Ukwanshika kwa bukumo ukwa Bamboni sha baYawe kwalitatikile kukushila kwa ba1900. Pali ilya impindi, ibumba ilinini ilya Basambile ba Baibolo abalukwikala apepi na mu Pittsburgh, Pennsylvania, mu United States, balitatikile ukusalala Baibolo. Bakulukupalanya fyefyo amapempelo alukusambisha na fyefyo Baibolo isambisha mu cinenene. Ifi balukusambilila balitatikile ukufilemba mu mabuuku, inyunshipepela, na makashini iitwa bukumo ati Ulupungu lwa kwa Kalinda—Ulusabankanya Ubufumu bwa kwa Yehova.

Pali liliya ibumba pali umwalalume uwalukwitwa ati Charles Taze Russell. Nangaba’ti Russell pali ilya mpindi ewalukutangilila umulimo wa kutulisha kabili ewali umulembeshi wa kutanga uwa Ulupungu lwa kwa Kalinda, talipo ewatatikile uku kupempela. Ici Russell ne basambile ba Baibolo bambi balukufwaisha, calishibikilwe bwino, kukusha ubusambishi bwa ba Yesu Klistu ne kulonda ifi abaKlistu bakutanga balukucita. Pakuti baYesu e batatikile ubuKlistu, penka tulababona ati e batatikile ukupempela kwesu.—AbaKolosai 1:18-20.