Alakanyeni ati mwaya ku calo cimbi pa muku wa kutanga. Muli cici icalo, mwakumanya abantu aba tamwishipo. Nakabili, amekalilo, ifyakulya, ne ndalama tamufishipo bwino. Pakuti pali fyefyo, mungabombomana.

Cipale mungomfwa koti ni fyopele’fyo ili mulukupenda Baibolo pa muku wa kutanga. Ili mulukupenda Baibolo, cilaba koti mwaya ku calo ca kale pa muku wa kutanga. Mu Baibolo, mungapenda pa bantu abali koti baFilishiti, ifintu ifili koti ‘kukwamala ifyakufwala,’ ifyakulya ifi balukwita ati mana ne ndalama ishi balukwita ati amashekeli. (Ifyakufuma 16:31; Josyua 13:2; 2 Samweli 3:31; Jelemiya 32:9) Ifi fyonse fingakatasha ukufyumfwisha. Koti ni fyenka filya cingaba ku muntu uwaya ku calo cimbi pa muku wa kutanga, tali na mwebo mungatemwa kani kwaba uwa kumofweniko ukumfwisha ifilembelwe mu Baibolo?

Ukutatika mu myaka ya ba 1500, ili amalembo atatikile ukulembwa, abantu baalukofwewa ukumfwisha ifilembelwe mu Baibolo. Ku cakubwenako, Mose, umuntu wa kutango’kutangilila abaIshilaeli, ‘alukubuulishisha’ ifyalembelwe.—Ndutelonomi 1:5.

Abantu abaishibile bwino ukubuulishisha ifyalembelwe mu Baibolo eko bali na lyelyo papitile imyaka 1,000. Mu 455 B.C.E., ibumba ilikulu ilya baJuda, ukubiikako ne bana abengi, balibungene mu mushi wa Jelusalemi. Abaishibile bwino ukusambisha ‘baalipendele mwi buuku.’ Pano kwali na fimbi ifi bacitile. ‘Balibuulishishe, fyopele’fyo abantu kabomfwisha ifyapendelwe.’—Neyamiya 8:1-8.

Ili papitile imyaka apepi na 500, baYesu nabo balitatikile umulimo uupalileko. Na cine, baYesu balishibikilwe ati basambishi. (Yoane 13:13) Balukusambisha abantu abakuti ubwingi. Nakabili balukusambisha ne muntu umo umo. Pa mpindi imo, baYesu balilabiile ilyashi ku bantu abakuti ubwingi ilishibikilwe ati Ilyashi lya pa Lupili. Pa kushila kwa lili ilyashi, “amabumba abantu alikankamene lukoso ku busambishi bwabo.” (Matayo 5:1, 2; 7:28) Pa mpindi imbi mu 33 C.E., baYesu balukwambaala ne basambile babo babili abalukuya ku mushi uwali apepi na Jelusalemi. Ili balukwenda nabo mu nshila, ‘balukubabuulishisha amalembo.’—Luke 24:13-15, 27, 32.

Abasambile ba baYesu nabo bali basambishi ba Mashiwi abaLesa. Pa mpindi imo, umuntu umo uwa ku Etiopia alukupenda iciputusha cimo ica mu Malembo. Filipo, umusambile wa baYesu, alipalamine kuli ye ne kumwipusha ati: “Uliishibishe ifyo ifi ulukupenda?” Uyu umuntu alimwasukile Filipo ati: “Njishibe shani ne wakubulo’muntu wa kumbulishishako?” Eli pano Filipo amubuulishishe ifi alukupenda.—Ifyacitilwe 8:27-35.

Koti ni baabo abalukubuulishisha ne kusambisha ifilembelwe mu Baibolo, Bamboni sha BaYawe balasambisha abantu Baibolo mu fyalo 239. (Matayo 28:19, 20) Umulungu ne mulungu, balofwako abantu ukucila pali 9 milyoni ukumfwisha Baibolo. Abengi pali baba abasambilila Baibolo tabaalipo baKlistu pa kutanga. Ili balukusambilila, tabalipilapo kabili balasambilila pa mipunda pabo neli pa mipunda imbi yeyo batemenwe. Bambi balasalululapo ukusambilila pa foni, kompyuta neli ukupyungisha ifyakupangapanga fimbi.

Twamukombeteleni ukwipusha Bamboni sha BaYawe ukumofweniko ukubona ifi mungabwenamo mu kusambilila Baibolo. Mukasangana ati Baibolo libuuku ili mungomfwisha, kabili ati Amalembo onse “alielelwe ukusambisha, ne kucenjesha, ne kulunjika, ne kufunda ukulungeme,” pakweba’ti ‘mulukuli abawaminine, abakonshiwe lukoso ukulukucite’milimo yonse iweme.’—2 Timote 3:16, 17.