baalukupoka lukoso kadi ne kwisalako icibi. Bambi nabo tabaatemenwepo ifi twalukutulisha, ica kweba’ti balukukwamaala kadi. Nangaba’ti kwali ayo amakatasho, kadi ya kutulishishapo yalyofweleko abakutulisha abengi ukutulisha ku bantu bonse ne kwishibikwa ati bakutulisha ba Bufumu.

8. Kani icilimba ca fonografu calukupyungishiwa shani? (Boneni icikope icili pe buula 27.)

⁸ Panuma ya 1930, baalitatikile ukupyungisha icilimba ca kwenda naco ici baalukwita ati fonografu. Bamboni bambi baalukuciita ati Aloni ni pakuti ecalukubalabililako. (Pendeni Ifyakufuma 4:14-16.) Kani umwine wa ng’anda asumina ukukutika, uwakutulisha alukulisha ilyashi lya Baibolo iliipi eli apeela umwine wa ng’anda amabuuku. Shimbi impindi, ifisoolo fyonse fyalukubungana ku kukutika ku lyashi! Mu 1934, ba Watch Tower Society baalitatikile ukupanga ifi ifilimba pakweba’ti balukufipyungisha mu mulimo wa kutulisha. Ici calilengeshe abakwabesu ukukopa amalyashi aalekenekelene 92.

9. Kani icilimba ca fonografu calipyungishiwe shani?

⁹ Ili ba Hillary Goslin baumfwileko ku lyashi limo, kacibalengesha ukwashima icilimba pa mulungu umo kabili baalukukutika amalyashi ya mu  Baibolo na babo baalukwikala nabo apepi. Icafuminemo ca kweba’ti abantu abengi baalitemenwe bucine kabili kababatishiwa. Ici calilengeshe abana abanakashi babili aba ba Goslin ukusanganwa kwi Sukuulu lya Gilyadi ne kuba bamishonali. Koti ni kadi ya kutulishishapo, icilimba ca fonografu calyofweleko abakutulisha abengi ukutatika ukutulisha. Panuma ya fyefyo, Imfumu yalitatikile ukupungisha Isukuulu lya Kusambisha Ukutulisha pa kofwako abantu baiyo ukuba abasambishi abaweme.

10, 11. Kani amanyunshipepala ne mulabasa fyalipyungishiwe shani ku kutulisha icebo iciweme, kabili nindo cawamine ukufipyungisha?

¹⁰ Imfumu yesu ilitangilile abantu ba baLesa mu mulimo wa kutulisha ku bantu abengi ukupyungisha inshila ishilekenelekene. Ishi inshila shalyofweleko makosa ili kwali abakutulisha abanini. (Pendeni Matayo 9:37.) Ku cakubwenako, imyaka iingi kunuma, amanyunshipepala alipyungishiwe pa kutulisha icebo iciweme. Umulungu ne mulungu Umukwabesu Russell alukutuma ilyashi lya Baibolo ku balemba amanyunshipepala. Eli aba nabo balukutuma ilyashi lyakwe ku manyunshipepala ya ku Canada, Europe, na United States. Ukufika mu 1913, amalyashi ya Mukwabesu Russell yalifumine mu manyunshipepala 2,000 kabili abantu apepi na 15,000,000 baliapendele.

¹¹ Nakabili, abantu ba baLesa baalukupyungisha umulabasa pa kutulisha icebo iciweme. Pa April 16, 1922, Umukwabesu Rutherford alilabiile ilyashi lyakwe ilya kutanga pa cilimba, kabili abantu 50,000 balikutikileko. Tapapitilepo ne mpindi twalitatikile ukupyungisha umulabasa wesu woyo twalukwita ati WBBR, kabili uyu umulabasa walitatikile ukupyunga pa February 24, 1924. Akatambo ka Wakulama aka December 1, 1924, kalilabiile ati: “Tulicetekele ukweba ati ukutulisha bucine pa cilimba ni nshila iiweme kabili iitaipengelwapo amaboni aengi yeyo tatungapyungishapo.” Koti manyunshipepala, umulabasa walitofweleko ukutulisha ku bantu abalukwikala mu mipunda umwali abakutulisha abanini.

12. (a) Pa mipunda yonse apasanganwa abantu abengi, ni isa mutemenwe ukutulishapo? (b) Findo fingatofwako ukucimfyo’mwenso wa kutulisha apasanganwa abantu abengi?

¹² Ukutulisha apasanganwa abantu abengi e nshila iweme iilukupyungishiwa pali ino mpindi pa kutulisha ku bantu. Kuli ukwanshika kwa kweba’ti kube ukutulisha ku bantu abasanganwa apa kuninina imyotoka, amashitima, apa kwimakanika imyotoka, apa abantu batuushisha, na pa mamaliketi. Kani mulomfwo’mwenso ukutulisha apasanganwa abantu abengi? Kani efi cili, mulyelelwe ukutembela ati baLesa bamofweniko. Kabili umfweni ifi Umukwabesu Manera, umupyungishi wa kwenda alabiile, ati, “Twalukubona inshila shonse isha kutulishishamo ati lishuko lya kupyungila baYawe, ishuko lya kulangisha bucine bwesu kuli bo, nakabili ati lyali lishuko lya kulangisha ubucetekelo bwesu, kabili twalukufwaya ukulangisha baYawe ati twalilitemeenwe ukucita fyonse lukoso ifi batubuula.” Kani twacimfya umwenso wesu ne kupyungisha inshila sha bukumo isha kutulishishamo, tukacetekela makosa baYawe kabili tukaba abakutulisha abaweme.—Pendeni 2 AbaKolinto 12:9, 10.

13. Nindo ciwamine ukupyungisha webusaiti yesu ili tulukutulisha? Findo fyacitikile ili mwaipyungishe pa kutulisha?

¹³ Abakutulisha abengi balalitemwesha ukubuulako abantu pali webusaiti yesu iya jw.org, apa bangapenda ne kukopolola amabuuku aalabila pali Baibolo mu milaka ukucila pali 700. Inshiku shonse, abantu ukucila pali 1.6 milyoni balapendako ifyebo pa webusaiti yesu. Akale, umulabasa walitofweleko ukutulisha ku bantu abekala ku mipunda ya kutali. Ifi fyenka, efi na webusaiti yesu itofwako buno bukumo.

14. Findo abakutulisha baelelwe ukusambilila, kabili ni lise’sukuulu ilibofweleko ukuba abasambishi abaweme?

¹⁴ Ifyakupyungisha ne nshila sha kutulishishamo ifi twalabilapo fyalipyungile bwino makosa. Nangabe’fyo, abakutulisha abaliko pali ilya mpindi baalyelewe ukusambishiwa ifya kutulisha. Ku cakubwenako, impindi shimbi abantu twalukutulishako tabalukusuminapo ifi baalukumfwa pa cilimba ca fonografu. Impindi shimbi aba twalukutulishako baalukutemwa kabili baalukufwaya ukwishibilapo na fimbi. Abakutulisha baalyelelwe ukwishiba ifya kwasuka abaciicila icebo iciweme ne fya kuba abasambishi abaweme. Ukwakubulo’kukanika, umupashi wa baLesa uswetelele e waofweleko Umukwabesu Knorr ukwishiba’ti cali icicindeme ku bakutulisha ukusambilila ifya kulabila ili balukutulisha. Popele, ukutatika mu 1943, amakelesha alitatikile ukwanshika Isukuulu lya Kusambisha Ukutulisha. Ili isukuulu lyalyofweleko bonse ukuba abasambishi abaweme.

15. (a) Findo fyacitikile ili bamo balabiile ilyashi lya kutanga mwi Sukuulu lya Kusambisha Ukutulisha? (b) Kani amashiwi abaYawe aalembelwe pa Amasamo 32:8 alikonshiwe shani mu mweo wenu?

¹⁵ Abakwabesu abengi tabaishibilepo ifya kulabila ku bantu abengi. Umukwabesu Ramu alanuka ifyacitikile ili alabiile ilyashi lya kutanga mu 1944. Ilyashi lyalukulabila pali Doeji uulabilwepo mu Baibolo. Umukwabesu Ramu alilabiile ati, “Amakufi anji alukupamana, amaboko anji na o alukututuma, ne meno alukulila.” Alilabiile ne kweba’ti, “Uyu e wali umuku wa kutanga ukwimakana pa cibwambilo, pano nalishilile ukulabila ilyashi lyonse.” Nangaba’ti tacalipo icipubile, ne bana abanini balukulabilako amalyashi mwi sukuulu. Umukwabesu Manera alanuka ifyacitikile ili umwanice umo alabiile ilyashi lya kutanga. Alilabiile ati, “Uyu umwanice ali ne mwenso ica kweba’ti ili atatikile lukoso ukulabila ilyashi, alitatikile ne kulila. Nangaba’ti alililile mu lyashi lyakwe lyonse, alishilile ukulabila.” Cipale na mwebo mulafilwa ukwasukapo pa kubungana  pakuti mulomfwe’nsoni neli mulabona ati tekuti mukonshepo ukucite’fyo. Kani efi cili, lombeni baYawe ati bamofweniko ukushilisho’mwenso. Bakamofweniko koti ni fyopele filya baofweleko abasambile ba kutanga aba mwi Sukuulu lya Kusambisha Ukutulisha.—Pendeni Amasamo 32:8.

16. Kani Isukuulu lya Gilyadi lilyofweleko bani (a) ukufuma lukoso ne kale ne (b) kufuma mu 2011?

¹⁶ Ukwanshika kwa baLesa kulisambishe abengi ukupitila mwi Sukuulu lya Gilyadi. Ici kubelele ili isukuulu kofwako abasambile ukufwaisha makosa ukutulisha icebo iciweme. Isukuulu lya Gilyadi lyalitatikile mu 1943, kabili ukufume’yo mpindi, abasambile 8,500 e bapitile muli lili isukuulu ne kutumwa ku fyalo 170. Ukufuma mu 2011, abetwa kuli lili isukuulu ni bapainiya abalibelele, abapyungishi bakwenda, abapyungila pa Beteli, neli bamishonali abatabangayako kuli lili isukuulu.

17. Kani Isukuulu lya Gilyadi lilibeele shani cakofwako iciweme?

¹⁷ Kani Isukuulu lya Gilyadi lilibeele cakofwako iciweme? Inya. Langulukeni lukoso pa fyacitikile mu Japan. Mu August 1949, muli cici icalo mwali abakutulisha abanini. Pano, ku kushila kwa wuyu umwaka, bamishonali 13 baalukutulisha ne bakwabesu ba muli cenke’ci icalo. Pali ino mpindi, mu Japan muli abakutulisha apepi na 216,000, kabili hafu pali baba ni bapainiya.

18. Ni esa ambi amasukuulu ao tukwete?

¹⁸ Tulikwete na ambi amasukuulu. Pali aya amasukuulu pali ne Sukuulu lya Bufumu, Isukuulu lya Bapainiya, Isukuulu lya Bakutulisha ba Bufumu, Isukuulu lya Bapyungishi ba Luteta ne Bakashi Babo, ne Sukuulu lya Bali Muli Komiti ya Mutano ne Bakashi Babo. Aya amasukuulu alisambishe abakwabesu ne nkashi shesu ne kubofwako ukukosha ukucetekela kwabo. Cilibwenekele apaswetele ati baYesu balipitilishe ukusambisha abantu abengi.

19. Findo Umukwabesu Russell alabiile pa mulimo wa kutulisha, kabili ifi alabiile filikonshiwe shani?

¹⁹ Ubufumu bwa baLesa bulikalikile pa myaka ukucila pali 100. Muli yiyi imyaka yonse, Imfumu yesu, baYesu Klistu, balatangilila umulimo wa kutulisha. Mu 1916, Umukwabesu Russell alicetekele ati umulimo wa kutulisha wali ne kupyungwa mu calo conse. Kaalabila ati: “Umulimo ulukukula, kabili ukapitilisha ukukula, ni pakuti kuli umulimo uwa kutulisha ‘icebo iciweme ica bufumu’ mu calo conse.” (Ibuuku lya Faith on the March, ilyalembele ba A. H. Macmillan, ibuula 69) Uyu umulimo ulukupyungwa pali ino impindi! Tulatoota baYawe, baLesa besu aba mutende, pa kutupeela fyonse lukoso ifi tupengela pakweba’ti tukonshe ukucita ukufwaya kwabo!