BAYAWE ni baLesa abatemenwe ukupeela. (Jakobo 1:17) Iyi imibelo ya baLesa iya kupeela ilabwenekela muli fyefyo baalengele. Baalilengele utubangabanga mwiulu kabili baalilengelele ne fiti ifingi kabili ifyakuti ubune.—Amasamo 65:12, 13; 147:7, 8; 148:3, 4.

Uwalembele Amasamo 104 alukutoota pa bulengeshi bwa baYawe bonse. Pakuti pali fyefyo alilembele ulwimbo lwa kubalemya. Ili mwapenda ulu ulwimbo, kani na mwebo mulomfwa koti ni fyefyo uyu umwimbishi wa masamo alukumfwa? Alilabiile ati: “Nkalukubembila baYawe inshiku sha mweo wanji shonse: Nkalukubembila baLesa banji ukulukubacindika ili ncili ne mweo.” (Amasa. 104:33) Kani na mwebo mungatemwa ukucita fyopele’fyo?

Pakuti baYawe ni baLesa abapeela, balafwaya na fwebo ukulukupeela. Nakabili balatubuula ne mulandu twelelwe ukulukupeelela. Baalibuulile Paulu ukulemba ati: “Ulukubafunda abo ababile pa mpindi ino iya bukumo ati belitota, bepemamo mu kukanika kwa maboni, sombi nga balukupemamo muli baLesa ba mweo, abatupele’fintu fyonse ne bupe ati tusangalale nafyo. Nga balukucite’fiweme ati bakafule mu milimo iweme, ati bakabe ne mitima ya bupe, bakubaabanishisha bambi; ne kulukulibicila ica kwibacilapo iciweme pakuti pa mpindi ikesa, ati bakekatishe umweo uwa cine.”—1 Timote 6:17-19.

Mu nkalata yakwe Paulu iya bushibili yeyo alembeele abaKolinto, alilabiile pa celelwe ukutulengesha ukupeelako bambi. Alilabiile ati: “Abantu bonse nga apele koti ni fyopele’fyo ifi alandakanya mu mutima wakwe, ne nsoni teko, neli ni pakuti pa kupanjilwa koku; pakuti baLesa balatemwa umuntu upela ne mutima wakwe wonse.” (2 AbaKolinto 9:7) Kani ni bani tofwako ili tulukupeela? Paulu alilabile ati tulofwako bambi kani tulukubapeelako ifi balukupengela. Pano na fwebene tulabwenamo ni pakuti baYawe balatushukisha ili tulukucite’fyo.—2 AbaKolinto 9:11-14.

Nakabili, ukulosha ku cilangisha ati baLesa bali ne mutima wa kupeela, Paulu alilabiile ati: “BaLesa babe ne kutotwa pakuti pa mpese yabo iya kukankamana.” (2 AbaKolinto 9:15) “Pa mpese” ya baYawe pali ne fintu fyonse ifiweme ifi batupeela ukupitila muli baYesu Klistu. Icine, amashiwi tekuti abuulishishepo ifi iyi impese icindeme.

Kani tungalangisha shani ati tulatoota pali fyefyo baYawe na baYesu batucitiile na fyefyo bakatucitila? Inshila imo yeyo tungalangishishamo ati tuli ne mutima wa kupeela kupitila mu kupyungisha impindi yesu, amakosa esu, ne maboni esu mu kupempela baYawe ne kofwako bambi ukusambilila pali baYawe. Tungacite’fyo nangaba’ti tuli ne fingi neli ifinini.—1 Ifyebo 22:14; 29:3-5; Luku 21:1-4.