Ifi BaLesa Baalukubona Inkondo Akale
Abantu baalukupenshiwa. Impindi ne mpindi baalukutembela kuli baLesa ati babofweko, pano baLesa tababaasukilepo penka’po lukoso. Aba abantu baali baIshilaeli, abantu ba kale aba baLesa. Abaalukubapensha baIjipiti. (Ifyakufuma 1:13, 14) Pa myaka iyakuti ubwingi, abaIshilaeli baalukupembelela ati baLesa babapulushe ku baIjipiti. Mu kupelako, impindi ya baLesa iya kucitapo fimo yalifikile. (Ifyakufuma 3:7-10) Baibolo ilabuulishisha ati baLesa abene balilwile inkondo ne baIjipiti. Baaliletele ifincinsha pa baIjipiti, kabili balyonawile Imfumu ya baIjipiti ne fita fyaiyo mu Cishiba Icikashikile. (Amasamo 136:15) BaYawe Lesa balililangishe abene ati “bantu ba nkondo,” abangalwilako abantu babo.—Ifyakufuma 15:3, 4.
Bucine bwakweba’ti baLesa abene balilwile inkondo ne baIjipiti bulalangisha ati shimbi inkondo baLesa balashisuminisha. Shimbi impindi, baalukubuula abaIshilaeli ukulwe’nkondo. Ku cakubwenako, balibabuulile ukulwe’nkondo ne bantu imbifi aba mu Kanani. (Ndutelonomi 9:5; 20:17, 18) Nakabili, balibuulile Imfumu ya baIshilaeli, Dafidi, ukulwe’nkondo ne baFilisiti. Ukulunda pali fyefyo, baLesa balibuulile Dafidi ifi aelelwe ukucita pakweba’ti acimfye.—2 Samweli 5:17-25.
Aya amalyashi amu Baibolo alalangisha ati kani kuli abalukuleta bumbifi neli ukutatiko’kupensha abaIshilaeli, baLesa baalukusuminisha inkondo pakweba’ti balame abantu babo ne kulama ukupempela kwa cine. Pano boneni ifintu fitatu ifilukulabila pa nkondo ishi baLesa baalukusuminisha.
-
NI BALESA LUKOSO ABALUKUSALULULA ABAELELWE UKULWA INKONDO. Pa mpindi imo, baLesa balibuulile abaIshilaeli ati: “Tacikafwaikwa kuli mwebo ukulwa muli yiyi [inkondo].” Nindo bababuulile’fyo? Nipakuti baLesa abene ebali ne kubalwilako. (2 Ifyebo 20:17; 32:7, 8) Balicitile’fi pa mpindi ishingi, koti ni fyefyo ifilabilwepo pa kutatika kwa cicino iciputusha. Shimbi impindi, baLesa balukubuula abantu babo ukulwe’nkondo ishi basuminishe, makosa makosa shesho baalukulwila Icalo Icalailwe.—Ndutelonomi 7:1, 2; Josyua 10:40.
-
NI BALESA LUKOSO ABALUKULABILA ILI KWAELELWE UKUBA INKONDO. Abapyungishi ba baLesa baalyelelwe ukupembelela impindi ili baLesa baali ne kubabuula ukulwa ne bantu abalukubapensha neli mbifi abaali apepi nabo. Kani tabababuulilepo tabaelelwepo ukulwe’nkondo. Kani balwa, baLesa tabaalukubashukishapo. Tanje cine, Baibolo ilalangisha ati impindi ili abaIshilaeli baalukulwe’nkondo ukwakubula baLesa ukubasuminisha, ifyalukufumamo fyalukubipa ukwakuti. *
-
BALESA TABASEMBELAPO MUMFWA YA BANTU, UKUBIKAKO NE MBIFI. BaYawe Kantupuntupu ka mweo kabili e Balengeshi ba bantunshi. (Amasamo 36:9) Popele, tabasembapo kani babona abantu balukufwa. Ku cakubombomanika, kuli abantu imbifi abafwaya ukupensha ne kwipaya bambi. (Amasamo 37:12, 14) Pakweba’ti baLesa baciicile ubu bumbifi, shimbi impindi balukusuminisha ukonaala imbifi mu nkondo. Nangabe’fyo, imyaka yonse ili baalukusuminisha abaIshilaeli ukulwe’nkondo, baali ne ‘nkumbu’ kabili “abakokolo’kukalipa” kuli babo abaalukupensha abaIshilaeli. (Amasamo 86:15) Ku cakubwenako, balilabiile ati ili abaIshilaeli tabangonaala umushi, baalyelelwe “ukutulisha kuli wo ubutende.” Ici calukupeela abalukwikala muli woyo umushi ishuko lya kwaluka pakweba’ti kwikabapo inkondo. (Ndutelonomi 20:10-13) Ici caalukulangisha ati baLesa ‘tabasembelamo mu kufwa kwa bakubifya; sombi balafwaya’ti uwakubifya aaluluke ku nshila yakwe, ekale ne mweo.’—Esiceli 33:11, 14-16. *
Muli fifi twalabilapo, twabona ati akale, baLesa baalukubona inkondo ati ni nshila ya kushilishishamo bumbifi ne konaala abalukupensha abantu babo. Nakabili, ni baLesa lukoso, talipo bantunshi abaalukulabila ili kwaelelwe ukuba inkondo ne baelelwe ukulwako. Kani baLesa baalukulwa inkondo pakweba’ti bonaale lukoso abantu? Koku mwane. Balipatile ulukansa. (Amasamo 11:5) Kani ifi baLesa babona inkondo fyalyalukile ili Umwana wabo, baYesu Klistu, baishile pa calo?
^ par. 6 Ku cakubwenako, pa mpindi imo, ili abaIshilaeli baalwile ne baAmaleki ne baKanani, abaIshilaeli baalibacimfishe ni pakuti baalilwile inkondo yeyo baLesa babakenye ukulwa. (Ifyakupenda 14:41-45) Ili papitile imyaka iyakuti ubwingi, Imfumu ya bucetekelo Josaya yalilwile inkondo yeyo baLesa tabasuminishepo, pakuti pali fyefyo iyi imfumu yalifwile.—2 Ifyebo 35:20-24.
^ par. 7 AbaIshilaeli tabatulishepo ubutende ili tabangatatika ukulwa ne baKanani. Mba nindo? Ni pakuti abaKanani balipeelwe imyaka 400 iya kuleko’kucita ifibipile. Pa mpindi ili abaIshilaeli baishile mu kulwe’nkondo, ninshi abaKanani bonse baalukucita bumbifi. (Ifyakutanga 15:13-16) Ecalengeshe ati babonaale. Nangabe’fyo, abaKanani abanini abalekele ukucite’fibipile baalipulukile.—Josyua 6:25; 9:3-27.
