Inya, Bamboni sha BaYawe impindi ishingi balofweleshako ili kwaba ifyakukatasha. Tulofweleshako ifilukupengelwa kuli Bamboni sha BaYawe nakuli baabo abatabali ni Bamboni, koti nifyefyo Baibolo itubuula ukucita pa BaGalatya 6:10 apalabila ati: “Ngatulukucita ifiweme ku bantu bonse, tanje cine kuli babo aba mu cikoto ca kucetekela.” Tulesha ne makosa esu onse ukofwako abantu kuli fyefyo balukulanguluka na ku fya baLesa fyefyo abantu bapengela ili kwaba ifyakukatasha.—2 AbaKolinto 1:3, 4.

Panuma ili kwaba ifyakukatasha, abakulu ba mwi kelesha mu mupunda umwaba ifyakukatasha balesha ukwishiba kani bonse abali muli lyelyo ikelesha balabi kabili bali lukoso bwino kabili ne kwishiba kani pali ifi balukupengela ukofwewa. Kabili abakulu ba mwi kelesha balatumina ku maofeshi Abamboni sha BaYawe.

Kani ifilukupengelwa fyafulisha ukucila fyefyo ikelesha lingakumanisha, Ibumba Ilitangilila ilya Bamboni sha BaYawe balanshika ukutuma ifilukupengelwa. Ici cilipalene na fyefyo abaKlistu bakutanga balakucita kuli umo umo ili kwalukuba insala. (1 AbaKolinto 16:1-4) Amaofeshi amutano akwenko’ko ukwacitika amakatasho balasalulula abakofwako ilikwaba ifyakukatasha (Disaster Relief Committees) pakweba ati bangekatanya bwino ne kupyunga imilimo. Bamboni sha BaYawe mu mipunda imbi balalipeelesha ukupyungisha impindi ne fikwatwa fyabo pakweba ati nabo bangofwako.—Ifisimpi 17:17.

Umulandu umbi indalama ishipeelwe mukulitemenwa shipyungishiwa shesho ishitumwa ku maofeshi Abamboni sha BaYawe kofwako abaponenwa ne fyakukatasha. (Ifyacitilwe 11:27-30; 2 AbaKolinto 8:13-15) Pakuti umulimo ulapyungishiwa ne bakulitemenwa abatabafolapo, indalama ishitumwa shilapyunga kuli fyefyo ifilukupengelwa kuli babo abali ne makatasho, talipo ni kulibabo abalukwangalila. Tulapyungisha bwino impese shonse ishipeelwa.—2 AbaKolinto 8:20.