Koku. Bamboni sha baYawe balisumine ati baLesa e balengeshi ba fintu fyonse. Pano tatusuminepo ati icalo calilengelwe mu nshiku 6 kabili ati caikala lukoso imyaka imyanda iinini. Mba nindo? Nipakuti ici cisambisho cilipuseneko na fyefyo Baibolo ilabila. Langulukeni pali fifi ifyakubwenako fibili:

1. Ubukulu bwa nshiku 6 shesho baLesa bapangilemo icalo. Abasumine ati icalo calilengelwe mu nshiku 6 balalabila ati shilye nshiku shali lukoso sha maawala 24. Pano ishiwi “akasuba” mu Baibolo lilemakaninako iciputusha ca mpimdi iikulu makosa.—Ifyakutaŋga 2:4; Amasamo 90:4.

2. Imyaka icalo ciikele. Abasumine mu kweba ati icalo calilengelwe mu nshiku 6 balasambisha ati icalo cilikeele lukoso imyanda ya myaka iinini. Nangabefyo, Baibolo ilasambisha ati, icalo ne maulu eko fyali ili inshiku 6 ishi baLesa bapangilemo icalo tashingatatika. (Ifyakutaŋga 1:1) Pakuti pali fyefyo, Bamboni sha baYawe balasumunishako kuli fyefyo basayantisti basangile ati icalo cipale cilikele amabilyoni amyaka.

Nangaba’ti Bamboni sha baYawe balisumine ati ifintu fyonse fyalilengelwe lukoso, tatukanapo fyonse ifi basayantisti balabila. Tulisumune ati Baibolo na sayansi mpindi shimbi filasuminanshanya.