Hues du schonn e léiwe Mënsch duerch den Doud verluer? An esou enger schwéierer Zäit frees du dech vläicht: „Wat geschitt nom Doud? Kann ech dës léif Persoun eng Kéier erëmgesinn?“ D’Äntwerten aus der Bibel ginn engem echten Trouscht.

1. A wéi engem Zoustand sinn déi Doudeg?

Jesus huet den Doud mat engem déiwe Schlof verglach. Wann een déif schléift, kritt een net mat, wat ronderëm ee geschitt. Esou ass et och beim Doud. Wann ee gestuerwen ass, spiert ee keng Péng a kee Leed méi. D’Bibel seet: „Déi Doudeg wësse guer näischt.“ (Lies Prediger 9:5.)

2. Firwat ass et gutt ze wëssen, wat nom Doud geschitt?

Vill Mënschen hunn Angscht virum Doud an och virun den Doudegen. Wat an der Bibel iwwer den Doud steet, kann engem d’Angscht huelen. Jesus sot: „D’Wouerecht mécht iech fräi“ (Johannes 8:32). Vill Relioune léieren, datt de Mënsch eng onstierflech Séil huet, déi nom Doud weiderlieft. D’Bibel léiert dat net. Si seet, datt déi Doudeg näischt matkréien. Also leiden si net a schueden och kengem. Dofir musse mir och net fir déi Doudeg bieden oder besonnesch Bräich anhalen, fir si ze veréieren.

Muncher behaapten, et kéint ee mat den Doudege schwätzen. Awer dat ass onméiglech, well „déi Doudeg wësse guer näischt“. Déi, déi mengen si kéinte mat Verstuerwene schwätzen, schwätzen a Wierklechkeet vläicht mat Dämonen, déi virtäuschen, déi Verstuerwen ze sinn. Wann een also d’Wouerecht iwwer den Zoustand vun den Doudege kennt, da schützt dat ee virun den Dämonen. Jehova seet, mir sollen net mat den Doudege schwätzen, well hie weess, datt de Kontakt mat Dämonen eis schuet (5. Mose 18:10-12).

3. D’Wouerecht iwwer den Zoustand vun den Doudegen

Mënschen op der ganzer Welt hunn déi ënnerschiddlechst Virstellungen, wat nom Doud geschitt. Awer natierlech kënnen déi net all richteg sinn.

• Wat gleewen d’Leit an denger Géigend, wat mat den Doudegen ass?

 4. D’Wouerecht iwwer den Doud befreit vu falsche Virstellungen

Ze wëssen, wat nom Doud geschitt, hëlt eis d’Angscht virun den Doudegen. Prediger 9:10 liesen. Dozou dës Fro:

• Kënnen déi Doudeg eis schueden?

D’Wouerecht aus der Bibel befreit eis vun der Ligen, datt een déi Doudeg veréiere muss. Jesaja 8:19 an Offenbarung 4:11 liesen. Dozou dës Fro:

• Wat mengs du, wéi et Jehova beréiert, wann een déi Doudeg veréiert oder si ëm Hëllef freet?

5. D’Wouerecht iwwer den Doud befreit vun Ängschten

Vill Leit goufe geléiert, datt si nom Doud bestrooft ginn, wann si am Liewe Schlechtes maachen. Et berouegt awer ze wëssen, datt keen nom Doud gequäält gëtt, och keen, dee vill Schlechtes gemaach huet. Römer 6:7 liesen. Dozou dës Fro:

• Gëtt een nom Doud fir Feeler bestrooft, déi een am Liewe gemaach huet?

Wie Jehova kennt, dee weess, datt Jehova een nimools quäle géif. 5. Mose 32:4 an 1. Johannes 4:8 liesen. Dozou dës Froen:

• Géif esou e Gott zouloossen, datt Mënschen nom Doud gequäält ginn?

• Berouegt et dech ze wëssen, wat d’Bibel iwwer den Doud seet? Firwat?

 FAZIT

Wann ee stierft, dann existéiert een net méi. Déi Doudeg leiden net an si kënnen och kengem schueden.

Réckbléck

• Wat geschitt nom Doud?

• Wat hu mir dovun, d’Wouerecht iwwer den Doud ze kennen?

• Firwat ass et berouegend, d’Wouerecht iwwer den Doud ze kennen?