Ubufi: Umulandu Bamboni sha BaYawe tabasefeshapo Icilishimishi ni pakuti tabacetekelepo muli baYesu.

Icine: Tuli baKlistu. Tulicetekele ati ukupuluka kukeshila lukoso ukupitila muli baYesu Klistu.—Ifyacitilwe 4:12.

Ubufi: Mulapaatulula icisoolo cenu pa kulukusambisha aba mwi kelesha ati tabelelwe ukusefya Icilishimishi.

Icine: Tulabikako makosa akalango ku fisoolo, kabili tulapyungisha Baibolo pa kofwako ifisoolo ati fibe ifikosele pakweba ati tafipatulukile.

Ubufi: Mulapuswako ku mupashi wa pa Cilishimishi uwa kupeela, umutende pa calo, ne kweba ati ifintu filukwenda bwino ku bantu bonse.

Icine: Tulesha ne makosa ukulukupeelako bambi cila kasuba kabili ukuba abamutende lyonse lukoso. (Ifisimpi 11:25; AbaLoma 12:18) Ku cakubwenako, inshila tubunganinamo ne kutulisha filipalene na fyefyo baYesu balabiile ati “Mwalukupoka lukoso, ka mulukupeela lukoso.” (Matayo 10:8) Ukulunda pali fyefyo, tulabiika makosa akalango ku Bufumu bwa baLesa ukweba ati ekungaleta umutende pa calo.—Matayo 10:7.

• BaYesu balikomekele ati tulukusefya lukoso imfwa yabo, talipo kufyalwa kwabo.—Luku 22:19, 20.

• Intangishi ne basambile ba baYesu aba kutanga tabalukusefyapo Icilishimishi. Ibuuku lya The New Catholic Encyclopedia lilalabila ati “ukusefya kwalitatikile cipale panuma ya 243 [C.E.],” ili abasambile bakupelako bafwile.

• Kabili tapalipo ifyebo fya cinenene ifibuulishisha ati baYesu balifyelwe pa December 25; akasuba kabo akakufyalwa takalembelelwepo mu Baibolo.

• Tulicetekele ati Icilishimishi tacifuminepo kuli baLesa ni pakuti cilifumine kuli babo abalukupempela ukupempela kwa bufi.—2 AbaKolinto 6:17.

Abengi balasefyako Icilishimishi nangaba ati balishi ati cilifumine ku kupempela kwa bufi kabili nangaba ati balishi ati Baibolo tailabilepo pa Cilishimishi. Abantu bakube’fyo bangepusha ati: Mba nindo abaKlistu bangakoselapo lukoso ati tabelelwepo ukusefya Icilishimishi? Mba nindo Icilishimishi cibelele umulandu uukulu?

Baibolo ilatukoselesha ukulukulangulukapo fwebene pa fintu fyakube’fi, ukupyungisha amakosa esu aakwalakanya pa fintu. (AbaLoma 12:1, 2) Ilatusambisha ukucindamika icine. (Yoane 4:23, 24) Popele nangaba ati tulabikako akalango kuli fyefyo bambi batubona, tulabika makosa kuli fyefyo Baibolo ilabila nangaba ati abantu tabatwishibilepo.

Nangaba ati tulasalululapo ukubula ukusefyako Icilishimishi fwe bene, tulacindikisha makosa ukusalululapo kwa muntu umo umo pali fyefyo asalululapo umwine. Tatufulunganyapo fyefyo abantu abene balukufwaya ukusefya Icilishimishi.