BÊNO NA MESO MA TIA!
Basiantifike bazonzele ntangu ya nsuka ya nza—Bibila bwe ditâka?
Mu tilumbu tia 24 janvier 2023, basiantifike batêle ti ntangu ya nsuka ya nza a yeka penepene.
“‘Nsuka ya nza,’ yimonekesaka mfukulu ya bantu bawu beni, yayizi bâ penepene. Mu tilumbu tia mardi, basiantifike bayizi tia pusa penpene na minuit, mu bungu dia misamu ntiana muzingu wa ku Ukraine, nkwamusu za bombes atomiques, na nsobolo za climat.”—AFP International Text Wire.
“Basiantike batêle ti mardi, nsuka ya nza yayizi bâ penepene na minuit—nkatika penepene na armagedo.”—ABC News.
“Tikunku timosi tia basiantifike batêle ti bwawu bu nsuka ya nza nkatika penpene yena yôka mu ntama.”—The Guardian.
Ngano nsuka ya bantu na mutoto yeka penepene? Ngano tufweti tîna misamu mia bilumbu bita kwiza? Bibila bwe ditâka?
Nti bitûla ku matu
Mu mabanza ma Bibila, “mutoto ntangu zazansoni wuzingila” mpe bantu “mbo bazinga mankululu ha mutoto.” (Ekleziaste 1:4; Mikunga 37:29) Buna, bantu ka bafukisa mutoto ko, peleko ka basa ko ti luzingu lwasuka ha mutoto.
Kâ, Bibila nsuka yimosi dizonzelaka. Mu tifwani, Bibila ditâka ti “nza yôka yita yôka.”—1 Za 2:17.
Mu dzukula nti Bibila dizolo tâka bu dizonzelaka nsuka ya nza, tanga mutu-diambu wa “Ngano nza ku nsuka yita kwenda? Ngano Nzabukusu ni nti?”
Mu zaba nti Bibila ditâka mu ntangu yi lunganaka misamu mia nza, tanga mutu-diambu wa “Nsuka ya nza ntia ntangu yitûla?”
Tatamana mu bâ na mabanza ma mbote
Bibila dilendi tu bakisa mu bâ na mabanza ma mbote ntono misamu mia bwawu bu mu nza. Ngano bwe?
Bibila malongi ma mbote dituhanaka. (2 Timote 3:16, 17) Mu tifwani, tanga mutu-diambu wa “Bwe lendi telamana lwaka” mu zaba bwe Bibila dilendi ku bakisila mu tatamana mu bâ na mabanza ma mbote ntono nkwamusu.
Bibila nkatika tivuvu dihanaka mu bungu dia bilumbu bita kwiza. (Bisi-Rome 15:4) Bibila beto ditomo têlaka nti tulendi kekolo bwawu bu na mu bungu dia bilumbu bita kwiza, mpe nti bitubakisaka mu bâ na lukwikulu ntono misamu mia nza.
Mu baka ndandu ziyôkele mu Bibila, tukulombele mu yêla ndongokolo ya Bibila ma mulongi lumbu ti.
a “Nsuka ya nza, mabanza mena malwengesaka bantu ti mutoto tuta bebesa beto beni mu teknolozi za mbi zi tuta yirika. Tifwani tiena, lubambu lwa misamu mi tufweti telamana tala ti tuzololo tavuka mu musamu mitûrila mutoto.”—Bulletin of the Atomic Scientists.