Ngano nti monaka ku mutima bu wâka ntêlo ya “nzabukusu (apocalypse)”? Lendi banza katastrofe yibâ ya mu nza, kampe yisukisa luzingu ha mutoto. Bantu bakaka bakwikilaka ti nza ku mfukulu yita kwenda, nsungula bu batangaka misamu ntiana mita landa:

•   “Guerre nucléaire—ni bu sa ti Nzambi tulumuna yo, buzoba bwa bantu peleko ngwisani ya mbi—mbo yitulumuka.”—Bulletin of the Atomic Scientists.

•   “Mu mivu miayôkele, bitembo bia ngolo tamweni mu nza yayansoni, tiya twa masangi, yaninga dia nzitukulu na niamba. Mibu mpe miatomono beba.”—National Geographic.

•   “Yungi dia makonko ma ku Afrique diayôkele dia mivu miayôkele.”—The Associated Press.”—The Associated Press.

 Ngano katastrofe yimwangasa nza? Ngano Bibila bwe ditâka?

 Kâni. Zu dia Nzambi, Bibila, ditutêlele ti mutoto mbo wuzinga mankululu. (Ekleziaste 1:4) Kani kafukisa mutoto wu kayirika, Nzambi “mbo kafukisa bô bebesaka mutoto.”—Nzabukusu 11:18.

 Bibila ditâka ti “nza” yifuka, ni nza ya bantu balembo zoloko Nzambi mpe bê na bwimi. Ntiana mu bilumbu bia Noa, Nzambi mbo kasukisa “nza ya bantu ba mbi.”—2 Piere 2:5; 3:7.

 Ntiana bu tâka 1 Za 2:17, “nza yôka yita yôka na nsatu zandi.” Verse yo yisongele ti Nzambi mbo kafukisa, bantu basarilaka nsatu zawu za mbi, ka mutoto’â ko.

 Bibila ka ditomo’â tâka ko nsuka ntia ntangu yitûla. (Matie 24:36) Kâ, ditusongele ti nsuka yeka penepene. Bibila diatitêla misamu mita landa:

•   Misamu ntiana mizingu, nsatu, epidemi na midikutulu mia mutoto mbo miaketi yilama “mu mbuka za mpila na mpila.”—Matie 24:3, 7, 14; Like 21:10, 11; Nzabukusu 6:1-8.

•   Bantu babîngi mbo baketi bâ na bwimi bwa yôka. Mu tifwani, mbo baketi bâ na “luzolo lwa mbongo,” “lukokoto,” na “kondo kwa tiyimina.”—2 Timote 3:1-5.

 Bantu babingi batambulaka mu tâ ti tûka 1914, misamu mia mu nza midelakane na mi zonzelaka Bibila, mpe nsuka yeka penepene. Mu zaba nsangu zakaka, tala mutu-diambu wa “Ngano ntangu ya mu Bibila bwe yitâka mu muvu wa 1914?” na wa “Ngano tidimbu tia “bilumbu bia mansukina,” peleko “ntangu za mansukina” ni nti?”

 Ntêlo ya Greke yi babangula mu “nzabukusu” mu Bibila yizololo tâ “dzukula” peleko “zabikisa.” Vula-vula, ntêlo yo misamu mia swekama mi bazabikisi yizonzelaka. Bibila “nzabukusu [peleko apocalypse] ya Mfumu Yezu” dizonzelaka, yiyilama mu ntangu Yezu yi kazabakana ntiana wô we na lenda dia katula misamu mia mbi ha mutoto, na mu hana musendo kwe bô basarilaka Nzambi.—2 Bisi-Tesalonike 1:6, 7; 1 Piere 1:7, 13.

 Mukanda wa mansukina wa Bibila batâka wo Apocalypse peleko Nzabukusu, mu bungu ti misamu mia ku matu wuzabikisaka. (Nzabukusu 1:1) Mu mukanda wango nsangu za mbote ze mô na nsangu za tivuvu. (Nzabukusu 1:3) Mukanda wo wusongele mpe ti Nzambi mbo katitula mutoto mu paradi. Buna, bantu ka bavutu’â timuka ko, mpasi mbo ziwâ, mpe lufwa mbo luzimbakana.—Nzabukusu 21:3, 4.

 Ngano zololo watomo zaba makani ma nzitukulu ma Bibila? Mbangi za Yehova ndongokolo ya Bibila ya ofele zihanaka yilendi ku bakisa. Mu bungu dia nti lembo ba têla mbila bwawu bu?