Ica kutanga, umfweni ubu bucine ubwa kusangalasha: BaLesa balukubona ifi abantu balukupenga pali bubuno bukumo, kabili bakacitapo fimo. (Amasamo 72:13, 14) Mu mashiwi abo, Baibolo, baLesa balilaile ‘ukubwesesha ukutusha kuli babo abalukukululuka.’ Ni lwisa bakacite’fyo? Bakacite’fyo “pa kufisuluka baShikulu Yesu ukufuma kwiulu pamo ne nkalamba sha makosa abo, . . . ukulukubabweseshe’milandu abo aba tabeshi baLesa na babo nabo abapulaisha Icebo Iciweme ica baShikulu besu Yesu Klistu.” (2 AbaTesalonike 1:7, 8) BaYesu bakafisuluka kuntangiile pa mpindi yeyo Baibolo ita ati ‘akasuba akakulu aka baLesa Abamakosa onse,’ neli ati Amagedono.—Ukufisulula 16:14, 16.

Muli yiyi inkondo iya kuntangiile, baLesa tabakapyungishapo abantunshi, sombi bakapyungisha Umwana wabo, baYesu Klistu, ne filengelwe fimbi ifya mupashi pa konaala imbifi. Ifita fya mwiulu fikonaala bonse abalukupensha abantu.—Yisaya 11:4; Ukufisulula 19:11-16.

Ukufika na ino mpindi, baLesa tabalukilepo muli fyefyo babone’nkondo. Balabone’nkondo ati ni nshila ya kushilishishamo bumbifi ne konaala abalukupensha abantu. Pano koti ni fyefyo cili ukufuma lukoso ne kale, ni baLesa lukoso abelelwe ukulabila ili kwelelwe ukuba inkondo na belelwe ukulwako. Koti ni fyefyo twabona, baLesa balilabiile kale ati inkondo iikashilisha bumbifi ne konaala abapensha abantu ni nkondo ya kuntangiile iikalwa ne Mwana wabo, baYesu  Klistu. Ici cilukwalula ati inkondo shonse ishi abantu balwa pali ino mpindi talipo ni baLesa abasuminishe, nangaba’ti ifi balukulwila ishi inkondo fiboneke ati fili lukoso bwino.

Tungacipalanya kuli cici: Alakanyeni ati abana abalalume babili batatiko’kulwa ili bawishibo tabaapo. Pa mpindi imo baleko’kulwa ne kutuma foni kuli bawishibo. Umbi umwana alabila ati umubyakwe ewacibifya, eli umbi naye alabila ati umubyakwe acilemupensha. Bonse babili balitamasha kuli bawishibo ni pakuti umo umo alukufwaya ati bawishi bamofweko. Nangabe’fyo, panuma bawishibo baumfwa ifi abana bonse balabila, eli bababuula ati baleko’kulwa ne kubapembelela ati babwele eli bakwisa mu kushilisha ubukatasho. Abana bapembelela lukoso pa mpindi inini, nakabili batatikako ukulwa. Ili bawishi babwela ku ng’anda, bafitilwa abana bonse babili kabili babapanika pa kubulo’kuba ne cumfwila.

Buno bukumo, abalukulwe’nkondo balalomba kuli baLesa ati babofweko. Pano baLesa tabakwetepo ibumba lya bantu ili bofwako ukulwe’nkondo pali ino mpindi. Sombi, balilabiile mu Mashiwi abo, Baibolo, ati: “Tekubabweseshe’fibipile abantu bonse neli umo,” nakabili ati, “Tekulicitile’milandu.” (AbaLoma 12:17, 19) Ukulunda pali fyefyo, balibuulile abantunshi ati balyelelwe ‘ukupembelela ne mutimanteka’ ati bakacitepo fimo pa nkondo ya Amagedono. (Amasamo 37:7) Ili abantu bafilwa ukupembelela pali baLesa ne kutatika ukulwe’nkondo, baLesa balafiitwa ni pakuti aba bantu balatatika ukucite’fyo ukwakubula ukubabuula. Popele, pa Amagedono, baLesa bakalangisha ubukali bwabo ne kushilisha inkondo sha bantunshi pa ‘kulamwina inkondo ukupelele icalo.’ (Amasamo 46:9; Yisaya 34:2) Muli bucine, inkondo ya Amagedono ikashilisha inkondo shonse lukoso.

Pa mashuko aengi ao Ubufumu bukaleta pali ne kushilisha inkondo. BaYesu balilabiilepo pali bubu ubuteko mwi tembelo ilishibikilwe makosa ati: “Ubufumu bwenu bwise. Ukufwaya kwenu kucitwe, panshi pano koti ni kwiulu.” (Matayo 6:10) Ubufumu bwa baLesa bukashilishe’nkondo ne kufumyapo ifilete’nkondo, ekweba’ti bumbifi. * (Amasamo 37:9, 10, 14, 15) Ecilengesha abasambile ba baYesu ukufwaisha amashuko ao Ubufumu bwa baLesa bukaleta.—2 Petilo 3:13.

Kani tukapembelela ukufika lwisa, pakweba’ti Ubufumu bwa baLesa bukashilishe ukupenga, bumbifi, ne konaala abapensha abantu? Ukukonshiwa kwa fyakushimika fya mu Baibolo kulukulangisha ati tulukwikala mu ‘nshiku sha kupelako.’ (2 Timote 3:1-5) * Bukumo, Ubufumu bwa baLesa bukashilisha bumbifi ubuli muli shishino nshiku sha kupelako pa nkondo ya Amagedono.

Koti ni fyefyo tubwene kale, abakonaalwa muli yiyi inkondo ni babo “abapulaisha Icebo Iciweme ica baShikulu besu Yesu Klistu.” (2 AbaTesalonike 1:8) Pano, anukeni ati baLesa tabasembelamo mu mfwa ya bali bonse, ukubikako ne mbifi. (Esiceli 33:11) Pakuti baLesa “tabalukufwaya ati bakonalwe neli umo” muli yiyi inkondo, balukupyungisha pakweba’ti icebo iciweme pali baShikulu besu baYesu citulishiwe “monse mu calo ca panshi, koti ni bumboni ku mikoka yonse ya bantu” ili ukushila takungesa. (2 Petilo 3:8, 9; Matayo 24:14; 1 Timote 2:3, 4) Ukupitila mu mulimo wa kutulisha woyo Bamboni sha BaYawe balukupyunga mu calo conse, abantu bonse balikwete ishuko lya kwishiba baLesa, ukumfwila icebo iciweme pali baYesu, ne kubonako akasuba ili inkondo shonse lukoso shikashila.