Pakuti pa milandu iyakonkapo, Bamboni sha BaYawe tabayapo mukulwa inkondo:

1. Ukumfwila BaLesa. Baibolo ilalabila pa bapyungishi ba baLesa ati “impoko shabo bakashikunka ati shibe mase” neli kusambilile’nkondo libili baba.”—Yisaya 2:4.

2. Ukumfwila BaYesu. Umusambile Petilo balimubuulile kuli baYesu ati: “Someka impoko yobe umu iikala, pakuti bonse abakusomone’mpoko bakafwa ku mpoko.” (Matayo 26:52) BaYesu pano balukubuulishisha ati abapyungishi babo tabaelelwepo ukupinda ifyakulwilako fya nkondo.

   Abasambile ba baYesu balyumfwilile ukukomeka kwa baYesu ukwakubula ukuba ‘aba pa calo ca panshi’ pakubula ukubuulamo akabeya mu mapolitiki amu calo. (Yoane 17:16) Tabalibikamo mu fyakupikisha mu fya bashilikani neli ukukaanya abo abasalululapo ukucite’fyo.

3. Ukutemwa abantu bambi. BaYesu balibuulile abasambile babo “ukulukutemwanshanya.” (Yoane 13:34, 35) Namulifyefyo balaba banabankashi ukushinguluka icalo conse mumo tapapo uwamuli babo uungabalamune’nkondo ku mukwabo umwanakashi neli umwalalume.—1 Yoane 3:10-12.

4. Icakubwenako ca baKlistu bakutanga. Ibuuku lya The Encyclopedia of Religion and War lilalabila ati: “Abasambile ba baKlistu abakutanga balukukaana ukulibika mu nkondo neli ukwingila ubushilikani,” ni pakuti balishibile ati ukucita ifyakube’fyo “kwalipuseeneko na fyefyo baYesu balabile ati ukwakutemwa abapate besu.” Koti ni fyefyo umuntu usambilile makosa pa fya baLesa uwa German uwe shina lya Peter Meinhold alilabile pa basambile ba baYesu abakutanga ati: “Ukuba umuKlistu ne kuba umushilikani fintu fibili ifitafyalukumfwanapo.”

Bamboni sha BaYawe bantu abapyungisha makosa mu bwikashi kabili tabaletapo ifyakukatasha neli fimo ku bantu neli mu calo bekala. Tulapeela abekalishi ubuleme, koti ni fyefyo Baibolo ilabila:

• “Abantu bonse ngabakomekwe ku bukulu bubekalika.”—AbaLoma 13:1.

• “Mu bapeele lomba ba Kaisa ifintu fya baKaisa, ne ku bapeela baLesa ifintu fya baLesa.”—Matayo 22:21.

Namulifyefyo, tulomfwila amafunde, tulalipila imisonko, tulapyungila pamo ne bekalika pa kuwamyako amekalilo abantu.